1. ¿Xi naquiiñeʼ guni ca hombre ni naca xpinni Cristu para ganda cueenducaʼ ni galán?

 SICARÍʼ gudxi rey David Salomón: «Guca nadipaʼ ne biʼniʼ ca cosa ca casi ti hombre» (1 Rey. 2:​1-3). Naquiiñeʼ chinanda guiráʼ ca hombre ni naca xpinni Cristu conseju riʼ. Para ganda cueendúcabe ni galán caquiiñeʼ guiziidicabe ca norma stiʼ Jehová ne chinándacabe ca principiu ni zeeda lu Biblia lu guiráʼ ni gúnicabe (Luc. 2:52). ¿Xiñee risaca nga guiniisi ca joven ca lu neza stiʼ Jehová yaʼ?

2, 3. ¿Xiñee risaca nga gaca ca joven ca xpinni Cristu ni guiniisi ndaaniʼ xquidxi Dios?

² Ca hombre ni naca xpinni Cristu rúnicaʼ stale dxiiñaʼ risaca ndaaniʼ familia ne zaqueca ndaaniʼ congregación. Pa nácaluʼ joven, zándaca huaníʼ íqueluʼ ca privilegiu ni zanda gueeda gápaluʼ despué. Zándaca maʼ gudixhe íqueluʼ gácaluʼ precursor, siervu ministerial ne despué gueeda gácaluʼ ancianu. Zándaca laaca racaláʼdxiluʼ guichaganaluʼ ne gápaluʼ xiiñiluʼ (Efes. 6:4; 1 Tim. 3:1). Para ugaandaluʼ ca meta ca ne cueenduluʼ ni galán la? caquiiñeʼ gácaluʼ ti xpinni Cristu ni guiniisi ndaaniʼ xquidxi Dios. b

³ ¿Xi zacané lii guiniisiluʼ ndaaniʼ xquidxi Dios? ¿Xi dxiiñaʼ risaca naquiiñeʼ guiziidiluʼ ne gúniluʼ? Ne, ¿ximodo zanda chuʼluʼ listu para guni cumplirluʼ né ca privilegiu ni gueeda gápaluʼ despué? Guidúʼyanu.

4. ¿Paraa zanda guidxélaluʼ ejemplu ni gacané lii? (Biiyaʼ ca imagen ca).

⁴ Biyubi ejemplu galán ni zanda chinándaluʼ. Zanda chinándaluʼ ejemplu stiʼ ca hombre fiel ni riete lu Biblia ni gunnaxhii Dios ne gúpacaʼ xquídxibe de gadxé gadxé modo. Zándaca ndaaniʼ familia stiluʼ ne ndaaniʼ congregación nuu ejemplu stiʼ hermanu ni zanda chinándaluʼ (Heb. 13:7). Ne laaca nápaluʼ ejemplu sicarú stiʼ Jesucristu (1 Ped. 2:21). Ora gúʼyaluʼ ca ejemplu riʼ, guníʼ ique gunáʼ nga ca cualidad ni jma riuuláʼdxiluʼ de cada tobi de laacabe (Heb. 12:​1, 2). Despué, guníʼ ique xi zanda gúniluʼ para chinándaluʼ ejemplu stícabe.

5. ¿Xiñee naquiiñeʼ guiziidiluʼ guiníʼ íqueluʼ jneza, ne xiñee nabé risaca ni? (Salmo 119:9).

⁵ Guníʼ ique jneza ne gupa modo riníʼ íqueluʼ (Prov. 3:21). Ca hombre ni runi sicaríʼ ribeecaʼ tiempu para guiníʼ ique chaahuicaʼ ante guicaacaʼ ti decisión. Nga runi, biʼniʼ stipa pur guiníʼ íqueluʼ jneza. ¿Xiñee yaʼ? Ndaaniʼ guidxilayú riʼ nuu stale joven ni runi ni riníʼ ique ne ni runi sentir (Prov. 7:7; 29:11). Ne laaca zanda gucaa televisión, ca película, internet ne ca red social ca guchaaluʼ modo riníʼ íqueluʼ. Yanna, ¿xi zanda gacané lii guiníʼ íqueluʼ jneza yaʼ? Primé, naquiiñeʼ guiziidiluʼ ca principiu zeeda lu Biblia ne guiníʼ íqueluʼ xiñee jneza ni cayabi Jehová lii. Despué, pur ni maʼ biziidiluʼ ca gucuaa decisión gusiécheluʼ Jehová (biindaʼ Salmo 119:9). Nabé risaca nga guiziidiluʼ guiníʼ íqueluʼ jneza para gácaluʼ ti xpinni Cristu ni maʼ biniisi lu neza stiʼ Dios (Prov. 2:​11, 12; Heb. 5:14). Yanna, guidúʼyanu ximodo zanda gacaneni lii 1) ora guni tratarluʼ ca hermana ca ne 2) ora guicaaluʼ decisión de modo guzuchaahuiluʼ.

