1. ¿Xi gudxi Jesús ti gubaanaʼ ni cá cueʼ ante gatiʼ? (Lucas 23:39-43).

 CHAAHUIDUGÁ cayati Jesús ne guiropaʼ gubaanaʼ ni cá cueʼ (Luc. 23:32, 33). Biʼniʼ burla guiropaʼ hombre riʼ Jesús, nga runi zanda guininu cadi discípulo stibe laacaʼ (Mat. 27:44; Mar. 15:32). Peru tobi de ca gubaanaʼ que bichaa. Ne guníʼ: «Jesús, bietenalaʼdxiʼ de naa ora guiuuluʼ lu Reinu stiluʼ». Para gudxi Jesús laabe: «Dxandíʼ ni chitidxeʼ lii yannadxí: ziuuneluʼ naa ndaaniʼ Paraísu» (biindaʼ Lucas 23:39-43). Gastiʼ nin ti prueba ni rusihuinni biʼniʼ aceptar hombre riʼ mensaje stiʼ «Reinu ni nuu guibáʼ» ni biʼniʼ predicar Jesús dxi guyuu lu Guidxilayú. Ne qué niníʼ diʼ Jesús ziuu hombre riʼ lu Reinu (Mat. 4:17). Ni caníʼ Jesús nga de Paraísu ni chichuu lu Guidxilayú riʼ. ¿Ximodo nánnanu ni yaʼ?

2. ¿Xiñee zándaca judíu gubaanaʼ ni guca arrepentir que?

² Zándaca judíu gubaanaʼ ni guca arrepentir que. Ndiʼ nga ni gunabadiidxaʼ hombre riʼ sti gubaanaʼ ni cá cueʼ Jesús: «¿Ñee qué ridxíbiluʼ Dios nin ne cayaca castigarluʼ casi cayaca castigar hombre riʼ la?» (Luc. 23:40). Ti Dios si runi adorar ca judíu, peru ca binni de xcaadxi guidxi la? biʼniʼ crecaʼ nuu stale dios (Éx. 20:2, 3; 1 Cor. 8:5, 6). Pa ñaca cadi judíu guiropaʼ gubaanaʼ riʼ la? zándaca ndiʼ nga ni ninabadiidxabe: «¿Ñee qué ridxíbiluʼ ca dios ca la?». Ne laaca «ra nuu si ca dendxuʼ ni cananiti stiʼ guidxi Israel» biseendaʼ Dios Jesús, nga runi huaxiéʼ biʼniʼ predicarbe ca binni de xcaadxi guidxi (Mat. 15:24). Ne maca gudxi Dios ca israelita zusibani ca binni ni maʼ guti. Zándaca gunna gubaanaʼ ni guca arrepentir que ca cosa riʼ, ne pur ca diidxaʼ ni guniʼbe nánnabe zusibani Jehová Jesús para guni mandar lu Reinu stiʼ Dios. Ndiʼ rusihuinni,  biʼniʼ cré hombre que zanda gusibani Dios laa.

3. ¿Xi zándaca guníʼ ique gubaanaʼ ni guca arrepentir que ora guníʼ Jesús de ti Paraísu? (Génesis 2:15).

³ Pa judíu gubaanaʼ ni guca arrepentir que, nánnabe guluu Jehová Adán ne Eva ndaaniʼ ti Paraísu. Nga runi zándaca guníʼ íquebe lu Guidxilayú riʼ nga chichuu Paraísu ni bizeeteʼ Jesús (biindaʼ Génesis 2:15).

4. Ni gudxi Jesús gubaanaʼ que, ¿xi rucaa ni laanu guiníʼ íquenu?

⁴ Ni gudxi Jesús gubaanaʼ que zanda gucaa ni laanu guiníʼ íquenu ximodo zabáninu ndaaniʼ Paraísu. Ti cosa ni zacané laanu nga guietenaláʼdxinu pabiáʼ galán bibani ca israelita tiempu biʼniʼ mandar Salomón. Ne Biblia ná naca Jesús ti binni «jma risaca que Salomón». Nga runi nanna dxiichinu zuni Jesús ne ca ni guni mandarné laa Guidxilayú riʼ ti lugar guizáʼ sicarú (Mat. 12:42). Pur nga, naquiiñeʼ guiziidiʼ «xcaadxi dendxuʼ» xi naquiiñeʼ gúnicaʼ para ganda guibánicaʼ sin qué chuʼ dxi gáticaʼ ndaaniʼ Paraísu (Juan 10:16).

