GULEʼ lu iza 1934. Bixhozeʼ láʼ Fred Molohan ne jñaaʼ Edna Molohan, ne dxi guleʼ maʼ zinécabe gande iza de nácacabe Binni Ruundaʼ Biblia (testigu stiʼ Jiobá). Rudieeʼ xquíxepeʼ laacabe purtiʼ bisiidicabe naa gannaxhieeʼ Dios. Gulézadu Parsons, ti guidxihuiiniʼ ni riaana ladu sureste stiʼ guidxi Kansas. Ne guyuʼdu ti congregación ra casi guiráʼ ca hermanu que ungidu laacaʼ. Qué riaʼdxadu nin ti reunión ne gatigá riguni predicardu Stiidxaʼ Dios. Ne casi guiráʼ ca sábadu huadxí riguni predicardu lu calle, ni yanna runibiaʼnu casi predicación pública. Nuu biaje guizáʼ ridxágadu, peru despué de predicación runi invitar bixhozeʼ laadu ti nieve.

Naroʼbaʼ territorio gúpadu peru nahuiiniʼ congregación stidu ne lu territorio que guyuu stale guidxihuiiniʼ ne stale ranchuhuiiniʼ ni nuu gaxha de ra nabézadu. Ora rusaananedu ca binni ni nabeza ndaaniʼ ca ranchuhuiiniʼ que ti publicación la? rudiicabe laadu dxita, verdura ne bere, ricaadu cani ne riguʼdu cani ndaaniʼ cajuela stiʼ carru ni zinedu. Cumu qué gápadu stale bueltu ne maʼ bidii bixhozeʼ donación pur ca publicación que la? ruchaagadu cani rudiicabe laadu que xcaadxi cosa ni nápadu para guidoʼdo.

Gupa bixhozeʼ ne jñaaʼ ti gramófono, ne biquiiñecabe ni para guni predicárcabe. Cumu nahuiineʼ la? qué ñanda niquiiñeʼ ni, peru riuuladxeʼ gacaniáʼ laacabe guxhídxidu ca discursu stiʼ hermanu Rutherford ora rigúnidu revisita ne estudiu.

Gupa bixhozeʼ ti carru Ford de iza 1936 ne bidxiibabe ti bocina ique ni. Guizáʼ biquiiñedu ni para biʼniʼ predicardu. Ni nabé bínidu nga, primeru riguʼdu música para guidxiña binni ra nuudu ne despué maʼ ruxhídxidu ti discursu. Ora riluxe ni la? rudiʼdu publicación ca binni ni riuulaʼdxiʼ guiziidiʼ.

 Ndaaniʼ guidxi Kansas nuu ti guidxihuiiniʼ láʼ Cherryvale, raqué gudxi ti puliciá bixhozeʼ cadi guxhidxi ca grabación que ra parque, ra rié stale binni guiráʼ domingu para guiziilaʼdxiʼ. Peru gudxi puliciá que laabe zanda guxhídxibe ca grabación que fuera de ra parque. Ngue runi bizuubabe diidxaʼ ne bizuhuaabe carru que ndaaniʼ calle nuu gaxha de ra parque que. Ne raqué bixhídxibe grabación que sti biaje para gucaadiaga binni ca discursu que. Guizáʼ riuuladxeʼ chiguneʼ predicarniáʼ bixhozeʼ ne bicheʼ Jerry ca lugar que.

Dxi mayaca ganda iza 1940, biʼniʼ participardu lu ti campaña de predicación ni binibiáʼcabe casi «campaña relámpago» para guni predicardu ca territorio ra huaxiéʼ riná binni gucaadiaga. Casi bizeeteʼ ra bizulunu que, riásadu nacándaruʼ para gusaanadu tratadu ne revista xaʼnaʼ ca puertaʼ stiʼ ca yoo ni nuu ndaaniʼ guidxi Joplin (Misuri). Ora maʼ bilúxedu la? raca reunirdu fuera de guidxi que para guidúʼyadu pa cadi málasi gunaazeʼ pulicia tuuxa hermanu.

Dxiqué la? gucanedu lu sti faceta de predicación ni binibiaʼdu casi marcha de información. Rugaandadu caadxi letreru lu xíʼquedu, rúnidu ti fila ne rizadu ndaaniʼ ca guidxi que ti guʼyaʼ binni ca letreru stiʼ Reinu zinedu que. Rietenalaʼdxeʼ dxi guca tobi de ca marcha riʼ ndaaniʼ guidxi ra nabezaʼ. Ziné ca hermanu que ti cartel ni ná «Ti trampa ca religión ca ne rusiguiicaʼ binni». Bireecabe de ra lídxidu ne guzácabe jma de ti kilómetru arondaʼ ne despué biguétacabe. Ni galán nga qué nidxaaga ca hermanu que nin ti binni nucaalú laacaʼ, peru stale binni bidxiguetalú ne biiyadxí laacabe.

