1. ¿Xi guníʼ Jehová zazaaca lu ca dxi nabáninu riʼ?

SICARÍʼ guníʼ Jehová zazaaca ca dxi nabáninu riʼ: «Ca dxi que, zanaaze dxiichiʼ chii hombre de guiráʼ idioma stiʼ ca guidxi túnica stiʼ ti judíu, ne zaniʼcaʼ: “Racaláʼdxidu chinedu laatu, purtiʼ maʼ binadiágadu nuuné Dios laatu”» (Zac. 8:23). Hombre «judíu» riʼ zeeda gaca ca binni ni maʼ biʼniʼ ungir Dios né espíritu santu, laaca runibiáʼcabe laacaʼ casi «Israel stiʼ Dios» (Gál. 6:16). Ne zeeda gaca «chii hombre» riʼ ca binni ni napa esperanza de guibani lu Guidxilayú riʼ sin gatiʼ. Nánnacabe Jehová nga gulí ca ungidu ne riéchecabe pur privilegiu ni nápacabe de guninécabe ca ungidu xhiiñaʼ Dios.

2. ¿Ximodo nga ziné chii hombre que ca ungidu yaʼ?

² Neca qué ganna binni tu láʼ ca ungidu ni nabeza lu Guidxilayú tiempu riʼ la? * ca ni cabeza guibani lu Guidxilayú riʼ zanda chinecaʼ laacabe. ¿Ximodo yaʼ? Biblia ná zanaaze dxiichiʼ «chii hombre» túnica stiʼ «ti judíu» ne zaniʼcaʼ: «Racaláʼdxidu chinedu laatu, purtiʼ huayunadiágadu nuuné Dios laatu». Lu versículo riʼ riete de ti judíu si. Peru ora guniʼné chii hombre que judíu riʼ biquiiñecaʼ diidxaʼ «laatu». Ndiʼ rusihuinni cadi ti binni si nga «judíu» ca, sínuque zeeda gácabe ca ni nuu lu grupu ni  maʼ gulí Dios né espíritu santu. Ca binni ni cadi ungidu laacaʼ rúnicaʼ ni ná Dios né ca ungidu. Peru qué ruuyacaʼ laacabe casi xaíque sticaʼ, purtiʼ nánnacaʼ Jesús nga xaíque sticaʼ (Mat. 23:10).

3. ¿Xi pregunta zacábinu lu artículo riʼ?

³ Tiempu riʼ, nuuruʼ hermanu ungidu lade ca xpinni Dios. Nga runi zándaca nuu tu guinabadiidxaʼ: ¿ximodo naquiiñeʼ guʼyaʼ ca ungidu laca laacaʼ?, ¿ximodo caquiiñeʼ guni tratarnu ca binni ni ró pan ne reʼ vinu lu Conmemoración?, ¿ñee caquiiñeʼ chuʼnu xizaa purtiʼ guiráʼ iza cadale ca hermanu ni ró pan ne reʼ vinu lu Conmemoración la? Lu artículo riʼ zacábinu ca pregunta riʼ.

4. Casi ná 1 Corintios 11:27-29, ¿xii nga ni caquiiñeʼ guiníʼ ique chaahuiʼ ca ungidu, ne xiñee?

⁴ Caquiiñeʼ guiníʼ ique chaahuiʼ ca ungidu ca diidxaʼ ni zeeda lu 1 Corintios 11:27-29 (biindaʼ ni). ¿Ximodo zándaca guni participar ti ungidu lu Conmemoración «neca qué runi merecer guni ni» yaʼ? Ra gobe pan ne guebe vinu peru cadi zinándabe ni ná ca ley stiʼ Jehová (Heb. 6:4-6; 10:26-29). Nanna  ca ungidu caquiiñeʼ gácacaʼ fiel pa racaláʼdxicaʼ guicaacaʼ «premiu, laani nga ti guendanabani ni cudii Dios» laacaʼ guibáʼ pur Cristu Jesús (Filip. 3:13-16).

