Cadi nga diʼ nga ni caniʼni. Ni caníʼ versículo riʼ nga de tuuxa ni riaba stale biaje pur ca problema ni ridxaagalú ne riasa sti biaje o runi huantar ca ni cadiʼdiʼ.

Guidúʼyanu contextu stiʼ versículo riʼ: «Cadi quíxheluʼ trampa ti binni runi ni jneza gaxha de ra lidxi para guninaluʼ laa, cadi gunideluʼ lugar ra riziilaʼdxiʼ. Purtiʼ neca guiaba ti binni runi ni jneza gadxe biaje, ziásabe sti biaje, peru binni malu ziaba pur guendananá gueeda luguiáʼ. Ora guiaba enemigu stiluʼ, cadi guiécheluʼ, ne ora guirenda ñeebe, cadi guiecheʼ ladxidoʼloʼ» (Prov. 24:15-17).

Nuu tu ná caníʼ versículo 16 de ti binni ni riaba lu pecadu peru zanda chuʼ gaxha de Dios sti biaje. Chupa sacerdote británico ná «stale predicador de dxiqué ne de tiempu riʼ zacá rusiénecabe ni». Laaca guníʼ ca sacerdote riʼ caníʼ versículo riʼ «zanda guni cometer ti hombre nachaʼhuiʼ pecadu grave, peru qué rusaana Dios de gannaxhii laa, ne runi perdonar laa cada biaje gaca arrepentir». Ni rusiidicabe riʼ riuulaʼdxiʼ ca binni ni qué racalaʼdxiʼ guni stipa pur cadi guni pecar, purtiʼ zanda guiníʼ íquecaʼ neca gucheecaʼ stale biaje zuni perdonar Dios laacaʼ.

Cadi nga diʼ nga ni rusiidiʼ versículo 16.

Diidxaʼ hebreu «guiaba» ni zeeda lu versículo 16 ne 17 nápani stale significadu. Zándaca caniʼni de guiaba tuuxa layú, guiaba ti yuze, guiaba tuuxa de ique yoo o guiaba ti guié huiiniʼ layú (Deut. 22:4, 8; Amós 9:9). Peru laaca zanda guiénenu diidxaʼ riʼ sicaríʼ: «Ora riuulaʼdxiʼ Jehová neza stiʼ ti hombre, rábibe laa ximodo sáʼ. Neca guiaba, qué ziaana layú, purtiʼ naaze Jehová náʼ» (Sal. 37:23, 24; Prov. 11:5; 17:20).

Sicaríʼ guníʼ profesor Edward H. Plumptre: «Diidxaʼ hebreu guiaba cadi caníʼ diʼ ni de guiaba tuuxa lu pecadu». Ne sti hombre ni nanna de Biblia sicaríʼ guníʼ de versículo 16: «Pur gana nga chuʼ tu guniná xquidxi Dios purtiʼ laacaʼ zalacaʼ; peru ca binni malu coʼ».

Nga runi, Proverbios 24:16 cadi caníʼ diʼ ni de «guiaba» tuuxa lu pecadu. Caniʼni tidiʼ binni lu guendanagana stale biaje. Ndaaniʼ Guidxilayú riʼ, zanda gaca huará ti binni nachaʼhuiʼ o gapa xcaadxi guendanagana, o dede sananda gobiernu laa. Peru zanda gápabe confianza zacané Dios laabe ne zacané laabe gudxiilube ca guendanagana stibe. ¿Cadi dxandíʼ stale biaje ora runi ca xpinni Dios xiixa rireeni jneza la? ¿Xiñee yaʼ? Biblia ná «naaze Jehová ca ni mayaca guiaba ne racanebe ca ni maʼ caguude deche» (Sal. 41:1-3; 145:14-19).

Nga runi, «ti binni runi ni jneza» qué riecheʼ ora napa xcaadxi guendanagana. Riéchebe purtiʼ nánnabe «jma galán zieni ca ni ridxibi Dios ni dxandíʼ, purtiʼ ridxíbicaʼ laabe» (Ecl. 8:11-13; Job 31:3-6; Sal. 27:5, 6).