1. ¿Ximodo nga ribeenu tiempu para chuʼnu gaxha de Jehová?

 ¿CADI dxandíʼ guiranu riuuláʼdxinu cueenu tiempu para chuʼnu ra nuu ca binni ni nadxiinu la? Guzéʼtenu caadxi ejemplu, ca guendaxheelaʼ la? riuuláʼdxicaʼ cueecaʼ tiempu para guiziiláʼdxicaʼ. Ca joven, riuuláʼdxicaʼ chuʼcaʼ tobi si né ca xhamígucaʼ. Ne laanu, riuuláʼdxinu chuʼnu gaxha de ca hermanu stinu. Peru ni jma riuuláʼdxinu nga cueenu tiempu para chuʼnu gaxha de Dios stinu. ¿Ximodo rúninu ni yaʼ? Rúninu ni ora runi orarnu, ora runi estudiarnu, ora riníʼ íquenu propósitu stibe ne ca cualidad ni nápabe. ¡Guizáʼ riuuláʼdxinu cueenu tiempu para Jehová! (Sal. 139:17).

2. ¿Xiñee nuu biaje raca nagana cueenu tiempu para Jehová?

² Neca riuuláʼdxinu cueenu tiempu para Jehová, nuu biaje rácani nagana. Guiranu nuu xhiiñanu nga runi raca nagana para laanu cueenu tiempu para guni adorarnu Jehová. Pur dxiiñaʼ nápanu, familia stinu, ne xcaadxi cosa ni rúninu zándaca guiníʼ íquenu qué gápanu tiempu para guni orarnu, guni estudiarnu o guni meditarnu.

3. ¿Xi sti cosa naquiiñeʼ gápanu cuidadu?

³ Peru nuu sti cosa ni zándaca gaxhaʼ tiempu stinu. Zándaca caquiiñenu tiempu stinu para gúninu xcaadxi cosa neca cadi malu ca ni peru ñanda niquiiñenu  tiempu ca para ñuʼnu gaxha de Jehová. Dxandíʼ nga naquiiñeʼ guiziiláʼdxinu ne gaca divertirnu. Peru pa qué chuʼnu cuidadu la? zándaca maʼ qué zápanu tiempu para gúninu ca cosa ni ruchiña laanu gaxha de Jehová. Cadi guiaandaʼ laanu, ni jma risaca nga guni adorarnu Jehová que gúninu xcaadxi cosa (Prov. 25:27; 1 Tim. 4:8).

4. ¿Xi zadúʼyanu lu artículo riʼ?

⁴ Lu artículo riʼ zadúʼyanu xii nga ni jma risaca para laanu. Laaca zadúʼyanu ximodo zanda iquiiñenu tiempu stinu jneza para chuʼnu jma gaxha de Jehová ne xi zabeendunu.

5. ¿Ximodo zacané Efesios 5:15-17 ca joven para guicaacaʼ decisión jneza lu xquendanabánicaʼ?

⁵ Guicaanu decisión jneza. Ndiʼ nga ti cosa ni nabé riguu xizaa ca joven. Zándaca ca maestru o ca familia stícabe ni cadi naca Testigu gabi laacabe naquiiñeʼ guni estudiárcabe ti carrera ne guyúbicabe ti dxiiñaʼ ra guni ganárcabe stale bueltu. Peru zaquiiñecabe stale tiempu para gúnicabe ni bizéʼtenu riʼ. Bixhózecabe ne jñaacabe ne ca hermanu de congregación zándaca cuʼcaʼ gana laacabe para iquiiñecabe xquendanabánicabe para gúnicabe ni ná Jehová. ¿Xi zacané ti joven ni nadxii Jehová guicaa decisión jneza yaʼ? Zanda gúʼndabe Efesios 5:15-17 (biindaʼ ni). Despué de guiníʼ íquebe ni ná ni, zanda guiníʼ íquebe ca pregunta riʼ: «¿Xi racalaʼdxiʼ Jehová guneʼ? ¿Ñee ziuuláʼdxibe decisión ni guicaaʼ la? ¿Xi zacané naa iquiiñeʼ tiempu stinneʼ jneza?». Cadi guiaandaʼ laanu, nabé nagana ca dxi nabáninu riʼ ne maʼ cadi candaa zanitilú guidxilayú stiʼ Binidxabaʼ. Nga runi, ni jma jneza gúninu nga iquiiñenu xquendanabáninu para gusiéchenu Jehová.