5. ¿Ximodo naquiiñeʼ guʼyaʼ ca ungidu laca laacaʼ?

⁵ Racané espíritu santu binni para gaca jma humilde ne cadi gácacaʼ orgulloso (Efes. 4:1-3; Col. 3:10, 12). Nga runi, qué riníʼ ique ca ungidu jma risácacaʼ que xcaadxi. Nánnacabe qué rudii Jehová laacabe espíritu santu jma que xcaadxi xpinni Cristu. Laaca qué riníʼ íquecabe jma nánnacabe ni zeeda lu Biblia que xcaadxi binni. Ne qué ziuu dxi gábicabe tuuxa: «Lii laaca ungidu lii ne caquiiñeʼ goloʼ pan ne gueluʼ vinu lu Conmemoración». Lugar de nga la? nácacabe humilde ne nánnacabe Jehová si nga zanda guni invitar tuuxa para cheʼ guibáʼ.

6. Casi ná 1 Corintios 4:7, 8, ¿ximodo caquiiñeʼ gaca ti ungidu?

⁶ Neca nanna ca ungidu nabé sicarú invitación biʼniʼ Dios laacaʼ para checaʼ guibáʼ, qué ribézacaʼ gusisaca xcaadxi binni laacaʼ (Filip. 2:2, 3). Laaca nánnacabe ora biʼniʼ ungir Jehová laacabe, qué niníʼ pa maʼ ungidu laacabe. Nga runi qué ridxagayaa ti ungidu ora ranna cayaca nagana para ti binni guni cré maʼ gulí Dios laa para cheʼ guibáʼ. Ne lu Biblia peʼ ná cadi casi ziuunu guni crenu binni ni gabi laanu maʼ bidii Dios laa ti privilegiu nabé risaca (Apoc. 2:2). Cumu qué ribeza ca ungidu gusisaca xcaadxi binni laacaʼ la? qué riniʼcaʼ pa ungidu laacaʼ primé biaje gunibiaʼcaʼ tuuxa. Ne qué runi crecaʼ laacaʼ purtiʼ si ungidu laacaʼ (biindaʼ 1 Corintios 4:7, 8).

7. ¿Xi cosa qué runi ca ungidu, ne xiñee?

⁷ Qué ridagulisaa puru si ungidu casi ñaca ñápacaʼ ti club para laasicaʼ. Ne laaca qué riniʼnécabe xcaadxi ungidu ximodo gulí Dios laacabe para chécabe guibáʼ ne qué ridagulisaacabe para guni estudiárcabe Biblia laasícabe (Gál. 1:15-17). Purtiʼ pa ñúnicabe ni la? qué ñacanécabe ñuu congregación tobi si. Ne nucaanácabe espíritu santu, purtiʼ laani nga racané chuʼ paz ne chuʼ xquidxi Dios tobi si (Rom. 16:17, 18).

8. ¿Xiñee caquiiñeʼ gápanu cuidadu modo guni tratarnu ti ungidu? (Biiyaʼ ni ná nota).

⁸ ¿Ximodo caquiiñeʼ guni tratarnu ca hermanu ne ca hermana ni naca ungidu? Malu nga gusisaca xhaatanu ti binni,  neca nácabe ti biʼchiʼ Cristu, ti ungidu (Mat. 23:8-12). Sicaríʼ ná Biblia ora caniʼni de ca ancianu: «Lagapa fe cásica modo nápacabe», peru cadi caníʼ diʼ ni chinándanu binni (Heb. 13:7). Lu Biblia laaca ná caquiiñeʼ guni respetarnu caadxi xpinni Cristu. Peru cadi purtiʼ nácacaʼ ungidu, sínuque «purtiʼ jneza modo cayúnicaʼ dxiiñaʼ ndaaniʼ congregación» ne purtiʼ cayúnicaʼ «dxiiñaʼ nadipaʼ para guiniʼcaʼ ne gusiidicaʼ de stiidxaʼ Dios» (1 Tim. 5:17). Pa gusisaca xhaatanu ca hermanu ungidu riʼ, zanda gusituinu lúcabe * o gucaʼnu laacabe gácacabe orgulloso (Rom. 12:3). ¿Cadi dxandíʼ qué racaláʼdxinu guchee ti ungidu la?

