1, 2. Xiñee nabé risaca capítulo 8 stiʼ Romanos para ca xpinni Cristo ni bibí.

ZÁNDACA huadúʼndanu ni ná Romanos 8:15-17 ora maʼ cayetenaláʼdxinu guendaguti stiʼ Jesús. Ca versículo riʼ rusiene cani ximodo nanna ca xpinni Cristo ni bibí né espíritu santu nápacaʼ esperanza checaʼ guibáʼ. Romanos 8:1 ná ca xpinni Cristo ni bibí pur espíritu santu nga «cani ma nuu né Cristu tobi si». Peru, ñee gucuá capítulo 8 stiʼ Romanos para si ca xpinni Cristo ni bibí la? Ñee laaca zanda gacané ni cani napa esperanza guibani lu Guidxilayú riʼ sin gáticaʼ la?

² Capítulo 8 stiʼ Romanos gucuá ni para ca xpinni Cristo ni bibí. Lu capítulo riʼ ná bidii Dios «Espíritu» ca xpinni Cristo ni bibí ne cabézacaʼ dxi guicaabe laacaʼ «casi xiiñi be» ne dxi gusaanacaʼ cuerpu de beela ni nápacaʼ (Romanos 8:23). Ora guibánicabe guibáʼ sti biaje, reeda gácacabe xiiñiʼ Dios. Pur ni biaxa pur laanu ca, maʼ bitiidilaʼdxiʼ Jiobá ca pecadu stícabe ne maʼ guniʼbe rúnicaʼ ni jneza, nga runi zanda gácacaʼ xiiñibe (Romanos 3:23-26; 4:25; 8:30).

3. Xiñee naquiiñeʼ guni estudiar cani napa esperanza guibani lu Guidxilayú riʼ sin gatiʼ capítulo 8 stiʼ Romanos.

 ³ Lu capítulo 4 stiʼ Romanos, bicaa Pablo de Abrahán. Hombre ni bizuubaʼ stiidxaʼ Dios riʼ, bibani stale iza ante gudii Jesús xquendanabani para gulá laanu. Neca qué ñaca Abrahán tobi de cani bibí, peru biiyaʼ Jiobá laa casi ti hombre runi ni jneza (biindaʼ Romanos 4:20-22). Cásica Abrahán, ca xpinni Cristo ni ruzuubaʼ diidxaʼ de tiempu riʼ, cani napa esperanza guibani lu Guidxilayú sin gáticaʼ, laaca zanda guiníʼ Dios rúnicaʼ ni jneza. Ca xpinni Cristo riʼ laaca zanda guni estudiarcaʼ capítulo 8 stiʼ Romanos purtiʼ zanda gacané ca conseju stini laacabe.

4. Xi naquiiñeʼ guinabadiidxanu laanu ora guidúʼndanu Romanos 8:21.

⁴ Lu Romanos 8:21 guníʼ Jiobá zabee cani bizáʼ de lu náʼ guendaruchee ne guendaguti. Nga racané laanu guiénenu laaca ziaana cani chiguibani ndaaniʼ Paraísu libre casi nuu «ca xiiñi be» ni nuu guibáʼ. Ora guidúʼndanu versículo riʼ naquiiñeʼ guinabadiidxanu laca laanu: «Ñee ruxuiʼluáʼ nuaaʼ ndaaniʼ guidxilayú cubi ca la?». Guidúʼyanu xi zanda gúninu para guibáninu ndaaniʼ ni.

5. Xidé guníʼ Pablo lu Romanos 8:4-13.

⁵ (Biindaʼ Romanos 8:4-13). Lu capítulo 8 stiʼ Romanos, guníʼ Pablo de chupa clase binni. Guniʼbe de cani «nabani [...] modo na ique» ne cani nabani «modo na Espíritu Santu». Ñándaca niníʼ íquenu caníʼ Pablo de cani cadi naca xpinni Cristo ne de cani naca xpinni Cristo. Peru carta riʼ bicaa Pablo ni ra nuu ca xpinni Cristo, cani gulí Dios para gaca xpinni (Romanos 1:7). Nga runi, cásica «cani nabani casi na ique» ne cani «nabani casi na Espíritu» tiempu que, xpinni Cristo laacaʼ. Peru, xi rusihuinni gadxé cada clase de binni riʼ yaʼ.