6. ¿Ximodo zanda gusihuinni ti joven ni riníʼ ique jneza runi respetar ca gunaa?

⁶ Pa guiníʼ íqueluʼ jneza zacaneni lii guni respetarluʼ ca gunaa. Guzéʼtenu ti ejemplu, zándaca chuulaʼdxiʼ ti joven ti hermana ne gacaláʼdxibe gunibiaʼbe laa jma. Cadi malu diʼ nga. Yanna, ti joven ni riníʼ ique jneza qué zaníʼ, qué zucaa ne qué zuni xiixa ni gucaa ti hermana guiníʼ ique riuuláʼdxibe laa. Zanda gúnibe ni pa dxandíʼ caníʼ íquebe guichaganabe  hermana ca (1 Tim. 5:​1, 2). Ne pa cayunibiaʼbe ti hermana, zápabe laa para cadi guiníʼcabe mal de laa. ¿Ximodo zanda gúnibe ni yaʼ? Ra cadi chúʼcabe stúbicabe, sínuque chúʼcabe né tuuxa ni maʼ xadxí de nuu ndaaniʼ xquidxi Dios (1 Cor. 6:18).

7. ¿Xi decisión naquiiñeʼ guicaa ti joven de modo guzuchaahuiʼ ni zusihuinni naca ti binni nuu xpiaaniʼ?

⁷ Sti modo zanda gusihuinni ti joven maʼ biziidiʼ guiníʼ ique casi riníʼ ique Jehová nga pur modo racu lari ne modo rigá guicha ique. Cani riguixhe modo gacu binni lari ne cani ruyubi modo guidoo ni, qué runi respetarcaʼ Jehová ne stale biaje zinecaʼ ti vida inmoral. Nga runi, ca lari ni rúnicabe ca nabé riguiichi binni ndaaniʼ ca ni o runi ni guihuinni ca hombre ca casi gunaa. Zuni ti joven stipa pur guihuinni casi ti xpinni Cristu ni maʼ biniisi ndaaniʼ xquidxi Dios ora chinanda ca principiu ni zeeda lu Biblia ne ca ejemplu sti ca hermanu de congregación ora quixhe ique modo gacuʼ lari ne modo guzuchaahuiʼ. Nga runi, zanda guiníʼ íquebe: «¿Ñee rusihuinni ca decisión ni ricaa’ nacaʼ ti binni nuu xpiaaniʼ ne runeʼ respetar ni runi sentir xcaadxi la? ¿Ñee rusihuinneʼ nacaʼ ti xpinni Dios pur modo racuaʼ lari la?» (1 Cor. 10:​31-33; Tito 2:6). Ca joven ni riziidiʼ gaca ti binni nuu xpiaaniʼ runi respetar ca hermanu laa, ne laaca runi respetar Bixhózebe ni nuu guibáʼ laabe.

8. ¿Ximodo zanda gaca ti joven ti binni ni zanda gápacabe confianza laa?

⁸ Guca ti binni ni zanda gápacabe confianza laa. Para nga la? caquiiñeʼ guni cumplirluʼ né guiráʼ dxiiñaʼ ni guicaaluʼ (Luc. 16:10). Guníʼ ique ejemplu sicarú ni bisaana Jesús. Qué nusaanabe xhiiñabe para despué, sínuque bíʼnibe guiráʼ ni gudxi Jehová laabe, neca guyuu ora gúcani nagana para laabe. Gunnaxhiibe binni, jmaruʼ si ca discípulo stibe ne dede bidiibe xquendanabánibe pur laacaʼ (Juan 13:1). Cásica biʼniʼ Jesús, biʼniʼ stipa gúniluʼ intiica dxiiñaʼ ni gudiicabe lii. Pa qué gánnaluʼ ximodo gúniluʼ ni, guca humilde ne gunabaʼ gacané ti hermanu ni maʼ biniisi ndaaniʼ xquidxi Dios lii. Biyubi gúniluʼ jma de biaʼ ni zanda gúniluʼ (Rom. 12:11). Binduuxeʼ ca dxiiñaʼ ni gudiicabe lii; biʼniʼ ni «para Jehová [ . . . ] ne cadi para binni» (Col. 3:23). Cadi guiaandaʼ lii binni ruchee lii, nga runi gunna nuu cosa ni qué zanda gúniluʼ ne ziuu biaje zucheeluʼ (Prov. 11:2).

