1, 2. a) ¿Pora nga rietenaláʼdxinu ti binni ni nadxiinu ni maʼ guti? b) Gueelaʼ ante gatiʼ Jesús, ¿xi biʼniʼ mandarbe guni ca discípulo stibe?

 ORA rati binni ni nadxiinu, qué rusiáʼndanu laabe neca tidiʼ stale tiempu. Ne jmaruʼ si rietenaláʼdxinu laabe ora rizaa iza de gútibe.

² Guiráʼ iza, millón binni ni nuu lu guidubi Guidxilayú raca reunirnu para guietenaláʼdxinu guendaguti stiʼ Jesucristu (1 Ped. 1:8). Rúninu ni para guietenaláʼdxinu bidii Jesús xquendanabani para gulá laanu de lu náʼ pecadu ne guendaguti (Mat. 20:28). Ni racalaʼdxiʼ Jesús nga guietenalaʼdxiʼ ca discípulo guendaguti stiʼ. Ne gueelaʼ ante gátibe, gudíxhebe gúnicaʼ ti guendaroxhí nabé especial ne biʼniʼ mandarbe laacaʼ: «Cadi gusaana de gúnitu ndiʼ para guietenaláʼdxitu naa» (Luc. 22:19).

3. ¿Xi zadúʼyanu lu artículo riʼ?

³ De lade millón de binni rié dxi rietenaláʼdxinu guendaguti stiʼ Cristu, ti grupu nahuiiniʼ si cabeza cheʼ guibáʼ, peru jma stale binni nga cabeza guibani lu Guidxilayú. Lu artículo riʼ zadúʼyanu xiñee rié guiropaʼ grupu riʼ Conmemoración ni raca guiráʼ iza. Laaca zadúʼyanu xi ribeendunu ora chuunu. Guzulunu guininu xiñee rié ca xpinni Cristu ni naca ungidu.

4. ¿Xiñee ró ca ungidu pan ne reʼcaʼ vinu lu Conmemoración?

⁴ Rié ca ungidu guiráʼ iza para gocaʼ pan ne guecaʼ vinu lu Conmemoración. ¿Xiñee laacabe zanda gócabe pan ne guécabe vinu yaʼ? Para gánnanu xiñee la? guietenaláʼdxinu xi biʼniʼ Jesús últimu gueelaʼ bibani lu Guidxilayú. Despué de biʼniʼ celebrárcabe Pascua, biʼniʼ mandar Jesús ca xpinni guni ni runibiaʼnu yanna casi Guendaroxhí stiʼ Señor. Bidiibe pan ne vinu ca 11 apóstol stibe ne gúdxibe laacaʼ gocaʼ ne guecaʼ. Guníʼnebe laacaʼ de chupa pactu: pactu nacubi ne pactu para ti Reinu (Luc. 22:19, 20, 28-30). * Pur ca pactu riʼ zanda gaca ca apóstol que ne xcaadxi xpinni Cristu rey ne sacerdote guibáʼ (Apoc. 5:10; 14:1). Ne nuu xcaadxi ungidu * lu guiropaʼ pactu riʼ, ne pur nga laasicabe zanda gócabe pan ne guécabe vinu lu Conmemoración.

5. ¿Xi nanna ca ungidu de esperanza ni nápacaʼ?

⁵ Laaca rié ca ungidu Conmemoración purtiʼ racané ni laacaʼ guiníʼ íquecaʼ esperanza ni nápacaʼ. Maʼ bidii Jehová laacabe ti esperanza nabé galán ne laani nga guibánicabe guibáʼ né ti cuerpu ni qué ziuu dxi guinitilú ne ni qué ziuʼdxuʼ, zuninécabe Jesucristu dxiiñaʼ ne xcaadxi de ca 144,000 ne ziuucabe ra nuu Jehová (1 Cor. 15:51-53; 1 Juan 3:2). Nanna ca ungidu maʼ gucuaacaʼ invitación riʼ para guicaacaʼ ca privilegiu nabé galán riʼ. Peru para ganda guibánicabe guibáʼ cadi naquiiñeʼ gucheenécabe Jehová dede dxi gáticabe (2 Tim. 4:7, 8). Guizáʼ riéchecabe ora riníʼ íquecabe esperanza ni nápacabe (Tito 2:13). ¿Xi zanda guininu de ca «xcaadxi dendxuʼ» yaʼ? (Juan 10:16). ¿Xiñee riécabe Conmemoración yaʼ? Guzéʼtenu caadxi razón.

