1, 2. a) Pa nadxiinu Dios, ximodo zanda gusihuínninu nápanu fe. b) Xi guendarinabadiidxaʼ zacábinu.

JIOBÁ nga Bixhózenu, ne maʼ bidii stiidxabe zudiibe ndaayaʼ ca xpínnibe ni qué gusaana de guzuubaʼ stiidxabe. Ndiʼ nga ti modo rusihuinni Jiobá nadxii laanu. Ne nadxiinu laabe «purti nirudóʼ laabe gunaxhii be laanu» (1 Juan 4:19). Pa nadxiinu  Dios la? laaca zusihuínninu nápanu fe. Purtiʼ pa gannaxhiinu Dios jma la? jma zápanu fe laabe ne ziuʼnu jma seguru zudiibe premiu ca binni ni nadxiibe (biindaʼ Hebreos 11:6).

² Jiobá racalaʼdxiʼ gudii premiu ca xpinni. Purtiʼ zacá nga laabe ne rihuinni ni pur cani rúnibe. Yanna laanu la? naquiiñeʼ chuʼnu seguru zudii Jiobá premiu cani cuyubi laabe de guidubi ladxidóʼ ti gaca fe stinu naguidxi. Xiñee rininu zacá yaʼ. Purtiʼ «pa dxandí runi cre nu Dios [o pa nápanu fe] qué zagúʼ xa ique nu de ni cabeza nu udii be laanu» (Hebreos 11:1). Pa nápanu fe, zápanu confianza de guidubi ladxidoʼno zaguu Jiobá ndaayaʼ cani qué rusaana laa. Laanu nánnanu zudii Jiobá laanu ti premiu, ximodo racané esperanza ca laanu. Ximodo bidii Jiobá premiu ca xpinni ni bibani dxiqué. Ximodo rúnibe ni yanna. Guidúʼyanu.

3. Xi maʼ bidii stiidxaʼ Dios laanu casi cá lu Malaquías 3:10.

³ Maʼ bidii stiidxaʼ Jiobá zudii premiu ca xpinni ni qué gusaana de guzuubaʼ stiidxaʼ. Ne laaca cayábibe laanu zaguube ndaayaʼ laanu pa gudiʼnu laabe ni jma galán nápanu. Jiobá cayuni invitar laanu gutíʼdinu laa prueba. Ne despué nabe: «Laguuyaʼ, [...] pa qué zuxheleʼ ca compuerta stiʼ guibáʼ ne zundaateʼ ndaayaʼ stinneʼ luguiatu dede ora maʼ cadi cayaadxaʼ gastiʼ laatu» (Malaquías 3:10). Ora ricaanu invitación ni zeeda de Dios riʼ, rusihuínninu cudiʼnu xquíxepeʼ laabe.

4. Xiñee zanda gápanu confianza lu ca diidxaʼ guníʼ Jesús lu Mateo 6:33.

⁴ Jesús bidii stiidxaʼ ca discípulo stiʼ zudii Dios laacaʼ guiráʼ ni iquiiñecaʼ pa gúnicaʼ ni ná Reinu primé lu xquendanabánicaʼ (biindaʼ Mateo 6:33). Guníʼ Jesús zacá purtiʼ nanna ora gudii stiidxaʼ Dios guni xiixa la? runi ni (Isaías 55:11). Ne laanu laaca naquiiñeʼ gápanu confianza ca. Pa gápanu fe Jiobá de guidubi ladxidoʼno, zúnibe ni ná ca diidxaʼ riʼ: «Qué zusaana laatu ne qué ziaana dxie de acaniá laatu» (Hebreos 13:5). Ni bidii stiidxaʼ Jiobá laanu riʼ, racané ni laanu gápanu confianza lu ca diidxaʼ guníʼ Jesús lu Mateo 6:33.

