¿Ñee maʼ nuuluʼ listu para guni heredarluʼ Guidxilayú la?
GUIRANU maʼ racaláʼdxinu gaca cumplir promesa ni biʼniʼ Jesús, ni ná: «Dichoso ca ni nadóʼ, purtiʼ zuni heredarcaʼ guidxilayú» (Mat. 5:5). Ca xpinni Cristu ungidu zuni heredarcaʼ Guidxilayú ora gácacaʼ rey guibáʼ né Jesús (Apoc. 5:10; 20:6). Maʼ racalaʼdxiʼ stale xpinni Cristu guicaacaʼ Guidxilayú ne guibánicaʼ luni para siempre. Tiempu ca zácacaʼ perfectu, zabánicaʼ nayecheʼ ne zápacaʼ paz. Para gaca cumplir promesa riʼ napa xidé gúnicaʼ caadxi cosa. Lu artículo riʼ zazíʼdinu chonna de laacani: zacanecaʼ gaca Guidxilayú riʼ ti paraísu, zacanecaʼ ca binni ni guiasa de lade gueʼtuʼ ne zusiidicaʼ laacabe. Laaca zadúʼyanu xi zanda gúniluʼ dede ca yanna para gusihuínniluʼ racaláʼdxiluʼ gúniluʼ ca cosa riʼ ndaaniʼ guidxilayú cubi.
¿ÑEE MAʼ NUULUʼ LISTU PARA GACANELUʼ GACA GUIDXILAYÚ RIʼ TI PARAÍSU LA?
Dxi gudxi Jehová binni «laguchá guidxilayú riʼ ne laguni dxiiñaʼ luni», bisihuínnibe ziuu ti dxi zaca Guidxilayú riʼ ti paraísu (Gén. 1:28). Ca binni ni guibani para siempre zuni cumplircaʼ mandatu ni guníʼ Jehová maʼ xadxí. Tiidiʼ si Armagedón cadi maca diʼ nuu ti paraísu ra chúʼcabe, purtiʼ jardín ni guyuu Edén que bixiani maʼ raca stale iza. Napa xidé guiá ra maʼ biʼniʼ biidiʼ binni. ¡Ti dxiiñaʼ guizáʼ naroʼbaʼ!
Zacagá biʼniʼ ca israelita ni biree de Babilonia ne biguetaʼ xquidxi despué de 70 iza. Peru zanda guni chaahuicabe xquídxicabe pa gacané Jehová laacabe, cásica guníʼ Isaías ni. Laa bizeeteʼ: «Zúnibe desiertu stiʼ casi Edén ne layú napampa stini zaca casi jardín stiʼ Jehová» (Is. 51:3). Gunda biʼniʼ ca israelita guidxi que ti lugar sicarú. Zaqueca nga né ndaayaʼ stiʼ Jehová, ca binni ni guni heredar Guidxilayú riʼ zúnicaʼ ni ti lugar sicarú. Ne dede ca yanna nuu cosa ni zanda gúniluʼ para gusihuínniluʼ racaláʼdxiluʼ gúniluʼ dxiiñaʼ ca.
Caadxi de ca cosa ni zanda gúniluʼ nga gusialuʼ ra lídxiluʼ, patiu stiluʼ ne quixheʼ chaahuiluʼ ca cosa stiluʼ dede ra gándatiʼ. Ne zanda gúniluʼ ni neca ca vecinu stiluʼ qué rusiacaʼ ra lídxicaʼ. Laaca zanda gacaneluʼ guiá ne guicaa mantenimientu Yoo stiʼ Reinu ne Salón de Asamblea. Ne pa nuu lu naluʼ gúniluʼ ni la? zanda chigacaneluʼ lu ca labor de socorro. Zacá zusihuínniluʼ dxandíʼ racaláʼdxiluʼ gacaneluʼ ca ni caquiiñeʼ ni. Guníʼ ique ndiʼ: «¿Ñee zanda guiziideʼ ti dxiiñaʼ ni zanda guneʼ ndaaniʼ guidxilayú cubi ca pa gudii Jehová lugar naa guneʼ heredar ni la?».
¿ÑEE MAʼ NUULUʼ LISTU PARA GACANELUʼ CA NI GUIASA DE LADE GUEʼTUʼ LA?
