Ñee maʼ biindaluʼ ca últimu tema ni bedané revista Torre stiʼ ni rapa la? Yanna biiyaʼ pa zanda guicábiluʼ ca guendarinabadiidxaʼ riʼ:

Xi tipu pecadu nga caníʼ Jesús ora bidii ca instrucción ni zeeda lu Mateo 18:15-17.

Nga nga ca guendanagana rapa ca xpinni Cristu ni randa runi chaahuicaʼ laasicaʼ, peru raca ni jma nagana ne dede zanda gaca expulsar tuuxa pa qué guni chaahuiʼ guendanagana gapané sti binni. Laani nga gusiguii tuuxa para guni ganar xiixa o para guicaa xiixa ni risaca o guindisaʼ falsu luguiáʼ tuuxa binni para guniná laabe (w16.05, yaza 7).

Xi zanda gúninu para cueendunu ni galán ora guidúʼndanu Biblia.

Zanda gúninu stale cosa, casi gucáʼ íquenu guizíʼdinu xiixa ora guidúʼndanu; guidúʼyanu ximodo zanda gacané ni laanu; guinabadiidxanu laca laanu: «Ximodo zanda iquiiñeʼ ni para gacaniáʼ xcaadxi binni», ne iquiiñenu ca información ni nápanu para guni investigarnu ti guiene chaahuinu ni cadúʼndanu (w16.05, yaza 24 dede 26).

Ñee cadi jneza nga guʼnaʼ ti xpinni Cristu ora gatiʼ tuuxa binni ni nadxii, pa maca nanna ziasa ca binni ni maʼ guti la?

Gapa ti xpinni Cristu fe ziasa ca binni ni maʼ guti, cadi caníʼ diʼ nga maʼ qué ziuubaʼ ladxidoʼbe ora gatiʼ tuuxa binni ni nadxiibe. Casi dxi gutiʼ Sara la? biinaʼ Abrahán pur laa (Génesis 23:2). Ne ra tiidiʼ tiempu chaahuiʼ chaahuiʼ maʼ zidiʼdiʼ yuubaʼ ni runi sentir binni (wp16.3-S, yaza 4).

Lu visión ni biʼyaʼ Ezequiel, tuu nga zeeda gaca hombre ni ziné tintero stiʼ secretariu ne xhoopaʼ hombre ni naaze guiibaʼ para guxuuxe.

Laacabe nga ca ángel ni gucané para binitilú Jerusalén ne laaca zacanécabe para guinitilú guidxilayú malu stiʼ Binidxabaʼ lu Armagedón. Ca dxi stinu riʼ, hombre ni ziné tintero stiʼ secretariu riʼ nga Jesucristu. Ne laabe nga chigucaabe marca ca binni ni guilá (w16.06, yaza 16 ne 17).

Ximodo bilá Biblia de guiráʼ ni huayaca para ninitilú ni.

Bilá ni 1) ra bioʼxhoʼ ca material ra gucuá ni, casi papiro ne pergaminu; 2) ra bicaalú ca xaíque stiʼ ca políticu ne ca xaíque yuʼduʼ para ninitilú ni, ne 3) ra guyuu tu gucalaʼdxiʼ nuchaa ni zeeda luni (wp16.4-S, yaza 4 dede 7).

Ximodo zanda guibani ti xpinni Cristu né ni caquiiñeʼ si.

Biʼniʼ ti lista de ca cosa ni caquiiñeluʼ ne cadi gunítiluʼ bueltu lu ca cosa ni cadi dxandíʼcaquiiñeluʼ, biiyaʼ xi naquiiñeʼ siluʼ cada semana o cada beeu ne pagala naquiiñeʼ guni gástuluʼ. Bitoo, bisigaʼdeʼ o bisaʼbiʼ ca cosa ni maʼ qué riquiiñeluʼ, gudixe guiráʼ ra nuzaabiluʼ, biiyaʼ pa ganda guʼnuʼ dxiiñaʼ chupa chonna hora menu ne guníʼ ique xcaadxi modo zanda gucheecheluʼ diidxaʼ (w16.07, yaza 10).

Casi ná Biblia, xii nga jma risaca que oro o plata.

Job 28:12 ne 15 cusiene jma risaca guendanuuxpiaaniʼ stiʼ Dios, que oro o plata. Nga runi, ora guyúbinu ni, gúninu stipa para cadi gudxíʼbanu laca laanu ne gúninu stipa para iguidxi fe stinu (w16.08, yaza 18 ne 19).

Ñee jneza nga gapa ti hermanu guicha ruaa la?

Nuu caadxi cultura ra rudiicabe lugar gapa binni guicha ruaa ne rugacaʼ ni biaʼ guihuinni ni galán, ne cadi feu diʼ ruuyaʼ binni ni ora guiniʼnécabe laa de stiidxaʼ Dios. Ne nuu hermanu laapeʼ qué riná gapa guicha ruaa (1 Corintios 8:9). Lu xcaadxi cultura ne nuu caadxi lugar cadi jneza diʼ ruuyaʼ binni gapa ca testigu stiʼ Jiobá guicha ruaacaʼ (w16.09, yaza 21).

Ximodo nánnanu dxandíʼ historia zeeda lu Biblia ni caníʼ de David ne Goliat.

Biaʼ sti 15 centimetru si nga jma nasoo guca Goliat que binni ni jma nasoo ni runibiáʼcabe yanna riʼ. Dxandíʼ bibani David, casi rihuinni lu ni bidxela caadxi arqueólogo ra cá caadxi diidxaʼ ra caníʼ de «lidxi David». Ne Jesús peʼ guníʼ de laabe. Ca lugar ni ruzeeteʼ relatu ni caníʼ de laabe, biaʼsi cani né cani runibiáʼ binni yanna (wp16.5-S, yaza 13).

Xi rusihuinni gadxé nga guendananna, guendariene ne guendanuuxpiaaniʼ.

Gaca binni tuuxa ni nanna nga gucaasaa caadxi información o datu, ne gaca binni tuuxa ni riene nga ganna ximodo guchaaga ca datu ca para ganna xiixa. Peru ti binni ni nuu xpiaaniʼ la? zanda iquiiñeʼ guendananna ne guendariene ca para cueendú ni galán lu cani guni (w16.10, yaza 18).