MAʼ BISIGAʼDEʼ JEHOVÁ laanu stale cosa ne rudiʼnu xquixe peʼ laabe pur rudiibe lugar guicaanu decisión ximodo iquíʼñenu ca ni. Tobi de ca ni bisigáʼdebe laanu nga vinu. Biblia ná: «Raca pan para guiéchenu ne vinu ca rusiecheʼ guendanabani» (Ecl. 10:19; Sal. 104:15). Peru zándaca huadiiluʼ cuenta caadxi binni rápacaʼ guendanagana purtiʼ reʼcaʼ nisadxuʼniʼ ne laaca gadxé gadxé modo ruuyacabe ndaaniʼ ca guidxi ca gueʼ tuuxa xiixa ni napa alcohol. Peru ¿ximodo naquiiñeʼ guidúʼyanu ni laanu ca xpinni Cristu yaʼ?

Ora guicaanu xiixa decisión, galán guiníʼ íquenu ximodo ruuyaʼ Dios gueʼ tuuxa nisadxuʼniʼ ne cadi pur modo riníʼ ique binni ra nabézanu o pur modo biniisinu. Zacá zabáninu jma nayecheʼ.

Zándaca huadiiluʼ cuenta lu guidxilayú riʼ nuu stale binni ni nabé reʼ ne rúnicaʼ ni seguidu. Nuu tu reʼ para guni sentir galán ne xcaadxi reʼcaʼ para gusiaandacaʼ ca guendanagana ni nápacaʼ. Ne nuu lugar ruuyacabe binni ni reʼ xhaataʼ nisadxuʼniʼ casi ti binni nadipaʼ.

Peru laanu ca xpinni Cristu nápanu ca conseju ni rudii Dios ni nadxii ne ni bizáʼ laanu. Lu Stiidxabe rábibe laanu xi rizaaca ora xhudxi tuuxa. Casi lu Proverbios 23:​29-35 riete de ti binni rixudxi ne de ca guendanagana ni rapa pur laani. a Ti ancianu de Europa láʼ Daniel bizeeteʼ ximodo guca xquendanabani ante gaca Testigu, laabe guniʼbe: «Cumu nabé güeʼ xhaataʼ nisadxuʼniʼ la? bicaani naa guicaaʼ decisión ni cadi jneza ne pur laani nabé gucanaʼyaʼ ne dede yanna ruchiiñaʼ xquendabiaaneʼ naa».

¿Xi zacané laanu guicaanu decisión jneza ne cadi gápanu guendanagana ni rapa tuuxa ni rixudxi yaʼ? Ni zacané laanu nga guidúʼyanu ca cosa ca casi ruuyaʼ Dios ni.

Guidúʼyanu xi ruzeeteʼ Biblia de alcohol ne xii nga ni rucaa binni xhudxi.

Stiidxaʼ Dios cayabi laanu cadi malu nga gueʼ tuuxa caadxi nisadxuʼniʼ. Ni cayabi ni laanu nga riuu binni nayecheʼ ora gueʼ vinu. Lu Eclesiastés 9:7 ná: «Gudó guendaró stiluʼ né guendanayecheʼ ne zaqueca güeʼ vinu stiluʼ nayecheʼ». Biblia ruzeeteʼ caadxi biaje güeʼ Jesús vinu ne zaqueca caadxi xpinni Jehová de dxiqué (Mat. 26:​27-29; Luc. 7:34; 1 Tim. 5:23).

Gadxé nga gueʼ binni caadxi nisadxuʼniʼ que xhudxi. Nayaʼniʼ ná Biblia: «Cadi xhúdxitu» (Efes. 5:18). Ne laaca nani «Ca binnigüeʼ, […] qué ziuucaʼ lu Reinu stiʼ Dios» (1 Cor. 6:10). Casi bidúʼyanu, guizáʼ ridxiichi Jehová ora gueʼ xhaataʼ tuuxa o xhudxi. Qué rinándanu modo riníʼ ique binni ni nabeza gaxha de laanu, sínuque rúninu stipa guidúʼyanu ca cosa ca modo ruuyaʼ Dios ca ni.

Nuu tu ná: «Naa randa reeʼ stale ne qué rixudxeʼ». Peru cadi galán guiníʼ íquenu zacá. Biblia cayabi laanu cadi jneza gapa binni viciu de gueʼ xhaataʼ vinu pa hombre laabe o pa gunaa ne pur laani maʼ qué zanda gacaʼ xhamígube Jehová (Tito 2:3; Prov. 20:1). Dede bizeeteʼ Jesús qué ziuu caadxi de ca binni ni gueʼ xhaataʼ nisadxuʼniʼ lu guidxilayú cubi (Luc. 21:​34-36). Yanna, ¿xi zanda guni ti xpinni Cristu para cadi gapa ca guendanagana ni rapa ti binni ni reʼ nisadxuʼniʼ ya?