Cumu nabézadu Kansas la? nabé biʼniʼ viajar familia stinneʼ Texas para chuudu asamblea. Biʼniʼ bixhozeʼ dxiiñaʼ para ti compañiá de ferrocarril ni riné binni Misuri, Kansas ne Texas, ngue runi ora rigánnadu familia stidu ne riuudu asamblea la? qué riguíxedu. Napa jñaaʼ ti bizaʼnaʼ ni jma huaniisi que laa ni láʼ Fred Wismar, ne xheelabe Eulalie, gulézacabe ndaaniʼ guidxi Temple (Texas). Lu ca primé iza ruzulú siglu 20, dxi naca stiuaʼ riʼ joven la? biziidiʼ de Jiobá ne guyuunisa, byuíʼnebe ca bizáʼnabe cani caziidibe ne tobi de laacabe nga jñaaʼ. Binibiáʼ ca hermanu de guidxi Texas laabe, purtiʼ gúcabe siervu de zona, ni yanna runibiaʼnu casi superintendente de circuito. Guizáʼ galán runi sentirdu chuʼdu gaxha de laabe purtiʼ nacháʼhuibe ne nabé alegre laabe. Guizáʼ riuuláʼdxibe gusiidibe ni dxandíʼ, ne nabé gucanebe naa dxi nacaʼ joven.

Lu tren guyuudu ti asamblea naroʼbaʼ ni guca San Luis (Misuri), lu iza 1941. Biʼniʼ invitárcabe guiráʼ xcuidihuiiniʼ ne ca joven para cuidu ti lugar ra maʼ gulícabe para gucaʼdiágadu ti discursu chigudii hermanu Rutherford ni láʼ «Hijos del Rey». Jma de quince mil xcuidihuiiniʼ ne joven bicaadiaga discursu que. Biluxe si ni la? guizáʼ bidxagayaadu ni biʼniʼ hermanu Rutherford né cani racané laa, bisigáʼdecaʼ laadu ti libru nacubi ni láʼ Hijos.

Lu beeu abril iza 1943, qué ziuu dxi guiaandaʼ naa gúpadu ti asamblea nahuiiniʼ ndaaniʼ guidxi Coffeyville (Kansas) ni biree láʼ «Llamada a la Acción». Lu asamblea que biete zuzulú zapa guiráʼ  ca congregación que ti reunión ni chiguiree lá Escuela del Ministerio Teocrático (Scuela stiʼ cani Rucheeche Diidxaʼ). Laaca guleecabe ti folletu ni napa 52 lección ni zaquiiñeʼ lu scuela riʼ. Nin qué nindaa, laaca lu iza ca bidieeʼ primé discursu stinneʼ lu scuela riʼ. Lu asamblea que guyuaanisaʼ né xcaadxi hermanu ndaaniʼ ti tanque ra daʼ nisa guizáʼ nagaʼndaʼ ni nuu ra ti ranchuhuiiniʼ. Qué ziuu dxi guiaandaʼ naa dxi ca.

Casi biluxeʼ secundaria la? lu iza 1951, gupa xidé guníʼ iqueʼ xi guneʼ né xquendanabaneʼ. Ni jma gucuaaʼ ique nga guneʼ servir Betel, ra biʼniʼ servir bicheʼ Jerry. Ngue runi nagueendaca biseendaʼ solicitud stinneʼ Brooklyn. Nin qué nindaa biʼniʼ invitárcabe naa ne bizuluáʼ bineʼ servir Betel 10 de marzo iza 1952. Guizáʼ gucané decisión que naa guiniiseʼ en sentidu espiritual.

