1. ¿Xi zándaca guinabadiidxanu ora guiníʼ íquenu fe ni gupa Abrahán?

 NECA stale binni maʼ binadiágacaʼ de Abrahán, peru stale de laacaʼ huaxiéʼ si nánnacaʼ de laabe. Peru laanu runibiáʼ chaahuinu laabe. Tobi de ca ni nánnanu nga ruzeeteʼ Biblia nácabe «bixhoze guiráʼ ni napa fe» (Rom. 4:11). Yanna, zándaca chuʼ tu guinabadiidxaʼ: ¿ñee zanda chinandaʼ ejemplu stiʼ Abrahán ne gapaʼ ti fe nadipaʼ cásica gúpabe la? Zanda pue.

2. ¿Xiñee risaca guni estudiar chaahuinu ejemplu stiʼ Abrahán? (Santiago 2:​22, 23).

² Ti cosa ni zanda gacané laanu gápanu fe casi gupa Abrahán nga guni estudiar chaahuinu ejemplu stibe. Qué nusaana Abrahán de nuzuubaʼ stiidxaʼ Dios: yendézabe ti guidxi zitu, stale iza bibánibe ndaaniʼ yoohuiiniʼ de lari ne gunabe bidiibe Isaac, xiiñibe ni nadxiibe, casi sacrificiu. Ne ca ni bíʼnibe ca bisihuínnibe nadipaʼ fe stibe. Pur fe stibe ne pur ca ni bíʼnibe, biiyaʼ Jehová laabe casi ti binni nachaʼhuiʼ ne guca xhamigu laabe (biindaʼ Santiago 2:​22, 23). Racalaʼdxiʼ Jehová guʼyaʼ guiranu casi binni ni runi ni jneza ne gaca xhamígunu laabe, dede né lii. Nga runi, chiguidúʼyanu ti cosa nabé risaca de Abrahán ni riete lu capítulo 4 stiʼ Romanos ne capítulo 2 stiʼ Santiago.

3. ¿Xi versículo nga biquiiñeʼ Pablo ne Santiago para guiniʼcaʼ de Abrahán?

³ Cásica Pablo ne zaqueca Santiago guniʼcaʼ de Abrahán ra bizeetecaʼ ni zeeda lu Génesis 15:6 ra ná: «Gúpabe fe Jehová, ne laa biiyaʼ laabe casi ti binni nachaʼhuiʼ». ¿Ximodo nga ruuyaʼ Jehová tuuxa casi ti binni nachaʼhuiʼ yaʼ? Riechenebe laa, riuuláʼdxibe ni runi ne para laabe  qué gapa donda. Nabé ridxagayaanu ruuyaʼ Jehová tuuxa casi ti binni ni qué gapa donda neca naca ti binni ruchee. Zándaca laaca racaláʼdxiluʼ guʼyaʼ Jehová lii zacá, ne zanda ugaandaluʼ ni. Guidúʼyanu xiiñeʼ biiyaʼ Jehová Abrahán casi ti binni nachaʼhuiʼ ne xi naquiiñeʼ gúninu para gúʼyabe laanu zacá.

4. ¿Xi rucueeza laanu para gácanu binni nachaʼhuiʼ?

⁴ Lu carta ni bicaa Pablo ra nuu ca xpinni Cristu de Roma, guniʼbe guiranu nga nácanu binni ruchee (Rom. 3:23). ¿Ximodo zanda guiechené Dios laanu ne guʼyaʼ laanu casi ti binni nachaʼhuiʼ yaʼ? Biquiiñeʼ Pablo ejemplu stiʼ Abrahán para gacané guiráʼ ca xpinni Cristu ni nayá ladxidóʼ gánnacaʼ respuesta stiʼ pregunta ca.

5. ¿Xiñee biiyaʼ Jehová Abrahán casi ti binni nachaʼhuiʼ? (Romanos 4:​2-4).

⁵ Biiyaʼ Jehová Abrahán casi ti binni nachaʼhuiʼ dxi nabeza Canaán. Ne biiyabe laa zacá neca qué ninanda casi peʼ modo ná Ley stiʼ Moisés (Rom. 4:13). ¿Ximodo nánnanu ni yaʼ? Purtiʼ gucuaa guidxi Israel Ley que jma de tapa gayuaa iza despué. Yanna, ¿xiñee biiyaʼ Jehová Abrahán casi ti binni nachaʼhuiʼ yaʼ? Guca Jehová nachaʼhuiʼ ne biiyaʼ laabe casi ti binni ni runi ni jneza pur fe stibe (biindaʼ Romanos 4:​2-4).