5. Ximodo racané ni bicabi Jesús apóstol Pedro laanu.

⁵ Ti dxi gunabadiidxaʼ apóstol Pedro Jesús: «Laadu yaʼ, xi zacaa du, ma bisaana du irá xixé ne ma beda nanda du lii» (Mateo 19:27). Qué ñabi diʼ Jesús Pedro cadi jneza ni gunabadiidxaʼ, sínuque gudxi Jesús ca discípulo stiʼ zaguu Jiobá ndaayaʼ laacaʼ pur ca sacrificiu ni gúnicaʼ. Dxandíʼ, lu ca dxi ni  zeeda ca zuni mandarné Jesús ca apóstol ne xcaadxi xpinni Cristo ni ruzuubaʼ diidxaʼ guibáʼ. Peru Jesús guníʼ laaca nuu premiu para laacabe ca dxi stinu riʼ, sicaríʼ guniʼbe: «Tutiica gusaana lidxi o biʼchi o bizaʼna o bixhoze o jñaa o xheela o xiiñi o xquidxi pur naa la? zacaa ti gayuaa tantu de ni bisaana que, ne zapa enda nabani ni qué zaluxe» (Mateo 19:29). Ca dxi stinu riʼ, guiráʼ ca xpinni Cristo ridxélanu bixhózenu, jñaanu, xiiñinu, bíʼchinu, bizáʼnanu ndaaniʼ congregación. Nanna dxíchinu, jma risaca ca ndaayaʼ riʼ que intiica sacrificiu gúninu pur Reinu stiʼ Dios.

6. Ora gánnanu zudii Jiobá premiu ca xpinni ni ruzuubaʼ diidxaʼ, ximodo racané ni laanu.

⁶ Ora gánnanu zudii Jiobá premiu ca xpinni ni ruzuubaʼ diidxaʼ, racané ni laanu guni huantarnu ora gápanu guendanagana. Maʼ nápanu stale ndaaya yanna, peru laaca cabézanu guicaanu premiu jma naroʼbaʼ ca dxi zeeda ca (1 Timoteo 4:8). Pa nuunu seguru zaguixe Jiobá «cani uyubi laabe» la? zacané ni laanu para cadi gusaananu laabe (Hebreos 11:6).

7. Xiñee zanda guininu zeeda gaca esperanza stinu casi ti ancla.

⁷ Lu libana ni bidii Jesús lu dani que, guníʼ: «Laguiecheʼ neca cazaaca tu irá nga, purti nabé sicarú ni chi gudii Dios laatu ibáʼ, ne nanna ca tu zacaca biʼni cabe ca profeta sti Dios chiqué» (Mateo 5:12). Nuu xpinni Jiobá zacaa premiu para cheʼ guibáʼ. Ne xcaadxi zacaa premiu para guibani sin qué chuʼ dxi gatiʼ ndaaniʼ ti paraísu lu Guidxilayú riʼ. Laacabe laaca nápacabe razón para guiéchecabe (Salmo 37:11; Lucas 18:30). Peru guiranu nga rinaaze esperanza riʼ laanu «casi rinaaze ancla barcu para qué iniibi» (Hebreos 6:17-20). Cásica rinaaze dxiichiʼ ancla ti barcu ora guiaba ti bi yooxhoʼ lu nisadóʼ, zacaca rinaaze dxiichiʼ esperanza riʼ laanu para gaca fe stinu naguidxi ne rudii ni stipa laanu para gudxíʼlunu ca guendanagana gápanu.

8. Ximodo racané esperanza nápanu laanu para gatadxí ladxidoʼno.

⁸ Laaca zanda gacané esperanza riʼ laanu para gatadxí ladxidoʼno. Cásica racané ti pomada para guianda ládinu la? zacaca racané cani maʼ bidii stiidxaʼ Dios laanu para gatadxí ladxidoʼno. Nabé ratadxí ladxidoʼno gánnanu zapa Jiobá laanu ora gulaʼnu guiráʼ ni nuanu o cani naguu xizaa laanu luguiabe (Salmo 55:22). Nga racané laanu chuʼnu seguru «zanda guni [Jiobá] jma que biaʼ iníʼ ique nu inaba nu laa» (Efesios 3:20). Nga caníʼ zuni Jiobá stale cosa pur laanu, jma que biaʼ guinábanu laa.

