1, 2. ¿Xi guendanagana ridxaagalú stale xpinni Jehová, ne xi zándaca guiníʼ íquecabe?

GUINÍʼ íquenu ca guendanagana ni chiguzéʼtenu riʼ. Primé, gudxi ti doctor ti hermanu joven napa ti guendahuará ne zusirani stipa stiʼ. Guiropa, ti hermanu ni napa jma de cincuenta iza biniti dxiiñaʼ stiʼ ne neca cuyúbibe sti dxiiñaʼ qué ganda guidxélabe ni. Guionna, ti hermana ni maʼ zigola runi sentir zeʼ dxi maʼ qué randa runi jma lu xhiiñaʼ Jehová.

² Pa cadídinu lu tobi de ca guendanagana riʼ, zándaca guiníʼ íquenu maʼ qué iquiiñenu purtiʼ maʼ qué ganda gúninu gastiʼ. Ne pur nga chuʼnu triste, gusaana de gannaxhiinu laca laanu ne gápanu guendanagana né xcaadxi binni.

3. ¿Ximodo ruuyaʼ Binidxabaʼ ne binni guidxilayú guendanabani?

³ Qué rusisaca Binidxabaʼ guendanabani ne zaqueca runi stale binni ni. Modo huayuni tratar Binidxabaʼ binni rucaabe laacaʼ guiníʼ íquecaʼ qué risácacaʼ. Cumu malu laabe la? gúdxibe Eva zaca libre neca nánnabe zati pa qué guzuubaʼ stiidxaʼ Dios. Runi controlarbe sistema económico, ca políticu ne ca xaíque yuʼduʼ. Nga runi qué ridxagayaanu guidúʼyanu nuu stale hombre de negocio, políticu ne xaíque yuʼduʼ ni qué rusisaca guendanabani ne ni runi sentir xcaadxi binni.

4. ¿Xidé chiguininu lu artículo riʼ?

 ⁴ Peru racalaʼdxiʼ Jehová gannaxhiinu laca laanu ne racanebe laanu ora ridxaagalunu guendanagana ni zándaca gucaa laanu guiníʼ íquenu qué iquiiñenu para gastiʼ (Sal. 136:23; Rom. 12:3). Lu artículo riʼ zadúʼyanu ximodo racanebe laanu ora nápanu ti guendahuará, ora qué gápanu bueltu ne ora maʼ zigólanu ne riníʼ íquenu maʼ qué ganda gúninu jma lu xhiiñaʼ Jehová. Peru primeru guidúʼyanu xiñee zanda guni crenu risácanu para Dios.

5. ¿Xi razón rusihuinni risaca binni para Jehová?

⁵ Neca de yu nga bizáʼ Jehová laanu, risácanu jma que ti puñu yu (Gén. 2:7). Guidúʼyanu caadxi razón ni rusihuinni risácanu para Dios. Guzéʼtenu tobi de laacani, bizaʼbe laanu para ganda gusihuínninu ca cualidad stibe (Gén. 1:27). Nga runi jma risácanu que guiráʼ ca cosa ni bizáʼ Jehová lu Guidxilayú, ne guluube laanu ndaaniʼ ni para gápanu ni ne gápanu ca maniʼ ca (Sal. 8:4-8).

6. ¿Xi sti razón rusihuinni risaca binni para Jehová neca imperfectu laacaʼ?

⁶ Neca bichee Adán la? risácaruʼ binni para Jehová. Guizáʼ risácanu para laabe dede bidiibe lugar gatiʼ Xiiñibe pur ca pecadu stinu (1 Juan 4:9, 10). Ne pur guti Jesús, zusibani Dios binni ni maʼ guti pur donda stiʼ Adán, ca ni biʼniʼ ni jneza ne ca ni qué ñuni ni jneza (Hech. 24:15). Lu Stiidxabe ná rusisácabe cada tobi de laanu neca huaranu, maʼ zigólanu ne pa nápanu o qué gápanu bueltu (Hech. 10:34, 35).