6. ¿Xiñee rié ca ni nuu lu grupu de xcaadxi dendxuʼ Conmemoración ni raca guiráʼ iza?

⁶ Rié ca ni nuu lu grupu de xcaadxi dendxuʼ Conmemoración para gúʼyacaʼ, ne cadi para guni participarcaʼ. Lu iza 1938 nga primé biaje guyé ca binni ni napa esperanza guibani lu Guidxilayú riʼ Conmemoración. Revista ni biree abril de 1938 stiʼ La Torre del Vigía bizeeteʼ «jneza ne naquiiñeʼ» cheʼ ca ni nuu lu grupu de xcaadxi dendxuʼ reunión riʼ ne «gúʼyacaʼ ximodo raca ni». Laaca bizeeteʼ ni: «Laaca naquiiñeʼ guiéchecabe pur reunión riʼ». Cásica rié tuuxa ti boda, rié para guʼyaʼ ne guiecheʼ, zacaca nga rié ca de xcaadxi dendxuʼ Conmemoración, riecaʼ para gúʼyacaʼ ne guiéchecaʼ.

7. ¿Xiñee riuulaʼdxiʼ ca ni nuu lu grupu de xcaadxi dendxuʼ gucaadiágacaʼ discursu stiʼ Conmemoración?

⁷ Laaca riníʼ ique xcaadxi dendxuʼ esperanza ni nápacaʼ. Riuuláʼdxicabe gucaadiágacabe discursu stiʼ Conmemoración, purtiʼ luni riete xi chiguni Reinu stiʼ Cristu ne ca 144,000 pur binni lu ti mil iza. Ora maʼ guni mandar Rey, Jesucristu, zacané ca 144,000 gaca Guidxilayú riʼ ti Paraísu ne zacanécabe ca  binni ni ruzuubaʼ diidxaʼ gácacaʼ perfectu. Guizáʼ riecheʼ millón de binni ni rié Conmemoración ora riníʼ íquecaʼ dxi maʼ gaca cumplir ca profecía ni zeeda lu Biblia casi Isaías 35:5, 6; 65:21-23 ne Apocalipsis 21:3, 4. Ora guiníʼ íquecabe maʼ nuucabe ndaaniʼ guidxilayú cubi né familia stícabe ne ca xhamígucabe, riguidxi esperanza stícabe ne racané ni laacabe gúnicabe jma lu xhiiñaʼ Jehová (Mat. 24:13; Gál. 6:9).

8. Bizeeteʼ sti razón xiñee rié grupu de xcaadxi dendxuʼ Conmemoración.

⁸ Laaca rié grupu de xcaadxi dendxuʼ Conmemoración purtiʼ riuuláʼdxicaʼ gusihuínnicaʼ nadxiicaʼ ne racanecaʼ ca ungidu. Maca bizeeteʼ Stiidxaʼ Dios ziuu ca ungidu ne ca binni ni chiguibani lu Guidxilayú riʼ tobi si. Guidúʼyanu caadxi profecía ni rusihuinni zacá ni.

9. Casi ná profecía ni zeeda lu Zacarías 8:23, ¿xi runi sentir ca xcaadxi dendxuʼ pur ca ungidu?

⁹ (Biindaʼ Zacarías 8:23). Guizáʼ sicarú modo ruzeeteʼ profecía riʼ ni runi sentir grupu de xcaadxi dendxuʼ pur ca hermanu ne hermana ni naca ungidu. Ca diidxaʼ «ti judíu» ne «laatu» caníʼ ca ni de ca xcaadxi ungidu (Rom. 2:28, 29). «Chii hombre de guiráʼ idioma stiʼ ca guidxi» runi representar ni ca xcaadxi dendxuʼ. Rinaazeʼ dxiichicabe ca ungidu, ndiʼ riníʼ qué rixélecabe de laacaʼ ne riuucabe tobi si né ca ungidu para guni adorárcabe Jehová. Nga runi, ora rié xcaadxi dendxuʼ riʼ gueelaʼ raca Conmemoración, rusihuínnicaʼ nuucaʼ tobi si né ca ungidu.

10. ¿Xi maʼ biʼniʼ Jehová para gaca cumplir profecía stiʼ Ezequiel 37:15-19, 24, 25?