9. ¿Xiñee caquiiñeʼ guiziidiʼ ti joven guni dxiiñaʼ?

⁹ Para gácaluʼ ti xpinni Cristu ni maʼ biniisi ndaaniʼ xquidxi Dios, caquiiñeʼ guiziidiluʼ gúniluʼ dxiiñaʼ. Ndiʼ zacané lii guni cumplirluʼ ca privilegiu ni gápaluʼ ndaaniʼ congregación, gápaluʼ ti dxiiñaʼ ni gacané lii gudiiluʼ ni caquiiñeʼ familia stiluʼ, ne zacaneni lii gaca llevarluʼ xcaadxi binni. Guidúʼyanu caadxi de laacani.

10, 11. ¿Xiñee galán guiziidiʼ ti joven guʼndaʼ ne gucaa jneza, ne ximodo racané ni congregación? (Salmo 1:​1-3; biiyaʼ imagen ca).

¹⁰ Biziidiʼ gúʼndaluʼ ne gucaaluʼ jneza. Biblia ná tuuxa ni ruundaʼ Stiidxaʼ Dios guiráʼ dxi ne riníʼ ique ni cayuundaʼ la? riuu nayecheʼ ne  riree guiráʼ ni runi jneza (biindaʼ Salmo 1:​1-3). Zacá riziidibe ximodo riníʼ ique Jehová ne nga racané laabe guiníʼ ique chaahuibe ne gácabe ti binni ni riuu razón (Prov. 1:​3, 4). Ndaaniʼ congregación caquiiñeʼ hombre ni gapa ca cualidad riʼ. ¿Xiñee yaʼ?

¹¹ Caquiiñeʼ ca hermanu ne ca hermana chuʼ tu gusiidiʼ ne gudii conseju ni zeeda lu Biblia laacaʼ (Tito 1:9). Pa nánnaluʼ gúʼndaluʼ ne gucaaluʼ jneza zanda guni prepararluʼ discursu ne comentariu ni chuuláʼdxicabe ne ganda guquídxiluʼ fe stiʼ xcaadxi. Ora guni estudiarluʼ ne gunadiágaluʼ ca discursu ni riete lu ca reunión ne asamblea, zanda guicaaluʼ nota ni guquidxi fe stiluʼ ne uguu gana xcaadxi hermanu.

12. ¿Xi zacané lii guiníʼneluʼ xcaadxi binni?

¹² Biziidiʼ guiníʼneluʼ xcaadxi binni. Nabé risaca gapa ca hombre ni naca xpinni Cristu habilidad riʼ. Ne para gápacabe ni naquiiñeʼ gánnacabe gucaadiágacabe ne guiénecabe ni riníʼ ique ne ni runi sentir xcaadxi binni (Prov. 20:5). Zanda guizíʼdinu guiénenu xi racalaʼdxiʼ tuuxa gabi laanu pur modo riniʼbe, pur ca gestu ne ca ademán ni rúnibe. Ne zanda guizíʼdinu ni ra güínenu xcaadxi binni diidxaʼ. Pa puru pur correu o pur mensaje ruiluʼ diidxaʼ la? jma nagana zaca para lii guiníʼneluʼ tuuxa ora gúʼyaluʼ laa. Nga runi, galán guyúbiluʼ guiníʼneluʼ xcaadxi binni ne cadi gúniluʼ ni pur teléfono si (2 Juan 12).

13. ¿Xiruʼ caquiiñeʼ guiziidiʼ ti joven? (1 Timoteo 5:8; biiyaʼ imagen ca).

