1. ¿Ximodo runi sentirnu pur nadxii Jehová laanu?

BICAA apóstol Juan caadxi diidxaʼ ni ruluíʼ sencillu peru nabé risaca: «Dios nga guendarannaxhii» (1 Juan 4:8). Zacá ni, ra nuu Dios nga ridá guendanabani ne laaca ra nuube nga ridá guendarannaxhii. Nadxii Jehová laanu, ne pur laani ribáninu galán, nayecheʼ ne nuudxí ladxidoʼno.

2. a) Casi ná Mateo 22:37-40, ¿gunáʼ nga guiropaʼ mandamientu jma risaca? b) ¿Xiñee zándaca gaca nagana para laanu gúninu ni ná guiropa mandamientu yaʼ?

² Laanu, ca xpinni Cristu, ti mandatu maʼ gucuaanu nga gannaxhiinu (biindaʼ Mateo 22:37-40). Ra jma gunibiaʼnu Jehová, qué zaca nagana para laanu gúninu ni ná primé mandamientu stiʼ, purtiʼ perfectu laa, runi tratar laanu galán ne rusihuinni rizaalaʼdxiʼ laanu. Peru zándaca gaca nagana para laanu gúninu ni ná guiropa mandamientu stibe. ¿Xiñee yaʼ? Purtiʼ ca hermanu —ni naca prójimo stinu— imperfectu laacaʼ ne nuu biaje riniʼcaʼ o rúnicaʼ xiixa ni runiná laanu. Nga runi biquiiñeʼ Jehová caadxi hombre ni bicaa Biblia para guiniʼcaʼ ximodo ne xiñee naquiiñeʼ gannaxhiisaanu. Ne tobi de ca hombre ca nga apóstol Juan (1 Juan 3:11, 12).

3. ¿Xi gunna dxichi apóstol Juan?

 ³ Lu ca libru stiʼ Biblia ni bicaa Juan, bicaabe naquiiñeʼ gannaxhii ca xpinni Cristu. Ne lu Evangeliu ni bicaabe, stale biaje riete diidxaʼ guendarannaxhii, jma que lu xhonna Evangeliu ni zeeda lu Biblia. Maʼ napa Juan biaʼ ti gayuaa iza dxi biquiiñeʼ Dios laa para gucaa ti Evangeliu ne chonna carta. Ni bicaabe ca rusihuinni guiráʼ ni guni ca xpinni Cristu naquiiñeʼ gúnicaʼ ni purtiʼ nadxiicaʼ de guidubi ladxidoʼcaʼ (1 Juan 4:10, 11). Ne gudiʼdiʼ tiempu para biziidiʼ Juan ni.

4. Bizeeteʼ pora qué nusihuinni Juan nadxii xcaadxi.

⁴ Dxi joven Juan, guyuu ora qué nusihuinni guendarannaxhii. Ti biaje, zeʼ Jesús ne ca discípulo stiʼ Jerusalén, ne zidíʼdicaʼ ndaaniʼ ti guidxihuiiniʼ stiʼ Samaria ne qué nidxaagalú ca binni que laacabe galán. ¿Xi biʼniʼ Juan óraque yaʼ? Guyuube ñaba gui de guibáʼ ne nunitilú ca binni que (Luc. 9:52-56). Ne sti biaje qué nusihuínnibe nadxiibe xcaadxi apóstol. Laabe ne bíʼchibe Santiago, gúdxicabe jñaacabe guinabaʼ Jesús gudii laacabe puestu risaca lu Reinu stiʼ. Ora gunna xcaadxi apóstol que ni la? guizáʼ bidxiichicaʼ (Mat. 20:20, 21, 24). Neca biʼniʼ Juan ca cosa ni cadi jneza riʼ, nabé gunnaxhii Jesús laabe (Juan 21:7).

5. ¿Xi zazíʼdinu lu artículo riʼ?

⁵ Lu artículo riʼ, zazíʼdinu de ejemplu stiʼ Juan ne caadxi cosa ni bicaabe de guendarannaxhii. Laaca zazíʼdinu ximodo gannaxhiinu ca hermanu stinu ne xi zanda guni ca ni naca xaíque ndaaniʼ familia para gusihuínnicaʼ nadxiicaʼ familia sticaʼ.

6. ¿Ximodo rusihuinni Jehová nadxii laanu yaʼ?

