1, 2. a) ¿Xii nga jubileo? (Biiyaʼ recuadru ni láʼ « ¿Xii nga Jubileo?»). b) ¿Xidé guníʼ Jesús lu libru stiʼ Lucas 4:16-18?

NDAANIʼ caadxi guidxi, runi binni saa para guni celebrar 50 iza de cayuni mandar ti rey. Runibiáʼcabe saa ca casi jubileo. Ne zanda guindaa saa riʼ ti dxi, ti semana o jma tiempu, peru redandá dxi riluxe ni, ne nagueendaca rusiaandaʼ binni saa riʼ.

² Lu artículo riʼ zazíʼdinu de ti jubileo jma galán que ni biʼniʼ celebrar ca israelita dxiqué. Biʼniʼ celebrar ca israelita Jubileo riʼ cada 50 iza, rindaa saa riʼ ti iza ne luni raca stale binni libre. ¿Xiñee risácani para laanu tiempu riʼ yaʼ? Purtiʼ rusietenaláʼdxini laanu ti cosa galán ni maʼ biʼniʼ Jehová pur laanu ti gácanu libre para siempre. Guníʼ Jesús de libertad riʼ, maʼ nápanu libertad riʼ ne zanda cueendunu stale cosa galán de laani (biindaʼ Lucas 4:16-18).

3. Casi ná Levítico 25:10-12, ¿xi ribeendú ca israelita ora runi celebrarcaʼ Jubileo?

³ Ziene chaahuinu xi nuu Jesús gusiene ora guníʼ de libertad pa guni analizarnu ni biʼniʼ mandar Dios ca israelita gúnicaʼ ora maʼ cayuni celebrarcaʼ Jubileo. Sicaríʼ guníʼ Dios: «Caquiiñeʼ guni santificartu iza 50 ne guiniʼtu libre binni nabeza lu guidubi Guidxilayú. Zácani ti Jubileo para laatu, ne cada tobi de laatu zabiguetaʼ ra nuu layú stiʼ ne cada tobi de laatu zabiguetaʼ ra nuu familia stiʼ» (biindaʼ Levítico 25:10-12; 25:8, 9). Lu artículo ni gudiʼdiʼ ca bizíʼdinu xi ribeendú ca israelita ora riziiláʼdxicaʼ sábadu stiʼ cada semana. Ne lu artículo riʼ zazíʼdinu xi guleendúcabe  ora rúnicabe Jubileo. Guzéʼtenu caadxi ejemplu. Dxiqué, pa nuzaabiʼ ti israelita bueltu ti binni ne bitoo layú stiʼ para gudixe ra nuzaabiʼ. Lu iza ra raca celebrar Jubileo, rudxiguétacabe laabe layú ni bitoobe que. Nga runi, ricaa hombre riʼ layú stiʼ sti biaje, ne zacá qué riniti herencia stiʼ ca xiiñibe. O guxuíʼlunu qué gapa ti israelita bueltu para quixe ra nuzaabiʼ, ne pur nga bitoo tobi de ca xiiñiʼ o bitoo laca laa para gaca esclavu. Peru lu iza ra raca celebrar Jubileo, ribiguetaʼ esclavu ca «ra nuu familia stiʼ». Zaqué nin ti esclavu qué runiti esperanza de gaca libre. ¿Cadi dxandíʼ rusihuinni guiráʼ ni bizéʼtenu riʼ rizaalaʼdxiʼ Jehová ca xpinni la?

4, 5. ¿Xiñee caquiiñeʼ guizaaláʼdxinu gánnanu jma de Jubileo?

⁴ ¿Xi sti cosa ribeendú ca israelita ora rúnicaʼ Jubileo yaʼ? Jehová guníʼ: «Nin tobi de laatu cadi naquiiñeʼ gaca pobre, purtiʼ dxandipeʼ zaguu Jehová ndaayaʼ laatu lu layú ni cudii Jehová, Dios stitu laatu casi herencia» (Deut. 15:4). Rihuinni dxichi maʼ gadxé ni cayaca tiempu riʼ, purtiʼ ca binni ricu rácacaʼ jma ricu, ne ca binni pobre rácacaʼ jma pobre.