¹³ Biziidiʼ xiixa ni gacané lii gápaluʼ ni tidineluʼ dxi. Ti xpinni Cristu ni maʼ biniisi ndaaniʼ xquidxi Dios naquiiñeʼ guiziidiʼ guni dxiiñaʼ para gapa ni iquiiñeʼ ne ni iquiiñeʼ familia stiʼ (biindaʼ 1 Timoteo 5:8). Ndaaniʼ caadxi guidxi zanda guiziidiʼ ca joven ca gúnicaʼ dxiiñaʼ ni runi bixhózecaʼ o tuuxa familia sticaʼ, ne xcaadxi lugar riziidicabe gúnicabe xiixa dxiiñaʼ ra guicaacabe ti cursu de laani ra scuela. Modo tiica si, peru galán guiziidiluʼ gúniluʼ xiixa dxiiñaʼ ti gápaluʼ ni tidineluʼ dxi (Hech. 18:​2, 3; 20:34; Efes. 4:28). Biʼniʼ dxiiñaʼ nadipaʼ ne cadi gusaana ndáhuiluʼ xhiiñaluʼ. Zacá zaníʼcabe galán de lii, jma nagueenda zadxélaluʼ dxiiñaʼ ne qué zunítiluʼ ni. Ca cualidad ne habilidad ni maʼ bizéʼtenu riʼ, laaca zacané ca ni lii gúniluʼ xcaadxi dxiiñaʼ ni guicaaluʼ despué. Guidúʼyanu caadxi de laacani.

14. ¿Xi zanda gacané ti joven gaca preparar para guni xhiiñaʼ Jehová de tiempu completu?

¹⁴ Zanda gúniluʼ xhiiñaʼ Jehová de tiempu completu. Stale hermanu ni maʼ biniisi ndaaniʼ xquidxi Dios bizulú gúcacaʼ precursor  dede dxi nácacaʼ joven. Pa gácaluʼ precursor zaziidiluʼ gunineluʼ gadxé gadxé hermanu dxiiñaʼ ne iquiiñeluʼ xpueltuluʼ jneza (Filip. 4:​11-13). ¿Xiñee qué guzulú gúniluʼ de precursor auxiliar yaʼ? Ndiʼ huayacané ni xcaadxi gácacaʼ precursor regular. Laaca zanda gacané ni lii gúniluʼ xhiiñaʼ Jehová de tiempu completu, casi gácaluʼ siervu de construcción o gúniluʼ dxiiñaʼ Betel.

15, 16. ¿Xi caquiiñeʼ guni ti joven ni napa gana gaca siervu ministerial o ancianu?

¹⁵ Zanda gácaluʼ siervu ministerial o ancianu. Guiráʼ ca hermanu zanda gúnicaʼ stipa guni cumplircaʼ né ca requisitu para gácacaʼ ancianu ndaaniʼ congregación. Biblia ná ni racalaʼdxiʼ ugaanda ca meta riʼ «jneza ni cá ique guni» (1 Tim. 3:1). Para gaca tuuxa ancianu la? primé caquiiñeʼ gaca siervu ministerial. Ne nabé racané ca siervu ministerial ca ancianu de stale modo, cásica ca ancianu zaqueca ca siervu ministerial rácacaʼ humilde ne racanecaʼ ca hermanu sticaʼ ne laaca runi predicarcaʼ né stale gana. Ti joven ni napa biaʼ 17 iza o jma zanda gaca siervu ministerial pa maʼ ruchá ca requisitu para laani. Ne ti siervu ministerial ni maʼ nuu capacitadu zanda gaca ancianu neca deruʼ napa 20 iza.

¹⁶ Ca requisitu para gaca tuuxa siervu ministerial o ancianu zeeda ca ni lu Biblia ne zanda gúniluʼ ca ni pa nadxiiluʼ Jehová, familia stiluʼ ne ca hermanu de congregación (1 Tim. 3:​1-13; Tito 1:​6-9; 1 Ped. 5:​2, 3). Neca gastiʼ peʼ ti cosa ni caquiiñeʼ gúniluʼ para guchaluʼ ca requisitu ca ti dxi sti dxi, peru xiixa ni zacané lii nga gúniluʼ stipa guiéneluʼ xi riníʼ cada tobi de laacani ne guinábaluʼ Jehová gacané lii guni cumplirluʼ ca ni. c

17. ¿Ximodo zanda chuʼ ti joven listu dede ca yanna para gapa xheelaʼ ne gaca xaíque stiʼ ti familia? (Biiyaʼ imagen ca).