Casi maʼ bidúʼyanu, zanda gápanu guendanagana pa guiníʼ íquenu modo riníʼ ique ca binni ni nabeza xquídxinu ora guicaanu decisión pabiáʼ guideʼnu. Nga runi, laanu ca xpinni Cristu rúninu ni riuulaʼdxiʼ Jehová ora chiguicaanu decisión pabiáʼ guidoʼno o guideʼnu. Rudii Biblia conseju riʼ laanu: «Pa cayoto o pa cayeʼtu, o pa cayúnitu intiica cosa, laguni guiráʼ cosa para gusisácatu Dios» (1 Cor. 10:31). Guidúʼyanu caadxi pregunta ne principiu ni zeeda lu Biblia ni zanda gacané laanu.

¿Ñee reeʼ nisadxuʼniʼ para si cadi guni búrlacabe naa la? Éxodo 23:2 ná: «Cadi chinándaluʼ ni runi xcaadxi». Lu versículo riʼ cayabi Jehová ca israelita cadi gúnicaʼ cosa malu ni runi binni. Ne dede yanna risaca ca conseju stibe para ca xpinni Cristu. Pa gudiʼnu lugar guicá modo riníʼ ique ne ni runi xcaadxi laanu la? zándaca maʼ qué zinándanu ca norma stiʼ Jehová ne zaxélenu de laa (Rom. 12:2).

¿Ñee reeʼ para gusihuinneʼ runeʼ huantar la? Nuu guidxi cadi malu gueʼ xhaataʼ binni ne guni ni seguidu (1 Ped. 4:3). Guidúʼyanu conseju ni zeeda lu 1 Corintios 16:13: «Lagataná, laguyubi modo gaca fe stitu naguidxi, lagaca valiente, lagaca nadipaʼ». Gueʼ tuuxa nisadxuʼniʼ qué runi ni laa ti binni nadipaʼ. Sínuque ni runi ni nga qué randa riníʼ ique jneza ne jma raca nagana para laa guicaa decisión galán. Xhúdxiluʼ qué runi ni lii ti binni nadipaʼ, sínuque ti binni ni qué randa rucueeza laca laa. Lu Isaías 28:7 riete ca binni ni rixhudxi qué ricaacaʼ decisión galán ne rúnicaʼ ni cadi jneza.

Pa racaláʼdxinu gápanu stipa para gúninu ni jneza, caquiiñeʼ guyúbinu gacané Jehová laanu ne gúninu stipa pur gatananu ne chuʼ fe stinu naguidxi (Sal. 18:32). Para nga caquiiñeʼ guiduʼyaʼ chaahuinu xi zanda gúninu ne gucáʼnanu intiica decisión ni zanda guxheleʼ laanu de Jehová. Ne nga peʼ nga ni biʼniʼ Jesús dxi guyuu lu Guidxilayú riʼ, ngue runi stale binni biiyaʼ laabe casi ti hombre nadipaʼ ne ni dxandíʼ gupa valor.

 ¿Ñee reeʼ para cadi guiníʼ iqueʼ ca problema stinneʼ la? Ti hombre bicaa salmo gúdxibe Jehová ca diidxaʼ riʼ: «Ora jma peʼ nuaaʼ xizaa, lii gudixhedxiluʼ ladxiduáʼ ne gucaneluʼ naa guneʼ sentir galán» (Sal. 94:19). Pa nuu xiixa ni riguu xizaa lii, biyubi gacané Jehová lii ne cadi nisadxuʼniʼ. Ti modo zanda gacanebe lii nga cadi gusaana de guni orarluʼ. Ne nuu stale tu huanabaʼ gacané tuuxa hermanu ni maʼ ziné stale iza ndaaniʼ congregación laa. Ni dxandíʼ nga ora reʼ tuuxa para si gusiaandaʼ ca guendanagana stiʼ, jma qué rapa stipa para gudxiilú ca tentación ca ne guni ni jneza (Os. 4:11). Daniel, ni maca bizéʼtenu que guníʼ: «Guyuu ti tiempu bineʼ sentir napaʼ ansiedad, bineʼ sentir naa napaʼ donda pur ca cosa ni bineʼ, ngue runi reeʼ para guneʼ sentir galán. Peru pur ni runeʼ que laga rapaʼ jma guendanagana, maʼ qué ñapaʼ xhamiguaʼ ne bineʼ sentir maʼ qué risacaʼ». Yanna, ¿xi peʼ gucané laabe yaʼ? Sicaríʼ bisiénebe: «Bidieeʼ cuenta caquiiñeʼ gacané Jehová naa, cadi nisadxuʼniʼ. Pur gucanebe naa gunda bidxieeluáʼ ca guendanagana stinneʼ». Cadi guiaandaʼ laanu neca ruluíʼ qué zanda gaca chaahuiʼ xiixa guendanagana nápanu, siempre nuu Jehová para gacané laanu (Filip. 4:​6, 7; 1 Ped. 5:7).