6, 7. a) Xi guiráʼ modo riquiiñeʼ Biblia diidxaʼ «yenanda nu ni na ique nu». b) Xii nga bisiene Pablo lu Romanos 8:4-13 ora guníʼ de cani nabani casi ná ique yaʼ.

⁶ Diidxaʼ griegu ni bitiixhicabe para guibani binni casi ná ique ni zeeda lu  Romanos 8:4-13 riníʼ ni stale cosa. Nuu biaje riníʼ ni de cuerpu stiʼ ti binni o stiʼ ti maniʼ (Romanos 2:28; 1 Corintios 15:39, 50). Laaca riquiiñeʼ ni ora maʼ cayeeteʼ de familia stiʼ binni. Casi ora ruzeeteʼ Biblia de Jesús la? riníʼ ni «gule lade ca xiiñi David». Ne Pablo guníʼ naca ca judíu que biʼchiʼ (Romanos 1:3; 9:3).

⁷ Yanna, xii nga bisiene Pablo lu Romanos 8:4-13 ora guníʼ de cani nabani casi ná ique yaʼ. Para gánnanu ni la? guidúʼyanu ni ná Romanos 7:5 ra guníʼ Pablo: «Adxé modo bibani nu chiqué, purti yenanda nu ni na ique nu, ne biquiinde ley que laanu bini nu ni cadi jneza. Ne zacá beda gati nu para Dios». Ni bisiénebe raríʼ nga ora rinanda binni ni ná ique la? rucaa ni laa guni ni cadi jneza ne runi ni racalaʼdxiʼ.

8. Xiñee gudxi Pablo ca xpinni Cristo ni bibí cadi guibánicaʼ casi ná íquecaʼ.

⁸ Xiñee gudxi Pablo ca xpinni Cristo ni bibí cadi guibánicaʼ casi ná íquecaʼ yaʼ. Purtiʼ tutiica xpinni Dios zanda gueeda gusisaca jma ca cosa ni riuulaʼdxiʼ guni. Pablo guníʼ nuu caadxi hermanu de Roma nácacaʼ esclavu stiʼ cani riuuláʼdxicaʼ gúnicaʼ. Zándaca ni guniʼbe nga jma risaca para ca binni que gápacaʼ relación sexual, gocaʼ ne gúnicaʼ xcaadxi cosa ni riuuláʼdxicaʼ (Romanos 16:17, 18; Filipenses 3:18, 19; Judas 4, 8, 12). Ne ndaaniʼ guidxi Corinto, guyuu ti xpinni Cristo guyuuné madrastra stiʼ (1 Corintios 5:1). Ngue runi caquiiñeʼ ganna ca xpinni Cristo de primé siglu que conseju ni bidii Pablo laacaʼ, cadi guibánicaʼ casi ná íquecaʼ (Romanos 8:5, 6). Ne laaca caquiiñeʼ gánnanu ni yanna.

9. Xii nga cadi caníʼ Romanos 8:6.

⁹ Laaca nabé risaca conseju riʼ para laanu yanna. Dede ti binni ni maʼ xadxí de cayuni ni ná Jiobá zanda guzulú guibani casi ná ique. Peru Romanos 8:6 cadi caníʼ diʼ ni malu nga guiníʼ íquenu de guendaró, dxiiñaʼ, entretenimientu o chuuláʼdxinu tuuxa. Normal ca nga lu xquendanabáninu. Jesús laaca gudó ne dede biyaanaʼ stale binni. Ne guyuu biaje biquiiñeʼ guiziiláʼdxibe. Ne laaca guníʼ Pablo  risaca nga gapa binni relación sexual lu guendaxheelaʼ.

10. Xi riníʼ ca diidxaʼ guyúbinu chuuláʼdxinu xiixa yaʼ.

¹⁰ Xi riníʼ ca diidxaʼ guyúbinu chuuláʼdxinu xiixa yaʼ. Ni guníʼ Pablo nga maʼ guicá íquenu lu ti cosa si. Ti hombre nanna stale bisiene jma nga riquiiñeʼ diidxaʼ riʼ para ca binni ni riníʼ ique guyubi puru si para laa ne nisi de laacani maʼ caniʼcaʼ. Laacani nga cani jma risaca para laacabe ne maʼ laacani runi mandar cani laacabe.

