1. ¿Xiñee zanda guininu dxandíʼ esperanza ni gupa Abrahán que?

 BIʼNIʼ prometer Jehová Abrahán, xhamigu, pur descendencia stiʼ guiráʼ ca guidxi ni nuu lu Guidxilayú zacaacaʼ ndaayaʼ (Gén. 15:5; 22:18). Cumu guizáʼ gupa Abrahán fe Dios la? gunna dxichi zuni cumplir Jehová promesa que. Peru dxi napa Abrahán 100 iza ne xheelaʼ 90, caʼruʼ gapa ca xpinni Dios riʼ nin ti xiiñicaʼ (Gén. 21:​1-7). Sicaríʼ ruzeeteʼ Biblia de Abrahán: «Gúpabe esperanza ne gúpabe fe zeeda gácabe bixhoze stale guidxi casi maca gúdxicabe laabe» (Rom. 4:18). Ne casi nánnanu, guca cumplir esperanza ni gulézabe que: gupa Abrahán Isaac, xiiñibe ni cabézabe gudii Dios laabe que. ¿Xiñee gunna dxichi Abrahán zuni cumplir Jehová promesa ni biʼniʼ laabe yaʼ?

2. ¿Xiñee gunna dxichi Abrahán zuni Jehová ni maʼ biʼniʼ prometer?

² Cumu runibiáʼ chaahuiʼ Abrahán Jehová la? «guyuube seguru zuni Dios ni maʼ biʼniʼ prometer laabe» (Rom. 4:21). Pur fe stibe biiyaʼ Jehová laabe casi ti binni nachaʼhuiʼ ne guyuulaʼdxiʼ ni bíʼnibe (Sant. 2:23). Casi ruzeeteʼ Romanos 4:​18, gupa Abrahán fe ne gupa esperanza. Yanna guidúʼyanu ni guníʼ apóstol Pablo de esperanza ni zeeda lu Romanos capítulo 5.

3. ¿Xi bisiene Pablo de esperanza?

³ Bisiene Pablo xiñee zanda ganna dxíchinu «cadi pur gana si nga nápanu esperanza» (Rom. 5:5). Laaca racané ni laanu guiénenu ximodo zanda gaca esperanza stinu  jma nadipaʼ. Ra guidúʼndanu ni ná Romanos 5:​1-5, guníʼ ique ximodo jma nadipaʼ ziyaca esperanza stiluʼ ra zidiʼdiʼ tiempu. Ne ndiʼ zacané lii gánnaluʼ xi zanda gúniluʼ para gaca esperanza stiluʼ jma nadipaʼ. Primé, guidúʼyanu de ti esperanza guizáʼ sicarú ni bizeeteʼ Pablo ne cadi pur gana si esperanza riʼ.

4. ¿Xidé riete lu Romanos 5:​1, 2?

⁴ (Biindaʼ Romanos 5:​1, 2). Bicaa Pablo ca diidxaʼ riʼ para ca hermanu ni nuu Roma. Biziidicabe de Jehová ne de Jesús, bisihuínnicabe nápacabe fe ne gúcacabe xpinni Cristu. Ngue runi Dios guníʼ nácacabe binni nachaʼhuiʼ pur fe stícabe ne gulí laacabe né espíritu santu. Dede dxi que bizulú gúpacabe ti esperanza guizáʼ sicarú ne ni dxandíʼ zaca.

5. ¿Xi esperanza napa ca ungidu?

⁵ Despué, bisiene apóstol Pablo ca xpinni Cristu ungidu ni nabeza Éfeso de esperanza ni bidii Dios laacaʼ. Ne guniʼbe zacaacaʼ «ti herencia» (Efes. 1:18). Ne ca xpinni Cristu de Colosas gúdxibe laacaʼ paraa nuu esperanza sticaʼ. Guniʼbe: «Nuu ti esperanza para laatu guibáʼ» (Col. 1:​4, 5). Nga runi, ca xpinni Cristu ungidu nápacaʼ esperanza ziásacaʼ de lade gueʼtuʼ ne zabánicaʼ sin qué chuʼ dxi gáticaʼ guibáʼ ra zuni mandárnecaʼ Cristu (1 Tes. 4:​13-17; Apoc. 20:6).

6. ¿Xi guníʼ ti hermanu ungidu de esperanza ni napa?

