1. ¿Ximodo guca familia stiʼ Santiago?

 SANTIAGO, biʼchiʼ Jesús, biniisi ndaaniʼ ti familia ni runi ni ná Dios. * Bixhózebe ne jñaabe, José ne María, guizáʼ gunnaxhiicaʼ Jehová ne bíʼnicaʼ stipa gúnicaʼ ni nabe modo peʼ riuuláʼdxibe. Guizáʼ galán privilegiu gupa Santiago purtiʼ biiyabe bíʼchibe ni jma huaniisi guca Mesías.

2. ¿Xii nga ni naquiiñeʼ nucaa Santiago nidxagayaa biʼchiʼ ni jma huaniisi?

² Biʼniʼ Jesús stale cosa ni ñanda nucaa Santiago nidxagayaa (Mat. 13:55). Casi dxi napa Jesús 12 iza maʼ runibiáʼ chaahuiʼ Stiidxaʼ Dios dede ca ancianu stiʼ Jerusalén nabé bidxagayaacaʼ (Luc. 2:46, 47). Zándaca biʼniʼ Jesús ne Santiago dxiiñaʼ de carpinteru. Pa zacá ni la? seguru binibiáʼ chaahuibe bíʼchibe. Hermanu Nathan Knorr guníʼ: «Ora runineluʼ ti binni dxiiñaʼ, riziidiluʼ stale de laa». * Laaca zándaca bidii Santiago cuenta «ra ziniisi Jesús ziyaca ti binni nuu xpiaaniʼ ne ziyuulaʼdxiʼ Dios ni rúnibe ne zaqueca binni» (Luc. 2:52). Zándaca guiníʼ íquenu Santiago nga guca tobi de ca primé discípulo stiʼ Jesús, peru cadi nga diʼ nga ni bizaaca.

3. ¿Xi biʼniʼ Santiago dxi bizulú Jesús biʼniʼ xhiiñaʼ Dios?

 ³ Dxi biʼniʼ Jesús xhiiñaʼ Dios lu Guidxilayú riʼ, qué ñaca diʼ Santiago tobi de ca discípulo stibe (Juan 7:3-5). Zándaca Santiago nga tobi de ca familia stiʼ Jesús ni guníʼ: «Cayaca íquebe» (Mar. 3:21). Ne qué riete diʼ pa nuu Santiago ra nuu María dxi cá Jesús lu yaga que (Juan 19:25-27).

4. ¿Xi chupa cosa zazíʼdinu?

⁴ Gudiʼdiʼ si tiempu gupa Santiago fe Jesús ne guca ti xpinni Cristu ni nabé gucané congregación. Lu artículo riʼ, zazíʼdinu chupa cosa de ejemplu stiʼ Santiago, primé, ¿xiñee naquiiñeʼ gácanu humilde? ne guiropa, ¿ximodo zanda gácanu ti buen maestru?

5. ¿Xi biʼniʼ Santiago ora bihuinni Jesús nezalú despué de biasa de lade gueʼtuʼ?

⁵ ¿Padxí nga beeda gaca Santiago discípulo stiʼ Jesús yaʼ? Despué de biasa Jesús de lade gueʼtuʼ bihuinni «nezalú Santiago; despué maʼ nezalú guiráʼ ca apóstol» (1 Cor. 15:7). Ra bihuinni Jesús nezalú Santiago bichaani xquendanabani. Né laabe nuube ndaaniʼ cuartu ra nuu ca apóstol, ndaaniʼ guidxi Jerusalén, dxi biaba espíritu santu luguiacaʼ (Hech.1:13, 14). Despué, laaca biecheʼ Santiago purtiʼ guyuu lade grupu ni zániru ni guyuu lu primé siglu (Hech. 15:6, 13-22; Gál. 2:9). Ne ante de iza 62, biquiiñeʼ Jehová laabe para gucaabe ti carta ra nuu ca xpinni Cristu ni bibí. Racané carta riʼ ca xpinni Cristu tiempu riʼ, ca ni napa esperanza de cheʼ guibáʼ ne ca ni chiguibani lu Guidxilayú (Sant. 1:1). Historiador Josefo, ni bibani lu primé siglu, bicaa biʼniʼ ordenar sumo sacerdote judíu Anán, guuticabe Santiago. Peru qué nusaana Santiago de ñuni ni ná Jehová lu Guidxilayú dede dxi gutiʼ.

6. ¿Xiñee maʼ gadxé guca Santiago de ca líder stiʼ ca religión guyuu tiempu que?