9. Xi naquiiñeʼ gúninu para guicaanu ndaayaʼ stiʼ Jiobá.

⁹ Para ganda guicaanu ndaayaʼ stiʼ Jiobá la? naquiiñeʼ gápanu fe laabe de guidubi ladxidoʼno ne guzúʼbanu stiidxabe. Sicaríʼ gudxi Moisés ca israelita: «Dxandipeʼ zaguu Jiobá ndaayaʼ lii lu layú ni cudii Jiobá, Dios stiluʼ, lii casi herencia, ni naquiiñeʼ si gúniluʼ nga gucaadiágaluʼ stidxi Jiobá, Dios stiluʼ, para gúniluʼ guiráʼ ni ná mandamientu ni cayuneʼ mandar lii yannadxí riʼ. Purtiʼ Jiobá, Dios stiluʼ, dxandipeʼ zaguu ndaayaʼ lii casi maca bidii stiidxaʼ lii» (Deuteronomio 15:4-6). Ñee nanna dxíchinu zaguu Jiobá ndaayaʼ laanu pa qué gusaana de guzúʼbanu stiidxaʼ la? Nápanu stale razón para gápanu confianza zúnibe ni.

10, 11. Xi premiu bidii Jiobá José.

¹⁰ Gucuá Biblia para gacané laanu. Luni zanda guidúʼndanu ximodo bidii Jiobá premiu stale de ca xpinni de dxiqué ni bizuubaʼ stiidxabe (Romanos 15:4). Nabé galán ejemplu bisaana José. Primé, bitoo ca bíʼchibe laabe para gácabe esclavu. Despué, guníʼ xheelaʼ  xpixuaanabe bíʼnibe ti cosa malu, peru cadi dxandíʼ bíʼnibe ni, ngue runi biseguyoocabe laabe ndaaniʼ guidxi Egipto. Ñee bixélebe de Jiobá ra bieguyoobe que la? Coʼ. Biblia ná: «Qué nusaana Jiobá José ne bisihuinni nadxii laabe ra qué nusaana de ñaca nachaʼhuiʼ né laabe». Ne laaca ná ni: «Qué nusaana Jiobá José ne guiráʼ ni gúnibe riree cani jneza» (Génesis 39:21, 23). Dede ora gudiʼdiʼ José lu ca guendanagana riʼ, gupa paciencia ne guleza gacané Jiobá laa.

¹¹ Xi premiu bidii Jiobá José yaʼ. Chupa chonna iza despué, gulee Faraón laabe ra deguyoobe. Despué de guca José ti esclavu ni qué risaca, beeda gaca guiropa binni jma risaca de Egipto (Génesis 41:1, 37-43). Laabe ne xheelabe beeda gápacabe chupa xiiñicabe. Primé xiiñiʼ José, gulee labe laa Manasés, «purtiʼ riniʼbe: “Maʼ gucané Dios naa gusiaandaʼ guiráʼ guendanagana stinneʼ ne guiráʼ ni nabeza ra lidxi bixhozeʼ”». Ne guiropa que gulee labe laa Efraín, «purtiʼ riniʼbe: “Maʼ gucané Dios naa gapaʼ xiiñeʼ lu layú ra gucaʼ zidi dé”» (Génesis 41:51, 52). Bidii Jiobá premiu José purtiʼ qué nusaana laabe. Ne pur ngue, bilá José ca israelita ne ca egipciu para cadi ñáticaʼ de hambre. Ne nanna dxichi José pur ndaayaʼ stiʼ Jiobá ngue gupa guiráʼ cosa que (Génesis 45:5-9).

12. Xi gucané Jesús para qué nusaana de nuzuubaʼ stiidxaʼ Dios.

¹² Jesucristo laaca bizuubaʼ stiidxaʼ Dios neca gudiʼdiʼ lu stale prueba. Ne pur ngue, bidii Jiobá laabe premiu. Xi gucané Jesús para que nusaana de nuzuubaʼ stiidxaʼ Dios yaʼ. Biblia cayabi laanu: «Biʼniʼ huantarbe ra bicaacabe laabe lu madero que para gátibe, ne ra bisituícabe lube purtiʼ nánnabe nabé ziéchebe ora maʼ gudíʼdibe cani» (Hebreos 12:2, TNM). Rihuinni dxíchica nabé nayecheʼ guyuu Jesús ora bisisaca lá Dios. Guníʼ Bixhózebe jneza ni cayúnibe ne bidii laabe stale premiu. Biblia ná «maʼ guribe ladu derechu stiʼ trono stiʼ Dios». Ne laaca ná ni «ma bidxiiba Dios laabe ne bisisaca laabe jma que irá xixé» (Filipenses 2:9).