⁵ Laanu ca xpinni Cristu qué rinándanu Ley stiʼ Moisés. Nga riníʼ qué rinándanu ley ni ná caquiiñeʼ guni liberarnu ti esclavu, maʼ cadi guni cobrarnu ni nuzaabicabe laanu ne gudxiguétanu layú stiʼ ti binni (Rom. 7:4; 10:4; Efes. 2:15). Peru nápanu razón para guizaaláʼdxinu gánnanu jma de Jubileo. ¿Xiñee yaʼ? Purtiʼ rusietenaláʼdxini laanu zanda gácanu libre cásica guca ca israelita dxi biʼniʼ celebrarcaʼ Jubileo.

6. ¿Xiñee caquiiñeʼ gácanu libre?

⁶ ¿Xiñee caquiiñeʼ gácanu libre yaʼ? Purtiʼ nácanu esclavu stiʼ pecadu. Nga runi rióxhonu, raca huaranu ne rátinu. Rudiʼnu cuenta nácanu esclavu stiʼ pecadu ora ridúʼyanu laanu lu ti espeju ne ora riuunu ra nuu doctor purtiʼ huaranu. Laaca riuʼnu xizaa ora rúninu xiixa pecadu. Apóstol Pablo guníʼ nuseguyoo «ley stiʼ pecadu ni  nuu lu cuerpu» stiʼ laa. Ne laaca guníʼ: «¡Aque naná nuaaʼ xa! Yanna, ¿tuu ndiʼ zanda gulá naa de cuerpu ni cayati riʼ yaʼ?» (Rom. 7:23, 24).

7. ¿Xi guníʼ Isaías de dxi gaca binni libre?

⁷ Gudixhe chaahuiʼ Jehová ximodo zanda guiree binni de lu náʼ pecadu. Ne nabé risaca ni biʼniʼ Jesús para gaca binni libre. Lu siglu xhono ante de ca dxi stinu, guníʼ profeta Isaías zedandá dxi zaca stale binni libre, ne zácani jma galán que modo gúcani dxi biʼniʼ celebrar ca israelita Jubileo. Sicaríʼ bicaabe: «Luguiaʼyaʼ nuu espíritu stiʼ Jehová, Señor ni jma nandxóʼ, purtiʼ maʼ gulí Jehová naa para guinieeʼ ca noticia galán ra nuu ca binni nadóʼ. Biseendabe naa para guchendaʼ venda ca ni cayuubaʼ ladxidóʼ, para guinieeʼ maʼ chigaca liberar ca ni nuu de esclavu» (Is. 61:1). Guidúʼyanu tudé caníʼ profecía riʼ.

8. ¿Tudé caníʼ profecía stiʼ Isaías ni ná zaca binni libre despué?

⁸ Bizulú guca cumplir profecía ni guníʼ Isaías despué de bizulú Jesús ministeriu stiʼ. Dxi guyebe ndaaniʼ sinagoga nuu ndaaniʼ guidxi Nazaret, ra biniisibe, biindabe profecía riʼ nezalú ca judíu nuu raqué: «Nuu espíritu stiʼ Jehová luguiaʼyaʼ, purtiʼ maʼ gulibe naa para güeniáʼ ca pobre ca noticia galán. Biseendabe naa para guinieeʼ maʼ chigaca liberar ca ni deguyoo ne para guinieeʼ maʼ chiguuya ca ciegu, ne para guneʼ liberar ca ni cayacaná, para guneʼ predicar iza cayuni aceptar Jehová» (Luc. 4:16-19). Despué gudxi Jesús laacabe cayaca cumplir profecía que luguiáʼ. Peru ¿ximodo guca cumplir profecía riʼ luguiáʼ Jesús yaʼ?

9. ¿Xi liberación cabeza ca binni ni bibani tiempu stiʼ Jesús?

⁹ Lu primé siglu bizulú guca binni libre pur profecía ni guníʼ Isaías ne laani nga biʼndaʼ Jesús. Zacá guca ni pur ca diidxaʼ guníʼ Jesús riʼ: «Yannadxí cayaca cumplir parte de Stiidxaʼ Dios ni binadiágatu riʼ» (Luc. 4:21). Stale de ca binni ni bicaadiaga Jesús gúpacaʼ esperanza zedandá dxi maʼ qué zuni mandar gobiernu stiʼ Roma laacaʼ. Ne zándaca zacaca guníʼ ique caadxi de ca discípulo stiʼ Jesús, purtiʼ gudiʼdiʼ si tiempu, chupa de laacabe guníʼ: «Laandadu cabézadu laabe para gúnibe binni Israel libre» (Luc. 24:13, 21). Peru gudxi Jesús laacabe cadi gucaalúcabe ca  romanu neca cuquiichinacaʼ laacabe. Jesús gudxi laacabe «laquixe César stiʼ César» (Mat. 22:21). Peru ¿ximodo gucané Jesús binni de tiempu stiʼ para gácacaʼ libre yaʼ?

