Relatu ni zeeda lu Deuteronomio 22:25-27 riete napa hombre ca donda. Ley bidii Dios ca israelita que bisihuinni qué gapa gunaa ca donda. Guidúʼyanu xiná contextu stiʼ ca versículo riʼ.

Ca versículo ni zeeda ante caníʼcani de ti hombre ni rapa relación sexual né ti gunaa ni maʼ nexheʼ guichaganáʼ «ndaaniʼ guidxi». Dxiqué la? ti gunaa ni maʼ nexheʼ guichaganáʼ, ruuyacabe laa casi ti gunaa ni maʼ bichaganáʼ, nga runi, hombre riʼ napa donda purtiʼ maʼ guendarapa jnadxii nga ni bíʼnibe. ¿Xi guca xa de gunaa que yaʼ? «Qué nuguáʼ ridxi». Purtiʼ pa ñúnibe ni la? ñunadiaga binni laabe ne ñácanecaʼ laabe. Peru cumu qué nucaabe ridxi la? laaca nápabe donda. Nga runi guirópacabe nápacabe donda (Deut. 22:23, 24).

Peru Ley que ruzeeteʼ sti cosa ni zanda guizaaca: «Pa lu ti layú guidxaaga ti hombre ti baʼdudxaapaʼ ni maʼ nexheʼ guichaganáʼ ne gucaa laabe gatanebe laa, naquiiñeʼ gatiʼ hombre ni gutané laabe; cadi gúniluʼ baʼdudxaapaʼ ca gastiʼ. Cadi naquiiñeʼ gátibe purtiʼ qué ñuni cometerbe xiixa pecadu. Ndiʼ nga naquiiñeʼ gaca ora guniná ne guuti ti hombre prójimo stiʼ. Purtiʼ lu layú nga bizaaca ni ne baʼdudxaapaʼ ni maʼ nexheʼ guichaganáʼ riʼ biguáʼ ridxi, peru guirutiʼ ñacané laa» (Deut. 22:25-27).

Ora rizaaca ni bizéʼtenu riʼ, runi cré ca juez que gunaa riʼ. Purtiʼ guníʼ íquecaʼ biguaʼbe «ridxi, peru guirutiʼ ñacané» laabe. Nga runi cadi guendarapa jnadxii nga ni bíʼnibe. Peru napa hombre que donda. ¿Xiñee yaʼ? Purtiʼ gulaxoobe gunaa que ne pur ni ná Ley que maʼ nápabe jnaadxibe.

Gucané Ley que guihuinni qué gapa gunaa que donda, ne hombre ca nga napa donda purtiʼ gulaxoo laabe ne pur ni ná Ley que maʼ nápabe jnaadxibe. Nanna dxíchinu biʼniʼ investigar chaahuiʼ ca juez que xi peʼ guca ne yenándacaʼ ca instrucción ni maca bidii Dios para guicaacaʼ ti decisión (Éx. 20:14; Deut. 13:14; 17:4).