⁶ Guca Santiago humilde. Guidúʼyanu xiñee maʼ gadxé guca Santiago de ca líder stiʼ ca religión ni guyuu dxiqué. Ora biʼyaʼ Santiago ca prueba ni bisihuinni dxandíʼ Jesús nga Xiiñiʼ Dios la? gúcabe humilde ne biʼniʼ crebe ca ni. Peru qué ñuni cré ca sacerdote ni guyuu Jerusalén que. Ne qué ñanda  nusihuínnicaʼ cadi dxandíʼ bisibani Jesús Lázaro. Lugar de ñuni crécabe biseendaʼ Jehová Jesús lu Guidxilayú, laga gucaláʼdxicaʼ ñuuticaʼ laabe ne Lázaro (Juan 11:53; 12:9-11). Despué, dxi biasa Jesús de lade gueʼtuʼ, gucaláʼdxicabe cadi ñanna binni ni (Mat. 28:11-15). Cumu guca ca líder stiʼ ca religión riʼ orgulloso bicaanacaʼ Mesías.

7. ¿Xiñee cadi naquiiñeʼ gácanu ti binni orgulloso?

⁷ Ni rizíʼdinu: Cadi gácanu binni orgulloso ne gudiʼnu lugar gusiidiʼ Jehová laanu. Cásica rucueeza ti guendahuará dxiiñaʼ runi ladxidóʼ binni, zacaca zanda guquidxi orgullo ladxidoʼno para cadi guzúʼbanu stiidxaʼ Jehová. Bidii ca fariseu que lugar iguidxi ladxidoʼcaʼ neca biiyacaʼ ca cosa ni biʼniʼ Jesús, qué ñuni crecaʼ pa laabe nga Xiiñiʼ Dios ne nápabe espíritu stiʼ (Juan 12:37-40). Ne pur nga la? biníticabe oportunidad de guibánicabe sin qué chuʼ dxi gáticabe (Mat. 23:13, 33). Nga runi, nabé risaca nga gudiʼnu lugar gacané Stiidxaʼ Dios laanu ne espíritu stiʼ para guchaʼnu modo riníʼ íquenu, modo nácanu ne ca decisión ni guicaanu (Sant. 3:17). Cumu guca Santiago humilde la? bidii lugar gusiidiʼ Jehová laa. Ne casi zazíʼdinu lu xcaadxi párrafo ca, pur gúcabe humilde gúcabe ti buen maestru.

8. ¿Xi zacané laanu gácanu ti buen maestru?

⁸ Qué ñe diʼ Santiago scuela roʼ. Ngue runi para ca líder stiʼ ca religión de tiempu que naca Santiago cásica Pedro ne Juan, binni ni qué nizá scuela ne qué risaca (Hech. 4:13). Peru gúcabe ti buen maestru, casi ridúʼyanu ni lu carta ni zeeda lu Biblia ni ziné laabe. Cásica Santiago, zándaca laaca qué nizanu scuela roʼ. Peru pur racané espíritu santu stiʼ Jehová laanu ne rusiidiʼ organización stiʼ laanu zanda gácanu ti buen maestru. Guidúʼyanu ejemplu stiʼ Santiago ne xi zanda guizíʼdinu de laa.

9. ¿Ximodo bisiidiʼ Santiago?

⁹ Qué niquiiñeʼ Santiago diidxaʼ nagana  ne ni qué ñanda ñene binni. Ne pur ngue gunna ca binni que xi caquiiñeʼ gúnicaʼ ne ximodo caquiiñeʼ gúnicaʼ ni. Guzéʼtenu ti ejemplu, bisiidiʼ Santiago ca xpinni Cristu cadi naquiiñeʼ guidaacaʼ xiana ora guniná binni laacaʼ ne cadi nagana modo bisiénebe ni. Sicaríʼ bicaabe: «Ridúʼyanu pabiáʼ dichoso ca ni maʼ biʼniʼ huantar. Maʼ nánnatu xi guiráʼ biʼniʼ huantar Job ne nánnatu xi biʼniʼ Jehová pur laabe, nga runi yanna maʼ nánnatu pabiáʼ nadxii Jehová binni ne pabiáʼ riá laacabe» (Sant. 5:11). Raríʼ ridúʼyanu biquiiñeʼ Santiago Stiidxaʼ Dios para gusiidiʼ. Biquiiñebe ni para gacanebe binni ganna riguu ndaayaʼ Jehová ca ni qué rusaana laa cásica guluube ndaayaʼ Job. Zacá bisihuinni Santiago cadi de laa zeeda ni bisiidiʼ, sínuque de Jehová ne qué niquiiñeʼ diidxaʼ nagana para biʼniʼ ni.

10. ¿Xi ti modo zanda chinándanu ejemplu stiʼ Santiago ra bisiidiʼ?

