¿Ñee maʼ biindaluʼ ca últimu tema ni bedané revista Torre stiʼ ni rapa la? Yanna biiyaʼ pa zanda guicábiluʼ ca pregunta riʼ:

¿Ximodo caquiiñeʼ guni tratarnu ca ungidu?

Rusisácanu fe nápacabe Jehová, peru qué runi tratarnu laacabe casi runi tratárcabe ti binni risaca. Qué riguʼnu «naróʼ» stícabe (Jud. 16). Ne qué rinabadiidxanu laacabe cosa de esperanza nápacabe (w20.01, yaza 28).

¿Xiñee nanna dxíchinu ruuyaʼ Jehová cada tobi de laanu?

Biblia ná dede ante gálenu mápeca biiyaʼ Jehová laanu ne rucaadiágabe ca oración ni rúninu. Laaca nánnabe xi nuu ndaaniʼ ladxidoʼno ne nánnabe xi riníʼ íquenu. Nga runi, pur ni gúninu, zanda cuʼnu Jehová triste o gusiéchenu laa (1 Crón. 28:9; Prov. 27:11). Ne cadi guiaandaʼ laanu laabe nga gulídxibe laanu ra nuube (w20.02, yaza 12).

¿Pora nga caquiiñeʼ guininu ne pora jma jneza cadi guininu?

Riuʼnu nayecheʼ ora rinínenu xcaadxi binni de Jehová. Ora guidúʼyanu caxeleʼ tuuxa de Jehová laaca naquiiñeʼ guinínenu laa. Rudii ca ancianu conseju ca hermanu ora caquiiñeʼ cani. Qué rinabadiidxanu ximodo peʼ raca xhiiñaʼ Dios ndaaniʼ ti guidxi ra rucueezacabe dxiiñaʼ stiʼ ca Testigu. Laaca qué rininu gastiʼ ora nánnanu xiixa ni cadi naquiiñeʼ ganna ca hermanu de congregación (w20.03, yaza 20 ne 21).

¿Xi diferencia napa ca langosta ni riete lu Joel capítulo 2 né ca langosta ni riete lu Apocalipsis capítulo 9?

Lu Joel 2:20-29 riete riné Jehová ca langosta zitu ne cayuni prometerbe zudxiguétabe guiráʼ ni binitilú ca langosta. Despué zudiibe espíritu stibe. Guca cumplir ca diidxaʼ riʼ dxi biʼniʼ invadir ca babilonio guidxi Israel ne laaca zaca cumplir ni despué. Lu Apocalipsis 9:1-11 riete zeeda gaca ca ungidu casi langosta purtiʼ caniʼcaʼ né stale valor zusabanáʼ Dios binni malu ne ndiʼ ruchiichi ca binni ni zinanda guidxilayú riʼ (w20.04, yaza 3 hasta 6).

¿Tuu nga «rey del norte» tiempu riʼ?

Rusia ne ca xpinni. Cucaalúcabe xquidxi Dios ne cayuni prohibírcabe predicación stinu ne nanaláʼdxicabe Testigu. Siempre huadinde rey del norte ne rey del sur (w20.05, yaza 13).

¿Ñee lista si de ca cualidad ni riete lu Gálatas 5:22 ne 23 nga «ca cualidad stiʼ espíritu» la?

Coʼ. Laaca racané espíritu stiʼ Dios laanu guni cultivarnu xcaadxi cualidad casi gúninu ni jneza (Efes. 5:8, 9) (w20.06, yaza 17).

¿Xiñee naquiiñeʼ gápanu cuidadu pa rudxíʼbanu foto, videu ne ca comentariu ni rúninu lu ca red social?

Ni rudxíʼbanu lu ca red social zándaca gusihuínnicani cayuni presumirnu ne cadi cusihuínninu humilde laanu (w20.07, yaza 6 ne 7).

¿Xi zanda guizíʼdinu de ca buen pescador?

Ca buen pescador rúnicaʼ dxiiñaʼ nadipaʼ hora ne lugar ra zanda guidxélacaʼ benda, nánnacaʼ iquiiñecaʼ herramienta sticaʼ ne rúnicaʼ dxiiñaʼ né stale valor ora tiica si. Zacaca naquiiñeʼ gúninu ora guni predicarnu (w20.09, yaza 5).

¿Ximodo zanda gacanenu ca estudiante stinu gannaxhiicaʼ Dios jma?

Zanda guni animarnu laacaʼ gúʼndacaʼ Biblia guiráʼ dxi, gacanenu laacaʼ guni meditarcaʼ ne gusíʼdinu laacaʼ guni orarcaʼ Jehová (w20.11, yaza 4).

¿Tudé caníʼ Pablo ora guníʼ «zabani guiráʼ binni pur Cristu»? (1 Cor. 15:22).

Cadi caníʼ diʼ apóstol Pablo ziasa guiráʼ binni de lade gueʼtuʼ, sínuque caniʼbe de ca ungidu, «ca ni maʼ guleechú Dios para chuʼ tobi si né Cristu Jesús» (1 Cor. 1:2; 15:18) (w20.12, yaza 5 ne 6).

¿Xi chiguni ca ungidu guibáʼ, despué de guidxaacaʼ «biaʼ riguiñe laga si binni, ora maʼ xhidxi últimu trompeta»? (1 Corintios 15:51, 53).

Zacanecaʼ Jesús, zuni mandarcaʼ guiráʼ guidxi «né vara de guiibaʼ» (Apoc. 2:26, 27) (w20.12, yaza 12 ne 13).