¹⁷ Zanda guichaganaluʼ ne gácaluʼ xaíque sti’ ti familia. Casi guníʼ Jesús, nuu hermanu ni maʼ biniisi ndaaniʼ xquidxi Dios maʼ gudixhe ique guiaana solteru (Mat. 19:12). Peru, pa quixhe íqueluʼ guichaganaluʼ la? zápaluʼ responsabilidad de gápaluʼ xheelaluʼ ne gácaluʼ xaíque stiʼ ti familia (1 Cor. 11:3). Ribeza Jehová gannaxhii hombre xheelaʼ, gudii ni caquiiñebe, guiene laabe ne gacané laabe chuʼbe gaxha de Jehová (Efes. 5:​28, 29). Ca cualidad ne ca habilidad ni maʼ bizíʼdinu lu artículo riʼ, casi guiníʼ íqueluʼ jneza, guni respetarluʼ ca gunaa ne gácaluʼ ti binni de confianza, zacané ca ni lii chuʼluʼ listu para gápaluʼ xheelaluʼ ne gúniluʼ xhiiñaluʼ jneza casi xaíque stiʼ ti familia.

18. ¿Ximodo zanda chuʼ ti joven listu dede ca yanna para gusiniisi xiiñiʼ?

 ¹⁸ Zándaca gápaluʼ xiiñiluʼ. Pa guichaganaluʼ la? zándaca zápaluʼ xiiñiluʼ. Zanda guiziidiluʼ stale cosa de ejemplu stiʼ Jehová para gácaluʼ ti buen padre (Efes. 6:4). Gastiʼ qué nucueeza Jehová ne gúdxibe Jesús, xiiñibe, nadxiibe laa ne riéchebe pur ni runi (Mar. 1:11). Pa gueeda gápaluʼ xiiñiluʼ galán gápaluʼ costumbre de gábiluʼ laacabe nadxiiluʼ laacabe ne guni felicitarluʼ laacabe ora gúnicabe ca cosa ca jneza. Ca binni ni rinanda ejemplu stiʼ Jehová racanecaʼ ca xiiñicaʼ gácacaʼ xpinni Cristu ni maʼ biniisi ndaaniʼ xquidxi Dios. ¿Ximodo zanda chuʼluʼ listu dede ca yanna ti ganda gusiniisiluʼ ca xiiñiluʼ jneza yaʼ? Ra gácaluʼ nachaʼhuiʼ né familia stiluʼ ne ca hermanu de congregación ne guiziidiluʼ guiniʼluʼ nadxiiluʼ laacaʼ ne rusisácaluʼ laacaʼ (Juan 15:9). Cadi zacané si ni lii ora guichaganaluʼ ne gápaluʼ xiiñiluʼ, sínuque zacané ni lii dede ca yanna para gácaluʼ ti binni guizáʼ risaca para Jehová, para familia stiluʼ ne para congregación.

19, 20. ¿Xi caquiiñeʼ guni ti joven para gaca ti xpinni Cristu ni maʼ biniisi ndaaniʼ xquidxi Dios? (Biiyaʼ ca imagen ni zeeda lu portada).

¹⁹ Pa nácaluʼ ti joven, bietenalaʼdxiʼ caquiiñeʼ gúniluʼ stipa para gácaluʼ ti xpinni Cristu ni maʼ biniisi ndaaniʼ xquidxi Dios. Naquiiñeʼ guyúbiluʼ ejemplu galán ni zanda chinándaluʼ, guiníʼ íqueluʼ jneza, gácaluʼ ti binni ni zanda gápacabe confianza laa, guiziidiluʼ xiixa dxiiñaʼ ni zanda gúniluʼ ne chuʼluʼ listu para ni guizaaca despué.

²⁰ Ora guiníʼ íqueluʼ guiráʼ cosa ni naquiiñeʼ gúniluʼ, zándaca guiníʼ íqueluʼ stale peʼ ca ni. Peru cadi guireeluʼ gana, ¡zanda gúniluʼ ni! Cadi guiaandaʼ lii nuu Jehová gacané lii (Is. 41:​10, 13). Ne nuu ca hermanu ne hermana de congregación para gacanecaʼ lii. Ora maʼ nácaluʼ ti hombre casi ribeza Jehová la? zabániluʼ nayecheʼ. Guizáʼ nadxiidu lii ne racaláʼdxidu cuʼ Jehová ndaayaʼ guiráʼ stipa ni cayúniluʼ para gácaluʼ ti xpinni Cristu ni maʼ biniisi ndaaniʼ xquidxi Dios (Prov. 22:4).