Gulezaʼ ñuneʼ dxiiñaʼ ra imprenta para gacaniáʼ gaca imprimir revista ne xcaadxi publicación. Peru qué ñuneʼ dxiiñaʼ raqué purtiʼ biʼniʼ asignárcabe naa guneʼ dxiiñaʼ de meseru ne ra guzina. Guyuuladxeʼ dxiiñaʼ bineʼ raqué ne biziideʼ stale cosa. Ne cumu pur turnu bínidu dxiiñaʼ ra guzina la? gupaʼ tiempu para guneʼ estudiar ra biblioteca nuu Betel. Ndiʼ gucané naa jma gacaʼ xhamiguaʼ Jiobá, gaca fe stinneʼ naguidxi ne cadi gusaana de guneʼ dxiiñaʼ ni runeʼ Betel né stale gana. Biree Jerry Betel lu iza 1949, bichaganabe ti hermana lá Patricia, ne gulézacabe ndaaniʼ guidxi Brooklyn. Lu ca primé iza bineʼ servir Betel la? guizáʼ gucanécabe ne guluucabe gana naa.

Cadi tan xadxí de yendayaʼ Betel, ca hermanu que biiyacaʼ turuʼ laa zanda guseendacaʼ chigudii discursu. Lu iza que guca asignar ca hermanu riʼ chigudiicaʼ discursu ndaaniʼ ca congregación ni riaana biaʼ 322 kilómetru de Betel nuu Brooklyn. Rudiicabe ti discursu de ti hora ne riguni predicarnécabe ca hermanu que. Gulícabe naa para chigudieeʼ discursu. Dxi bizuluáʼ yeganna ne yegudieeʼ discursu ndaaniʼ ca congregación riʼ, guizáʼ guyuaaʼ nervioso. Stale biaje lu tren guyaaʼ. Rietenaládxeruaʼ ni bizaacaʼ ti huadxí lu inviernu iza 1954. Gucuaaʼ ti tren para chaaʼ Nueva York ne nindayaʼ Betel huaxhinni que. Peru málasi biaba ti tormenta de nieve ne ti bi nadipaʼ, ne tantu nagaʼndaʼ que la? dede guca feu ca motor stiʼ tren ra ziaaʼ que. Yendayaʼ ra estación que lunes biaʼ las cinco de la mañana. Nagueendaca gudxiʼbaʼ lu metru ne ziaacaʼ Brooklyn, ne casi yendayaʼ Betel la? guyaaʼ ra guzina ne bizuluáʼ bineʼ dxiiñaʼ. Maʼ huadxí yendayaʼ ne maʼ bidxagaʼ purtiʼ qué ñaseʼ guidubi gueelaʼ que. Peru neca bidxaagaluáʼ guiráʼ ca guendanagana riʼ la? qué zanda diʼ guchaaga ni né guendanayecheʼ ni runeʼ sentir ora rigacaniáʼ ne gaca xhamiguaʼ ca hermanu ni rigannaʼ ca fin de semana.

Lu ca primé iza bineʼ servir Betel la? biʼniʼ invitárcabe naa guneʼ dxiiñaʼ lu estación de radiu ni biree láʼ WBBR, ne para tiempu que guyuu estudiu stini lu guiropa pisu stiʼ edificu 124 ni nuu calle Columbia Heights. Lu radiu que gudiʼdiʼ ti programa ra runi estudiar ti grupu de hermanu Biblia guiráʼ semana. Naa nga tobi de ca hermanu ni guyuu lu grupu que, ne hermanu A. H. Macmillan nga ni ridiʼdiʼ lu ca programa ni riree lu WBBR, de cariñu rábidu laabe hermanu Mac. Stale iza biʼniʼ servirbe Betel, ne para cani nacubi la? gúcabe ti ejemplu galán purtiʼ qué nusaanabe de ñúnibe ni ná Jiobá.

Lu iza 1958, biʼniʼ invitárcabe naa gacaniáʼ ca hermanu ni rié Scuela stiʼ Galaad. Dxiiñaʼ ni gupaʼ nga gacaniáʼ ca misioneru ni deruʼ guca graduar de scuela que para gápacaʼ visa sticaʼ ne ganda chindacaʼ lugar ra guca asignarcaʼ. Cumu nabé caru para cheʼ binni lu avión tiempu que la? cadi guiráʼ ca misioneru que gunda guyecaʼ lu avión. Stale de ca hermanu ni guca asignar África ne ca guidxi riaana ladu este stiʼ continente de Asia guyecaʼ lu barcu ni riné carga. Peru ora biete preciu stiʼ ca boletu de avión que la? maʼ gunda biʼniʼ viajar ca misioneru que lu avión.