⁶ De guidubi ladxidóʼ ca xpinni Cristu ungidu rusisácacaʼ esperanza ni nápacaʼ. Lu iza 1991 hermanu Frederick Franz guníʼ sicaríʼ: «Seguru esperanza ni nápadu, dxandíʼ peʼ zaca cumplir ni luguiáʼ guiráʼ ne cada tobi de ca 144.000 ni nuu lu grupuhuiiniʼ de dendxuʼ, ne zácani jma de biáʼ ruxuíʼludu». Despué de bíʼnibe xhiiñaʼ Jehová pur stale iza, hermanu Franz guníʼ: «Qué huasaanadu de  gusisácadu esperanza ni nápadu. Ni rúnidu nga [ . . . ] jma rusisácadu ni ra tidiʼ tiempu. Nácani ti cosa ni risaca cuézadu, neca tidiʼ ti millón de iza. Ne yanna jmaruʼ si rusisacaʼ esperanza ni nápadu».

7, 8. ¿Xi esperanza napa stale de ca xpinni Dios? (Romanos 8:​20, 21).

⁷ Stale de ca xpinni Jehová de tiempu riʼ gadxé esperanza nápacaʼ. ¿Xi esperanza ca yaʼ? Laaca laani nga esperanza ni gupa Abrahán: guibáninu sin qué chuʼ dxi gátinu lu Guidxilayú riʼ dxi guni mandar Reinu stiʼ Dios (Heb. 11:​8-10, 13). Laaca bicaa Pablo de esperanza nabé sicarú riʼ (biindaʼ Romanos 8:​20, 21). Dxi biziidiluʼ de ca promesa ni zeeda lu Biblia, ¿xi jma guyuuláʼdxiluʼ yaʼ? ¿Ñee guyuuláʼdxiluʼ ora gúnnaluʼ zácaluʼ ti binni sin donda la? ¿Ñee biécheluʼ ora gúnnaluʼ ziasa ca binni ni nadxiiluʼ ne zabánicaʼ ndaaniʼ ti paraísu la? Pur esperanza ni bidii Dios lii zanda gápaluʼ ti guendanabani guizáʼ sicarú despué.

⁸ Guiranu nápanu ti esperanza ni nabé rusiecheʼ laanu: guibáninu guibáʼ o lu Guidxilayú sin qué chuʼ dxi gátinu. Ne ra zidiʼdiʼ dxi jma nadipaʼ zaca esperanza ni nápanu. ¿Ximodo zanda gácani jma nadipaʼ yaʼ? Para gánnanu ni la? guidúʼyanu xi bicaa Pablo. Zacané ca diidxaʼ ni bicaabe riʼ laanu ganna dxíchinu cadi pur gana si esperanza ni nápanu.

9, 10. Cásica Pablo, ¿xi nánnanu zazaacanu? (Romanos 5:3; biiyaʼ ca imagen ca).

⁹ (Biindaʼ Romanos 5:3). Guníʼ Pablo ti cosa ni zándaca zadxagayaanu: tídinu lu guendanagana zanda guquidxi ni esperanza ni nápanu. Guiranu ca xpinni Cristu nánnanu zadxaagalunu guendanagana. Guiníʼ íquenu ni gudxi Pablo ca xpinni Cristu de Tesalónica: «Dxi nuurudu ra nuutu maca gúdxidu laatu zápanu guendanagana, ne yanna maʼ cadídinu lúcani» (1 Tes. 3:4). Ne ra nuu ca  xpinni Cristu de Corinto bicaabe: «Racaláʼdxidu gánnatu pabiáʼ gucanadu [ . . . ] zácaxadu ñátidu raqué» (2 Cor. 1:8; 11:​23-27).

¹⁰ Dede yanna dxandíʼ ca diidxaʼ riʼ. Laanu ca xpinni Cristu nánnanu zadídinu lu guendanagana (2 Tim. 3:12). ¿Xi guendanagana huadxagaluluʼ dede dxi bizulú gúpaluʼ fe Jesús ne cayúniluʼ ni ná yaʼ? Zándaca ca xhamíguluʼ o familia stiluʼ huayuni búrlacaʼ lii o huayuninacaʼ lii. ¿Ñee huayápaluʼ guendanagana ra dxiiñaʼ pur nácaluʼ honradu lu guiráʼ cosa la? (Heb. 13:18). ¿Ñee huacaalú Gobiernu lii pur riníʼneluʼ xcaadxi de esperanza ni nápaluʼ la? Intiica si guendanagana cadídinu, Pablo guníʼ naquiiñeʼ chuʼnu nayecheʼ. ¿Xiñee yaʼ?