¹⁰ (Biindaʼ Ezequiel 37:15-19, 24, 25). Maʼ biʼniʼ cumplir Jehová profecía riʼ purtiʼ cayacané ca ungidu ne grupu de xcaadxi dendxuʼ gúnicaʼ dxiiñaʼ tobi si. Caníʼ profecía riʼ de chupa palu. Ca binni napa esperanza de guibani guibáʼ nga ca ni zeeda gaca palu «para Judá» (tribu ra ribícabe ca binni gaca rey stiʼ guidxi Israel). Ne ca ni cabeza guibani lu Guidxilayú riʼ nga zeeda gaca palu «stiʼ Efraín». * Jehová nga chiguni guiropaʼ grupu riʼ «ti palu si». Ndiʼ riníʼ ziuucabe tobi si para gúnicabe ni ná Rey stícabe, Cristu Jesús. Ne guiráʼ iza, rié ca ungidu ne xcaadxi dendxuʼ Conmemoración, cadi casi chupa grupu, sínuque casi «ti grupu si» ni napa «ti pastor si» (Juan 10:16).

11. ¿Ximodo racané «ca dendxuʼ» ni riete lu Mateo 25:31-36, 40 ca biʼchiʼ Cristu?

¹¹ (Biindaʼ Mateo 25:31-36, 40). «Ca dendxuʼ» ni riete lu parábola riʼ laacabe nga ca binni nachaʼhuiʼ ni nabani lu ca últimu dxi ne nápacaʼ esperanza de guibánicaʼ lu Guidxilayú, laaca laacabe nga grupu de xcaadxi dendxuʼ. Racanécabe xcaadxi biʼchiʼ Cristu ni nuuruʼ lu Guidxilayú para guni cumplircaʼ dxiiñaʼ ni gucuaacaʼ: guni predicarcaʼ lu guidubi naca Guidxilayú ne gusiidicaʼ (Mat. 24:14; 28:19, 20).

12, 13. ¿Xi xcaadxi modo racané ca xcaadxi dendxuʼ ca biʼchiʼ Cristu?

¹² Guiráʼ iza, caadxi semana ante gaca Conmemoración, rusihuinni xcaadxi dendxuʼ cayacanecaʼ ca biʼchiʼ Cristu. ¿Ximodo rúnicabe ni yaʼ? Ra guni invitárcabe binni cheʼ Conmemoración  (biiyaʼ cuadru ni láʼ « Ni zanda gúniluʼ ante ne despué de Conmemoración»). Lu guidubi naca Guidxilayú, raca preparar grupu de xcaadxi dendxuʼ para gúnicaʼ Conmemoración neca ndaaniʼ congregación sticaʼ gastiʼ nin ti xpinni Cristu ungidu. Guizáʼ riecheʼ grupu de xcaadxi dendxuʼ purtiʼ randa racanecaʼ ca biʼchiʼ Cristu. Nánnacabe nanna Jesús guiráʼ ni cayúnicabe para ca ungidu cayúnicabe ni para laa (Mat. 25:37-40).

¹³ Yanna, neca gadxé gadxé esperanza ni nápanu, ¿xiñee riuunu Conmemoración?

14. ¿Ximodo maʼ bisihuinni Jehová ne Jesús pabiáʼ nadxiicaʼ laanu?

¹⁴ Purtiʼ rudiʼnu xquixe peʼ Jehová ne Jesús pur nadxiicaʼ laanu. Stale modo rusihuinni Jehová nadxii laanu. Peru ra jma bisihuínnibe guendarannaxhii ca nga ra biseendabe Xiiñibe gacaná ne gatiʼ pur laanu (Juan 3:16). Laaca bisihuinni Jesús nadxii laanu ra guyuu dispuestu gatiʼ pur laanu (Juan 15:13). Dxandíʼ, qué zanda quíxenu laacabe guiráʼ ni maʼ bíʼnicabe pur laanu, peru pur modo nabáninu zusihuínninu rudiʼnu xquixe peʼ laacabe (Col. 3:15). Ora chuunu Conmemoración, rusihuínninu rudiʼnu xquixe peʼ Jehová ne Jesús pur nadxiicaʼ laanu ne laaca rusihuínninu nadxiinu laacaʼ.

15. ¿Xiñee rudii ca ungidu ne xcaadxi dendxuʼ xquixe peʼ ni biʼniʼ Jesús pur laacaʼ?