9. ¿Ximodo zanda gusihuínninu runi respetarnu ca ungidu?

⁹ ¿Ximodo zanda gusihuínninu runi respetarnu ca binni ni maʼ biʼniʼ ungir Jehová? Primé, cadi guinabadiidxanu laacabe ximodo gulí Dios laacabe para chécabe guibáʼ. Laasícabe nánnacabe ni ne cadi caquiiñeʼ gánnanu ni (1 Tes. 4:11; 2 Tes. 3:11). Cadi guiníʼ íquenu laaca ungidu xheelabe, bixhózebe, jñaabe o ti familia stibe. Purtiʼ cadi casi ti herencia ni; Dios nga ribí tu gaca ungidu (1 Tes. 2:12). Laaca qué zúninu pregunta ni zándaca gucaa xcaadxi guni sentir mal. Guzéʼtenu ti ejemplu, cadi jneza diʼ guinabadiidxanu xheelaʼ ti ungidu ximodo runi sentir ora guietenalaʼdxiʼ maʼ qué zuuyaʼ xheelaʼ lu Guidxilayú cubi. Ni nánnanu nga lu Guidxilayú cubi ca zudii Jehová guiráʼ ni caquiiñeʼ binni (Sal. 145:16).

10. ¿Xiñee cadi caquiiñeʼ uguʼnu naróʼ stiʼ tuuxa?

¹⁰ Ora qué runi tratarnu ca ungidu casi tuuxa ni jma risaca que xcaadxi la? laaca rápanu laca laanu. ¿Ximodo yaʼ? Purtiʼ lu Biblia ná zándaca gueeda gucheené ca ungidu Dios (Mat. 25:10-12; 2 Ped. 2:20, 21). Peru, pa nácanu binni ni qué riguu «naróʼ stiʼ tuuxa», qué zinándanu binni neca ungidu laacaʼ, neca nabé runibiáʼ binni laacaʼ o maʼ xadxí de cayúnicaʼ ni ná Jehová (Jud. 16). Nga runi, pa gucheenécabe Dios o guireecabe de ndaaniʼ xquidxi Dios, qué zará fe stinu ne qué zaxélenu de Jehová.

11. ¿Xi cazaaca né ca binni ni ró pan ne reʼ vinu lu Conmemoración?

¹¹ Dxiqué la? ra zidiʼdiʼ iza zixiéʼ ca ni ró pan ne reʼ vinu lu Conmemoración. Peru lu ca últimu iza riʼ, lugar de nixiéʼcabe laga jma zidálecabe. ¿Ñee caquiiñeʼ chuʼnu xizaa pur laani la? Coʼ. Guidúʼyanu caadxi cosa ni zacané laanu guiénenu xiñee.

12. ¿Xiñee cadi caquiiñeʼ chuʼnu xizaa gánnanu panda binni ró pan ne reʼ vinu lu Conmemoración?

¹² «Runibiáʼ Jehová ca xpinni» (2 Tim. 2:19). Nanna Jehová tuu nga ca ni dxandíʼ ungidu, peru ca hermanu ni rugabaʼ panda binni ró pan ne reʼ vinu lu Conmemoración qué gánnacaʼ. Nga runi, ora rugábacabe panda binni ró pan ne reʼ vinu la? rugábacabe dede ca binni ni riníʼ ique ungidu laa peru cadi dxandíʼ ni. Ne caadxi binni ni biʼniʼ ni maʼ qué rúnicani. Ne laaca nuu binni ni huará xquendabiaaniʼ runi crecaʼ zuni mandárnecaʼ Cristu guibáʼ. Nga runi qué ganna  chaahuinu panda ungidu riaana lu Guidxilayú.

13. ¿Ñee cá lu Biblia panda ungidu ziuu lu Guidxilayú ora guzulú gran tribulación la?