10. ¿Ximodo gucané Jesús binni gaca libre?

¹⁰ Beeda Xiiñiʼ Dios lu Guidxilayú riʼ para gacané binni gaca libre de chupa cosa. Primeru la? gucané Jesús ca binni que cadi chinándacaʼ guiráʼ cosa ni cadi jneza rusiidiʼ ca xaíque yuʼduʼ. Purtiʼ stale judíu nácacaʼ esclavu stiʼ ca costumbre ne ca cosa ni cadi dxandíʼ runi cré binni (Mat. 5:31-37; 15:1-11). Ca binni ni ná racané xcaadxi guni ni ná Dios qué ñúnicaʼ ni, nga runi casi ñaca nacheepaʼ lucaʼ. Ra bicaanácabe Mesías ne biaaniʼ espiritual stiʼ, biaanacabe lu guelacahui ne biaanacabe lu náʼ pecadu (Juan 9:1, 14-16, 35-41). Bisiidiʼ Jesús ni dxandíʼ ne guca ti ejemplu, biluiʼbe ca binni humilde xi zanda gúnicaʼ para cadi chinándacaʼ ca cosa ni cadi jneza rusiidiʼ ca xaíque yuʼduʼ que (Mar. 1:22; 2:23–3:5).

11. ¿Ximodo gucané Jesús binni gaca libre de lu náʼ pecadu?

¹¹ Guiropa, gucané Jesús binni gaca libre de lu náʼ pecadu. Ra gútibe pur laanu, runi perdonar Dios pecadu stiʼ binni ni runi cré guti Jesús pur laa ne rusihuínnini pur modo nabani (Heb. 10:12-18). Jesús guníʼ: «Pa guni Xiiñiʼ Dios laatu libre la? dxandíʼ peʼ zácatu libre» (Juan 8:36). Jma galán libertad riʼ que libertad ni ricaa ca israelita que lu iza de Jubileo. Guzéʼtenu ti ejemplu, ti binni ni raca libre ora raca celebrar Jubileo dxiqué zanda gaca esclavu sti biaje, ne zedandá dxi laaca zati.

12. ¿Tuu nga ca primé binni ni guca libre casi maca guníʼ Jesús?

¹² Lu Pentecostés stiʼ iza 33, biʼniʼ ungir Jehová ca apóstol ne xcaadxi binni ni bizuubaʼ diidxaʼ né espíritu santu stiʼ. Gucuaabe laacaʼ casi xiiñibe, nga runi ra tidiʼ tiempu ziásacaʼ de lade gueʼtuʼ para guni mandárnecaʼ Jesús guibáʼ (Rom. 8:2, 15-17). Dxi guyé Jesús ra sinagoga ndaaniʼ guidxi Nazaret guníʼ zaca binni libre, ne ca hombre ne ca gunaa ni guca ungir né espíritu santu riʼ nga ca primé binni ni guca libre. Maʼ cadi nácacabe esclavu stiʼ costumbre ne ca cosa ni cadi dxandíʼ rusiidiʼ ca xaíque yuʼduʼ. Ne para Jehová laaca maʼ bilácabe de lu náʼ pecadu ne guendaguti. Bizulú Jubileo simbólico lu iza 33 dxi guca ungir ca xpinni Cristu ne zaluxe ni ra guiluxe guni mandar Jesús lu  ti mil iza. ¿Xi huabeendú binni dede dxi que yaʼ?

13, 14. A parte de ca ungidu, ¿turuʼ zanda gaca libre?

¹³ Tiempu riʼ, millón de binni ni nuu lu guidubi Guidxilayú zeeda gácacaʼ parte de «xcaadxi dendxuʼ» (Juan 10:16). Qué nibí Jehová laacabe para guni mandarnécabe Jesús guibáʼ, sínuque nápacabe esperanza de guibánicabe ndaaniʼ Guidxilayú riʼ para siempre casi riete lu Biblia. ¿Ñee cadi dxandíʼ laani nga ni cabézanu la?

