1. ¿Xi runi Jehová stale biaje para guicabi ca oración stiʼ ca xpinni?

 ¿ÑEE nánnaluʼ zanda iquiiñeʼ Jehová lii para guicabi oración stiʼ ti hermanu la? Zanda iquiiñebe lii pa nácaluʼ ancianu, siervu ministerial, precursor, publicador, joven, huaniisi, hombre o gunaa. Ora guinabaʼ ti binni ni nadxii Jehová gacanebe laa, stale biaje riquiiñeʼ Dios stinu ca ancianu ne xcaadxi xpinni para quixhedxí ladxidóʼ binni ca (Col. 4:11). Ti privilegiu nga gúninu ni ná Jehová ne gacanenu ca hermanu stinu. Zanda gúninu ni ora chuʼ ti epidemia, guizaaca xiixa cosa ni cadi cabézanu o sanándacabe laanu.

2. ¿Xiñee zándaca gaca nagana para laanu gacanenu ca hermanu ora chuʼ ti epidemia?

² Ora nuu ti epidemia zándaca jma nagana gaca para laanu gacanenu xcaadxi. Guzéʼtenu ti ejemplu, zándaca racaláʼdxinu chigánnanu ca hermanu ra lídxicaʼ, peru pur epidemia ca qué zanda gúninu ni. O ñuuláʼdxinu ñuni invitarnu ca hermanu ni huaxiéʼ napa bueltu ti guendaró ra lídxinu, peru laaca qué zanda gúninu ni. Ne zándaca racaláʼdxinu gacanenu xcaadxi, peru pa laaca cayacaná familia stinu la? qué zanda gúninu ni. Neca zacá, racaláʼdxinu gacanenu ca hermanu ne riecheʼ Jehová ora ruuyaʼ rúninu biaʼ gándatiʼ para gacanenu laacabe (Prov. 3:27; 19:17). Yanna, ¿xi zanda gúninu yaʼ?

3. ¿Xi rizíʼdinu de ejemplu stiʼ ca ancianu de congregación stiʼ Desi? (Jeremías 23:4).

³ Ni zanda guni ca ancianu. Pa ancianu de congregación lii binibiáʼ chaahuiʼ ca dendxuʼ stiʼ Dios (biindaʼ Jeremías 23:4). Desi, hermana ni bizéʼtenu lu artículo ni gudiʼdiʼ que guníʼ: «Gupa ca ancianu de grupu de predicación stinneʼ costumbre guni predicarnecaʼ naa ne xcaadxi hermanu,  ne bíʼnicaʼ cosa para chuʼdu nayecheʼ». b Pur ni biʼniʼ ca ancianu riʼ, qué ñaca nagana para laacaʼ ñacanecaʼ Desi dxi bizulú pandemia stiʼ COVID-19 purtiʼ guti caadxi familia stibe pur guendahuará riʼ.

4. ¿Xiñee gunda gucané ca ancianu Desi, ne xi rusiidiʼ ni ca ancianu?

⁴ Desi guníʼ: «Cumu xhamiguaʼ ca ancianu la? qué ñaca nagana para naa ñabeʼ laacaʼ xi naguu xizaa naa». ¿Xi rusiidiʼ ndiʼ ca ancianu yaʼ? Rusiidiʼ ni laacaʼ gápacaʼ ca dendxuhuiiniʼ stiʼ Dios ne gaca xhamígucaʼ laacabe ante gápacabe guendanagana. Pa lu ti epidemia qué ganda chigánnatu ca hermanu ra lídxicaʼ, laguyubi xcaadxi modo para guiníʼnetu laacabe. Desi guníʼ: «Stale biaje lu ti dxi si riniʼné caadxi ancianu naa pur teléfono, o ruseendacaʼ mensaje ra nuaaʼ. Ca textu stiʼ Biblia ni ruseendacabe ra nuaaʼ yendá ca ni ndaaniʼ ladxiduáʼ neca maca runebiaʼyaʼ ca ni».

5. ¿Ximodo zanda ganna ca ancianu xi caquiiñeʼ ca hermanu, ne ximodo zanda gacanécabe laacaʼ?

