1, 2. a) Xiñee riuu chupa chonna xpinni Dios xizaa. (Biiyaʼ foto ni zeeda ra ruzulú tema riʼ). b) Xi zadúʼyanu lu tema riʼ.

CA DXI riʼ canazá Binidxabaʼ «casi ti lion ni canaguu beedxeʼ, canayubi tu uxuuxe» (1 Pedro 5:8; Apocalipsis 12:17). Pur laabe, guiranu raca estresarnu. Dede laanu, ca xpinni Dios, runiná ansiedad laanu. Ca xpinni Dios ni bibani dxiqué laaca guyuu ora guyuucaʼ xizaa. Lu Biblia rieeteʼ laaca guyuu rey David xizaa (Salmo 55:2). Ne apóstol Pablo guníʼ: «Nuaa xizaa pur irá cani ma bini cre Cristu» (2 Corintios 11:28). Peru, xi zanda gúninu pa cayuni sentirnu qué ganda guni controlarnu ansiedad stinu yaʼ.

² Bixhózenu ni nuu guibáʼ ni nadxii laanu, gucané ca xpinni ni bibani dxiqué, ne gudixhedxibe ladxidoʼcaʼ dxi nabé nuucaʼ xizaa. Ne ngaca nga nuu Jiobá guni pur laanu yanna. Biblia cayabi laanu gulaʼnu guiráʼ ni riguu xizaa laanu lu náʼ Jiobá, purtiʼ rizaaláʼdxibe laanu (1 Pedro 5:7). Lu tema riʼ zadúʼyanu tapa cosa ni zanda gacané laanu para cadi chuʼnu xizaa o gucueezanu ansiedad stinu. Primé, guni orarnu. Guiropa, guidúʼndanu Stiidxaʼ Dios ne guni meditarnu ni guidúʼndanu. Guionna, gudiʼnu lugar gacané espíritu santu stiʼ Jiobá laanu. Ne guidapa, gábinu tuuxa ni nápanu  confianza ni cayuni sentirnu. Ora guidúʼndanu guidapa puntu riʼ, guiníʼ íquenu paraa racaláʼdxinu guni mejorarnu.

3. Ximodo zanda gulaʼnu ni nuanu luguiáʼ Jiobá.

³ Ni zanda gúninu primé para cadi chuʼnu xizaa nga gulaʼnu ni nuanu luguiáʼ Jiobá, zanda gúninu ni ora guni orarnu laabe de guidubi ladxidoʼno. Ora nuu xiixa ni cuchiiñaʼ laanu la? racalaʼdxiʼ Bixhózenu ni nuu guibáʼ gábinu laa guiráʼ ni cayuni sentirnu. Sicaríʼ biʼniʼ orar David Jiobá: «Dios, rinabaʼ lii gucaadiágaluʼ oración stinneʼ». Ne despué guniʼbe: «Bilaa ni nualuʼ luguiáʼ Jiobá ne laabe zanaazebe lii» (Salmo 55:1, 22). Pa maʼ birá ni maʼ bíninu para guni chaahuinu xiixa guendanagana nápanu la? maʼ cadi chúʼrunu xizaa pur laani. Ni zanda gacané laanu nga guni orarnu Jiobá de guidubi ladxidoʼno. Peru, ximodo zanda gacané oración laanu para cadi chuʼnu xizaa o gucueezanu ansiedad stinu yaʼ. (Salmo 94:18, 19).

4. Xiñee nabé risaca guni orarnu ora nabé nuunu xizaa.

⁴ (Biindaʼ Filipenses 4:6, 7). Ximodo ricabi Jiobá laanu ora qué rusaana de guni orarnu laa de guidubi ladxidoʼno yaʼ. Zanda gacanebe laanu chúʼdxinu ne cadi guiníʼ íquenu o guni sentirnu xiixa ni zanda guniná laanu. Ora runi orarnu pur xiixa ni cuchiiñaʼ laanu o ni cuchibi laanu la? runi sentirnu riguixhedxí Dios ladxidoʼno ne guirútiruʼ zanda guni ni casi laabe. Stale hermanu stinu huayuni sentircaʼ riguixhedxibe ladxidoʼcaʼ, laanu laaca zanda guni sentirnu ni. Zanda gudxíʼlunu intiica guendanagana purtiʼ riguixhedxí Dios ladxidoʼno. Jiobá cayabi laanu cadi guidxíbinu, purtiʼ maʼ bidii stiidxabe ziuube gaxha de laanu para gudiibe stipa laanu ne gacanebe laanu (Isaías 41:10). Zanda gápanu confianza zuni cumplirbe ni maʼ bidii stiidxabe.

