¿Ñee zanda guicábiluʼ ca pregunta ni beeda lu ca últimu tema stiʼ revista Torre stiʼ ni rapa de 2019 la?

¿Xi raca significar promesa ni biʼniʼ Dios riʼ: «Intiica guiibaʼ gúnicabe para gucaalúcabe lii, qué zabeendunedícabe ni gastiʼ»? (Is. 54:17).

Nánnanu rapa Jehová laanu «ora rucaalú ca binni malu» laanu (Is. 25:4, 5). Ne zedandá dxi ra maʼ qué zuniná ca enemigu stinu laanu (w19.01, yaza 6 ne 7).

¿Ximodo rusihuinni Dios runi ni jneza pur modo biʼniʼ tratar ca cananeu ne ca israelita rebelde?

Biʼniʼ castigar Dios ca ni biʼniʼ practicar actu sexual yuudxuʼ ne ca ni bininá ca gunaa ne ca baʼduhuiiniʼ. Peru guluu ndaayabe ca ni bizuubaʼ diidxaʼ ne ca ni biʼniʼ ni jneza (w19.02, yaza 22 ne 23).

¿Xi gúninu pa tuuxa ni cadi naca Testigu guni ti oración nezalunu?

Ni jma jneza nga cadi guininu gastiʼ ne gusihuínninu respetu. Cadi naquiiñeʼ guininu «amén» ne cadi naquiiñeʼ guinaazenu náʼ ca binni ca ora cayaca ti oración. Zanda guicaanu decisión de gúninu oración stinu aparte (w19.03, yaza 31).

¿Pabiáʼ malu nga guni abusar tuuxa de ti menor?

Guni abusar tuuxa de ti menor la? ti pecadu ni contra xcuidihuiiniʼ ca, contra congregación, contra ca autoridad ne contra Dios. Ca lugar ra nuu ley para guni denunciárcabe ti supuestu abuso de menor nezalú autoridad la? ruzuubaʼ ca ancianu diidxaʼ (w19.05, yaza 9 ne 10).

¿Ximodo guchaʼnu stipa ni runiibi xquendabiaaninu?

Naquiiñeʼ gúninu chonna cosa risaca: guni orarnu Jehová, guni meditarnu para guiduʼyaʼ chaahuinu ximodo nácanu pur dentru ne guiduʼyaʼ chaahuinu tu gaca xhamígunu (w19.06, yaza 11).

¿Ximodo chuʼnu listu dede ca yanna para ora sanándacabe laanu?

Naquiiñeʼ guyúbinu gaca amistad ni nápanu né Jehová jma naguidxi, gápanu confianza laa de guidubi ladxidoʼno, ne cadi lica guiaandaʼ laanu guizáʼ nadxiibe laanu ne qué ziuudxí gusaanabe laanu, guidúʼndanu Biblia guiráʼ dxi ne cadi gusaana de guni orarnu. Naquiiñeʼ gánnanu dxandíʼ zaca cumplir ca promesa stiʼ Reinu, guizíʼdinu ca textu ni jma riuuláʼdxinu ne ca canción stiʼ Reinu para gusisácanu Jehová (w19.07, yaza 2 hasta 4).

¿Xi zanda gúninu para gacanenu familia stinu guilá?

Nabé risaca guiénenu laacabe, gácanu ti ejemplu galán, gápanu paciencia ne gácanu nadóʼ (w19.08, yaza 15 hasta 17).

Casi ná Mateo 11:28, ¿ximodo racané Jesús laanu para guiziilaʼdxiʼ ladxidoʼno?

Nápanu ca superintendente ni nadxii laanu, ca hermanu ni racané laanu ne nápanu ti dxiiñaʼ nabé galán (w19.09, yaza 23).

¿Ximodo rudii Jehová laanu deseu ne poder para gúninu guiráʼ ni riuulaʼdxiʼ? (Filip. 2:13).

Ora ridúʼndanu Biblia ne runi meditarnu ni nani, rudii Jehová laanu deseu ne poder para gúninu ni riuulaʼdxiʼ. Zudiibe laanu espíritu santu stibe para gúninu ni nabe (w19.10, yaza 21).

¿Xi naquiiñeʼ gúninu ante quixhe íquenu gúninu xiixa?

Naquiiñeʼ gúninu gaayuʼ cosa: guni investigar chaahuinu, guinábanu Jehová gudii laanu sabiduría, guiníʼ íquenu xiñee cayúninu xiixa, gucaʼnu ni naguixhe íquenu gúninu, chinándanu ni ne naquiiñeʼ gánnanu nuu cosa ni zanda ne ni qué zanda gúninu (w19.11, yaza 27 hasta 29).

Ora gudxi Binidxabaʼ Eva qué zati, ¿ñee cayábibe laa de ti alma ni qué rati, casi runi cré stale binni yanna la?

Ruluíʼ coʼ. Qué ñabi Binidxabaʼ Eva zati cuerpu stiʼ peru zabani alma stiʼ sti lugar. Ni gúdxibe laa nga qué zati. Ni nánnanu nga binitilú guiráʼ ca ni rusiidiʼ religión falsu dxi guca Diluvio. Zándaca biasastí creencia falsu ni ná napa binni ti alma ni qué rati ante gucheeche Jehová ca binni ni cucuí torre de Babel (w19.12, yaza 15).