⁵ Ti modo zanda ganna ca ancianu xi caquiiñeʼ ca hermanu nga ra guinabadiidxacabe laacaʼ, peru sin gusituícabe lucaʼ (Prov. 20:5). ¿Ñee napa ca hermanu ni gocaʼ, medicina ne xcaadxi cosa ni caquiiñecaʼ la? ¿Ñee zándaca guníticabe dxiiñaʼ stícabe o lídxicabe la? ¿Ñee caquiiñeʼ gacanenu laacabe para guicaacabe xiixa ayuda ni rudii Gobiernu la? Caadxi hermanu gucanecaʼ Desi ra bidiicaʼ laabe bueltu ne guendaró. Peru ni jma gucané laabe nga guendarannaxhii ni bisihuinni ca ancianu ne ca textu stiʼ Biblia ni biindanecaʼ laabe. Laaca guníʼ Desi: «Biʼniʼ orarné ca ancianu naa. Qué rietenalaʼdxeʼ xi peʼ guníʼcabe lu ca oración que, peru rietenalaʼdxeʼ ximodo bineʼ sentir. Casi ora ñabi Jehová naa “Cadi stúbiluʼ nuuluʼ”» (Is. 41:10, 13).

6. ¿Ximodo zanda gacanésaanu ndaaniʼ congregación? (Biiyaʼ ca foto ca).

⁶ Ni zanda guni congregación. Nánnanu ca ancianu nga ca primé ni naquiiñeʼ gacané ca hermanu. Peru rinabaʼ Jehová guiranu cuʼnu gana ne gacanenu xcaadxi (Gál. 6:10). Dede ca cosa ni jma nahuiiniʼ ni gúninu para gacanenu tuuxa ni huará zanda cuʼ ni gana laa. Ca xcuidihuiiniʼ zanda gúnicaʼ ti dibujuhuiiniʼ para cuʼcaʼ gana ti hermanu. Ca joven zanda gacanecaʼ para chisicaʼ ca cosa stiʼ ti hermana. Ne xcaadxi  hermanu la? zanda gúnicaʼ ti guendaró para ti binni ni huará ne chisaanacaʼ ni ra lídxibe. Ne ora stale hermanu huará la? guiráʼ ca ni nuu ndaaniʼ congregación caquiiñenu tu cuʼ gana laanu. Nga runi galán guiaananu despué de reunión para guinínenu ca hermanu ra Yoo stiʼ Reinu o pur videoconferencia. Ne ca ancianu, laaca caquiiñeʼ tu cuʼ gana laacaʼ. Nuu hermanu rucaacaʼ caadxi diidxaʼ para gudiicaʼ xquixe peʼ ca ancianu, purtiʼ ora nuu ti epidemia rápacabe stale dxiiñaʼ. Nga runi galán nga guni guiranu stipa chinándanu conseju riʼ: «Lauguusaa gana laatu ne lagacanesaa» (1 Tes. 5:11).

7. ¿Xi guendanagana zándaca gapa tuuxa ora guizaaca xiixa cosa ni cadi cabeza?

⁷ Zándaca guizáʼ nagueenda guchaa xquendanabani tuuxa ora guizaaca xiixa ni cadi cabeza. Zándaca gunítibe ca cosa material stibe, lídxibe o dede gatiʼ ti familia stibe. Ne laaca rizaaca ca hermanu stinu ca ni bizéʼtenu riʼ. Yanna, ¿ximodo zanda gacanenu laacabe yaʼ?

8. ¿Xi naquiiñeʼ guni ca ancianu ne ca padre ante guizaaca xiixa cosa ni cadi cabézacaʼ?