6. ¿Xiñee zanda guuyaʼ Jehová tuuxa ni ruchee casi ti binni nachaʼhuiʼ?

⁶ Despué, bisiene Pablo, ora napa tuuxa fe «ruuyaʼ Dios laa casi ti binni nachaʼhuiʼ, [ . . . ] pur fe stiʼ» (Rom. 4:5). Ne guníʼrube: «Laaca guníʼ David pabiáʼ nayecheʼ riuu ti hombre ni ruuyaʼ Dios laa casi ti binni nachaʼhuiʼ ne cadi pur xiixa ni guni: “Dichoso ca binni ni maʼ guca perdonar ca cosa malu ni biʼniʼ ne ni maʼ biʼniʼ perdonárcabe ca pecadu stiʼ; dichoso nga hombre ni qué ziuu dxi guietenalaʼdxiʼ Jehová ca pecadu stiʼ”» (Rom. 4:​6-8; Sal. 32:​1, 2). Runi perdonar Dios ca pecadu stiʼ ca binni ni gapa fe laabe ne rusiaandabe ca ni. Ruuyaʼ Jehová laacabe casi binni nachaʼhuiʼ ne ni maʼ qué gapa donda pur fe stiʼ.

7. ¿Ximodo guca ca xpinni Dios de dxiqué nachaʼhuiʼ?

⁷ Neca biiyaʼ Dios Abrahán, David ne xcaadxi xpinni casi binni nachaʼhuiʼ la? nácarucaʼ binni ruchee. Peru pur fe stícabe biiyaʼ Dios laacabe casi binni ni qué gapa donda, jmaruʼ si pa guchaaganu laacabe né ca binni ni qué runi adorar Dios (Efes. 2:12). Lu carta ni bicaa Pablo ra nuu ca xpinni Cristu de Roma, bisiénebe caquiiñeʼ gápanu fe para gaca xhamígunu Jehová. Nga peʼ nga ni biʼniʼ Abrahán ne David, ne ngaca nga ni naquiiñeʼ gúninu.

8, 9. ¿Xi ti cosa cadi jneza huaníʼ ique caadxi binni de ni bicaa Pablo ne Santiago, ne xiñee?

⁸ Maʼ raca gayuaa iza, ca xaíque stiʼ ca religión ni nacaʼ nácacaʼ xpinni Cristu, huadindediidxacaʼ de xii nga ni jma risaca: gapa binni fe la? o guni xiixa pur xcaadxi. Nuu de laacaʼ nacaʼ para ganda guilá tuuxa la? ni caquiiñeʼ si guni nga guni cré si Señor Jesucristu. Zándaca huayunadiáganu guiníʼcabe «Guluu Cristu ndaaniʼ ladxidoʼloʼ ne zalaluʼ». Ne zándaca rusiidiʼ ca xaíque stiʼ ca religión ca zacá pur ni riete lu Romanos 4:​6, ra guníʼ  Pablo, ruuyaʼ Dios tuuxa «casi ti binni nachaʼhuiʼ ne cadi pur xiixa ni guni». Ne nuu xcaadxi rusiidiʼ para ganda guilá binni caquiiñeʼ cheʼ sti lugar chitixe promesa ne gacané xcaadxi. Ne zándaca rusiidicabe zacá pur ni ná Santiago 2:24: «Reeda gaca tuuxa ti binni nachaʼhuiʼ pur ni runi, ne cadi pur fe si ni napa».

⁹ Cumu gadxé gadxé ni runi cré ca religión riʼ la? caadxi binni ni nanna de Biblia nacaʼ qué ñuu diʼ Pablo ne Santiago de acuerdu xi peʼ nga ni caquiiñeʼ guni binni para guilá. Nácabe guníʼ ique Pablo para ganda chuulaʼdxiʼ Dios ni guni ti binni la? ni caquiiñeʼ si gapa nga fe, peru Santiago bisiidiʼ caquiiñeʼ guni binni obra. Ti teólogo guníʼ: «Qué ñene Santiago xiñee nabé gucuá Pablo tema caquiiñeʼ gapa binni fe, para guʼyaʼ Dios laa casi ti binni nachaʼhuiʼ ne cadi pur ca ni guni». Peru Jehová nga gudxi Pablo ne zaqueca Santiago xi gucaacaʼ (2 Tim. 3:16). Nga runi, nuu ti modo cadi nagana para guiénenu xi guníʼ cada tobi de laacaʼ. Para gánnanu ni la? guidúʼyanu ca diidxaʼ ni zeeda ante de ni guníʼcabe ca.

