¿Ñee maʼ biindaluʼ ca últimu tema ni bedané revista Torre stiʼ ni rapa la? Yanna biiyaʼ pa zanda guicábiluʼ ca pregunta riʼ:

¿Ñee runi tratarluʼ ca gunaa cásica runi Jehová ni la?

Qué runi Jehová menu ca gunaa ne qué rúnibe jma pur ca hombre que pur laacaʼ. Rucaadiágabe ca gunaa ne rizaaláʼdxibe ni runi sentircaʼ ne ca guendanagana ni nápacaʼ ne laaca nápabe confianza zanda guni cumplircaʼ né ca dxiiñaʼ rudiibe laacaʼ (w24.01, yaza 15 ne 16).

¿Ximodo zanda chinándanu conseju zeeda lu Efesios 5:​7, ra ná: «Cadi gúnitu ni rúnicabe»?

Cayabi apóstol Pablo laanu cadi guidxaaganu binni ni gucaa laanu guchéʼnenu Jehová. Ne cadi caquiiñeʼ peʼ chuʼnu gaxha de ca tipu binni ca, purtiʼ laaca nuucabe lu ca red social ca (w24.03, yaza 22 ne 23).

¿Xi naquiiñeʼ gúninu pa guseendacabe información ni cadi dxandíʼ ra nuunu?

Naquiiñeʼ gápanu cuidadu né ca información ni cadi dxandíʼ riʼ, purtiʼ zándaca guseendaʼ ti hermanu ni ra nuunu para cuʼ gana laanu o zándaca gutiidiʼ tuuxa ni laanu lu correu, o zándaca tuuxa ni gusihuinni interés gabi ni laanu peru apóstata laa (w24.04, yaza 12).

¿Xi nánnanu ne xi qué gánnanu de modo zuni juzgar Jehová rey Salomón, ca binni ni gutiʼ Sodoma ne Gomorra que ne ca ni gutiʼ lu Diluvio?

Qué gánnanu pa binduuxeʼ Jehová laacabe para siempre, ni nánnanu nga runi Jehová ni jneza ne riabe binni (w24.05, yaza 3 ne 4).

Ra gánnanu naca Jehová casi ti «guié», ¿ximodo racané nga laanu? (Deut. 32:4).

Zanda guyúbinu guilanu ra nuu Jehová. Zanda gápanu confianza laabe, purtiʼ siempre runi cumplirbe guiráʼ ni maʼ guniʼbe. Ne qué ruchaabe modo nácabe ne laaca qué ruchaabe ni maʼ gudixhe íquebe gúnibe (w24.06, yaza 26 ne 28).

¿Xi zacané lii guiaaluʼ ti congregación ra nacubi bidxaaluʼ?

Gápanu confianza zacané Jehová laanu cásica gucanebe ca xpínnibe de dxiqué, cadi guchaaganu congregación ni bisaananu né congregación ra nuunu yanna, guyúbinu gacanenu ndaaniʼ congregación ne gaca xhamígunu ca hermanu (w24.07, yaza 26 hasta 28).

¿Xi rizíʼdinu de guionnaʼ parábola ni zeeda lu capítulo 25 stiʼ Mateo?

Ejemplu stiʼ ca dendxuʼ ne ca chiva rusiidiʼ ni laanu cadi naquiiñeʼ guixélenu de Jehová, de ca chii binnidxaapaʼ rizíʼdinu naquiiñeʼ chuʼnu listu ne gatananu ne de ca talentu rizíʼdinu naquiiñeʼ gácanu binni runi dxiiñaʼ (w24.09, yaza 20 hasta 24).

¿Pabiáʼ nasoo corredor ni guyuu ndaaniʼ templu bicuí Salomón?

Lu caadxi manuscritu yooxhoʼ ra zeeda 2 Crónicas 3:4 ná nasoo corredor que «ti gayuaa gande codo», nga riníʼ gúcani ti torre ni nasoo 53 metru. Peru lu xcaadxi traducción ni maʼ guca revisar chaʼhuiʼ cuzeeteʼ nasoo ni «gande codo», ni caninu nga nasoo ni biaʼ gaʼ metru. Zanda guininu jma biaʼsi ni bizéʼtenu últimu riʼ, purtiʼ casi biáʼqueca nga xilaga pader stiʼ templu que (w24.10, yaza 31).

¿Xi rinabaʼ Biblia guni ca siervu ministerial? (1 Tim. 3:12).

Ca siervu ministerial cadi naquiiñeʼ gápacaʼ chupa chonna gunaa sínuque xheelasicaʼ. Ne cadi lica naquiiñeʼ gúnibe xiixa ni gusihuinni riuuláʼdxibe xcaadxi gunaa (w24.11, yaza 19).

¿Ximodo nánnanu cadi de Guendaroxhí stiʼ Señor nga riete lu Juan 6:53?

Lu Juan 6:53 guníʼ Jesús naquiiñeʼ gócabe beela ne guécabe rini stiʼ. Guniʼbe ca diidxaʼ riʼ dxi nuube Galilea lu iza 32 ne gúdxibe ni ca judíu ni caʼruʼ gapa fe laabe. Peru ti iza despué, dxi maʼ nuube Jerusalén, gudíxhebe gaca Guendaroxhí stiʼ Señor ne gúdxibe ni ca xpínnibe ni chiguni mandárnebe guibáʼ (w24.12, yaza 10 ne 11).