5. Ximodo zanda gacané Stiidxaʼ Dios laanu gatadxí ladxidoʼno.

⁵ Guiropa cosa ni zanda gúninu para ganda gatadxí ladxidoʼno nga guidúʼndanu Biblia ne guiníʼ íquenu ni guidúʼndanu. Xiñee zanda gacané Biblia laanu yaʼ. Purtiʼ laani nga Stiidxaʼ Dios ne nabé jneza ca conseju zeeda luni ne zanda iquiiñenu cani. Nga runi, ora qué guidxélanu xi gúninu, guni meditarnu ni guidúʼndanu lu Stiidxaʼ Dios ne ximodo zanda gacané ca conseju stibe laanu. Zacá nga zanda gucueezanu o gucáʼnanu ansiedad. Jiobá ná para ganda gácanu «nadxibalú ne nadipaʼ» ne cadi guidxíbinu la? naquiiñeʼ guidúʼndanu Stiidxabe (Josué 1:7-9).

6. Ximodo zanda gacané ca diidxaʼ ni guníʼ Jesús laanu ca dxi riʼ.

⁶ Ora guidúʼndanu Stiidxaʼ Dios, ridúʼyanu ximodo guniʼné Jesús binni. Nabé riuulaʼdxiʼ ca binni que gucaadiágacaʼ laabe, purtiʼ rudiibe stipa laacaʼ ne riguixhedxibe ladxidoʼcaʼ, jmaruʼ si ca binni ni maʼ bidxaga ne cani nuu deprimidu (biindaʼ Mateo 11:28-30). Nabé bizaalaʼdxiʼ Jesús modo cayuni sentir xcaadxi binni (Marcos 6:30-32). Gucané Jesús ca apóstol stiʼ, ne laaca zacanebe laanu yanna. Dxandíʼ, ca apóstol que guyuucaʼ ra nuu Jesús, peru laanu coʼ. Peru cadi caquiiñepeʼ chuʼnu ra nuu Jesús para ganda gacanebe laanu, casi biʼniʼ prometerbe gúnibe ni. Laabe nga Rey stinu ne dede guibáʼ rusihuínnibe nadxiibe laanu. Nga runi, ora nuunu xizaa pur xiixa cosa la? zanda chuʼnu seguru ziuuné Jesús laanu ne zacanebe laanu órapeʼ caquiiñenu ni. Rudii Jesús laanu esperanza ne valor, ne nga zacané laanu gucáʼnanu ni riguu xizaa laanu (Hebreos 2:17, 18; 4:16).

7. Ximodo racané espíritu santu stiʼ Dios laanu.

⁷ Yanna, guidúʼyanu guionna cosa ni zanda gacané laanu para cadi chuʼnu xizaa. Jesús  biʼniʼ prometer zudii Bixhózenu espíritu santu laanu pa guinábanu ni laa (Lucas 11:10-13). Espíritu santu ca nga poder stiʼ Dios ni jma nandxóʼ ne runi ni dxiiñaʼ luguianu, racané ni laanu gápanu ca cualidad ni nápabe (Colosenses 3:10). Lu Biblia rieeteʼ cani casi ca cualidad ni rudii espíritu santu binni (biindaʼ Gálatas 5:22, 23). Ora rusihuínninu ca cualidad riʼ, jma galán modo ridxaaganu xcaadxi binni ne qué riuʼnu lu guendanagana ni zándaca uguu laanu xizaa. Guidúʼyanu chupa chonna modo zanda gacané ca cualidad ni rudii espíritu santu laanu.

8-12. Ximodo zanda gacané ca cualidad ni rudii espíritu santu laanu.