¹³ Ziuu ungidu lu guidubi Guidxilayú ora guedacaa Jesús laacaʼ para checaʼ guibáʼ (Mat. 24:31). Lu Biblia ná ziuuruʼ ti grupuhuiiniʼ de ungidu lu Guidxilayú lu ca últimu dxi riʼ (Apoc. 12:17). Peru qué riete lu Biblia panda ungidu ziuu lu Guidxilayú ora guzulú gran tribulación.

14. ¿Xi rusiidiʼ Romanos 9:11, 16 laanu de modo ribí Jehová ca ungidu?

¹⁴ Jehová nga nanna pora guni ungir ti xpinni (Rom. 8:28-30). Bizulú gulí Jehová ca ungidu despué de biasa Jesús de lade gueʼtuʼ. Ne ruluíʼ guiráʼ cani dxandíʼ xpinni Cristu ni bibani lu primé siglu gúcacaʼ ungidu. Peru caadxi iza despué, stale de ca binni ni ná xpinni Cristu laacaʼ cadi dxandíʼ ni. Neca zaqué, tiempu que biʼniʼ ungir Jehová caadxi de ca ni dxandíʼ xpinni Cristu. Laacabe nga ni beeda gaca casi trigu ni guníʼ Jesús zaniisi lade guixi malu (Mat. 13:24-30). Ne lu ca últimu dxi riʼ, cabiruʼ Jehová binni para gaca parte de ca 144,000 ungidu. * Nga runi, pa guni ungir Dios tuuxa para gaca ungidu ante gueeda fin, ¿tuu nácanu para guiníʼ íquenu cadi jneza ni biʼniʼ Dios yaʼ? (Biindaʼ Romanos 9:11, 16). * Qué racaláʼdxinu gácanu casi  ca trabajador ni bizeeteʼ Jesús lu parábola stiʼ, ni bidxiichiné dueñu stiʼ layú que pur modo biʼniʼ tratar ca hombre ni guyuu últimu que para guni xhiiñaʼ lu layú stiʼ (Mat. 20:8-15).

15. Casi ná Mateo 24:45-47, ¿ñee guiráʼ ca ungidu nácacaʼ parte de «mozo ni nuu xpiaaniʼ ne ni runi jneza» la? Bisiene ni.

¹⁵ Cadi guiráʼ diʼ ca ni napa esperanza cheʼ guibáʼ nga naca parte de «mozo ni nuu xpiaaniʼ ne ni runi jneza» (biindaʼ Mateo 24:45-47). Cásica gúcani lu primé siglu que, ca dxi riʼ riquiiñeʼ Jehová ne Jesús caadxi si binni para gudii guendaró espiritual, o gusiidicaʼ, stale binni. Lu primé siglu que, biquiiñeʼ Jehová caadxi si ungidu para bicaacaʼ Escrituras Griegas Cristianas. Ne tiempu riʼ laaca caadxi si ungidu nga napa privilegiu de gudii guendaró espiritual xquidxi Dios «ora peʼ caquiiñecabe ni».

16. ¿Xi maʼ bizíʼdinu lu artículo riʼ?

¹⁶ Guietenaláʼdxinu ca ni maʼ bizíʼdinu lu artículo riʼ. Maʼ gudixhe ique Jehová gudii guendanabani ni qué zaluxe stale de ca xpinni lu Guidxilayú riʼ ne laaca zudiibe lugar cheʼ caadxi binni guibáʼ para guni mandarné Jesús. Zudii Dios premiu guiráʼ ca xpinni —cásica «judíu» ne «chii hombre» que— ne rinábabe laacaʼ chinándacaʼ ni ná ley stibe ne gácacaʼ fiel. Guirácabe caquiiñeʼ gácacabe humilde ne gúnicabe ni ná Dios tobi si. Ne laaca caquiiñeʼ gúnicabe stipa para chuʼ congregación tobi si. Mayaca gueeda fin, nga runi, cadi gusaana de gúninu ni ná Jehová ne chinándanu Cristu cásica runi «ti grupu» de dendxuʼ (Juan 10:16).