¿Ñee maʼ biindaluʼ ca últimu tema ni bedané revista Torre stiʼ ni rapa la? Yanna biiyaʼ pa zanda guicábiluʼ ca pregunta riʼ:

¿Xi ndaayaʼ zacaanu pa cueenu tiempu guinínenu Jehová, gucaadiáganu laabe ne guiníʼ íquenu laabe?

Zacaanu decisión jneza, zusíʼdinu jma jneza, zaca fe stinu jma naguidxi ne jma zannaxhiinu Jehová (w22.01, yaza 30 ne 31).

¿Xiñee jneza gápanu confianza Jehová ne ca xpínnibe ni runi dirigir xquídxibe?

Yanna nga jma naquiiñeʼ gápanu confianza jneza guiráʼ ni runi Jehová. Ne rúninu ni ora rinándanu ca decisión ni ricaa ca ancianu ne ca instrucción ni rudiicaʼ laanu. Lu gran tribulación, ziuʼnu listu para chinándanu ca instrucción gudiicabe laanu neca gaca nagana para laanu guiénenu o gaca nagana para laanu chinándanu ca ni (w22.02, yaza 4 hasta 6).

¿Xiñee gudxi ti ángel Zacarías zuuyaʼ naazeʼ gobernador Zorobabel plomo? (Zac. 4:8-10).

Visión que gucané ni xquidxi Dios ganna neca cadi naroʼbaʼ templu que, peru zalúxecabe ni ne ziuulaʼdxiʼ Jehová ni (w22.03, yaza 16 ne 17).

¿Xi caquiiñeʼ gúninu para gácanu ti ejemplu galán para xcaadxi pur modo rininu? (1 Tim. 4:12).

Gácanu nachaʼhuiʼ ne guinínenu binni lu predicación né respetu, guidúʼndanu né stale gana lu ca reunión ne guni comentarnu, guininu ni dxandíʼ, guininu diidxaʼ ni cuʼ gana ne cadi guininu diidxaʼ ni guniná stobi (w22.04, yaza 6 hasta 9).

¿Xiñee riete lu Apocalipsis 13:1, 2 de ti bestia ni napa guidapaʼ cosa stiʼ guidapaʼ bestia (ca gobiernu) ni riete lu capítulo 7 stiʼ Daniel?

Bestia ni riete lu Apocalipsis 13 qué runi representar ni ti gobiernu si, casi Roma. Runi representar bestia riʼ guiráʼ gobiernu ni huayuni mandar binni (w22.05, yaza 9).

¿Gunáʼ nga ti modo zanda gusihuínninu nápanu confianza zuni Jehová ni jneza?

Pa tuuxa biʼniʼ laanu xiixa ni qué ñuuláʼdxinu o pa gucheené laanu, naquiiñeʼ gúninu stipa cadi guidxiichinu ne cadi guidaʼnu xiana né laabe ne gusaananu guiráʼ ni lu náʼ Jehová. Laabe zuni chaahuibe ca guendanagana huayápanu pur pecadu (w22.06, yaza 10 ne 11).

¿Xi cadi naquiiñeʼ guiaandaʼ ti hermanu ora guni orar lu ti reunión?

Cadi naquiiñeʼ gudiicabe conseju congregación ne cadi naquiiñeʼ gúnicabe anunciu. Nga runi jma galán cadi iquiiñecaʼ «stale diidxaʼ», jmaruʼ si ora ruzulú reunión (Mat. 6:7) (w22.07, yaza 24 ne 25).

¿Ximodo ndiʼ chigaca juzgar «ca ni biʼniʼ cosa malu»? (Juan 5:29).

Qué zacaacabe ti juiciu naná pur ca cosa ni bíʼnicabe dxiqué, sínuque ziásacabe para guihuinni pa dxandíʼ cuchaacabe modo laacabe despué de guibánicabe sti biaje (w22.09, yaza 18).

¿Xi anunciu nabé risaca bidii hermanu Joseph Rutherford lu ti asamblea ni guca lu beeu septiembre iza 1922?

Lu ti asamblea de Cedar Point (Ohio, Estados Unidos), guniʼbe: «¡Laguuyaʼ, Rey ca maʼ cayuni mandar! Laatu nga ca ni chigucheecheʼ stiidxabe. Nga runi, laguiníʼ, laguiníʼ, laguiníʼ de Rey ne reinu stiʼ» (w22.10, yaza 3 hasta 5).

Casi ná capítulo 30 stiʼ Isaías, ¿xi chonna cosa runi Jehová para gacané laanu guni huantarnu?

Lu capítulo riʼ culuíʼ laanu ni rúnibe. Primé, rucaadiaga chaahuiʼ Jehová ne ricabi ca oración stinu. Guiropa, rábibe laanu xi caquiiñeʼ gúninu. Ne guionna, riguu ndaayabe laanu tiempu riʼ ne zúnibe ni despué (w22.11, yaza 9).

¿Xiñee zanda guininu ca diidxaʼ ni zeeda lu Salmo 37:10, 11, 29 guca cumplir ca ni dxiqué ne laaca zaca cumplir ca ni despué?

Ni bicaa rey David riʼ laaca rusihuínnini pabiáʼ galán zabani binni ndaaniʼ guidxi Israel tiempu guni mandar Salomón. Laaca bizeeteʼ Jesús ca diidxaʼ ni zeeda lu versículo 11 para guiníʼ de ti Paraísu ni chichuu despué (Mat. 5:5; Luc. 23:43) (w22.12, yaza 8 hasta 10 ne 14).