⁶ Ora nadxii ti binni sti binni, cadi caquiiñeʼ si guiníʼ ni. Zacá ni, cadi naquiiñeʼ guininu nadxiinu tuuxa, sínuque naquiiñeʼ gusihuínninu ni pur ni gúninu (bichaaga ni né Santiago 2:17, 26). Nadxii Jehová laanu (1 Juan 4:19). Ne riquiiñebe Biblia para gábibe ni laanu (Sal. 25:10; Rom. 8:38, 39). Peru nadxiibe laanu cadi pur ni rabisibe laanu, sínuque pur ni rúnibe. Juan bicaa: «Sicaríʼ nga bisihuinni Dios nadxii laanu: biseendaʼ Dios tobi lucha Xiiñiʼ ndaaniʼ guidxilayú para gudii laanu guendanabani ni qué zaluxe» (1 Juan 4:9). Bidii Jehová lugar gacaná ne gatiʼ Xiiñiʼ  pur laanu (Juan 3:16). Nga runi, nanna dxíchinu nadxiibe laanu.

7. ¿Ximodo bisihuinni Jesús nadxii laanu?

⁷ ¿Xi zanda guininu de Jesús yaʼ? Gúdxibe ca discípulo stibe nadxiibe laacaʼ (Juan 13:1; 15:15). Bisihuínnibe guizáʼ nadxiibe laacaʼ ne nadxiibe laanu cadi pur ni guníʼsibe, sínuque pur ni bíʼnibe. Sicaríʼ guniʼbe: «Guirutiʼ zanda gannaxhii jma que biaʼ nadxii tobi ni gudii xpida pur ca xhamigu» (Juan 15:13). Ra guiníʼ íquenu ni maʼ biʼniʼ Jehová ne Jesús pur laanu, ¿xi naquiiñeʼ gucaani laanu gúninu yaʼ?

8. Casi ná 1 Juan 3:18, ¿xi naquiiñeʼ gúninu?

⁸ Rusihuínninu nadxiinu Jehová ne Jesús ora ruzúʼbanu stiidxacaʼ (Juan 14:15; 1 Juan 5:3). Laaca biʼniʼ mandar Jesús laanu gannaxhiisaanu (Juan 13:34, 35). Naquiiñeʼ gannaxhiinu ca hermanu cadi pur ni guinísinu, sínuque pur ni gúninu (biindaʼ 1 Juan 3:18). Yanna, ¿ximodo gusihuínninu ni yaʼ?

9. ¿Xi biʼniʼ Juan pur guendarannaxhii?

⁹ Ñanda ñaana Juan ra nuu bixhoze, ñé guuzeʼ ne ñuni ganar stale bueltu. Peru lugar de nga bíʼnibe stipa gacanebe binni guiziidiʼ ni dxandíʼ de Jehová ne de Jesús. Peru gupa Juan guendanagana pur ni gudixhe ique guni. Guzanándacabe laabe ne ra maʼ ziluxe primé siglu, dxi maʼ nagólabe, guládxicabe laabe de xquídxibe (Hech. 3:1; 4:1-3; 5:18; Apoc. 1:9). Neca biseguyoocabe laabe pur biʼniʼ predicarbe, bisihuínnibe rizaaláʼdxibe xcaadxi. Guzéʼtenu ti ejemplu, dxi nuube lu isla de Patmos, bicaabe revelación ni bidii Dios laabe ne biseendabe ni ra nuu ca congregación para gánnacaʼ «ca cosa ni mayaca guizaaca» (Apoc. 1:1). Ne zándaca despué de bireebe lu isla que, bicaabe ni bizaaca lu xquendanabani Jesús ne tiempu biʼniʼ predicar. Ne laaca bicaabe chonna carta ra nuu ca hermanu stibe para uguube gana laacaʼ. ¿Ximodo zanda chinándanu ejemplu stiʼ Juan?

10. ¿Ximodo zanda gusihuínninu nadxiinu binni yaʼ?

¹⁰ Zanda gusihuínninu nadxiinu binni pur ni gúninu né xquendanabáninu. Racalaʼdxiʼ Binidxabaʼ ne ca xpinni iquiiñenu tiempu ne stipa stinu para gácanu ricu o famoso. Peru lu guidubi Guidxilayú nuu xpinni Cristu ni cayuni predicar ca noticia galán ne cayacanecaʼ binni guidxiñaʼ ra nuu Jehová. Ne nuu de laacabe rúnicabe ni de tiempu completu.

11. ¿Ximodo rusihuinni stale hermanu nadxiicaʼ Jehová ne ca hermanu sticaʼ?