Lu iza 1960 bineʼ organizar caadxi viaje de avión para cheʼ ca hermanu de Estados Unidos  caadxi asamblea internacional ni chigaca Europa lu iza 1961. Ne naa guyaaʼ tobi de ca asamblea riʼ lu ti avión ra zeʼ xcaadxi hermanu ni biree de Nueva York ni zeʼ Hamburgo (Alemania). Despué de asamblea que la? naa ne xhonna betelita biʼniʼ alquilardu ti carru ne guyuudu Italia, yegánnadu ca hermanu de Betel ni nuu ndaaniʼ guidxi Roma. De raqué guyuudu Francia, gudíʼdidu lade ca dani ni runibiáʼcabe casi Pirineos ne yendadu España ra qué riná gobiernu guni predicar ca hermanu. Nayecheʼ guyuaaʼ purtiʼ binebiaʼyaʼ caadxi hermanu de Barcelona ne bidieeʼ laacabe caadxi publicación ni guluaaʼ ndaaniʼ ti bolsa de regalu. Ne de España guyuudu Ámsterdam ne de raqué biguétadu Nueva York.

Gudiʼdiʼ si biaʼ ti iza la? biguetaʼ biʼniʼ asignárcabe naa guneʼ organizar xcaadxi viaje lu guidubi guidxilayú para 583 representante ni cheʼ caadxi asamblea internacional. Asamblea que biree lani «Buenas Nuevas Eternas», ne guca ni lu iza 1963. Ca lugar ra guca ca asamblea riʼ nga Europa, Asia ne Pacífico sur, ne ca últimu asamblea que guca cani ndaaniʼ guidxi Honolulú (Hawái) ne Pasadena (California). Lu viaje ca laaca yegunibiáʼ ca representante riʼ ca guidxi ni riete lu Biblia casi guidxi Líbano ne Jordania ne gucané ni laacabe para biziidicabe jma de ca lugar ni ruzeeteʼ Biblia. Aparte de sidu boletu de avión ne guni reservadu hotel ra chiguiaana ca hermanu riʼ, laaca naquiiñeʼ cueedu visa stícabe purtiʼ nuu guidxi rinabaʼ ni.

Iza 1963 guca ni ti iza nabé especial para naa, purtiʼ bichaganaʼyaʼ ti hermana láʼ Lila Rogers ti 29 de junio, de gudxi Misuri laabe ne maʼ zinebe chonna iza de cayuni servirbe Betel. Ti semana despué de bichaganadu que, guyuʼdu ra zeʼ ti grupu de hermanu ni zeʼ ti viaje lu guidubi guidxilayú, ne guyuudu guidxi Grecia, Egipto ne Líbano. Ne ndaaniʼ guidxi Beirut gucuaadu ti avión ni yené laadu Jordania. Cumu rucueeza gobiernu dxiiñaʼ runi ca Testigu lugar que ne maca gúdxicabe laadu qué rudii gobiernu visa ca hermanu para chuʼcaʼ ndaaniʼ guidxi que la? guníʼ íquedu xi gúnidu ora chindadu raqué. Guizáʼ bidxagayaadu ora yendadu raqué ne bidúʼyadu zuhuaa ti grupu de hermanu ique yoo stiʼ aeropuerto que cabezacaʼ laadu ne naazecaʼ ti cartel ni ná: «Bienvenidu hermanu caʼ». Guizáʼ guyuuláʼdxidu guidúʼyadu ca guidxi ni riete lu Biblia: ca lugar ra guleza ca patriarca, ra biʼniʼ predicar Jesús ne ca apóstol stiʼ ne ra gudxi Jesús ca primé xpinni chinecaʼ stiidxaʼ Reinu ra nuu «irá binni guidxilayú» (Hech. 13:47).

Maʼ cincuenta y cinco iza de bichaganadu ne qué huasaana Lila de gacané naa lu guirá asignación ni maʼ bidiicabe naa. Stale biaje guyuudu España ne Portugal tiempu rucueeza gobiernu dxiiñaʼ stinu raqué. Guluʼdu gana ca hermanu stidu, yenedu publicación ra nuucaʼ ne xcaadxi cosa ni caquiiñecaʼ. Laaca yegánnadu caadxi hermanu ni deguyoo ndaaniʼ ti cuartel militar ni riaana ndaaniʼ guidxi Cádiz (España). Guizáʼ guyuaaʼ nayecheʼ purtiʼ gunda bineʼ animar laacabe dxi bidieeʼ ti discursu raqué.