5. ¿Ximodo rábiluʼ zabani binni ndaaniʼ Paraísu?

⁵ ¿Ximodo rábiluʼ zabani binni ndaaniʼ Paraísu? Zándaca guiníʼ íqueluʼ zabani binni ndaaniʼ ti jardín sicarú casi jardín de Edén (Gén. 2:7-9). O guietenaláʼdxiluʼ profecía stiʼ Miqueas ra riete «zabí cada tobi xaʼnaʼ lubáʼ uva stiʼ ne xaʼnaʼ yaga duʼgaʼ stiʼ» (Miq. 4:3, 4). Ne zándaca guietenaláʼdxiluʼ ca textu ni ná ziuu stale guendaró lu Guidxilayú riʼ (Sal. 72:16; Is. 65:21, 22). O guxuíʼluluʼ zúbaluʼ ndaaniʼ ti jardín sicarú ne zúbaluʼ ruaa ti mexaʼ ra nexheʼ stale guendaró nanixe. Cayuuxiiluʼ candáʼ naxhi ca yagahuiiniʼ ne guieʼ. Cayunadiágaluʼ cuxidxi ca xhamíguluʼ ne ca familia stiluʼ laga caziiláʼdxitu. Zándaca caadxi de laacabe nga ca ni biasa de lade gueʼtuʼ. Cadi ti bacaandaʼ si ndiʼ. Ni bizéʼtenu riʼ nga ni chiguizaaca lu Guidxilayú riʼ. Peru ndaaniʼ Paraísu ca laaca ziuu dxiiñaʼ galán ni gúninu.

6. ¿Xi zúninu ora maʼ guibáninu ndaaniʼ Paraísu? (Biiyaʼ dibuju).

⁶ Bizáʼ Jehová laanu para chuuláʼdxinu gúninu dxiiñaʼ (Ecl. 2:24). Lu ti mil iza guni mandar Cristu, ziuu stale dxiiñaʼ ni gaca. Ca binni ni tidiʼ lu gran tribulación ne guiráʼ binni guiasa de lade gueʼtuʼ zaquiiñecaʼ lari, ni gocaʼ ne ti lugar ra cuézacaʼ. Para ganda gápacabe ca cosa riʼ la? zaca stale dxiiñaʼ, peru ziuu binni nayecheʼ ra gúnini. Cásica biʼniʼ Adán ne Eva dxiiñaʼ ndaaniʼ jardín de Edén que, laanu laaca nápanu privilegiu gacanenu gaca  Guidxilayú riʼ ti Paraísu. Ziuuláʼdxinu gusíʼdinu ca millón de binni ni guiasa de lade gueʼtuʼ ni huaxiéʼ gunna de Jehová ne de ni chiguni. Ne zanda gusíʼdinu ca xpinni Dios ni gutiʼ ante gueeda Jesús lu Guidxilayú.

7. ¿Xi nanna dxiichinu, ne xiñee?

⁷ Nanna dxiichinu ndaaniʼ Paraísu ca ziuu paz, zápanu guiráʼ ni iquiiñenu ne zatachaahuiʼ guiráʼ dxiiñaʼ ni chigaca. ¿Xiñee yaʼ? Purtiʼ ra bidii Jehová lugar guicá lu Biblia modo biʼniʼ mandar Salomón, cayacanebe laanu gánnanu ximodo zabani binni ora maʼ guni mandar Xiiñibe lu Guidxilayú riʼ.

8. ¿Ximodo guca cumplir ca diidxaʼ ni cá lu Salmo 37:10, 11, 29 dxiqué? (Biiyaʼ «Ni rinabadiidxaʼ ca ni ruundaʼ» ni zeeda lu revista riʼ).