10. ¿Xii nga ca cosa «ni cayuni tuuxa» ni bizeeteʼ Pablo? (Romanos 3:​20, 21, 28; biiyaʼ ca imagen ca).

¹⁰ ¿Xii nga ca cosa ni «cayuni tuuxa» ni bizeeteʼ Pablo lu Romanos 3 ne 4 yaʼ? Ni caniʼbe raríʼ nga guni tuuxa ca cosa ni ná ley, laani nga Ley stiʼ Moisés, ni bidii Dios ca israelita (biindaʼ Romanos 3:​20, 21, 28). Peru guca nagana para caadxi xpinni Cristu ni naca judíu guiníʼ íquecaʼ gusaana de chinándacaʼ ne gusaana de gúnicaʼ ni ná ley que. Ngue runi biquiiñeʼ Pablo ejemplu stiʼ Abrahán para gusihuinni ziuulaʼdxiʼ Dios ni guni tuuxa  pa napa fe ne cadi pur chinanda si ni ná ley. Ni guniʼbe riʼ nabé riguu ni gana laanu purtiʼ rusiidiʼ ni laanu zanda gusiéchenu ladxidóʼ Dios pa gápanu fe laa ne zaqueca Cristu.

11. ¿Xi «obra» ndiʼ caníʼ Santiago?

¹¹ Yanna, ca «obra» ni riete lu capítulo 2 stiʼ Santiago cadi laadícani nga ca «obra» stiʼ ti binni ni cayuni ni ná ley ni bizeeteʼ Pablo. Ni caníʼ Santiago raríʼ nga ca cosa ni runi ti xpinni Cristu guiráʼ dxi. Ne rusihuinni ca cosa riʼ pa dxandíʼ nápabe fe Dios. Guidúʼyanu chupa de ca ejemplu biquiiñeʼ Santiago.

12. ¿Ximodo bisiene Santiago caquiiñeʼ gapa binni fe ne laaca caquiiñeʼ guni obra? (Biiyaʼ ca imagen ca).

¹² Lu primé ejemplu ca, guníʼ Santiago naquiiñeʼ guni tratar ca xpinni Cristu guiráʼ binni igual. Bicaabe laacaʼ gudiicaʼ cuenta pa gácacaʼ nachaʼhuiʼ né ti binni ricu peru guni ca menu ti binni pobre la? neca guiniʼcaʼ nápacaʼ fe, peru pur ni rúnicaʼ qué rusihuínnicaʼ ni (Sant. 2:​1-5, 9). Lu guiropa ejemplu ca, guniʼbe de tuuxa ni gu’yaʼ ti biʼchiʼ o ti bizanaʼ caquiiñeʼ lari o ni gó peru qué rúnibe gastiʼ para gacanebe laa. Neca guiniʼbe nápabe fe peru pa cadi cusihuínnibe ni pur ni cayúnibe la? cadi dxandíʼ diʼ fe stibe. Sicaríʼ bicaa Santiago: «Binni ni ná napa fe peru qué rusihuinni ni né ca obra stiʼ. Qué iquiiñeʼ fe stiʼ» (Sant. 2:​14-17).

13. ¿Xi ejemplu biquiiñeʼ Santiago para guiníʼ naquiiñeʼ gusihuínninu nápanu fe pur ca ni rúninu? (Santiago 2:​25, 26)

¹³ Bizeeteʼ Santiago ejemplu stiʼ Rahab para guiníʼ de tuuxa ni rusihuinni napa fe pur ca ni runi (biindaʼ Santiago 2:​25, 26). Maca binadiaga gunaa riʼ de Jehová  ne nánnabe laa nga cayacané ca israelita (Jos. 2:​9-11). ¿Xi bíʼnibe para gusihuínnibe nápabe fe Jehová yaʼ? Bicaachibe chupa israelita ni canagundaachiʼ guidxi que para cadi guuticabe laacaʼ. Pur ni bíʼnibe riʼ, biiyaʼ Jehová laabe cásica Abrahán neca nácabe ti gunaa ni ruchee ne cadi nácabe israelita. Rusiidiʼ ejemplu stibe laanu nabéʼ risaca nga gusihuínninu nápanu fe pur ca ni rúninu.