13, 14. Ximodo ruuyaʼ Jiobá ni rúninu para gúninu xhiiñaʼ.

¹³ Zanda chuʼnu seguru rusisaca Jiobá guiráʼ ni rúninu para gúninu xhiiñaʼ. Laabe riénebe ora qué guidxélanu xi gúninu ne ora riníʼ íquenu qué zanda gúninu xiixa. Laaca riabe laanu ora rusidxaga dxiiñaʼ laanu o pur qué gánnanu xi gúninu para gacanenu familia stinu gapa guiráʼ ni iquiiñeʼ. Ne laaca riénebe laanu ora qué randa rúninu xhiiñabe biaʼ bíninu dxiqué purtiʼ cayuniná depresión laanu o sti guendahuará. Zanda gápanu confianza rusisaca Jiobá guiráʼ ni rúninu para cadi gusaananu laa neca gápanu guendanagana (biindaʼ Hebreos 6:10, 11).

¹⁴ Cadi guiaandaʼ laanu Jiobá nga Dios «ni rucaadiaga oración». Nga runi zanda chuʼnu seguru rucaadiágabe laanu ora runi orarnu laabe (Salmo 65:2). Jiobá nga Bixhózenu ni riá laanu ne «laabe nga Dios stinu ne riguixhe dxí be ladxidóʼ no» ne zudiibe guiráʼ ni caquiiñenu para cadi gusaana de guzúʼbanu stiidxabe. Zándaca iquiiñebe ca hermanu stinu para gacanecaʼ laanu (2 Corintios 1:3). Riecheʼ Jiobá ora rianu binni ne ora racanenu laacaʼ. Biblia ná: «Ni rilaselaʼdxiʼ binni pobre la? cutiiñeʼ Jiobá, ne laabe zaguíxebe laa» (Proverbios 19:17; Mateo 6:3, 4). Nga runi, ora rudiʼnu de ni nápanu ne racanenu ca hermanu stinu la? ruuyaʼ Jiobá ni casi ora nutíʼñenu laa ne maʼ bidii stiidxaʼ zaguixe laanu.

15. Xi premiu cabézaluʼ guicaaluʼ. (Biiyaʼ dibuju zeeda ra ruzulú tema riʼ).

¹⁵ Ca xpinni Cristo ni bibí nápacaʼ esperanza de guicaacaʼ «ti premiu» ni chigudii  Jesucristo laacaʼ saca bíʼnicaʼ ni jneza (2 Timoteo 4:7, 8). Peru pa gadxé esperanza nápanu la? laaca zacaanu ti premiu. Millón de binni ni zeeda gaca «xcaadxi dendxu» stiʼ Jesús cabézacaʼ guicaacaʼ premiu de guibánicaʼ sin gáticaʼ ndaaniʼ ti paraísu lu Guidxilayú riʼ, ra «zabánicaʼ nayecheʼ purtiʼ ziuu stale guendariuudxi» (Juan 10:16; Salmo 37:11).

16. Ximodo riguixhedxí ca diidxaʼ ni zeeda lu 1 Juan 3:19, 20 ladxidoʼno.

¹⁶ Zándaca chuʼ biaje guiníʼ íquenu cadi cayúninu stale lu xhiiñaʼ Jiobá. O zándaca guinabadiidxanu pa cayuulaʼdxiʼ Jiobá ni cayúninu. O dede zándaca guiníʼ íquenu qué runi merecernu guicaanu ti premiu. Peru cadi guiaandaʼ laanu «jma nandxóʼ Dios que [ladxidoʼno] ne laa nanna irá ni nuu ndaani ni» (biindaʼ 1 Juan 3:19, 20). Pa rúninu xhiiñaʼ Jiobá purtiʼ nápanu fe laabe ne purtiʼ nadxiinu laabe la? zanda chuʼnu seguru zudiibe laanu ndaayaʼ neca guiníʼ íquenu qué risácapeʼ ni rúninu (Marcos 12:41-44).