⁸ «Nadxii binni ne nayeche nuu, ne nuu dxí ladxidóʼ». Ora runi respetarnu xcaadxi binni, ora rannaxhiinu laacaʼ casi nadxiinu ca bíʼchinu ne ca bizáʼnanu ne ora gápanu cariñu laacaʼ la? qué riúʼpenu xizaa. Xiñee yaʼ. Purtiʼ ora gusihuínninu ca cualidad ca la? qué zápanu guendanagana ni guchiichi laanu, qué ziuʼnu triste ora qué raca ni naguixhe íquenu ne qué zaca estresarnu. Zacá qué zaca nagana para laanu chuʼnu tobi si né xcaadxi binni (Romanos 12:10).

⁹ «Qué rixhacalaʼdxi stobi, ne qué runiná binni, ne nachaʼhuiʼ». Biblia ná: «Lagaca nachaʼhui ne stobi, ne lailaselaʼdxi saa. Laguni perdonar saa» (Efesios 4:32). Ora rinándanu ni ná conseju riʼ la? riuʼnu tobi si né xcaadxi binni ne rucáʼnanu cosa ni zándaca uguu xizaa laanu. Laaca qué zaca nagana para laanu gudxíʼlunu ca guendanagana ni zándaca gueeda gápanu purtiʼ binni ruchee laanu.

¹⁰ Fe. Ca dxi riʼ, stale biaje runi estresar ca cosa material ne bueltu laanu (Proverbios 18:11). Ximodo zanda gucueezanu de gaca estresarnu pur ca cosa ca yaʼ. Ra chinándanu conseju stiʼ apóstol Pablo ora guníʼ: «Laguieche né biaʼ tiica napa tu». Pa naguidxi fe ni nápanu Jiobá la? zápanu confianza zudiibe laanu ca cosa ni caquiiñenu. Laabe cayuni prometerbe laanu: «Qué zusaana laatu ne qué ziaana dxie de acaniá laatu». Nga runi, zanda gacané Jiobá laanu cásica gucanebe Pablo, ngue runi guníʼ: «Qué zadxibe ni guni binni naa» (Hebreos 13:5, 6).

¹¹ «Nadóʼ, ne rapa xpiaʼ». Ora gácanu nadóʼ ne gápanu xpiaʼnu o gucueezanu laca laanu, ximodo zanda gacané cani laanu yaʼ. Pa gápanu ca cualidad riʼ, qué zúninu o qué zaninu cosa ni zándaca gucaa laanu chuʼnu xizaa o gápanu ansiedad. Ne laaca qué zácanu ti binni ni nabé ridxiichi, qué zucaʼnu ridxi binni ne qué zadindenenu laa (Efesios 4:31).

¹² Para gápanu confianza «Dios ni nandxóʼ» ne gulaʼnu guiráʼ ni riguu xizaa laanu luguiabe la? cadi naquiiñeʼ gudxíʼbanu laca laanu (1 Pedro 5:6, 7). Pa gácanu ti binni ni qué rudxiibaʼ laca laa la? zapa Jiobá laanu. Ora nánnanu nuu cosa ni zanda gúninu ne nuu cosa ni qué zanda gúninu, rusihuínninu qué rudxíʼbanu laca laanu. Ora gúninu zacá, qué riúʼpenu xizaa o qué rápanu ansiedad, purtiʼ nápanu confianza Dios (Miqueas 6:8).

13. Xii nga gucalaʼdxiʼ Jesús niníʼ ora bizeeteʼ: «Cadi chuʼ tu xizaa».

¹³ Nabé jneza conseju ni bidii Jesús riʼ: «Cadi chuʼ tu xizaa» (biindaʼ Mateo 6:34). Zándaca guiníʼ íquenu nagana chinándanu conseju riʼ. Peru, xii ngue gucalaʼdxiʼ Jesús niníʼ yaʼ. Cadi gucaláʼdxibe niniʼbe qué ziuu dxi chuʼ ca xpinni Dios xizaa. Maʼ bizíʼdinu dede rey David ne apóstol Pablo guyuu biaje biʼniʼ sentircaʼ zacá. Ni gucalaʼdxiʼ Jesús nga guiene ca discípulo stiʼ ora nabé riuu binni xizaa o riuu xizaa neca cadi naquiiñeʼ chuʼ xizaa la? qué zanda guni chaahuiʼ gastiʼ. Guiráʼ dxi nga zápanu guendanagana, nga runi cadi chuʼnu xizaa pur ca guendanagana ni gúpanu  dxiqué o pur ca guendanagana ni gápanu despué. Ximodo zanda gacané conseju stiʼ Jesús laanu para cadi chúʼpenu xizaa yaʼ.