11. ¿Xiñee naquiiñeʼ quixhe íquenu guni huantarnu?

¹¹ Riéchenu ora ridídinu lu guendanagana purtiʼ racané ni laanu gápanu ti cualidad nabé risaca. Romanos 5:3 ná: «Racané ca guendanagana ca laanu guni huantarnu». Cumu guiranu casi xpinni Cristu ridídinu lu guendanagana la? nga runi, guiranu naquiiñeʼ quixhe íquenu guni huantarnu. Pa guni huantarnu zacaanu premiu ni cabézanu. Qué racaláʼdxinu gácanu casi ca binni ni guníʼ Jesús lu ejemplu stiʼ semiá ni biaba lade guié que. Ricaacabe «stiidxaʼ Reinu» né guendanayecheʼ, peru «ora gueeda xiixa guendanagana o sanándacabe» laacaʼ maca ziyábacaʼ (Mat. 13:​5, 6, 20, 21). Dxandíʼ, guirutiʼ riuulaʼdxiʼ zanándacabe laa o tidiʼ lu guendanagana, peru zabeendunu ni galán pa guni huantarnu. Guidúʼyanu xiñee.

12. ¿Xi ndaayaʼ zacaanu pa guni huantarnu?

¹² Discípulo Santiago bizeeteʼ xi ndaayaʼ zacaanu pa guni huantarnu. Laabe bicaabe: «Pa qué gusaana de guni huantartu la? qué zápatu ra quiñeyúcabe laatu, ne zúnitu guiráʼ cosa jneza, ne gastiʼ qué ziaadxaʼ laatu» (Sant. 1:​2-4). Nga runi, guni huantarnu racané ni laanu. ¿Ximodo yaʼ? Racané ni laanu gápanu jma paciencia, jma fe ne gápanu jma confianza Dios. Peru cadi ngasi, laaca zabeendunu sti cosa galán pa guni huantarnu.

13, 14. ¿Xi rizaaca ora runi huantarnu, ne ximodo reeda gaca esperanza ni nápanu? (Romanos 5:4).

¹³ (Biindaʼ Romanos 5:4). Pablo bizeeteʼ: «Ne ora runi huantarnu riuulaʼdxiʼ Dios ni cayúninu» (Rom. 5:4). Peru qué riníʼ diʼ nga riecheʼ Jehová ora ridídinu lu guendanagana, sínuque riéchebe ora runi huantarnu. ¿Cadi dxandíʼ riuuluʼ gana ora gánnaluʼ zanda gusiécheluʼ Jehová pa gácaluʼ fiel ne guni huantarluʼ la? (Sal. 5:12).

¹⁴ Guiníʼ íquenu ni bizaaca Abrahán. Guyuulaʼdxiʼ Dios ni bíʼnibe purtiʼ biʼniʼ huantarbe ca guendanagana ni bidxaagalube. Guca xhamigu Jehová laabe ne biiyaʼ laabe casi ti binni nachaʼhuiʼ (Gén. 15:6; Rom. 4:​13, 22). Ne zacaca nga zuuyabe laanu. Ziuulaʼdxiʼ Dios ni gúninu pa gácanu fiel ne guni huantarnu, ne cadi pur ca ni gúninu lu xhiiñabe o pur ca privilegiu ni gápanu ndaaniʼ congregación. Ne laani nga ti cosa ni guiranu zanda gúninu, biaʼ tiica si iza nápanu, modo tiica si nabáninu o intiica si habilidad nápanu. Yanna, ¿ñee cadíʼdiluʼ lu xiixa guendanagana la? Pa zacá ni la? cadi guiaandaʼ lii ziuulaʼdxiʼ Dios  ni gúniluʼ pa gácaluʼ fiel. Ra gánnanu cusiéchenu Jehová zacané ni laanu iguidxi esperanza ni nápanu.

15. ¿Xiruʼ guníʼ Pablo, ne xi zándaca guiníʼ íquenu?

¹⁵ Casi maʼ bidúʼyanu, guníʼ apóstol Pablo ziuulaʼdxiʼ Dios ni gúninu pa guni huantarnu. Yanna guidúʼyanu xiruʼ guniʼbe: «Ora riuulaʼdxiʼ Dios ni cayúninu racané ni laanu gápanu esperanza, ne cadi pur gana si nga nápanu esperanza» (Rom. 5:​4, 5). Lu Romanos 5:​2, maca guníʼ Pablo napa ca xpinni Cristu de Roma «esperanza zusisaca Dios» laacaʼ. Nga runi, zándaca guiníʼ íquenu: «¿Pa maʼ napa ca xpinni Cristu riʼ esperanza, xiñee bizeeteʼ Pablo sti biaje de esperanza yaʼ?».