6. ¿Xi gulí María guni ne xiñee jneza ni biʼniʼ?

⁶ Gúninu ca cosa ni jma risaca. Para iquiiñenu tiempu stinu jneza nuu biaje naquiiñeʼ gusaana de gúninu ti cosa neca cadi malu ni. Nga peʼ nga ni bizaaca Jesús dxi yeganna María ne Marta. Cumu guizáʼ riuulaʼdxiʼ Marta guidxaagalú binni la? ora guyé Jesús ra lídxibe guizáʼ biéchebe ngue runi bizulú cayúnibe stale guendaró. Peru béndabe María, gurí para gucaadiaga ni cusiidiʼ Jesús. Cadi malu ngue ni biʼniʼ Marta peru Jesús guníʼ gulí María ni jma galán (Luc. 10:38-42). Zándaca despué maʼ qué ñetenalaʼdxiʼ María xi gudó dxi que peru qué ñuu dxi ñaandaʼ laabe ni biziidibe de Jesús. Nánnanu nabé bisaca para María gucaadiaga Jesús ngue runi gulee tiempu para chuʼ gaxha de laabe. Ngaca naquiiñeʼ gúninu, naquiiñeʼ cueenu tiempu para chuʼnu gaxha de Jehová. ¿Ximodo zanda gúninu ni yaʼ?

7. ¿Xiñee nabé risaca guni orarnu, guni estudiarnu ne guni meditarnu?

⁷ Cadi guiaandaʼ laanu, ora guni orarnu, guni estudiarnu ne guni meditarnu cayuni adorarnu Dios. Ora runi orarnu caninenu Bixhózenu ni nuu guibáʼ ni guizáʼ nadxii laanu (Sal. 5:7). Ora runi estudiarnu Biblia, rizíʼdinu de Dios, binni ni jma nuu xpiaaniʼ lu guidubi universu (Prov. 2:1-5). Ne ora runi meditarnu riníʼ íquenu ca cualidad galán ni napa Jehová ne propósitu ni nápabe para laanu  ne para binni. Sicaríʼ nga jma jneza iquiiñenu tiempu stinu. Dxandíʼ, guiranu nga huaxiéʼ tiempu nápanu. Yanna, ¿xi zacané laanu iquiiñenu tiempu stinu jneza yaʼ?

8. ¿Xi ejemplu bisaana Jesús para laanu dxi guyé lu desiertu?

⁸ Biyubi ti lugar ra chuʼluʼ stúbiluʼ. Guiníʼ íquenu ximodo biʼniʼ Jesús ni. Dxi bizulú bíʼnibe xhiiñaʼ Dios lu Guidxilayú, guyuube 40 dxi lu desiertu (Luc. 4:1, 2). Raqué biʼniʼ orarbe ne guníʼ íquebe xi racalaʼdxiʼ Jehová gúnibe ne gucaneni laabe para gudxiilube ca guendanagana ni zadxaagalube despué. ¿Xi rizíʼdinu de ejemplu stiʼ Jesús yaʼ? Pa stálenu ndaaniʼ familia stinu, zándaca gaca nagana para laanu guidxélanu ti lugar ra chuʼnu stúbinu. Pa zacá ni, zanda gúninu ni runi Julie purtiʼ laa rié sti lugar para guni orar Jehová. Laabe ne xheelabe nabézacabe ndaaniʼ ti yoo nahuiiniʼ ndaaniʼ guidxi Francia nga runi raca nagana para laabe chuʼbe stúbibe para guni orarbe Jehová. Sicaríʼ guniʼbe: «Guiráʼ dxi riaaʼ ra parque para guinieniáʼ Jehová sin tu guchiiñaʼ naa».