7. Laanu ca xpinni Dios, ¿gunáʼ nga ca razón nápanu para guni crenu risácanu para laabe?

⁷ Laanu ca xpinni Dios nápanu stale razón para guni crenu risácanu para Jehová. Bidiibe lugar guidxíñanu laabe ne maʼ bíʼyabe ximodo gucuaanu ca noticia galán stibe (Juan 6:44). Dxi bidxíñanu Dios la? laaca bidxíñabe laanu (Sant. 4:8). Laaca ribeebe tiempu ne rúnibe stipa para gusiidibe laanu. Nánnabe ximodo laanu yanna ne xi guiráʼ zanda gúninu. Ne riguu jnézabe laanu purtiʼ nadxiibe laanu (Prov. 3:11, 12). ¿Ñee qué rusihuinni guiráʼ ndiʼ pabiáʼ risácanu para Dios la?

8. ¿Ximodo zanda gacané ca diidxaʼ ni zeeda lu Salmo 18:27-29 laanu guidúʼyanu ca guendanagana stinu de gadxé modo?

⁸ Gunna dxichi rey David nadxii ne rapa Jehová laa, ne nga gucané laabe guni huantarbe ne qué nidxiichibe ora guníʼ caadxi binni qué risácabe (2 Sam. 16:5-7). Ora nuunu cayacananu ne cadxaagalunu guendanagana, zanda gacané Jehová laanu guidúʼyanu ca cosa ca de gadxé modo ne gudxiilunu intiica guendanagana (biindaʼ Salmo 18:27-29). Pa cayacané Jehová laanu la? guirutiʼ zanda gucueeza laanu para gúninu ni nabe né stale guendanayecheʼ (Rom. 8:31). Guidúʼyanu chonna ejemplu ni rusietenalaʼdxiʼ laanu risácanu para Jehová ne nadxiibe laanu.

9. ¿Xi runi sentirnu ora nápanu ti guendahuará?

⁹ Ora huaranu la? nuu biaje riuʼnu triste ne riníʼ íquenu maʼ qué zanda gúninu gastiʼ. Zándaca guituílunu gudii binni cuenta maʼ qué ganda gúninu xiixa o caquiiñenu tu gacané laanu. Ne neca qué ganna xcaadxi binni pa huaranu, zándaca guituílunu purtiʼ maʼ qué ganda  gúninu xiixa casi bíninu dxiqué. Ora runi sentirnu zacá racané Jehová laanu. Peru ¿ximodo rúnibe ni yaʼ?

10. Casi ná Proverbios 12:25, ¿xi zanda gacané laanu ora huaranu?

¹⁰ Ora huaranu ne gábicabe laanu caadxi «diidxaʼ galán» la? zaguuni gana laanu (biindaʼ Proverbios 12:25). Guiráʼ ca diidxaʼ galán ni cá lu Biblia rusietenaláʼdxicani laanu risácanu stale para Jehová neca huaranu (Sal. 31:19; 41:3). Pa siempre guidúʼndanu Biblia la? zacaneni laanu gudxiilunu ca cosa ni riguu laanu triste pur xiixa guendahuará nápanu.

11. ¿Ximodo biiyaʼ ti hermanu modo gucané Jehová laa?

¹¹ Guidúʼyanu ni bizaaca Jorge. Dxi nápabe 30 iza gúpabe ti guendahuará ni nabé bisidxaga laabe ne nagueenda guzá ni ne pur laani biʼniʼ sentirbe qué risácabe. Sicaríʼ guniʼbe: «Cadi nuaʼ listu para gudxieeluáʼ guendahuará stinneʼ purtiʼ rituiluaʼ guyadxí binni naa pur laani. Ora guyuaaʼ jma malu guníʼ iqueʼ modo zuchaa xquendanabaneʼ. Guizáʼ guyuaaʼ triste, nga runi gunabaʼ Jehová gacané naa». ¿Ximodo gupa Jehová laabe yaʼ? Laabe guniʼbe: «Raca nagana para naa gacaʼ concentrar ora maʼ cayuundaʼ, nga runi ruundaʼ ca Salmo jma nachucu ra riete pabiáʼ rizaalaʼdxiʼ Jehová ca xpinni. Ruundaʼ ca textu riʼ guiráʼ dxi. Racaneni naa ne riguixhedxini ladxiduáʼ. Ra gudiʼdiʼ tiempu, biiyaʼ binni guyuaaʼ xcaadxi galán purtiʼ maʼ ruxidxeʼ. Ne cumu ruuyacabe nuaaʼ nayecheʼ la? ngue riguu gana laacabe. Biiyaʼ bicabi Jehová ca oración stinneʼ. Gucanebe naa guneʼ sentir jma galán. Bizulú bieneʼ ximodo ruuyaʼ Jehová naa neca huaraʼyaʼ».