¹⁰ Ni rizíʼdinu: Iquiiñenu Stiidxaʼ Dios ora gusíʼdinu ne cadi iquiiñenu diidxaʼ nagana. Qué racaláʼdxinu guluinu binni pabiáʼ nánnanu, sínuque ni racaláʼdxinu nga guluinu laacabe nga pabiáʼ nanna Jehová ne pabiáʼ rizaalaʼdxiʼ laanu (Rom. 11:33). Zanda gúninu ni pa siempre iquiiñenu Biblia. Guidúʼyanu ti ejemplu, ora maʼ cusiidiluʼ ti estudiante lugar de gábiluʼ laabe xi ñúniluʼ lii, mejor biluíʼ laabe ti ejemplu ni zeeda ndaaniʼ Biblia ne gucané laabe gúʼyabe ximodo riníʼ ique Jehová de laani. Zacá, ni gucaa laabe gúnibe ni caziidibe nga gusiéchebe Jehová ne cadi laanu.

11. ¿Xi guendanagana gupa caadxi xpinni Cristu ne xi conseju bidii Santiago laacaʼ? (Sant. 5:13-15).

¹¹ Gunna Santiago nuu guendanagana. Lu carta stibe ridúʼyanu gúnnabe xi guendanagana napa ca hermanu que, ne gúdxibe laacaʼ xi naquiiñeʼ gúnicaʼ. Guzéʼtenu ti ejemplu, caadxi de ca xpinni Cristu que cadi casi zecaʼ yenándacaʼ ca conseju bidiibe que (Sant. 1:22). Guyuu xcaadxi nabé guyuuláʼdxicaʼ guidxaagacaʼ puru si binni ricu (Sant. 2:1-3). Ne guyuu xcaadxi ni guca nagana para laacaʼ gucueezacaʼ ruaacaʼ para cadi guninacaʼ stobi (Sant. 3:8-10). Naroʼbaʼ ca guendanagana gupa ca xpinni Cristu riʼ, peru qué niníʼ ique Santiago qué zanda guchaacabe ne gudxi laacabe paraa caquiiñeʼ guchaacabe ne bíʼnibe ni né diidxaʼ nadóʼ ne gucanebe xcaadxi ni caxeleʼ de Dios guyúbicaʼ gacané ca ancianu laacaʼ (biindaʼ Santiago 5:13-15).

12. ¿Xi zacané laanu cadi guireʼnu gana ora gacanenu ti estudiante stinu?

¹² Ni rizíʼdinu: Guidúʼyanu paraa caquiiñeʼ guchaa ca estudiante stinu ne gacanenu laacaʼ. Nuu estudiante raca nagana para laacaʼ chinándacaʼ conseju rudii Biblia (Sant. 4:1-4). Zándaca caquiiñeʼ tidiʼ tiempu para guchaacabe modo bibánicabe dxiqué ne guibánicabe casi ti xpinni Cristu. Cásica Santiago, naquiiñeʼ gácanu nadxibalú para gábinu estudiante stinu paraa caquiiñeʼ guchaa ne gúninu ni né diidxaʼ nadóʼ. Peru cadi guireʼnu gana, gápanu confianza Jehová zuchiiñaʼ laacabe ndaaniʼ xquidxi ne zudii stipa laacabe para guchaacabe xquendanabánicabe (Sant. 4:10).

13. ¿Xi gunna Santiago? (Sant. 3:2).

¹³ Qué nudxiibaʼ Santiago laaca laa. Qué niníʼ ique Santiago jma risaca que xcaadxi hermanu purtiʼ biʼchiʼ Jesús o  pur ca privilegiu gupa, sínuque gúdxibe laacaʼ «hermanu ni nadxieeʼ caʼ» (Sant. 1:16, 19; 2:5). Guniʼbe laaca rucheebe ora bizeetebe ca diidxaʼ riʼ: «Guiranu rucheʼnu stale biaje» (biindaʼ Santiago 3:2).

14. ¿Xiñee laaca naquiiñeʼ guininu rucheʼnu?

¹⁴ Ni rizíʼdinu: Cadi guianda laanu laaca rucheʼnu. ¿Xiñee cadi jneza guiníʼ íquenu jma risácanu que ca estudiante stinu yaʼ? Pa guininu qué rucheʼnu, zándaca guiníʼ ique estudiante stinu qué zanda guni ni ribeza Dios de laa. Zanda gábinu ca estudiante stinu laaca nuu biaje huayaca nagana para laanu chinándanu xiixa principiu ni zeeda ndaaniʼ Biblia, peru ora rábinu laabe ximodo huayacané Jehová laanu gúninu xiixa cambiu la? zacanenu laabe gúʼyabe zanda gúnibe xhiiñaʼ Jehová.