14. Xi zanda gúninu para cadi guchiiñaʼ ca cosa ni bíninu laanu, cásica biʼniʼ David.

¹⁴ Nuu tiru, ca cosa ni ruchiiñaʼ laanu nga cani bíninu dxiqué. Zándaca dede yanna runi sentirnu nabé nápanu donda pur ca pecadu ni bíninu dxiqué, neca maʼ gudiʼdiʼ stale iza de guca cani. Guyuu biaje laaca zacá biʼniʼ sentir rey David ora guníʼ ique ca pecadu biʼniʼ. Ora bizeetebe de ca pecadu stibe, guniʼbe nabé naná biʼniʼ sentirbe ne casi ora nuxhaataʼ ñeecabe laabe (Salmo 38:3, 4, 8, 18). Despué, biʼniʼ David ti cosa nabé galán, laanu laaca zanda gúninu ni bíʼnibe ca. Gúpabe confianza ziá Jiobá laabe ne zuni perdonar laabe. Guizáʼ biecheʼ David ora gunna maʼ biʼniʼ perdonar Jiobá laa. Biblia ná: «Ti hombre gucaalú, peru guni perdonárcabe ni biʼniʼ ne guni perdonárcabe donda stiʼ la? riuu nayecheʼ. Nayecheʼ nga ribani hombre ni qué ugaaniʼ Jiobá donda ique, ne nayecheʼ riuu hombre ni qué rusiguii. Dxi qué nibeeruaaʼ diidxaʼ, bidubi ca dxita ladeʼ purtiʼ guidubi dxi biinaʼ. Hasta que gudxeʼ lii pecadu stinneʼ, ne qué nucaacheʼ diaʼ ra bicheeʼ. Gunieeʼ: “Zabeʼ Jiobá guiráʼ ra maʼ bicheeʼ”. Ne lii biʼniʼ perdonarluʼ ca pecadu stinneʼ» (Salmo 32:1-3, 5).

15. a) Xi sti cosa rizíʼdinu de rey David. b) Xi zanda gúninu para guni controlarnu ansiedad. (Biiyaʼ cuadru « Caadxi conseju para cadi gápapenu ansiedad»).

¹⁵ Nuu biaje, zándaca chuʼnu xizaa pur ca cosa ni cayácanu yanna. Dxi bicaa David Salmo 55, cadxibi purtiʼ nuu si de guuticabe laa (Salmo 55:2-5). Peru qué nudiibe lugar nusirá ansiedad que confianza ni nápabe Jiobá. Gunabaʼ David Jiobá gacané laa. Peru laaca nánnabe naquiiñeʼ gúnibe xiixa para gaca chaahuiʼ ca guendanagana ni nápabe (2 Samuel 15:30-34). Xi sti cosa rizíʼdinu de David yaʼ. Lugar de guni controlar ansiedad laanu la? jma galán gúninu xiixa ni ganda gacané laanu guni chaahuinu guendanagana nápanu ne gápanu confianza zacané Jiobá laanu.

16. Ximodo riguidxi fe stinu pur ni raca significar lá Dios.

¹⁶ Laaca nuu biaje zándaca chuʼnu xizaa pur ni gueeda gaca despué. Peru cadi naquiiñeʼ gudiʼnu lugar guchiiñaʼ ca cosa ni caʼruʼ guizaaca ca laanu. Stale biaje cadi tan feu diʼ zaca xiixa cosa biaʼ caníʼ íquenu zaca ni. Laaca naquiiñeʼ guietenaláʼdxinu zanda guni controlar Jiobá intiica cosa. Riguidxi fe stinu pur ni raca significar lá Jiobá. Nánnanu lá Dios raca significar ni «Laabe nga ni runi ni Gueeda Gaca» (Éxodo 3:14). Ni raca significar lá Dios ca rusihuinni ni zuni cumplirbe guiráʼ ni maʼ gudixhe íquebe gúnibe pur laanu. Nga runi, cadi naquiiñeʼ chuʼnu xizaa pur cani gaca despué. Zanda chuʼnu seguru zaguu Dios ndaayaʼ ca xpinni ni qué gusaana laa, ne zacanebe laacaʼ guni controlarcaʼ ansiedad ni nápacaʼ pur ca guendanagana ni gúpacaʼ dxiqué ne ni nápacaʼ yanna, ne pur ca cosa ni zándaca guizaaca despué.