Dede lu iza 1963 biʼniʼ asignarcabe naa guneʼ organizar asamblea internacional ndaaniʼ guidxi África, América Central, América del Sur, Australia,  Europa, Hawái, ca guidxi riaana ladu este stiʼ continente de Asia, Nueva Zelanda ne Puerto Rico. Naa ne Lila maʼ guyuudu stale asamblea ni qué ziuu dxi guiaandaʼ laadu, tobi de laacani nga ni guca ndaaniʼ guidxi Varsovia (Polonia) lu iza 1989. Stale hermanu de Rusia ngue nga primé asamblea guyecaʼ. Ne caadxi de cani binibiaʼdu que biteguyoo Unión Soviética laacaʼ stale iza pur ni runi crecaʼ.

Sti asignación ni guizáʼ riuuláʼdxidu gúnidu nga chigánnadu ca Yoo Betel ne ca misioneru ni nuu lu guidubi guidxilayú para cuʼdu gana laacaʼ. Lu últimu visita ni bínidu la? guyuudu Corea del Sur ne binibiaʼdu 50 hermanu ni deguyoo ndaaniʼ guidxi Suwon. Guiráʼ ca hermanu qué nápacaʼ ti actitud galán ne maʼ nuucaʼ guireecaʼ de ndaaniʼ cárcel que para gúnicaʼ xhiiñaʼ Jiobá. Guizáʼ galán experiencia gúpadu dxi binibiaʼdu laacabe purtiʼ guizáʼ biquídxicabe fe stidu (Rom. 1:11, 12).

Ra maʼ gudiʼdiʼ ca iza riʼ, maʼ biiyaʼ ximodo caroobaʼ xquidxi Dios. Dxi guyuaanisaʼ lu iza 1943, nácadu biaʼ chii mil publicador. Peru yanna maʼ nácanu jma de xhono millón de testigu stiʼ Jiobá ni runi xhiiñaʼ Jiobá ndaaniʼ 240 guidxi ne territorio. Ne caroobaʼ xquidxi Dios pur dxiiñaʼ nadipaʼ ni huayuni ca graduadu de Galaad. Nayecheʼ nuaaʼ purtiʼ lu ca iza ni maʼ gudiʼdiʼ ca huayanda huayacaniáʼ stale de ca hermanu riʼ para ganda chindacaʼ lugar ra guca asignarcaʼ.

Nayecheʼ nuaaʼ purtiʼ gudixheʼ iqueʼ guneʼ xhiiñaʼ Jiobá dxi nacaʼ joven ne pur bichayaʼ solicitud para guneʼ dxiiñaʼ Betel. Dede dxi que, qué huasaana Jiobá de uguu ndaayaʼ naa. Aparte de guiráʼ ca cosa galán ni maʼ huadídidu Betel la? naa ne Lila guizáʼ nuudu nayecheʼ pur guiráʼ ca iza huayuni servirdu ndaaniʼ ca congregación ni nuu Brooklyn ne pur maʼ nápadu stale amigu.

Cayúneruaʼ dxiiñaʼ Betel ne cayacané Lila naa. Maʼ napaʼ jma de 84 iza, peru rándaruʼ runeʼ dxiiñaʼ, runeʼ tender guiráʼ correspondecia ni reeda ra sucursal.

Guizáʼ sicarú nga gácaluʼ parte de organización stiʼ Jiobá ne gúʼyaluʼ ximodo cayaca cumplir ca diidxaʼ ni zeeda lu Malaquías 3:18 ni ná: «Laatu zabiguetaʼ zuuyatu maʼ gadxé nga ti binni runi ni jneza ne maʼ gadxé nga ti binni malu, zuuyatu tuu nga tobi ni runi ni ná Dios ne tuu nga ni qué runi ni nabe». Cada dxi tiidiʼ ridúʼyadu ximodo zinitilú guidxilayú stiʼ Binidxabaʼ ne pabiáʼ triste nabani binni purtiʼ qué gápacaʼ esperanza. Peru cani nadxiinu ne cani rúninu ni ná Jiobá nayecheʼ nabáninu neca cadxaagalunu guendanagana, purtiʼ nanna dxiichinu zaca cumplir guiráʼ ni maʼ bidii stiidxaʼ Jiobá. Nápanu ti privilegiu guizáʼ galán de chinenu ca diidxaʼ nacubi ne galán ra nuu binni (Mat. 24:14). Maʼ cadi candaa zunitilú gobiernu stiʼ Dios guidxilayú malu stiʼ Binidxabaʼ riʼ ne zuni guidxilayú riʼ ti paraísu. ¡Guizáʼ maʼ nuunu gaca ni maʼ gudixheʼ ique Dios! Ne dxi ca, de guiranu ca xpinni Dios maʼ qué zaca huaranu ne zabáninu ndaaniʼ Guidxilayú riʼ para siempre.