11. Xii nga ca cosa ni zanda gueeda gaca ni jma risaca para laanu yaʼ.

¹¹ Ca xpinni Cristo de Roma que caquiiñeʼ gúʼyacaʼ ximodo nuucaʼ ne xi nga ni jma risaca para laacaʼ. Ñee ca cosa ni riuulaʼdxisícabe la? Laanu laaca caquiiñeʼ guidúʼyanu xii nga ni jma risaca para laanu. Xii nga ca cosa ni zanda gueeda gaca ni jma risaca para laanu yaʼ. Para gánnanu ni la? guinabadiidxanu laca laanu: «Xidé jma riuuladxeʼ guiniéʼ. Xi jma riuuladxeʼ guneʼ.». Nuu tu laa rudii cuenta puru maʼ caníʼ ique guni prueba guiráʼ clase vinu, gapa stale luju ndaaniʼ lidxi, siʼ lari, iquiiñeʼ xpueltu para guni xiixa o nisi maʼ caníʼ ique paraa chizá. Cadi malu diʼ ca cosa ca. Normal nga guni binni cani. Chiguzéʼtenu de vinu, guidúʼyanu chupa ejemplu de laani. Jesús peʼ biʼniʼ vinu lu ti guendaxheelaʼ ne biquiiñebe nisa para bíʼnibe ni, ne Pablo gudxi Timoteo gueʼ «caadxi vinu» para guianda (1 Timoteo 5:23; Juan 2:3-11). Peru cadi vinu diʼ que nga ni jma risaca para laacabe. Yanna laanu yaʼ. Xii nga ni jma risaca lu xquendanabáninu.

12, 13. Xiñee naquiiñeʼ guidúʼyanu xii nga ni jma risaca para laanu.

¹² Xiñee naquiiñeʼ guidúʼyanu xii nga ni jma risaca para laanu yaʼ. Pablo guníʼ: «Cani ruyubi ni chuʼlaʼdxi si la? rati» (Romanos 8:6). Pa nabáninu «casi na ique [nu] la?» zanda gunítinu amistad stinu né Jiobá ne laaca zanda gunítinu guendanabani stinu despué. Peru zanda gúninu xiixa ti cadi guizaaca nga. Guiranu zanda guchaʼnu. Guietenaláʼdxinu hombre de Corinto ni guyuuné madrastra stiʼ dede guca expulsar que. Laabe bichaabe, maʼ qué ninabe ninándabe ca cosa malu ni riuuláʼdxibe gúnibe ne bíʼnibe ni ná Jiobá sti biaje, peru maʼ jneza (2 Corintios 2:6-8).

¹³ Neca nagana ni gudiʼdiʼ hombre que purtiʼ bibani «casi na ique», gunda bichaa. Pa ti xpinni Cristo guzulú guni ca cosa malu ni riuulaʼdxiʼ lugar de chinanda ni ná ca ley stiʼ Jiobá la? laaca zanda guchaa. Pa guietenaláʼdxibe conseju stiʼ Pablo zanda gudii ni stipa laabe para guchaabe xpiaʼbe.

14, 15. a) Xii nga ni jma risaca guyúbinu gúninu. b) Xi qué riníʼ guyúbinu gúninu «ni chuʼlaʼdxi Espíritu Santu».

¹⁴ Despué de guníʼ apóstol Pablo de ca peligru ni zanda gapa cani «ruyubi ni chuʼlaʼdxi si la?» bizeeteʼ: «Peru cani ruyubi guni ni chuʼlaʼdxi Espíritu Santu la? ricaa ca enda nabani ne raʼta dxí ladxidóʼ caʼ». Rihuinni dxichi ti regalu sicarú ni.

¹⁵ Peru guyúbinu gúninu «ni chuʼlaʼdxi Espiritu Santu» ca, qué riníʼ ni puru si de Jiobá ne de Biblia nga  guininu guiráʼ ora. Ca xpinni Cristo huabánicaʼ casi ribani xcaadxi binni. Casi ca xpinni Cristo de primé siglu que la? gudocaʼ, güeʼcaʼ, bichaganacaʼ, gúpacaʼ familia ne bíʼnicaʼ dxiiñaʼ (Marcos 6:3; 1 Tesalonicenses 2:9).