9. Neca nabé guyuu xhiiñaʼ Jesús, ¿ximodo bisihuinni nabé risaca para laa chuʼ gaxha de Jehová?

⁹ Guizáʼ guyuu xhiiñaʼ Jesús. Ra tiica chebe ridxiña binni laabe para gucaadiágabe laacaʼ ne chuʼcaʼ gaxha de laabe. Biblia ná ti dxi «guca reunir guidubi guidxi» ra puertaʼ stiʼ ti yoo para gúʼyacaʼ Jesús. Neca zacá, guleebe tiempu para chuʼbe gaxha de Jehová. Ante guirá gueelaʼ guyebe ti lugar para chuʼbe stúbibe ne raqué biʼniʼ orarbe Bixhózebe (Mar. 1:32-35).

10, 11. Casi ná Mateo 26:40, 41, ¿xi conseju bidii Jesús discípulo stiʼ ndaaniʼ jardín de Getsemaní, peru xi bizaaca?

¹⁰ Últimu gueelaʼ guyuu Jesús lu Guidxilayú riʼ, dxi mayaca guilúxebe xhiiñaʼ Jehová guyebe ndaaniʼ jardín de Getsemaní para chuʼbe stúbibe, guni orarbe ne guni meditarbe (Mat. 26:36). Ne raqué gúdxibe ca discípulo stibe pabiáʼ risaca nga guni orarcaʼ.

¹¹ Guidúʼyanu ni bizaaca. Zándaca ora yendácabe ra jardín de Getsemaní que maʼ gudiʼdiʼ jma de galaa gueelaʼ, gudxi Jesús ca apóstol stiʼ cadi gásicaʼ ne zebe ziguni orarbe (Mat. 26:37-39). Ora biguétabe biiyabe nisiaasicaʼ ngue runi gúdxibe laaca sti biaje: «Lagataná ne cadi gusaana de guni orartu» (biindaʼ Mateo 26:40, 41). Nanna Jesús guizáʼ maʼ bidxágacabe ngue runi biabe laacaʼ ne gúdxibe laacaʼ «débil cuerpu stiʼ» binni.  Guyé Jesús yeguni orar xhupa biaje ne cada biaje biguétabe yendabe nisiaasicaʼ ne cadi cayuni orarcaʼ (Mat. 26:42-45).

12. ¿Xi zanda gúninu pa qué ganda guni orarnu purtiʼ guizáʼ nuunu xizaa o maʼ bidxáganu?

¹² Guyúbinu ti hora para guni orarnu. Nuu biaje raca nagana para laanu guni orarnu purtiʼ guizáʼ maʼ bidxáganu, ne cadi laasinu rizaacanu zacá. ¿Xi zanda gúninu yaʼ? Nuu hermanu napa costumbre guni orar huaxhinni peru maʼ biiyacabe jma galán pa gúnicabe ni xcaadxi tempranu, purtiʼ óraca caʼruʼ guidxágacabe. Ne nuu tu laa maʼ bidii cuenta jma raca concentrar ora ribí o ruzuxibi para guni orar. ¿Laga pa guizáʼ nuunu xizaa o qué gápanu gana guni orarnu yaʼ? Guinínenu Jehová purtiʼ laa ziene laanu ne ziaʼ laanu (Sal. 139:4).