12. ¿Xi zanda gúninu para guni sentirnu cayacané Jehová laanu ora huaranu?

 ¹² Pa huaranu la? cadi guiaandaʼ laanu nanna Jehová xi cadídinu. Guinábanu laabe gacanebe laanu guidúʼyanu ca cosa ca jma jneza. Guidúʼndanu Biblia para guidxélanu ca diidxaʼ ni maʼ bicaa Dios para laanu. Guidúʼndanu ca relatu ni rusihuinni pabiáʼ rusisaca Jehová ca xpinni. Ora gúninu ni la? zudiʼnu cuenta nabé nacháʼhuibe né ca xpínnibe ni runi ni nabe (Sal. 84:11).

13. ¿Xi zándaca guiníʼ ique xaíque stiʼ ti familia pa guniti dxiiñaʼ stiʼ?

¹³ Guiráʼ ca ni naca xaíque ti familia racaláʼdxicaʼ gudiicaʼ ni caquiiñeʼ familia sticaʼ. Guxuíʼlunu biniti ti hermanu dxiiñaʼ stiʼ neca cadi laa napa donda. Ne neca cuyúbibe sti dxiiñaʼ qué ganda guidxélabe ni. Nga runi zándaca guiníʼ íquebe qué risácabe. Pa guietenaláʼdxibe ca promesa stiʼ Jehová, ¿ximodo zacaneni laabe?

14. ¿Xiñee runi cumplir Jehová ca promesa stiʼ?

¹⁴ Siempre runi cumplir Jehová ca promesa stiʼ (Jos. 21:45; 23:14). Rúnibe ni de gadxé gadxé modo. Primé, para cadi gaca biidiʼ labe. Maʼ bidii stiidxabe zápabe ca xpínnibe ni qué gusaana laabe, nga runi nánnabe caquiiñeʼ guni cumplirbe promesa riʼ (Sal. 31:1-3). Laaca nánnabe zuni sentirnu mal pa qué gápabe laanu purtiʼ cadi cayuni cumplirbe promesa stibe. Maʼ biʼniʼ prometerbe zudiibe laanu guiráʼ ni caquiiñenu para guibáninu ne para gúninu ni nabe, ne gastiʼ qué zanda gucueeza laabe (Mat. 6:30-33; 24:45).

15. a) ¿Xi guendanagana bidxaagalú ca xpinni Cristu ni bibani lu primé siglu? b) ¿Xi confianza rudii Salmo 37:18, 19 laanu?

 ¹⁵ Ora rietenaláʼdxinu xiñee runi cumplir Jehová ca promesa stiʼ la? qué riúʼpenu xizaa ora qué gápanu bueltu. Guzéʼtenu ni bizaaca ca hermanu ni bibani lu primé siglu. Ora guzanándacabe ca hermanu de congregación ni nuu Jerusalén la? «bireeche ndase guirácabe [...] ca apóstol si qué nireecaʼ» (Hech. 8:1). Ne pur ni bizaaca riʼ zándaca biaanacabe sin bueltu, biníticabe lídxicabe, dxiiñaʼ ne negocio stícabe. Peru qué nusaana Jehová laacabe, ne qué nusaanacabe de ñuucabe nayecheʼ (Hech. 8:4; Heb. 13:5, 6; Sant. 1:2, 3). Gucané Jesús ca xpinni Cristu de dxiqué purtiʼ bizuubacaʼ diidxaʼ, ne ngaca zúnibe né laanu (biindaʼ Salmo 37:18, 19).

16. ¿Xi guendanagana zándaca gucaa laanu guiníʼ íquenu pa rusisaca Jehová ni rúninu lu xhiiñaʼ?