15. ¿Ximodo ca ejemplu biquiiñeʼ Santiago? (Sant. 3:2-6, 10-12).

¹⁵ Biquiiñeʼ Santiago ejemplu ni yendá ndaaniʼ ladxidóʼ binni. Nanna dxíchinu gucané espíritu stiʼ Jehová laabe, peru laaca zándaca guníʼ íquebe stale de ejemplu ni biquiiñeʼ Jesús dxi bisiidiʼ. Nga runi, ca ejemplu biquiiñeʼ Santiago lu ca carta stiʼ cadi nagana ca ni ne qué raca nagana para laanu guiénenu ca ni (biindaʼ Santiago 3:2-6, 10-12).

16. ¿Xiñee naquiiñeʼ iquiiñenu ejemplu para gusiénenu ni cusíʼdinu?

¹⁶ Ni rizíʼdinu: Iquiiñenu ejemplu para gusiénenu ni cusíʼdinu. Ora riquiiñenu ejemplu jneza racanenu binni guiene xi cusíʼdinu laa. Ca ejemplu ca zacané cani laacabe guietenaláʼdxicabe ni cusiidiʼ Biblia. Guizáʼ gunna Jesús iquiiñeʼ ejemplu ne bíʼchibe Santiago zaqueca biʼniʼ. Guidúʼyanu tobi de ca ejemplu ni biquiiñeʼ Santiago ne guidúʼyanu xiñee biaʼ si ni.

17. ¿Xiñee guizáʼ galán ejemplu zeeda lu Santiago 1:22-25?

¹⁷ (Biindaʼ Santiago 1:22-25). Ejemplu ni biquiiñeʼ Santiago de ti espeju que guizáʼ galán ni purtiʼ cusiéneni caadxi cosa. Gunna dxíchibe xii ngue nuube gusiidibe raqué. Pa racaláʼdxinu gacané Stiidxa Dios laanu cadi naquiiñeʼ si guidúʼndanu ni laaca naquiiñeʼ gúninu ni cusiidiʼ ni laanu. Santiago biquiiñeʼ ti ejemplu ni nabé runibiáʼ binni: ti hombre  ni cayuuyadxí laa lu ti espeju, ¿xii ngue racaláʼdxibe gusiidibe né ejemplu que yaʼ? ¿cadi dxandíʼ ruzuhuaa binni lu ti espeju para guʼyaʼ paraa naquiiñeʼ quixheʼ chaahuiʼ xiixa la? Zaqueca nga rizaaca ora guidúʼndanu Biblia, rúninu ni para guidúʼyanu paraa caquiiñeʼ guchaʼnu, peru pa qué gúninu ni la? ¿Xi para cadúʼndanu Biblia yaʼ?

18. ¿Xi chonna cosa naquiiñeʼ gúninu ora iquiiñenu ti ejemplu?

¹⁸ Ora iquiiñenu ti ejemplu zanda gúninu ni biʼniʼ Santiago, gúninu chonna cosa. Primé, iquiiñenu ejemplu ni zacané laanu gusiénenu tema ni cani nu ca. Guiropa, iquiiñenu ejemplu ni runibiáʼ binni. Ne guionna, guidúʼyanu pa biénebe ni biziidibe. Pa raca nagana para laanu guyúbinu ti ejemplu galán zanda iquiiñenu Índice de las publicaciones Watch Tower. Chuunu ra ná «Ejemplos» racá zadxélanu stale ejemplu ni zacané laanu ora maʼ cusíʼdinu. Cadi guiaandaʼ laanu riquiiñenu ca ejemplu ca para gacanenu laacabe guietenaláʼdxicabe ti puntu ni racaláʼdxinu guiziidicabe. Nga runi galán guicá íquenu gácanu ti buen maestru. Peru cadi para guʼyaʼ si binni pabiáʼ nánnanu, sínuque para gacanenu laacabe guidxíñacabe xquidxi Jehová.

19. ¿Ximodo rusihuínninu nadxiinu ca hermanu stinu?

¹⁹ Dxandíʼ qué huayápanu ti bíʼchinu ni huayaca perfectu, peru nápanu privilegiu de guninenu Jehová ne stale hermanu dxiiñaʼ. Zanda gusihuínninu nadxiinu ca hermanu stinu ra cueenu tiempu para laacaʼ, guizíʼdinu de laacaʼ ne guninenu laacaʼ xhiiñaʼ Jehová. Ra gúninu stipa chinándanu ejemplu stiʼ Santiago, pur modo laanu ne pur modo rusíʼdinu rusisácanu Jehová ne racanenu binni ni nayá ladxidóʼ guidxiña Bixhózenu ni nuu guibáʼ.