14. ¿Ximodo nusiénenu maʼ gadxé nga ni bicaa Pablo ne ni bicaa Santiago?

¹⁴ Casi bidúʼyanu, gadxé gadxé nga ni caníʼ Pablo ne Santiago ora bizeetecaʼ gapa binni fe ne guni obra. Pablo la? gúdxibe ca xpinni Cristu ni naca judíu qué ziechené Jehová laacaʼ pa ni ná si ley que cayúnicaʼ. Ne Santiago la? bisiene naquiiñeʼ gusihuinni guiráʼ ca xpinni Cristu napa fe pur ca obra stiʼ.

15. Bizeeteʼ caadxi modo zanda gusihuínninu nápanu fe pur ca ni rúninu. (Biiyaʼ ca imagen ca).

¹⁵ Ora cayabi Jehová laanu naquiiñeʼ gápanu fe cásica gupa Abrahán para gúʼyabe laanu casi ti binni nachaʼhuiʼ, cadi caníʼ diʼ nga naquiiñeʼ gúninu cásipeʼ modo biʼniʼ Abrahán. Nuu stale modo gusihuínninu nápanu fe pur cani gúninu. Zanda guidxaagalunu né guendanayecheʼ ca ni nacubi cadxiña ndaaniʼ congregación, gacanenu ca hermanu stinu ora peʼ caquiiñecaʼ xiixa ne guidúʼyanu modo gacanenu familia stinu. Rusiéchenu Jehová ora rúninu ca cosa riʼ (Rom. 15:7; 1 Tim. 5:​4, 8; 1 Juan 3:18). Tobi de ca modo jma risaca gusihuínninu nápanu fe nga guni predicarnu né stale gana (1 Tim. 4:16). Guiranu zanda gusihuínninu pur ca ni gúninu nápanu fe zuni cumplir Jehová ca promesa stiʼ ne modo  rúnibe ca cosa ca nga jma jneza. Pa gúninu ca ni la? zanda chuʼnu seguru zuuyaʼ Jehová laanu casi ti binni nachaʼhuiʼ ne zuuyabe laanu casi xhamígube.

16. ¿Xi cabeza Abrahán guizaaca pur fe ni napa?

¹⁶ Lu Romanos capítulo 4, ridxélanu sti cosa ni rusiidiʼ ejemplu stiʼ Abrahán laanu: nabé risaca gápanu esperanza. Biʼniʼ prometer Jehová Abrahán pur laa ziuu ndaayaʼ «stale guidxi». ¡Aque sicarú esperanza gupa Abrahán! (Gén. 12:3; 15:5; 17:4; Rom. 4:17). Peru dxi napa Abrahán 100 iza ne Sara 90, caʼruʼ diʼ gápacaʼ nin ti xiiñicaʼ. Para binni guidxilayú la? cadi nagana nuníticabe esperanza. Neca gúcani nagana para Abrahán, «gúpabe esperanza ne gúpabe fe zeeda gácabe bixhoze stale guidxi» (Rom. 4:​18, 19). Ne ra gudiʼdiʼ tiempu guca cumplir promesa que: beeda gaca Abrahán bixhoze Isaac, xiiñibe ni cabézabe gudii Dios laabe (Rom. 4:​20-22).

17. ¿Ximodo nánnanu zanda guʼyaʼ Dios laanu casi ti binni nachaʼhuiʼ ne gueeda gácanu xhamígube?

¹⁷ Cásica Abrahán, zanda guʼyaʼ Jehová laanu casi binni nachaʼhuiʼ ne gueeda gácanu xhamigu. Nga runi, Pablo guníʼ ca diidxaʼ riʼ ora bizeeteʼ de Abrahán: «Né ca diidxaʼ “biiyaʼ Dios laabe casi ti binni nachaʼhuiʼ”, cadi para laasibe gucuá ni, sínuque laaca gucuá ni para laanu, purtiʼ laaca zuuyaʼ Dios laanu casi binni nachaʼhuiʼ purtiʼ runi crenu laa nga bisibani Jesús Señor stinu» (Rom. 4:​23, 24). Caquiiñeʼ gápanu guionnaʼ cosa ni gupa Abrahán: gápanu fe, gúninu obra ne gápanu esperanza. Lu sti artículo ca zadúʼyanu ni guníʼ Pablo de esperanza ni riete lu Romanos capítulo 5.