⁸ Ni zanda guni ca ancianu. Ancianu caʼ, lagacané ca hermanu chuʼcaʼ listu ora guizaaca xiixa cosa ni cadi cabézacaʼ. Lagacané ca hermanu de congregación gánnacaʼ xi gúnicaʼ ti ganda guilacaʼ ne guiníʼnecaʼ laatu. Ndiʼ nga ni guníʼ Margaret, hermana ni bizéʼtenu lu artículo ni gudiʼdiʼ que: «Lu ti discursu de ni caquiiñeʼ congregación, bisietenalaʼdxiʼ ca ancianu laadu zándaca zacáguiruʼ neza ra nabézadu ne naquiiñeʼ guireʼdu nagueenda pa guinabaʼ autoridad ni laadu o pa chuʼ xquendanabánidu ra naxoo». Ne galán peʼ bidiicabe discursu que purtiʼ gaayuʼ semana despué gucuaguí lugar neza ra nabeza Margaret. Padre caʼ, lu adoración en familia stitu, laguiníʼ xi zanda guni cada tobi de laatu ora guizaaca ti cosa ni cadi cabézatu. Pa nuutu listu, laatu ne ca xiiñitu, zándaca qué zadxíbitu ora guizaaca ca cosa riʼ.

9. ¿Xi zanda guni ca ancianu ante de despué de guizaaca xiixa cosa ni cadi cabézacaʼ?

⁹ Pa superintendente de grupu lii, cadi cuézaluʼ guizaaca xiixa cosa ni cadi cabézaluʼ para gúʼyaluʼ pa jneza nuu ca númeru de teléfono ne dirección stiʼ ca hermanu de grupu stiluʼ. Biʼniʼ ti lista ne biiyaʼ pa caʼruʼ guchaa ca hermanu ca datu sticaʼ. Pa guʼnuʼ zacá, ora guizaaca xiixa zanda guiníʼneluʼ cada publicador ne gúʼyaluʼ xi caquiiñecaʼ. Bitiidiʼ información coordinador stiʼ cuerpu de ancianu, ne laa zaniʼné superintendente de circuito. Jma galán raca ca dxiiñaʼ riʼ ora runi ca hermanu riʼ dxiiñaʼ tobi si. Despué de incendiu que, qué ñasi superintendente de circuito ni riganna congregación stiʼ Margaret 36 hora purtiʼ caguixhe chaahuiʼ dxiiñaʼ ni cayuni ca ancianu ni cuyubi ne cayacané biaʼ 450 hermanu ni biree de ra lidxi (2 Cor. 11:27). Pur ngue gunda bidxélacabe ra guiaana ca hermanu que.

10. ¿Xiñee nabé risaca para ca ancianu gápacaʼ ca dendxuʼ stiʼ Dios? (Juan 21:15).

¹⁰ Ti dxiiñaʼ nabé risaca napa ca ancianu nga iquiiñecaʼ Biblia para cuʼcaʼ gana ca hermanu ni cadiʼdiʼ lu ti guendanagana (1 Ped. 5:2). Ora guizaaca ti desastre, naquiiñeʼ gúʼyacabe pa nazaaca nuu cada hermanu, pa nápacaʼ ni gocaʼ, ni gácucaʼ ne ti lugar ra guiaanacaʼ. Peru zándaca naquiiñeʼ cúʼcabe gana ca hermanu ni bizaaca ca cosa riʼ neca tidiʼ tiempu (biindaʼ Juan 21:15). Harold nga ti hermanu ni nuu lu ti Comité de Sucursal ne huaníʼnebe stale  hermanu ni gudiʼdiʼ lu ti desastre. Sicaríʼ guniʼbe: «Ridiʼdiʼ tiempu para guibiguetaʼ chuʼ ca hermanu riʼ nayecheʼ sti biaje. Zándaca guzulú ca hermanu riʼ gúnicaʼ ca cosa ni bíʼnicaʼ ante, peru zándaca guietenaláʼdxicabe familia stícabe ni gutiʼ, xiixa cosa risaca ni biníticabe o guendanagana ra gudíʼdicabe. Ne nga zanda gucaa ni laacabe guiuubaʼ ladxidóʼcabe sti biaje. Peru qué riníʼ ndiʼ qué gápacabe fe, normal nga guni sentírcabe zacá».

11. ¿Xiruʼ naquiiñeʼ guni ca ancianu para gacanecaʼ ca familia ni gudiʼdiʼ lu ti desastre?