17. Gunáʼ nga caadxi premiu ricaanu yanna.

¹⁷ Yanna riʼ laaca riguu Jiobá ndaayaʼ laanu, neca nabáninu lu ca últimu dxi stiʼ guidxilayú malu nuu lu náʼ Binidxabaʼ riʼ. Ximodo yaʼ. Rudii Jiobá laanu stale guendaró espiritual ne riguixhedxí ladxidoʼno. Ne sti premiu ni maʼ bidiibe laanu nga nuunu ndaaniʼ ti familia de hermanu lu guidubi guidxilayú ne nadxiicaʼ laanu, casi modo bidii stiidxaʼ Jesús (Isaías 54:13; Marcos 10:29, 30). Sti premiu rudii Dios nga riguixhedxí ladxidóʼ ne xquendabiaaniʼ ca binni ni runi stipa pur guyubi laabe ne rudiibe laacaʼ guendanayecheʼ (Filipenses 4:4-7).

18, 19. Laanu, ca xpinni Cristo, ximodo runi sentirnu ora riníʼ íquenu ca premiu ni rudiibe laanu.

¹⁸ Jiobá, Bixhózenu, maʼ bidiibe stale premiu ca xpínnibe ni nuu lu guidubi Guidxilayú ne dede ridxagayaanu modo rúnibe ni. Guzéʼtenu ejemplu stiʼ ti hermana de Alemania láʼ Bianca, laa ná: «Qué ridxelaʼ ximodo guinieeʼ para gudieeʼ xquíxepeʼ Jiobá pur modo huayacané naa ora huadideʼ lu guendanagana ne purtiʼ nuube cueeʼ guiráʼ dxi. Maʼ binitilú guidxilayú riʼ ne ruluíʼ maʼ qué zanda gaca chaahuiʼ ni. Peru nabé riuaaʼ seguru ndaaniʼ náʼ Jiobá ora runeniáʼ laa dxiiñaʼ. Ne rudiibe naa ti gayuaa premiu pur cada sacrificiu guneʼ pur xhiiñabe».

¹⁹ Yanna guidúʼyanu ejemplu stiʼ Paula, ti hermana de Canadá ni maʼ napa 70 iza. Qué randa rúnibe stale cosa purtiʼ nápabe ti guendahuará nabé malu lu dxita déchebe. Qué rándapeʼ riniibibe, peru laabe nabe qué rucueeza ni laabe de gucheechebe diidxaʼ. Laabe nabe: «Runeʼ predicar pur teléfono ne ra tiica nuu binni. Para chuaaʼ gana la? napaʼ ti cuadernu ra rucaaʼ textu stiʼ Biblia ne caadxi diidxaʼ ni ribeeʼ lu ca publicación stinu, ne gatigá ruundaʼ cani. Guleeʼ laʼyaʼ ni “Cuadernu stinneʼ ni rulá naa”. Nagueendaca ziuʼnu gana pa guicá íquenu cani maʼ bidii stiidxaʼ Jiobá. Nuucabe listu para gacanebe laanu, lu intiica guendanagana cadídinu». Zándaca cadi cadídinu lu xiixa guendanagana cásica cadiʼdiʼ Bianca ne Paula. Peru zándaca laaca rietenaláʼdxinu guiráʼ premiu ni maʼ bidii Jiobá laanu ne ni maʼ bidiibe ca binni nuu gaxha de laanu. Laanu, ca xpinni Dios nabé riuʼnu gana ora riníʼ íquenu guiráʼ premiu rudiibe laanu yanna ne ni chigudiibe laanu despué.

20. Xi confianza zanda gápanu pa gúninu biaʼ gándatiʼ pur gúninu xhiiñaʼ Jiobá.

²⁰ Qué chuʼ dxi guiaandaʼ laanu zacabi Jiobá ca oración ni rúninu de guidubi ladxidoʼno para gudii laanu ni caquiiñenu. Pa maʼ bíninu ni ná Dios la? zanda chuʼnu seguru zudiibe laanu ni maʼ bidii stiidxabe laanu (Hebreos 10:35, 36). Nga runi, cadi gusaananu de guquídxinu fe stinu ne gúninu biaʼ gándatiʼ pur gúninu xhiiñaʼ Jiobá. Pa gúninu zacá la? zanda gápanu confianza zudiibe laanu stale premiu (biindaʼ Colosenses 3:23, 24).