¹⁶ Ora maʼ zigólanu la? zándaca guzulú guiníʼ íquenu maʼ qué zanda gúninu jma lu xhiiñaʼ Jehová. Ne zándaca laaca zacaca guníʼ ique rey David dxi maʼ nagola (Sal. 71:9). Peru ¿ximodo racané Jehová laanu yaʼ?

17. ¿Xi rusiidiʼ ejemplu stiʼ hermana Jheri laanu?

¹⁷ Guidúʼyanu ni bizaaca ti hermana láʼ Jheri. Guca invitarbe ti cursu para mantenimientu ra Yoo stiʼ Reinu, peru qué nabe chebe. Sicaríʼ guniʼbe: «Maʼ nagolaʼ, viuda naa ne qué gannaʼ guneʼ gastiʼ para gacaniáʼ lu dxiiñaʼ de mantenimientu, ne maʼ qué iquiiñeʼ para gastiʼ». Peru ti gueelaʼ ante de reunión que, biʼniʼ orarbe Jehová de guidubi ladxidoʼbe. Sti dxi que, ora yendabe ra Yoo stiʼ Reinu,  caníʼ íquerube pa caquiiñeʼ chuʼbe raqué. Ne lu discursu ni bidii ti hermanu lu reunión que guníʼ ni jma risaca nga gudiʼnu lugar gusiidiʼ Jehová laanu. Sicaríʼ guníʼ hermana riʼ: «Guníʼ iqueʼ: “Naa napaʼ gana guiziideʼ”. Ne óraque bizulú biinaʼ purtiʼ bidieeʼ cuenta bicaadiaga Jehová oración stinneʼ. Guníʼ iqueʼ napaʼ xiixa risaca ni zanda gudieeʼ Jehová ne bidieeʼ cuenta zusiidibe naa guneʼ dxiiñaʼ que». Ora bietenalaʼdxiʼ Jheri guiráʼ ni bizaaca que guníʼ: «Cadxibeʼ ora ziyuaaʼ ra reunión que, qué gapaʼ gana ne nuaaʼ triste. Peru ora biluxe reunión que, maʼ napaʼ confianza, guyuaaʼ gana ne bineʼ sentir zanda guneʼ jma lu xhiiñaʼ Jehová».

18. ¿Ximodo rusihuinni Biblia rusisaca Jehová ni rúninu lu xhiiñaʼ neca maʼ zigólanu?

¹⁸ Ora maʼ zigólanu zanda chuʼnu seguru náparuʼ Jehová dxiiñaʼ para laanu (Sal. 92:12-15). Bisiidiʼ Jesús laanu rusisaca Jehová guiráʼ ni rúninu lu xhiiñaʼ neca ruluíʼ huaxiéʼ risácacani para laanu (Luc. 21:2-4). Nga runi quixhe íquenu gúninu ca cosa ni zanda gúninu. Caadxi de laacani nga guinínenu binni de Jehová, guni orarnu pur ca hermanu ne cuʼnu gana xcaadxi ti cadi guixélecaʼ de Jehová. Ruuyaʼ Jehová laanu casi ti binni ni runiné laabe dxiiñaʼ cadi pur ca cosa ni randa rúninu, sínuque purtiʼ racaláʼdxinu guzúʼbanu stiidxabe (1 Cor. 3:5-9).

19. Pur ni ná Romanos 8:38, 39, ¿xi cadi naquiiñeʼ guiaandaʼ laanu?

¹⁹ Guizáʼ riéchenu purtiʼ runi adorarnu Jehová, ti Dios ni dxandíʼ rusisaca ca binni runi ni nabe. Bizaʼbe laanu para gúninu ni nabe, ne ni rusiecheʼ laanu nga nuunu lu religión ni dxandíʼ (Apoc. 4:11). Zándaca para binni guidxilayú qué risácanu gastiʼ, peru para Jehová guizáʼ risácanu (Heb. 11:16, 38). Ora guni sentirnu triste purtiʼ huaranu, qué gápanu bueltu o maʼ zigólanu la? cadi guiaandaʼ laanu guirutiʼ zanda guxheleʼ laanu de Jehová, Bixhózenu ni nadxii laanu (biindaʼ Romanos 8:38, 39).