13. Pa qué gápanu cuidadu, ¿xi zanda guni ca aparatu electrónicu ca laanu ora maʼ guleenu tiempu para Jehová?

¹³ Cadi gudiʼnu lugar chuʼ xiixa ni guni distraer laanu ora maʼ cayuni estudiarnu. Runi orarnu para chuʼnu gaxha de Jehová peru xcaadxi cosa ni zanda gúninu nga guni estudiarnu Biblia ne cadi guiáʼdxanu reunión. ¿Ñee nuu ni zanda gúninu para cadi gaca distraernu ora maʼ cayuni estudiarnu ne ora maʼ nuunu lu reunión la? Guiníʼ íquenu ndiʼ: «¿Xii nga ni runi distraer laanu?». Zanda gácani ti correu ti mensaje o ti llamada lu teléfono o lu tableta stinu. Tiempu riʼ, nabé riquiiñeʼ binni teléfono. Peru ca binni ni nanna de tema riʼ ná, neca nexheʼ si ti teléfono gaxha zanda guni distraer ni laanu. Ne ti profesor ni biʼniʼ investigar de tema riʼ guníʼ: «Pa nexheʼ ti celular gaxha de ra nuuluʼ qué zanda gúniluʼ ni cayúniluʼ purtiʼ gadxe ni maʼ cá íqueluʼ». Ora riuunu asamblea ante guzulú ni rinábacabe laanu gáxhanu ruidu stiʼ teléfono stinu o gusuinu ni para cadi guchiiñaʼ ni xcaadxi. Yanna, ¿ñee cadi laaca naquiiñeʼ gúninu zacá para cadi guni distraer ni laanu ora cueenu tiempu para Jehová la?

14. Casi ná Filipenses 4: 6, 7, ¿xi zuni Jehová para gacané laanu cadi gaca distraernu?

¹⁴ Guinábanu Jehová gacané laanu  para cadi gaca distraernu. Pa cayuni estudiarnu o nuunu ra reunión ne gudiʼnu cuenta maʼ gadxé ni caníʼ íquenu la? guinábanu Jehová gacané laanu. Pa nuu xi naguu xizaa laanu zándaca gaca nagana para laanu gaca concentrarnu, peru nabé risaca gúninu ni. Guni orarnu Jehová ne guinábanu laa gudii laanu paz stiʼ purtiʼ zápani ladxidoʼno ne xquendabiaaninu (biindaʼ Filipenses 4:6, 7).

15. ¿Xii nga ti ndaayaʼ ni zacaanu pa cueenu tiempu para Jehová?

¹⁵ Zacaanu stale ndaayaʼ pa cueenu tiempu para guinínenu Jehová, gucaadiáganu laabe ne guiníʼ íquenu laabe. ¿Xii nga ca ndaayaʼ ni zacaanu ca yaʼ? Primé la? zacaanu decisión jneza. Biblia ná, «tu canazané binni nuu xpiaaniʼ la? zaca binni nuu xpiaaniʼ» (Prov. 13:20). Nga runi ra jma cueenu tiempu para chuʼnu gaxha de Jehová, binni ni jma nuu xpiaaniʼ lu guidubi naca universu, zácanu binni jma nuu xpiaaniʼ. Zánnanu ximodo gusiéchenu laabe ne qué zacaanu decisión ni guniná laabe.

16. ¿Xiñee rizíʼdinu gusíʼdinu jma jneza pa cueenu tiempu para Jehová?

¹⁶ Guiropa, zusíʼdinu jma jneza. Ora rudiʼnu estudiu, tobi de ca cosa ni racaláʼdxinu nga gacanenu estudiante ca guidxiña gaxha de Jehová. Ra jma guinínenu Bixhózenu ni nuu guibáʼ jma zannaxhiinu laa, ne jma zanda gacanenu estudiante stinu gannaxhii laabe. Nga nga ni biʼniʼ Jesús. Ora maʼ caniʼbe de Bixhózebe rusihuínnibe guizáʼ nadxiibe laa ne ngue bicaa ca discípulo stibe laaca gannaxhiicaʼ Jehová (Juan 17:25, 26).