Pa gatigá reʼluʼ nisadxuʼniʼ, galán guiníʼ íqueluʼ ca pregunta riʼ. «¿Ñee huayabi ti familia stinneʼ naa o ti xhamiguaʼ nuu xizaa purtiʼ maʼ ziaaʼ nisadxuʼniʼ reeʼ la?». Pa zacá ni, zándaca gueeda gácani ti viciu o ti guendanagana sin gudiiluʼ cuenta. «¿Ñee jma reeʼ nisadxuʼniʼ yanna que dxiqué la?». Pa zacá ni, zándaca maʼ cuzulú cayácani ti viciu para lii. «¿Ñee raca nagana para naa gusaanaʼ de gueeʼ chupa chonna gubidxa nisadxuʼniʼ la?». Pa zacá ni, ndiʼ rusihuinni maʼ nácani ti viciu ne maʼ caquiiñeluʼ gacané ti doctor lii para gusaanaluʼ viciu riʼ.

Nuu hermanu maʼ gudixhe íquecaʼ cadi guecaʼ nin ti gota nisadxuʼniʼ para cadi gápacaʼ ca guendanagana ni redaneni. Nuu xcaadxi hermanu qué reʼcaʼ purtiʼ qué riuuláʼdxicaʼ sabor ni nápani. Pa runibiaʼnu tuuxa hermanu  ni maʼ gudixhe ique cadi gueʼ ni jma jneza gúninu nga guni respetarnu decisión ni maʼ gucuaabe ne cadi guininu mal de laabe

Nuu hermanu maʼ gudixhe ique pabiáʼ si zanda gueʼ. Zándaca maʼ gudixhe íquecabe padxí zanda guécabe ne guécabe caadxi ora gócabe gueta o ti biaje lu ti semana. Sti cosa nga gúʼyacabe xi tipu nisadxuʼniʼ guécabe. Casi nuu tu laa reʼ caadxi vinu o cerveza peru qué reʼcaʼ nisadxuʼniʼ ni jma nadipaʼ nin lu xiixa preparadu o uguuchanécabeni sti bebida. Ora nanna dxíchinu pabiáʼ si zanda guideʼnu jma nagueenda chinándanu ni. Ti xpinni Cristu ni quixhe ique guni sicaríʼ ne chinanda ni la? qué gapa xi pur guituilú.

Ne laaca cadi naquiiñeʼ guiaandaʼ laanu guidúʼyanu modo riníʼ ique xcaadxi. Romanos 14:21 ná: «Jma galán cadi goloʼ beela ne cadi gueluʼ vinu ne cadi gúniluʼ xiixa cosa pa pur laani guirá fe stiʼ hermanu stiluʼ». Ni ná ca diidxaʼ riʼ nga guni respetarnu ne gannaxhiinu xcaadxi. Pa nadxiinu ti hermanu qué zadeʼnu nisadxuʼniʼ nezalube pa nánnanu que riuuláʼdxibe ni. Zacá zusihuínninu runi respetarnu ni riníʼ ique xcaadxi ne qué ruyúbinu puru si para laanu (1 Cor. 10:24).

Laanu ca xpinni Cristu rinándanu ca ley ni maʼ gudixhe gobiernu ni caníʼ de nisadxuʼniʼ. Zándaca nuu ley ni ná cadi naquiiñeʼ gueʼ ca ni nahuiiniʼ o ca ni chigusá carru o xiixa máquina (Rom. 13:​1-5).

Maʼ bidii Jehová laanu libertad para cuinu ximodo guiechenenu ca ni maʼ bidiibe laanu. Nga runi guiranu zanda cuinu xi guidoʼno ne xi guideʼnu. Chuʼnu seguru iquíʼñenu libertad ni nápanu jneza ne guluinu Bixhózenu ni nuu guibáʼ racaláʼdxinu gusiéchenu laa pur ca decisión ni guicaanu.