¹⁵ Purtiʼ rudiʼnu xquixe peʼ guti Jesús pur laanu (Mat. 20:28). Pur guti Jesús zanda gapa ca ungidu esperanza de checaʼ guibáʼ. Pur fe ni nápacabe lu sacrificiu stiʼ Cristu, ruuyaʼ Jehová nácacabe binni nachaʼhuiʼ ne runi adoptar laacabe casi xiiñiʼ (Rom. 5:1; 8:15-17, 23). Laaca rusisaca ca ni nuu lu grupu de xcaadxi dendxuʼ ni biʼniʼ Jesús, purtiʼ ra gápacaʼ fe lu rini ni bixhii Cristu, zanda chuulaʼdxiʼ Dios ni rúnicaʼ, gúnicaʼ xhiiñabe ne guilacaʼ de lu «gran tribulación» (Apoc. 7:13-15, nota). Ora rié guiropaʼ grupu riʼ Conmemoración ni raca guiráʼ iza, rusihuínnicaʼ rudiicaʼ xquixe peʼ ni biʼniʼ Jesús pur laacaʼ.

16. ¿Xi sti razón nápanu para chuunu Conmemoración?

¹⁶ Purtiʼ ruzúʼbanu stiidxaʼ Jesús. Neca gadxé gadxé esperanza nápanu, guiranu rinándanu mandatu ni bidii Jesús gueelaʼ dxi gudixhe guni ca xpinni Conmemoración, sicaríʼ gúdxibe laacaʼ: «Cadi gusaana de gúnitu ndiʼ para guietenaláʼdxitu naa» (1 Cor. 11:23, 24).

17. ¿Xiñee riuʼnu jma gaxha de Jehová ora riuunu Conmemoración?

¹⁷ Purtiʼ ruchiña ni laanu jma gaxha de Jehová (Sant. 4:8). Casi maʼ bidúʼyanu, ora riuunu Conmemoración racané ni laanu guiníʼ íquenu esperanza ni maʼ bidii Jehová laanu ne pabiáʼ nadxiibe laanu (Jer. 29:11; 1 Juan 4:8-10). Runi crenu esperanza ni nápanu ne laaca nánnanu qué zusaana Jehová de gannaxhii laanu. Ora guiníʼ íquenu ndiʼ jma rannaxhiinu Jehová ne riuʼnu jma gaxha de laa (Rom. 8:38, 39).

18. Ora riníʼ íquenu ejemplu stiʼ Jesús, ¿xi rucaani laanu gúninu?

 ¹⁸ Purtiʼ rucaani laanu chinándanu ejemplu stiʼ Jesús (1 Ped. 2:21). Ca dxi ante gaca Conmemoración, ridúʼndanu ca relatu ni zeeda lu Biblia ni caníʼ xi biʼniʼ Jesús últimu semana bibani lu Guidxilayú, dxi gutiʼ ne dxi biasa de lade gueʼtuʼ. Ne gueelaʼ raca Conmemoración, rusietenalaʼdxiʼ discursu ca laanu pabiáʼ nadxii Jesús laanu (Efes. 5:2; 1 Juan 3:16). Ora guidúʼndanu ne guiníʼ íquenu modo bizuubaʼ Jesús stiidxaʼ Bixhoze rucaani laanu sanu cásica guzabe (1 Juan 2:6).

19. ¿Xi caquiiñeʼ gúninu para cadi guixélenu de Dios ni nadxii laanu?

¹⁹ Purtiʼ racané ni laanu cadi guixélenu de Dios ni nadxii laanu (Jud. 20, 21). Qué rixélenu de Jehová, Dios ni nadxii laanu, ora rúninu stipa guzúʼbanu stiidxaʼ, gusisácanu lá ne gusiéchenu ladxidóʼ (Prov. 27:11; Mat. 6:9; 1 Juan 5:3). Ora riuunu Conmemoración jma riuʼnu gana gábinu Jehová guiráʼ dxi: «¡Qué racalaʼdxeʼ gusaanaʼ de gacaʼ xhamíguluʼ!».

20. ¿Xi razón nápanu para cadi guiáʼdxanu Conmemoración?

²⁰ Pa cabézanu guibáninu guibáʼ o lu Guidxilayú, maʼ bizíʼdinu xiñee naquiiñeʼ chuunu Conmemoración ni raca guiráʼ iza. Ora raca reunirnu dxi Conmemoración, rietenaláʼdxinu guendaguti stiʼ tuuxa ni nadxiinu: Jesucristu. Ne laaca rietenaláʼdxinu pabiáʼ nadxii Jehová laanu purtiʼ bidii Xiiñiʼ para gulá laanu. Iza riʼ, zápanu Conmemoración stinu viernes 15 de abril de 2022. Nadxiinu Jehová ne Xiiñiʼ. Nga runi, cadi gudiʼnu lugar chuʼ xiixa ni gucueeza laanu de chuunu Conmemoración.