¹¹ Nabé risaca chinanda ca ancianu conseju riʼ: «Laguunané ca ni cayuunaʼ» (Rom. 12:15). Ca hermanu ni huadiʼdiʼ lu ti desastre, naquiiñeʼ gusietenaláʼdxinu laacaʼ nadxii Jehová ne ca hermanu laacaʼ. Zanda gacané ca ancianu ca familia riʼ cadi gusaana de guni orarcaʼ, guni estudiarcaʼ, cadi guiaadxacaʼ reunión ne guni predicarcaʼ. Laaca zanda cúʼcabe gana ca padre gacanecaʼ ca xiiñicaʼ cadi gusiaandacaʼ naca Jehová xhamígucaʼ ne siempre nuu listu para gacané laacabe. Lagusiene laacabe nuu stale hermanu ne hermana ni naca familia stícabe ne nuucaʼ listu para gacanecaʼ laacabe (1 Ped. 2:17).

12. ¿Xi zanda guni congregación para gacané lu ca labor de socorro? (Biiyaʼ foto).

¹² Ni zanda guni congregación. Pa guizaaca ti desastre gaxha de ra nabézaluʼ, gunabadiidxaʼ ca ancianu xi zanda gúniluʼ para gacaneluʼ. Zándaca guni hospedarluʼ ti tiempu ca hermanu ni biree de ra lidxi o ca ni cayuni dxiiñaʼ lu labor de socorro. O zanda chigacaneluʼ ra gaca entregar despensa para ca hermanu ni gucaná. Ne pa zitu de ra nabézaluʼ bizaaca desgracia ca la? laaca zanda gacaneluʼ. ¿Ximodo yaʼ? Ra guni orarluʼ pur ca hermanu ni gucaná ne ra guni donarluʼ para obra mundial, purtiʼ riquiiñeʼ ni para gaca ca labor de socorro (2 Cor. 1:8-11; 8:2-5). Ne pa ganda cheluʼ lugar ra guca desastre ca la? gunabadiidxaʼ ca ancianu ximodo zanda gacaneluʼ. Pa gaca invitarluʼ, zándaca zuni capacitárcabe lii para gacaneluʼ ra jma caquiiñeʼ.

13. ¿Xi guendanagana rapa ca hermanu ni nabeza ca lugar ra rucueeza gobiernu dxiiñaʼ stinu?

¹³ Nagana raca para ca hermanu ora rizananda gobiernu laacaʼ. Ca ni nabeza ca lugar ra rucueeza gobiernu dxiiñaʼ stinu, ráparucaʼ guendanagana pur bueltu, raca  huaracaʼ ne rati familia sticaʼ. Ne zándaca gaca nagana para ca ancianu chigánnacaʼ ca hermanu o guiníʼnecaʼ laacabe para cuʼcaʼ gana laacabe. Nga nga ni bizaaca Andréi, hermanu ni bizéʼtenu lu artículo ni gudiʼdiʼ que. Gupa ti hermana de grupu de predicación stibe guendanagana pur bueltu ne despué gupa ti accidente né carru. Guca operarbe stale biaje ne qué ñanda ñúnibe dxiiñaʼ. Neca cucueeza gobiernu dxiiñaʼ stinu lugar que ne nuu pandemia, biyubi ca hermanu modo gacanecaʼ laabe. Rihuinni dxichi nanna Jehová xi cazaaca hermana que.

14. ¿Ximodo rusihuinni ca ancianu nápacaʼ confianza Jehová?

¹⁴ Ni zanda guni ca ancianu. Biʼniʼ orar Andréi Jehová ne biʼniʼ guiráʼ ni nuu lu náʼ para gucané hermana que. ¿Ximodo bicabi Jehová oración stibe yaʼ? Biquiiñebe xcaadxi hermanu para gacanecaʼ hermana riʼ. Nuu tu laa yené laabe doctor ne xcaadxi bidiicaʼ laabe bueltu. Guluu ndaayaʼ Jehová ni biʼniʼ ca hermanu riʼ purtiʼ bisihuínnicaʼ nadxibalucaʼ (Heb. 13:16). Ancianu caʼ, ora gucueezacabe dxiiñaʼ stinu, lagudii lugar gacané xcaadxi laatu (Jer. 36:5, 6). Peru ni jma risaca nga laguyubi gacané Jehová laatu. Laa zacané laatu para ganda gacanetu ca hermanu.