16. Bisiene ximodo zanda chuʼ tuuxa seguru zaca cumplir esperanza ni rudii Biblia. (Biiyaʼ ca imagen ca).

¹⁶ Zanda guiénenu ca diidxaʼ ni guníʼ Pablo pa qué guiaandaʼ laanu zanda gaca esperanza ni nápanu jma naguidxi. Guníʼ ique primé biaje guniʼnécabe lii de esperanza de guibániluʼ sin qué chuʼ dxi gátiluʼ ndaaniʼ ti paraísu lu Guidxilayú riʼ. Zándaca guníʼ íqueluʼ guizáʼ galán ni, peru cadi dxandíʼ ni. Peru ra jma ziyunibiaʼluʼ Jehová ne ni cayuni prometerbe laanu lu Biblia, guyuuluʼ seguru dxandíʼ zaca cumplir esperanza ni nápaluʼ.

17. ¿Ximodo raca esperanza stiluʼ jma naguidxi despué de guyuunísaluʼ?

¹⁷ Despué de guyuunísaluʼ, ziyácaruʼ esperanza stiluʼ jma naguidxi, purtiʼ ziziidiluʼ jma de Jehová ne zidxíñaluʼ jma gaxha de laabe. (Heb. 5:13–6:1). Zándaca bizaacaluʼ ni ná Romanos 5:​2-4, bidxaagaluluʼ guendanagana ne bidiiluʼ cuenta guyuulaʼdxiʼ Jehová ni bíʼniluʼ. Cumu nánnaluʼ cusiécheluʼ Jehová la? jmaruʼ si riuuluʼ seguru zuni cumplirbe ni maʼ biʼniʼ prometerbe. Jma maʼ naguidxi nuu esperanza stiluʼ yanna que dxiqué.  Jma maʼ runi creluʼ ni, runi sentirluʼ para lii ni, jma maʼ riníʼ íqueluʼ ni. Ne rihuinni zacá ni pur modo nabániluʼ: modo runi tratarluʼ familia stiluʼ, ca decisión ni ricaaluʼ ne modo riquiiñeluʼ tiempu stiluʼ.

18. ¿Xi cayabi Jehová laanu para guni crenu zuni ni maʼ guníʼ?

¹⁸ Despué de bizeeteʼ Pablo rápanu esperanza ora riuulaʼdxiʼ Dios ni cayúninu, bizeetebe ti cosa nabé risaca: zanda chuʼnu seguru zaca cumplir esperanza ni nápanu. ¿Xiñee yaʼ? Purtiʼ gudxi Pablo ca xpinni Cristu que caadxi diidxaʼ para guni crecaʼ zuni Dios ni maʼ guníʼ, sicaríʼ nabe: «Cadi pur gana si nga nápanu esperanza; purtiʼ maʼ gucuaanu espíritu santu, ne nga ruchátipa ladxidoʼno de guendarannaxhii stiʼ Dios» (Rom. 5:5). Nga runi, zanda chuʼluʼ seguru zaca cumplir esperanza ni nápaluʼ.

19. ¿Xidé nuunu seguru?

¹⁹ Galán guietenaláʼdxiluʼ ni bizaaca Abrahán. Biʼniʼ Jehová laabe ti promesa, guyuulaʼdxiʼ ni bíʼnibe ne biiyaʼ laabe casi xhamigu. Ne guca cumplir ni guleza Abrahán que. Biblia ná: «Guleza Abrahán ne qué niree gana dede dxi gucuaa promesa ni guníʼ Dios gudii laa» (Heb. 6:15; 11:​9, 18; Rom. 4:​20-22). Cásica Abrahán, laanu laaca nuunu seguru pa gácanu fiel Jehová la? cadi pur gana si esperanza ni nápanu, sínuque zacaanu premiu. Dxandíʼ esperanza ni nápanu ne pur nga riuʼnu nayecheʼ (Rom. 12:12). Pablo bicaa: «Rinabaʼ Dios ni rudii esperanza binni gusiecheʼ laatu ne quixhedxí ladxidoʼto purtiʼ nápatu confianza laa, ti gacané poder stiʼ espíritu santu laatu para gaca esperanza stitu jma naguidxi» (Rom. 15:13).