¹¹ Stale xpinni Cristu napa xidé gúnicaʼ dxiiñaʼ para gudiicaʼ ni caquiiñeʼ familia sticaʼ. Peru neca zacá, racanécabe organización stiʼ Dios biaʼ gándatiʼ. Nuu de laacabe racanécabe lu labor de socorro, nuu tu racané ra cabí ti lugar para gaca adorar Jehová ne guiranu zanda gudiʼnu donación para obra mundial. Zacá rusihuínnicabe nadxiicabe Dios ne prójimo stícabe. Guiráʼ semana rusihuínninu nadxiinu ca hermanu stinu ora riuunu reunión neca maʼ bidxáganu, runi participarnu lu reunión neca riuʼnu nervioso ne riguʼnu gana ca hermanu stinu ante o despué de reunión neca laaca nápanu problema (Heb. 10:24, 25). Guizáʼ rudiʼnu xquixe peʼ pur guiráʼ ni runi ca hermanu stinu riʼ.

12. ¿Xi sti modo bisihuinni Juan nadxii ca hermanu yaʼ?

 ¹² Bisihuinni Juan nadxii ca hermanu stiʼ ra biʼniʼ felicitarbe laacaʼ, peru laaca bidiibe conseju laacaʼ. Lu ca carta ni bicaabe, biʼniʼ felicitarbe laacaʼ pur fe ne pur ca cosa galán ni rúnicaʼ, peru laaca gúdxibe laacaʼ xi zazaaca pa gucheenecaʼ Dios (1 Juan 1:8–2:1, 13, 14). Laanu laaca naquiiñeʼ uguʼnu gana ca hermanu stinu pur ca cosa galán ni rúnicaʼ. Peru pa guidúʼyanu tuuxa hermanu cayuni xiixa ni cadi jneza o feu xpiaʼ, né diidxaʼ nadóʼ zanda gudiʼnu ti conseju laabe ne zacá zusihuínninu nadxiinu laabe. Naquiiñeʼ gápanu valor para gúninu ni purtiʼ Biblia ná ti binni ni dxandíʼ xhamigu zudii conseju xhamigu ora guʼyaʼ cadi cayúnibe ni jneza (Prov. 27:17).

13. ¿Xi cadi naquiiñeʼ gúninu?

¹³ Laaca zanda gusihuínninu nadxiinu ca hermanu stinu ra cadi gúninu caadxi cosa. Cadi gaca ofendernu pur ni gábicabe laanu. Guiníʼ íquenu ni bizaaca ante gatiʼ Jesús. Gúdxibe ca discípulo stibe naquiiñeʼ gocaʼ beela stibe ne guecaʼ rini stibe para guicaacaʼ guendanabani ni qué zaluxe (Juan 6:53-57). Stale de laacaʼ qué ñuulaʼdxiʼ ni guniʼbe ne bisaanacaʼ laabe. Peru ca ni dxandíʼ xhamígube, tobi de laacabe nga Juan, gúcacaʼ leal ne qué nusaanacaʼ laabe. Neca qué ñénecabe xidé caníʼ Jesús ne qué gánnacabe xi gúnicabe la? qué ñaca ofendércabe ne qué niníʼ íquecabe cadi jneza ni guníʼ Jesús. Lugar de nga la? gúpacabe confianza Jesús purtiʼ nánnacabe siempre riníʼ ni dxandíʼ (Juan 6:60, 66-69). Nga runi, nabé risaca cadi gaca ofendernu pur ni gabi tuuxa hermanu laanu ne cadi guiníʼ íquenu guniʼbe xiixa para guninabe laanu, sínuque cuézanu né paciencia gusiénebe xiñee guniʼbe zacá (Prov. 18:13; Ecl. 7:9).

14. ¿Xiñee cadi naquiiñeʼ gaca nanaláʼdxinu ca hermanu stinu?

¹⁴ Laaca guníʼ Juan cadi naquiiñeʼ gaca nanaláʼdxinu ca hermanu stinu. Pa qué guzúʼbanu diidxaʼ, zanda quiteʼ Binidxabaʼ laanu (1 Juan 2:11; 3:15). Nga peʼ nga ni bizaaca caadxi hermanu ni bibani ra maʼ ziluxe primé siglu. Biyubi Binidxabaʼ ximodo gaca nanaláʼdxisaa ca hermanu ne cadi chuʼcaʼ tobi si. Para dxi  bicaa Juan ra nucaabe, caadxi hermanu de congregación riníʼ íquecaʼ modo riníʼ ique Binidxabaʼ. Tobi de laacabe nga Diótrefes, cuxélebe ca hermanu de congregación. Qué ñuni respetarbe ca superintendente viajante ni ruseendaʼ grupu ni zániru. Cumu nabé orgulloso laabe la? gucaláʼdxibe niládxibe ca hermanu ni runi tratar galán ca ni qué riaba laabe bien (3 Juan 9, 10). Dede yanna racalaʼdxiʼ Binidxabaʼ cadi chuʼ xquidxi Dios tobi si. Cadi gaca nanaláʼdxinu ca hermanu stinu para cadi guxheleʼ Binidxabaʼ laanu.