17. Ra guni orarnu ne guni estudiarnu, ¿ximodo racaneni laanu gaca fe stinu jma naguidxi?

¹⁷ Ne guionna, zaca fe stinu jma naguidxi. Guiníʼ íquenu xi rizaaca ora rinábanu Jehová gacané laanu ne quixhedxí ladxidoʼno. Ora ricábibe oración stinu, jma naguidxi raca fe stinu (1 Juan 5:15). Sti cosa ni zacané laanu gaca fe stinu naguidxi nga guni estudiarnu Biblia stúbinu. Biblia ná: «Rapa binni fe ora maʼ binadiaga mensaje» (Rom. 10:17). Racá ridúʼyanu riguidxi fe stinu ora rizíʼdinu de lu Biblia. Peru ¿xiruʼ zanda gúninu yaʼ?

18. Bizeeteʼ ti ejemplu para gusiéneluʼ xiñee naquiiñeʼ guni meditarnu.

¹⁸ Naquiiñeʼ guiníʼ íquenu ni cazíʼdinu. Guzéʼtenu de hombre ni bicaa Salmo 77. Guyuube xizaa purtiʼ guníʼ íquebe maʼ qué riuulaʼdxiʼ Jehová ni rúnibe ne ni runi xcaadxi israelita. Guizáʼ guyuube  xizaa dede qué randa rásibe huaxhinni (versículo 2-8). ¿Xi bíʼnibe yaʼ? Sicaríʼ gúdxibe Jehová: «Zaníʼ iqueʼ guiráʼ ca ni rúniluʼ ne zaníʼ iqueʼ modo rúniluʼ cani» (versículo 12). Gunna hombre riʼ guiráʼ ni maʼ biʼniʼ Jehová pur guidxi Israel neca zacá guníʼ íquebe: «¿Ñee maʼ biaandaʼ Dios gacané laanu, o guizáʼ cadxiichibe dede maʼ qué riabe laanu la?» (versículo 9). Guníʼ ique salmista riʼ guiráʼ ni biʼniʼ Jehová ne modo biá xquidxi dxiqué (versículo 11). Ne pur ngue gunna dxíchibe qué zusaana Jehová xquidxi (versículo 15). Zaqueca nga naquiiñeʼ gúninu para gaca fe stinu naguidxi. Naquiiñeʼ guiníʼ íquenu guiráʼ ni maʼ biʼniʼ Jehová pur xquidxi ne guiráʼ ni maʼ biʼniʼ pur laanu.

19. ¿Xi sti ndaayaʼ zacaanu pa cueenu tiempu para Jehová?

¹⁹ Guidapa, jma zannaxhiinu Jehová. Ndiʼ nga ndaayaʼ ni jma risaca. ¿Xiñee yaʼ? Purtiʼ racané cualidad riʼ laanu guzúʼbanu stiidxaʼ Jehová, gúninu xhiiñaʼ para gusiéchenu laa ne guni huantarnu intiica prueba (Mat. 22:37-39; 1 Cor. 13:4, 7; 1 Juan 5:3). Gastiʼ sti cosa jma risaca que gaca xhamígunu Dios ni jma nadxiinu, Jehová (Sal. 63:1-8).

20. ¿Xi maʼ gudixhe íqueluʼ gúniluʼ yanna para cadi gusaana de gaca xhamíguluʼ Jehová?

²⁰ Cadi guiaandaʼ laanu cayuni adorarnu Jehová nga ora guni orarnu, ora guni estudiarnu ne ora guni meditarnu. Gúninu cásica biʼniʼ Jesús ne cueenu tiempu ne guyúbinu xiixa lugar para chuʼnu gaxha de Jehová. Gúninu stipa para cadi gaca distraernu. Ne ora chuunu reunión o cayuni estudiarnu, guinábanu Jehová gacané laanu cadi gaca distraernu. Pa gúninu stipa iquiiñenu tiempu stinu jneza, zaguu Jehová ndaayaʼ laanu ne zabáninu ndaaniʼ guidxilayú cubi para siempre (Mar. 4:24).