⁸ Gucané Jehová David para gucaa ximodo zabáninu despué dxi maʼ guni mandar ti rey ni nuu xpiaaniʼ ne ni qué ruchee (biindaʼ Salmo 37:10, 11, 29). Ora guinínenu binni de Paraísu, stale biaje ridúʼndanenu laacaʼ Salmo 37:11. Ne galán nga gúninu ni, purtiʼ Jesús biquiiñeʼ textu riʼ dxi bisiidiʼ lu Sermón del Monte. Zaqué bisihuínnibe zaca cumplir ca diidxaʼ riʼ despué (Mat. 5:5). Peru ni bicaa rey David riʼ laaca rusihuínnini ximodo zabani binni tiempu stiʼ Salomón. Tiempu que, gupa guidxi Israel paz ne gúpacaʼ guiráʼ ni iquiiñecaʼ ndaaniʼ ti layú ni rudii ziaʼ «leche ne miel». Maca guníʼ Dios: «Pa qué gusaana de satu casi ná ca ley stinneʼ [...], zaguaaʼ paz ndaaniʼ guidxi stitu ne ora gátatu la? guirutiʼ zuchibi laatu» (Lev. 20:24; 26:3, 6). Guca cumplir ca promesa riʼ tiempu biʼniʼ mandar Salomón (1 Crón. 22:9; 29:26-28). Ne laaca biʼniʼ prometer Jehová laacabe maʼ qué ziuu binni malu (Sal. 37:10). Ca diidxaʼ ni cá lu Salmo 37:10, 11, 29 guca cumplir ca ni dxiqué ne laaca zaca cumplir ca ni despué.

9. ¿Xi guníʼ reina de Saba ora biʼyaʼ modo cayuni mandar Salomón?

⁹ Binadiaga reina de Saba ndaaniʼ guidxi  Israel nuu paz ne napa ca binni que ni caquiiñecaʼ tiempu cayuni mandar Salomón. Biʼniʼ viajarbe zitu dede yendabe Jerusalén para gúʼyabe pa dxandíʼ ngue ni cayunadiágabe (1 Rey. 10:1). Despué de biiyabe ximodo runi mandar Salomón, gúdxibe laa: «Caadxi si nga ni gúdxicabe naa. […] ¡Nayecheʼ ca hombre stiluʼ ne nayecheʼ ca siervu stiluʼ, purtiʼ siempre cucaadiágacaʼ guendanuuxpiaaniʼ stiluʼ!» (1 Rey. 10:6-8). Peru modo bibani binni tiempu biʼniʼ mandar Salomón, rusihuínnini xi chiguni Jehová para binni tiempu guni mandar Jesús lu Guidxilayú riʼ.

10. ¿Xiñee jma risaca Jesús que Salomón?

¹⁰ Jma risaca Jesús que Salomón. Guca Salomón ti hombre imperfectu ne bíʼnibe stale pecadu grave ni bininá xquidxi Dios. Peru Jesús naca ti gobernante perfectu ne qué ruchee (Luc. 1:32; Heb. 4:14, 15). Gudíʼdibe guiráʼ prueba ni bilaa Binidxabaʼ luguiabe. Maʼ bisihuinni Cristu que ziuu dxi guchee ne qué zuni xiixa ni guniná ca binni ni ruzuubaʼ diidxaʼ ni guibani lu Guidxilayú riʼ. ¿Cadi dxandíʼ guizáʼ galán nga laabe chigácabe Rey stinu la?

11. ¿Tuu nga ca ni chigacané Jesús?

¹¹ Zacané 144,000 rey Jesús ne zápacabe ca binni ni ruzuubaʼ diidxaʼ ne laaca zuni cumplírcabe ni naguixhe ique Jehová guni lu Guidxilayú (Apoc. 14:1-3). Gudiʼdiʼ ca binni ni chiguni mandarné Jesús lu stale guendanagana dxi bibánicaʼ lu Guidxilayú. Nga runi ziénecabe laanu. ¿Xi dxiiñaʼ chigúnicabe yaʼ?

12. ¿Xi dxiiñaʼ chigudii Jehová 144,000 ungidu?