Despué de bisibani Jesús xiiñiʼ Jairo, guníʼ gudiicabe dxaapahuiiniʼ que ni gó (Mar. 5:42, 43). Qué ñaca nagana para ca binni que nudiicaʼ ni gó ti dxaapahuiiniʼ de 12 iza. Zanda guxuíʼlunu guiráʼ dxiiñaʼ ni chigaca dxi gaca cumplir ca diidxaʼ ni guníʼ Jesús la?: «Zunadiaga guiráʼ ca ni nuu ndaaniʼ baʼ voz stibe ne zareecaʼ» (Juan 5:28, 29). Neca qué ruzeeteʼ peʼ Biblia de laani, peru zanda guiníʼ íquenu zaquiiñeʼ ca ni guiasa de lade gueʼtuʼ guendaró, ra cuézacaʼ ne lari. ¿Ñee zanda gusihuínniluʼ dede ca yanna racaláʼdxiluʼ gacaneluʼ la? Guníʼ ique ca pregunta riʼ.
¿Xi zanda gúniluʼ dede ca yanna para gusihuínniluʼ racaláʼdxiluʼ guni heredarluʼ Guidxilayú?
Ora gábicabe laanu ndaaniʼ congregación chigueeda superintendente de circuito, ¿ñee rucaaluʼ laluʼ para guni invitarluʼ laabe ti guendaró la? Ora gaca reasignar ti betelita o ti superintendente de circuito, ¿ñee zanda gacaneluʼ laacabe guidxélacabe ti lugar ra cuézacabe la? Pa chigaca ti asamblea regional o especial gaxha de ra nabézaluʼ, ¿ñee zanda gacaneluʼ ante o despué de asamblea ca o guidxaagaluluʼ ca hermanu ni cheʼ la?
¿ÑEE MAʼ NUULUʼ LISTU PARA GUSIIDILUʼ CA NI GUIASA DE LADE GUEʼTUʼ LA?
Ni ná Hechos 24:15 rucaani laanu guiníʼ íquenu ziasa millón binni de lade gueʼtuʼ. Stale de laacabe qué niziidicabe de Jehová ante gáticabe, peru lu guidxilayú cubi ca maʼ zúnicabe ni. a Ca xpinni Jehová ni maʼ ziné stale iza de cayuni ni nabe zusiidicaʼ ca binni ni guiasa (Is. 11:9). Charlotte, ti hermana ni maʼ biʼniʼ predicar Europa, Sudamérica ne África, guizáʼ maʼ racalaʼdxiʼ guedandá dxi ca. Né guendanayecheʼ guniʼbe: «Guizáʼ maʼ racalaʼdxeʼ gusiideʼ ca binni ni guiasa de lade gueʼtuʼ. Ora ruundaʼ de tuuxa ni bibani dxiqué riníʼ iqueʼ: “Pa ñunibiaʼ binni ca Jehová maʼ gadxé modo nibani”. Guizáʼ maʼ racalaʼdxeʼ gusiideʼ laacabe ni ná Biblia».
Dede né ca xpinni Jehová ni bibani ante gueeda Jesús lu Guidxilayú napa xidé guiziidicaʼ. Ziéchenu gusíʼdinu Daniel ximodo guca cumplir ca profecía ni bicaa, ni maʼ qué ñene (Dan. 12:8). ¿O ruxuíʼluluʼ pabiáʼ galán gacanenu Rut ne Noemí guiénecaʼ tobi ni zá de laacaʼ beeda gaca Mesías la? Guizáʼ sicarú zaca dxi maʼ gusíʼdinu stale binni de Dios ne maʼ qué ziuu cosa malu ni guchiiñaʼ laanu.
¿Ximodo zanda gusihuínniluʼ racaláʼdxiluʼ gusiidiluʼ binni de Dios ndaaniʼ guidxilayú cubi ca? Ti modo zanda gusihuínniluʼ ni nga ra gusiidiluʼ jma jneza ne gatigá guni predicarluʼ (Mat. 24:14). Neca qué randa runi predicarluʼ pur maʼ huaniisiluʼ o pur sti cosa, zanda gusihuínniluʼ racaláʼdxiluʼ gusiidiluʼ ca ni guiasa de lade gueʼtuʼ ra gúniluʼ stipa guni predicarluʼ dede ca yanna.
Yanna, ¿ñee dxandíʼ racaláʼdxiluʼ guni heredarluʼ Guidxilayú riʼ la?, ¿ñee riécheluʼ ora riníʼ íqueluʼ zanda gacaneluʼ para gaca Guidxilayú riʼ ti paraísu, gacaneluʼ ca ni guiasa de lade gueʼtuʼ ne gusiidiluʼ laacabe ni dxandíʼ rusiidiʼ Biblia la? Zusihuínniluʼ maʼ nuuluʼ listu pa dede ca yanna gúniluʼ caadxi cosa ni chigaca ora guni heredarluʼ Guidxilayú riʼ.
a Biiyaʼ artículo ni láʼ «Zinécabe “stale binni lu neza stiʼ justicia”» ni biree lu Torre stiʼ ni rapa septiembre de 2022.