15. ¿Xi cadi naquiiñeʼ guiaandaʼ ca ni naca xaíque de familia yaʼ?

¹⁵ Zusihuinni ti binni ni naca xaíque de ti familia nadxii laacabe ora gudii ni caquiiñecabe (1 Tim. 5:8). Peru cadi naquiiñeʼ guiaandaʼ laabe ni jma risaca nga gacanebe familia stibe chuʼcaʼ jma gaxha de Jehová (Mat. 5:3). Guidúʼyanu ejemplu stiʼ Jesús. Casi ná Evangeliu stiʼ Juan, dxi cá Jesús lu yaga que, caníʼ íquebe familia stibe. Juan ne María, jñaa Jesús, nuucaʼ ra chiguuticabe Jesús. Neca cayacaná Jesús, gúdxibe Juan gapa jñaabe (Juan 19:26, 27). Napa María xcaadxi xiiñiʼ ni zanda gudii laabe ni caquiiñebe, peru para tiempu que zándaca cadi discípulo stiʼ Jesús nin tobi de laacabe. Nga runi biyúbibe tu gapa María ne gacané laa guni servir Jehová.

16. ¿Xi dxiiñaʼ gupa Juan?

¹⁶ Gupa Juan stale dxiiñaʼ. Cumu apóstol laabe la? gúcabe ti ejemplu galán purtiʼ guizáʼ biʼniʼ predicarbe. Ne zándaca maʼ bichaganabe. Pa zacá ni, gupa xidé bidiibe ni caquiiñeʼ familia stibe ne laaca gucanebe laacaʼ chuʼcaʼ jma gaxha de Dios (1 Cor. 9:5). ¿Xi zanda guiziidiʼ ca ni naca xaíque de familia de ejemplu stiʼ Juan yaʼ?

17. Ca ni naca xaíque de familia, ¿xiñee risaca gacanecaʼ familia sticaʼ chuʼcaʼ jma gaxha de Jehová?

¹⁷ Ca ni naca xaíque de familia zándaca laaca nápacaʼ stale dxiiñaʼ risaca. Naquiiñeʼ gúnicabe xhiiñacabe jneza para guiníʼ binni bien de Jehová (Efes. 6:5, 6; Tito 2:9, 10). Ne laaca zándaca nápacabe xcaadxi responsabilidad ndaaniʼ congregación,  casi gúnicabe visita de pastoreu ne gácabe ti ejemplu galán purtiʼ guizáʼ runi predicárcabe. Laaca risaca guni estudiárcabe Biblia guiráʼ dxi né xheelacabe ne ca xiiñicabe. Zudii familia stícabe xquixe peʼ laacabe, purtiʼ cudiicabe ni caquiiñecaʼ ne cayacanécabe laacaʼ para chuʼcaʼ nayecheʼ ne chuʼcaʼ jma gaxha de Jehová (Efes. 5:28, 29; 6:4).

18. ¿Xi gunna dxichi Juan?

¹⁸ Xadxí bibani apóstol Juan ne bizaacabe stale cosa. Gudíʼdibe ra nagana ni ñándaca nusirá fe stibe. Peru bíʼnibe stipa gúnibe ni biʼniʼ mandar Jesús, gannaxhiibe ca hermanu stibe. Gunna dxichi Juan nadxii Jehová ne Jesús laa ne zudiicaʼ stipa laabe para gudxiilube intiica guendanagana (Juan 14:15-17; 15:10; 1 Juan 4:16). Nin Binidxabaʼ ne nin ca xpinni qué ñanda nucueezacaʼ apóstol Juan de ñannaxhii ca hermanu ne ca hermana ne nusihuínnini pur ni biʼniʼ ne pur ni guníʼ.

19. ¿Xi rucaa 1 Juan 4:7 laanu gúninu, ne xiñee?

¹⁹ Cásica apóstol Juan, laaca nabáninu ndaaniʼ Guidxilayú ni runi mandar Binidxabaʼ, ra nabé nanalaʼdxiʼ binni (1 Juan 3:1, 10). Racaláʼdxibe gusaana de gannaxhiinu ca hermanu stinu, peru qué zanda gúnibe ni pa qué gudiʼnu lugar. Nga runi, quixhe íquenu gannaxhiinu ca hermanu stinu, gusihuínninu ni pur ni gábinu laacabe ne pur ni gúninu. Pa gúninu ni la? zabáninu nayecheʼ purtiʼ nácanu parte de familia stiʼ Jehová (biindaʼ 1 Juan 4:7).