¿Ñee maʼ biindaluʼ ca últimu tema ni bedané revista Torre stiʼ ni rapa la? Yanna biiyaʼ pa zanda guicábiluʼ ca pregunta riʼ:

¿Xi naquiiñeʼ gúninu para guchaʼnu modo riníʼ íquenu yaʼ? (Rom. 12:2).

Cadi naquiiñeʼ si gúninu chupa chonna cosa galán pur xcaadxi, sínuque laaca naquiiñeʼ guiduʼyaʼ chaahuinu ximodo nácanu pur dentru ne guchaʼnu modo laanu para chinándanu ca norma stiʼ Dios lu xquendanabáninu. (w23.01, yaza 8 ne 9).

¿Ximodo zanda guiníʼ íquenu jneza ora guidúʼyanu guiráʼ ni cazaca lu guidxilayú riʼ?

Ruyúbinu gánnanu xi cazaaca lu guidxilayú riʼ purtiʼ nánnanu maʼ cayaca cumplir ca profecía ni zeeda lu Biblia. Peru qué racaláʼdxinu guininu ni riníʼ íquesinu purtiʼ zándaca pur laani maʼ qué chuʼ ca hermanu de congregación tobi si. Nga runi, jma galán guininu de ca cosa ni maʼ bisiene xquidxi Jehová (1 Cor. 1:10) (w23.02, yaza 16).

¿Xiñee maʼ gadxé ni gucaʼ para chúʼnisa Jesús ne maʼ gadxé ni raca para chúʼnisa ca discípulo stiʼ?

Maʼ gadxé si guca dxi guyuunisa Jesús purtiʼ gúlebe ndaaniʼ ti guidxi ni maca guca dedicar Dios, ngue runi qué nudiibe laabe Jehová. Ne laaca cadi caquiiñeʼ gaca arrepentirbe pur xiixa pecadu purtiʼ perfectu laabe (w23.03, yaza 5).

¿Xi zanda gúninu para gudiʼnu lugar guni comentar xcaadxi hermanu lu ca reunión?

Galán gaca ca comentariu stinu nachucu para ganda guni comentar jma hermanu. Ne laaca, cadi gusiénenu stale puntu luni ti zacá ganda gusiene ca hermanu xcaadxi cosa ni riete lu párrafo ca (w23.04, yaza 23).

¿Xi nga «Neza ni Nayá» ni riete lu Isaías 35:8?

Para ca judíu zeeda gaca neza riʼ, ti neza nayá ni maʼ gudixhe Dios ni riree de Babilonia ne rindani Jerusalén. Ne para tiempu stinu riʼ la? Gayuaa iza ante de 1919, bizulú guca dxiiñaʼ para gaca chaahuiʼ neza ca, casi gaca imprimir ne gaca traducir Biblia. Ne «Neza ni Nayá» riʼ rindá ndaaniʼ paraísu espiritual, ne zacané ni xquidxi Dios guicacaʼ ca ndaayaʼ ni guedané Reinu stiʼ Dios (w23.05, yaza 15 hasta 19).

¿De tu chupa gunaa nga riete lu Proverbios capítulo 9?

Lu Proverbios riete de ti «gunaa nahuati» ne tu guicaa invitación stibe la? «ndaaniʼ Baʼ» nga zaluxe. Ne laaca riete de stiʼ gunaa ni zeeda gaca «guendabiaaniʼ ni dxandíʼ» ne invitación stiʼ gunaa riʼ rineni lu neza stiʼ guendariene ne guendanabani (Prov. 9:​1, 6, 13, 18) (w23.06, yaza 22 hasta 24).

¿Ximodo bisihuinni Jehová naca humilde ne riuu razón?

Gudxi Jehová Lot guiree de Sodoma ne cheʼ lu ca dani. Peru ora gunabaʼ Lot Dios chiné familia stiʼ Zóar la? guná Dios guni ni gunabaʼ Lot laa. (w23.07, yaza 21).

¿Xi zanda guni ti gunaa pa ruuyaʼ xheelaʼ pornografía?

Cadi guiníʼ ique laa nga napa donda. Galán guyúbibe chuʼbe gaxha de Jehová ne guiníʼ íquebe lu ca ejemplu stiʼ caadxi gunaa ni zeeda lu Biblia ni bidxaagalucaʼ guendanagana ne ximodo gudixhedxí Jehová ladxidoʼcaʼ. Zanda gúnibe xiixa para gacanebe xheelabe ti cadi guibiguetaʼ guuyaʼ ni. (w23.08, yaza 14 hasta 17).

Pa gácanu binni riene, ¿ximodo zanda gacané ni laanu guicábinu né diidxaʼ nadóʼ ora guinabadiidxaʼ tuuxa laanu de ca ni runi crenu?

Galán guidúʼyanu ni guinabadiidxabe laanu casi ti oportunidad de gánnanu xi riníʼ íquebe ne xi riguu xizaa laabe. Zacané nga laanu guicábinu né diidxaʼ nadóʼ (w23.09, yaza 17).

¿Xi rizíʼdinu de modo gucuaa María stipa?

Ora gunna María chigaca jñaa Mesías, bidiibe lugar gacané xcaadxi laabe. Biquiiñeʼ Gabriel ne Elisabet Stiidxaʼ Dios para gacanecaʼ laabe. Laanu laaca zanda gudii ca hermanu stipa laanu (w23.10, yaza 15).

¿Ximodo zanda guicabi Jehová ca oración stinu?

Maʼ gúdxibe laanu zucaadiágabe ca oración stinu ne qué zusiaandabe ni naguixhe íquebe gúnibe ora ricábibe ca ni (Jer. 29:12). Neca gadxé gadxé modo ricabi Jehová ca oración stinu, peru siempre zacanebe laanu (w23.11, yaza 21 ne 22).

Pa maca biete de esperanza lu Romanos 5:​2, ¿xiñee riete ni sti biaje lu versículo 4 yaʼ?

Dede dxi gunadiaga tuuxa ca noticia galán stiʼ Reinu zándaca rapa esperanza de guibani ndaaniʼ Guidxilayú riʼ ora maʼ naca ni ti paraísu. Peru, ora runi huantarbe xiixa guendanagana ne gánnabe riuulaʼdxiʼ Jehová ca ni rúnibe, jma naguidxi raca esperanza stibe ne runi sentirbe maʼ stibe ni (w23.12, yaza 12 ne 13).