¹² Jesús ne 144,000 jma zúnicaʼ stale dxiiñaʼ que biaʼ ni biʼniʼ Salomón. Biʼniʼ mandar rey Salomón panda millón de binni ndaaniʼ ti guidxi si. Peru ca ni guni mandar lu Reinu stiʼ Dios zuni mandarcaʼ mil de millón binni lu guidubi Guidxilayú. ¡Guizáʼ naroʼbaʼ privilegiu cudii Jehová ca ungidu!

13. ¿Xi dxiiñaʼ risaca chiguni ca ni guni mandarné Jesús?

¹³ Cásica Jesús, laaca zaca 144,000 rey ne sacerdote (Apoc. 5:10). Dxi yenanda ca israelita Ley stiʼ Moisés, ca sacerdote que nga racanecaʼ laacabe chúʼcabe nazaaca ne chúʼcabe gaxha de Jehová. Cumu napa Ley que «ti bandáʼ stiʼ ca cosa galán ni chigueedaruʼ» la? nga runi zanda guiníʼ íquenu ca ni chiguni mandarné Jesús zúnicaʼ ti dxiiñaʼ nabé risaca: zacanécabe chuʼ xquidxi Dios nazaaca ne chuʼcaʼ gaxha de Jehová (Heb. 10:1). Qué gánnanu ximodo guiniʼné ca rey ne sacerdote binni ni guibani lu Guidxilayú riʼ. Modo tiica si quixhe chaahuiʼ Jehová ca cosa ca, zanda guni crenu zacaa ca binni ni guibani ndaaniʼ Paraísu instrucción ni zacané laacaʼ (Apoc. 21:3, 4).

14. ¿Xi cayuni ne xi zuni grupu de «xcaadxi dendxuʼ» ne «grupuhuiiniʼ de dendxuʼ»?

¹⁴ Jesús gulee lá grupu de binni ni chiguni mandarné laa guibáʼ «grupuhuiiniʼ de dendxuʼ» (Luc. 12:32). Laaca bizeetebe sti grupu ni gulee labe «xcaadxi dendxuʼ». Naca guiropaʼ grupu riʼ tobi si (Juan 10:16). Maʼ cayúnicabe dxiiñaʼ tobi si ne zúnicabe ni dxi gaca Guidxilayú riʼ ti paraísu. Para tiempu ca maʼ nuu «grupuhuiiniʼ de dendxuʼ» guibáʼ, ne «xcaadxi dendxuʼ» zápacaʼ esperanza de guibánicaʼ ndaaniʼ Guidxilayú riʼ sin  qué chuʼ dxi gáticaʼ. Peru nuu caadxi cosa ni naquiiñeʼ guni grupu de «xcaadxi dendxuʼ» riʼ para guibánicaʼ ndaaniʼ Paraísu.

15. a) ¿Ximodo racané grupu de «xcaadxi dendxuʼ» ca biʼchiʼ Cristu? b) ¿Ximodo zanda chinándaluʼ ejemplu stiʼ hermanu ni rihuinni lu foto ca?

¹⁵ Maʼ qué ñanda nusihuinni gubaanaʼ ni guca arrepentir que cudii xquixe peʼ Jesús pur ni biʼniʼ pur laabe. Peru ca ni naca de «xcaadxi dendxuʼ» nápanu stale modo gusihuínninu cudiʼnu xquixe peʼ. Guzéʼtenu ti ejemplu, rusihuínninu nadxiinu Jesús pur modo runi tratarnu ca bíʼchibe ni maʼ bibí. Ne laaca guniʼbe nga zusihuinni pa dxandíʼ nácanu dendxuʼ stibe (Mat. 25:31-40). Ti modo zanda gacanenu ca biʼchiʼ Cristu nga ra guni predicarnu né stale gana ne gúninu discípulo (Mat. 28:18-20). Nga runi riuuláʼdxinu iquiiñenu ca herramienta ni biree de lu Biblia ni rudiicabe laanu, casi libru ¡Zanda guibániluʼ nayecheʼ! Pa nagasi qué gápaluʼ nin ti estudiu, zanda quixhe íqueluʼ guyúbiluʼ binni ni guni estudiárneluʼ Biblia.

16. ¿Xi zanda gúninu dede ca yanna para guibáninu ndaaniʼ Paraísu?