16. Xii nga ni jma bisaca para Pablo.

¹⁶ Peru nin Pablo nin xcaadxi xpinni Cristo de primé siglu, qué nudiicaʼ lugar nisaca ca cosa riʼ jma lu xquendanabánicaʼ. Casi apóstol Pablo la? nánnanu biʼniʼ yoo de lari para gapa ni iquiiñeʼ. Peru cadi dxiiñaʼ que diʼ nga ni jma bisaca para laabe. Ni jma bisaca para Pablo nga guni xhiiñaʼ Dios. Jma nga gudixhe íquebe gucheechebe diidxaʼ ne gusiidibe binni (biindaʼ Hechos 18:2-4; 20:20, 21, 34, 35). Ca hermanu de Roma que naquiiñeʼ ninándacaʼ ejemplu stiʼ Pablo, ne ngaca nga naquiiñeʼ gúninu yanna (Romanos 15:15, 16).

17. Xi zápanu pa quixhe íquenu guyúbinu gúninu «ni chuʼlaʼdxi Espiritu Santu».

¹⁷ Xi zabeendunu pa guyúbinu gúninu «ni chuʼlaʼdxi Espiritu Santu» yaʼ. Romanos 8:6 ná: «Cani ruyubi guni ni chuʼlaʼdxi Espíritu Santu la? ricaa ca enda nabani ne raʼta dxí ladxidóʼ caʼ». Ca diidxaʼ riʼ riníʼ cani rudiʼnu lugar iquiiñeʼ Jiobá espíritu stiʼ para guluíʼ laanu xi gúninu ti guizíʼdinu guiníʼ íquenu casi laa. Rudii stiidxaʼ Jiobá laanu zabáninu nayecheʼ yanna ne zacaanu guendanabani ni qué zaluxe lu ca dxi ni zeeda ca.

18. Ximodo nga zápanu guendariuudxi pa guyúbinu gúninu ni «chuʼlaʼdxi Espíritu Santu».

¹⁸ Laaca guníʼ Pablo pa guyúbinu gúninu ni «chuʼlaʼdxi Espíritu Santu la?» zatadxí ladxidoʼno. Guiranu caquiiñenu ni, peru jma nga caquiiñeʼ gatadxí xquendabiaaninu. Peru huaxiéʼ si binni ridxela ni. Ximodo nga zápanu guendariuudxi pa guyúbinu gúninu «ni chuʼlaʼdxi Espiritu Santu» yaʼ. Rudiʼnu xquíxepeʼ Jiobá purtiʼ laabe nga zanda quixhedxibe xquendabiaaninu. Laaca zanda gápanu guendariuudxi ndaaniʼ familia stinu ne xcaadxi xpinni Cristo. Cumu guiranu nácanu binni ruchee la? nuu biaje rápanu guendanagana né ca hermanu stinu. Ora guizaaca zacá, rinándanu conseju ni bidii Jesús riʼ: «Uyé biene né ni bichee neu» (Mateo 5:24). Guietenaláʼdxinu laaca cayuni ca hermanu stinu ni ná Jiobá, Dios «ni riguixhe dxí ladxidóʼ no» (Romanos 15:33; 16:20).

19. Tu binni nga ni jma risaca gápanu guendariuudxi né laa.

¹⁹ Pa ruyúbinu gúninu «ni chuʼlaʼdxi Espíritu Santu» la? laaca zápanu guendariuudxi né Dios, ne nga nga ni jma risaca. Profeta Isaías guníʼ zapa Jiobá cani rapa confianza laa ne qué zusaana de quixhedxibe ladxidoʼcaʼ (Isaías 26:3; biindaʼ Romanos 5:1).

20. Xi premiu zacaanu pa chinándanu conseju ni zeeda lu capítulo 8 stiʼ Romanos.

²⁰ Pa cabézanu guibáninu guibáʼ sin gátinu o lu Guidxilayú sin gátinu la? guiranu zanda cueendunu ni galán de conseju zeeda lu capítulo 8 stiʼ Romanos. Riéchenu stale riguu Biblia gana laanu para gucaa íquenu gúninu xhiiñaʼ Jiobá ne cadi gúninu cani riuuláʼdxinu. Pa guyúbinu gúninu «ni chuʼlaʼdxi Espíritu Santu» la? zanda gápanu ti premiu nabé sicarú: ti «enda nabani ni qué zaluxe, pur Cristu Jesús Señor stinu» (Romanos 6:23).