¹⁴ Maʼ cacaanu caadxi cosa galán ni cacaa ca ni chiguni mandarné Jesús guibáʼ. Guzéʼtenu ti ejemplu, zanda guinábanu perdón ora gúninu xiixa pecadu purtiʼ runi crenu guti Jesús pur laanu. Nga runi, riuulaʼdxiʼ Dios ni rúninu ne nápanu ti conciencia nayá (Efes. 1:7; Apoc. 7:14, 15). Guiníʼ íquenu guiráʼ cosa galán ni huabeendunu purtiʼ maʼ nácanu libre de ca cosa ni cadi dxandíʼ biʼniʼ crenu dxiqué. Nga runi Jesús guníʼ: «Zunibiaʼtu ni dxandíʼ, ne zuni ni dxandíʼ riʼ laatu libre» (Juan 8:32). Nabé riéchenu purtiʼ nápanu libertad riʼ.

15. ¿Xi libertad zacaanu lu ca dxi ni zeeda ca, ne xi ndaayaʼ zacaanu?

¹⁵ Zacaanu jma libertad lu ca dxi ni zeeda ca. Maʼ cadi candaa zunitilú Jesús religión  falsu ne ca gobiernu ni qué runi ni jneza nuu lu Guidxilayú riʼ. Zapa Jehová guiráʼ ca xpinni ne zaguu ndaayaʼ laacabe ora gaca Guidxilayú riʼ ti paraísu (Apoc. 7:9, 14). Laaca zandísabe stale binni ni maʼ gutiʼ. Ca binni ni quixhe ique guni ni ná Dios maʼ qué zaca huaracaʼ, qué zióʼxhocaʼ ne qué záticaʼ pur pecadu ni bisaana Adán (Hech. 24:15).

16. ¿Xi libertad jma galán cabeza guiráʼ binni?

¹⁶ Ora guni mandar Jesús né ca xpinni lu ti mil iza la? zacanécabe binni para maʼ cadi chuʼ dxi gaca huaracaʼ ne gácacaʼ xiiñiʼ Dios sti biaje. Libertad ni gapa binni ora guni mandar Jesús lu ti mil iza, zeeda gácani casi libertad ni gupa ca israelita dxi biʼniʼ celebrarcaʼ Jubileo. Ne óraca, guiráʼ ca binni ni guzuubaʼ diidxaʼ zácacaʼ perfectu. Ne zareecaʼ de lu náʼ pecadu.

17. Casi ná Isaías 65:21-23, ¿ximodo zabani ca xpinni Dios? (Biiyaʼ dibuju ni zeeda lu portada).

¹⁷ Lu Isaías 65:21-23 (biindaʼ ni) riete ximodo zabani binni lu Guidxilayú riʼ. Ziuu stale ni guni ca xpinni Dios tiempu ca. Purtiʼ lu Biblia ná zúnicaʼ dxiiñaʼ galán ne ni riuuláʼdxicaʼ. Zanda chuʼnu seguru, ra guiluxe ti mil iza de guni mandar Cristu, «maʼ qué zaca creación esclavu stiʼ pecadu ne guendaguti ne zaca ni libre cásica ca xiiñiʼ Dios» (Rom. 8:21).

18. ¿Xiñee zanda gápanu confianza zabáninu galán lu ca dxi ni zeeda ca?

¹⁸ Gudxi Jehová ca israelita cueecaʼ tiempu para gúnicaʼ dxiiñaʼ ne guiziiláʼdxicaʼ, ne laaca ngaca zúnibe né ca xpínnibe ora guni mandar Cristu lu ti mil iza. Zanda chuʼnu seguru zabee ca xpinni Dios tiempu para ca cosa espiritual. Purtiʼ cásica rúninu tiempu riʼ, laaca caquiiñeʼ guni adorarnu Dios ndaaniʼ guidxilayú cubi para guibáninu nayecheʼ. Ne guiráʼ ca ni guzuubaʼ diidxaʼ zabánicaʼ nayecheʼ purtiʼ zúnicaʼ dxiiñaʼ ni gusiecheʼ laacaʼ ne zúnicaʼ ni ná Jehová.