15. ¿Xi naquiiñeʼ gúninu para chuʼnu tobi si ora sanándacabe laanu?

¹⁵ Ni zanda guni congregación. Ora sanándacabe laanu, zándaca maʼ pur grupuhuiiniʼ nga guidagulisaanu. Nga runi risaca chuʼnu tobi si né ca hermanu dede ca yanna. Cadi guiaandaʼ laanu Binidxabaʼ nga cadíndenenu ne cadi ca hermanu stinu. Guni perdonarnu ca hermanu stinu ne nagueendaca guni chaahuinu intiica guendanagana gapanenu laacabe (Prov. 19:11; Efes. 4:26). Chuʼnu listu para gacanenu xcaadxi (Tito 3:14). Ra gucané ca hermanu de grupu de predicación stiʼ Andréi hermana que la? gucané ni guiracaʼ. Guyuucabe tobi si casi ti familia (Sal. 133:1).

16. Casi ná Colosenses 4:3, 18, ¿xi zanda gúninu para gacanenu ca hermanu ni canazananda gobiernu laacaʼ?

¹⁶ Stale de ca hermanu stinu rúnicaʼ ni ná Jehová neca rizananda ca autoridad laacaʼ. Nuu de laacabe nuucabe ndaaniʼ cárcel pur ni runi crécabe. Guni orarnu pur ca hermanu riʼ, pur ca familia sticaʼ ne pur ca hermanu ni riguu gana laacabe cadi gusaana de gápacabe confianza  Jehová, ca ni rudii ni iquiiñecabe ne ca ni runi defender laacabe nezalú tribunal (biindaʼ Colosenses 4:3, 18). c Cadi guiaandaʼ laanu zanda gacané ca oración ni rúninu ca hermanu stinu (2 Tes. 3:1, 2; 1 Tim. 2:1, 2).

17. ¿Ximodo zanda chuʼnu listu dede ca yanna ora sananda binni laanu?

¹⁷ Lii ne familia stiluʼ zanda chuʼtu listu dede ca yanna para ora sanándacabe laanu (Hech. 14:22). Cadi guiníʼ íqueluʼ guiráʼ ca cosa malu ni zándaca guizaaca, sínuque laguni stipa chuʼtu jma gaxha de Jehová ne lagacané ca xiiñitu gúnicaʼ zacá. Pa chuʼ ora guni sentirtu nuutu xizaa, laguiniʼné Jehová (Sal. 62:7, 8). Guniʼné familia stiluʼ xiñee zanda gápatu confianza Jehová. d Nabé risaca gusiidiluʼ ca xiiñiluʼ xi gúnicaʼ ora guizaaca xiixa cosa ni cadi cabézacaʼ, peru laaca risaca gacaneluʼ laacabe chúʼcabe listu para ora sananda binni ca xpinni Cristu ne gusiidiluʼ laacabe gápacabe confianza Jehová. Nga zacané laacabe gácacabe nadxibalú ne gánnacabe xi gúnicabe.

18. ¿Xi cabézanu guizaaca despué?

¹⁸ Paz stiʼ Dios racané ni laanu gatadxí ladxidoʼno (Filip. 4:6, 7). Riquiiñeʼ Jehová ni para quixhedxí ladxidoʼno ora chuʼ ti epidemia, guizaaca xiixa cosa ni cadi cabézanu o sananda binni laanu. Riquiiñebe ca ancianu, ni rapa ca dendxuhuiiniʼ stibe, ne rudiibe guiranu privilegiu de gacanésaanu. Paz stiʼ Dios laaca zacané ni laanu gudxíʼlunu ca guendanagana ni guidxaagalunu despué, ne tiempu chuʼ «stale yuubaʼ» o gran tribulación (Mat. 24:21). Tiempu ca, nabé risaca cadi guidxíbinu ne gacanenu xcaadxi laaca cadi guidxíbicaʼ. Peru tidiʼ si tiempu chuʼ stale yuubaʼ, maʼ qué zápanu guendanagana ni guchibi laanu. Zabáninu modo racalaʼdxiʼ Jehová guibani binni, ra gápanu paz ni qué ziuu dxi guiluxe (Is. 26:3, 4).