17, 18. Ximodo zanda gacané ti binni ni nápanu confianza laanu ora nuunu xizaa.

¹⁷ Guidapa cosa ni zanda gacané laanu para cadi gápapenu ansiedad o chuʼnu xizaa nga gábinu tuuxa ni nápanu confianza ca cosa ni naguu xizaa laanu ne ximodo cayuni sentirnu. Zándaca gacané xheelanu, xhamígunu o ti ancianu ni nuu ndaaniʼ congregación laanu guiénenu xipeʼ nga cazaacanu. Biblia rabi laanu ora nuu ansiedad «ndaaniʼ ladxidóʼ ti hombre, raca deprimir, peru ti diidxaʼ galán la? rusiecheʼ ni laa» (Proverbios 12:25). Ne laaca rabi ni laanu qué riree diʼ xiixa cosa galán ora qué rinabaʼ tobi conseju sti binni (Proverbios 15:22).

¹⁸ Guiráʼ ca reunión ni rápanu racané cani laanu para gudxíʼlunu ansiedad o para cadi chúʼpenu xizaa. Lu ca reunión riʼ nga ridxaaganu ca hermanu stinu guiráʼ semana. Ca hermanu riʼ rizaaláʼdxicaʼ laanu ne riguucaʼ gana laanu (Hebreos 10:24, 25). Pa ugúʼsaanu gana laanu, zápanu stipa ne zacané ni laanu gudxíʼlunu intiica guendanagana gápanu (Romanos 1:12).

19. Xiñee nuuluʼ seguru zanda gacané amistad ni napaneluʼ Dios lii ora cadíʼdiluʼ lu xiixa guendanagana.

¹⁹ Ti ancianu ni nuu ndaaniʼ ti congregación de Canadá biziidiʼ pabiáʼ risaca nga gulaʼnu guiráʼ ni riguu xizaa laanu luguiáʼ Jiobá. Napa hermanu riʼ ti dxiiñaʼ ni nabé runi estresar laa. Maestru ne consejero escolar laabe. Aparte de nga nápabe ti guendahuará casi ansiedad. Ximodo rúnibe para gápabe stipa ti guni huantarbe cani yaʼ. Neca nápabe ca guendanagana ca, rúnibe stipa para guquídxibe amistad ni napanebe Jiobá. Sti cosa ni racané laabe nga gábibe xheelabe ximodo cayuni sentirbe ne gacané ca xhamígube laabe. Xcaadxi ancianu de congregación stibe ne superintendente de circuito, huayacanecaʼ laabe gúʼyabe ca cosa ca casi ruuyaʼ Jiobá cani. Ne últimu la? gucané ti doctor laabe guiénebe ximodo nga guendahuará que. Óraque, bidii hermanu que cuenta naquiiñeʼ quixhe chaahuiʼ tiempu stiʼ, ti guiziilaʼdxiʼ ne guni ejerciciu. Chaahuiʼ chaahuiʼ biziidibe guni controlarbe modo nuube que ne guiráʼ ni cayuni sentirbe. Yanna, pa nuu xiixa cosa ni qué zanda guni controlarbe la? rusaanabe cani lu náʼ Jiobá.

20. a) Ximodo zanda gulaʼnu guiráʼ ni riguu xizaa laanu lu náʼ Jiobá. b) Xi zadúʼyanu lu sti tema ca.

²⁰ Lu tema riʼ maʼ bidúʼyanu nabé risaca nga gulaʼnu guiráʼ ni riguu xizaa laanu lu náʼ Jiobá, ora guni orarnu, ora guidúʼndanu Stiidxabe ne guni meditarnu ni guidúʼndanu luni. Laaca nabé risaca nga gudiʼnu lugar gacané espíritu santu stiʼ Dios laanu, guinínenu tuuxa ni nápanu confianza ne chuunu ca reunión ca. Lu sti tema ca zadúʼyanu ximodo racané Jiobá laanu ora riníʼ chigudii laanu ti premiu (Hebreos 11:6).