¹⁶ Cadi naquiiñeʼ cuézanu dede ora chuʼnu ndaaniʼ Paraísu ca para gusihuínninu nácanu binni ni racalaʼdxiʼ Jehová guibani ndaaniʼ ni. Dede ca yanna naquiiñeʼ gúninu stipa cadi gusiguiinu, gúninu cosa ni jneza, ne gapa xpiaʼnu lu guiráʼ ni gúninu. Ne laaca cadi naquiiñeʼ guchéʼnenu Jehová, xheelanu ne ca hermanu stinu. Pa yanna ruzúʼbanu stiidxaʼ Jehová tiempu ra nuu stale binni malu, jma fácil zaca para laanu gúninu ni ndaaniʼ Paraísu. Laaca zanda gápanu xiixa habilidad ne cualidad ne zacá gusihuínninu maʼ cayuʼnu listu para guibáninu ndaaniʼ Paraísu, casi ca ni riete lu artículo ni láʼ «¿Ñee maʼ nuuluʼ listu para guni heredarluʼ Guidxilayú la?» ni zeeda lu revista riʼ.

17. ¿Xiñee cadi naquiiñeʼ guiníʼ íquenu náparunu donda pur xiixa pecadu grave bíninu dxiqué?

¹⁷ Laaca naquiiñeʼ gúninu stipa cadi guiníʼ íquenu náparunu donda pur xiixa pecadu grave bíninu dxiqué. Laaca cadi guyúbinu «laapenu guni practicarnu  pecadu» purtiʼ si riníʼ íquenu zanda guixiá donda stinu ra guti Jesús pur laanu (Heb. 10:26-31). Peru pa dxandíʼ maʼ guca arrepentirnu de xiixa pecadu grave ni bíninu, maʼ biyúbinu Jehová para gacané laanu ne ca ancianu, ne maʼ bichaʼnu, zanda ganna dxiichinu maʼ biʼniʼ perdonarbe laanu (Is. 55:7; Hech. 3:19). Cadi guiaandaʼ laanu xi gudxi Jesús ca fariseu: «Cadi zedayubeʼ binni nachaʼhuiʼ, sínuque binni pecador» (Mat. 9:13). Nga runi zanda guixiá ca pecadu stinu pur guti Jesús pur laanu.

18. ¿Xi ñuuláʼdxiluʼ ninabadiidxaluʼ gubaanaʼ ni gucuá cueʼ Jesús que?

¹⁸ Guníʼ ique nuuluʼ ndaaniʼ Paraísu ne caníʼneluʼ gubaanaʼ ni guniʼné Jesús que. Ne guirópatu caniʼtu pabiáʼ cudiitu xquixe peʼ pur sacrificiu biʼniʼ Cristu. Zándaca guinábaluʼ laabe gábibe lii xi biʼniʼ Jesús ra mayaca gatiʼ ne xi biʼniʼ sentirbe ora binadiágabe ni gudxi Jesús laabe. Ne laaca zándaca guinabadiidxaʼ gubaanaʼ que lii ximodo bibani binni lu ca últimu dxi stiʼ guidxilayú stiʼ Binidxabaʼ. ¡Guizáʼ galán purtiʼ zusíʼdinu binni de Stiidxaʼ Dios cásica hombre riʼ! (Efes. 4:22-24).

19. ¿Xiñee qué zareʼnu gana guibáninu ndaaniʼ Paraísu? (Biiyaʼ dibuju ni zeeda lu portada).

¹⁹ Qué zareʼnu gana ndaaniʼ Paraísu. Ziuuláʼdxinu guinínenu stale binni ne zúninu dxiiñaʼ ni zusiecheʼ laanu. Ne ni jma galán nga, cada dxi tidiʼ jma zunibiaʼnu Bixhózenu ni nuu guibáʼ ne ziéchenenu guiráʼ ni gudiibe laanu. Qué zusaana de guizíʼdinu cosa nacubi de laabe ne de ca ni bizaʼbe. Ne cada dxi tidiʼ jma zannaxhiinu Dios. ¡Guizáʼ rudiʼnu xquixe peʼ Jehová ne Jesús purtiʼ maʼ biʼniʼ prometercaʼ laanu guibáninu ndaaniʼ ti Paraísu sin qué chuʼ dxi gátinu!