ARTÍCULO DE ESTUDIU 3
¿Xi rizíʼdinu de ora biʼnaʼ Jesús?
«Biinaʼ Jesús óraque» (JUAN 11:35).
CANCIÓN 17 Riuuladxeʼ
NI ZAZÍʼDINU *
1-3. ¿Xi cosa zándaca gusiguunaʼ laanu?
¿PADXÍ nga últimu biaje biinaluʼ? Nuu biaje ridúʼnanu purtiʼ cayéchenu, peru jma stale biaje ridúʼnanu purtiʼ nuunu triste. Zándaca ridúʼnanu purtiʼ guti ti binni ni nadxiinu. Sicaríʼ guníʼ Lorilei, * ti hermana de Estados Unidos: «Gucadé ladxiduáʼ dxi gutiʼ dxaapahuiiniʼ stinneʼ. Dede guníʼ iqueʼ guirutiʼ tu zanda quixhedxini. Ne guníʼ iqueʼ maʼ qué zanda guibaneʼ».
2 Zándaca nuu xcaadxi cosa ni rusiguunaʼ laanu. Sicaríʼ guníʼ ti precursora de Japón láʼ Hiromi: «Nuu biaje rireeʼ gana purtiʼ qué riná diʼ binni de territorio stidu gucaadiaga, dede ridá nisa luaʼ ora rinabaʼ Jehová gacané naa guidxelaʼ ti binni ni racalaʼdxiʼ guiziidiʼ de laa».
3 ¿Cadi dxandíʼ nuu biaje runi sentirnu cásica biʼniʼ sentir ca hermana riʼ la? (1 Ped. 5:9). Racaláʼdxinu gúninu ni ná Jehová né guendanayecheʼ. Peru zándaca gúninu ni né yuubaʼ purtiʼ guti ti binni ni nadxiinu o nápanu ti guendanagana ra zahuinni pa qué zuchéʼnenu Dios (Sal. 6:6; 100:2). ¿Xi zanda gúninu pa cayuni sentirnu zacá yaʼ?
4. ¿Xi zazíʼdinu lu artículo riʼ?
4 Zanda gacané ejemplu stiʼ Jesús laanu. Purtiʼ guyuu biaje biʼniʼ sentirbe triste dede biinabe (Juan 11:35; Luc. 19:41; 22:44; Heb. 5:7). Lu artículo riʼ zazíʼdinu guyuu biaje biinaʼ Jesús. Zadúʼyanu xi rusiidiʼ ni laanu de Jesús ne de Jehová ne xi zanda gúninu ora tídinu lu guendanagana ni zucaa laanu guidúʼnanu.
BIINAʼ JESÚS PUR CA XHAMIGU
Gacanenu ca binni ni gutiʼ ti binni ni nadxii cásica biʼniʼ Jesús ni. (Biiyaʼ párrafo 5 hasta 9). *
5. ¿Xi rusiidiʼ relatu ni zeeda lu Juan 11:32-36 laanu de Jesús?
5 Ra maʼ ziluxe iza 32, guca huará xhamigu Jesús ni láʼ Lázaro ne guti (Juan 11:3, 14). Guizáʼ gunnaxhii Jesús laabe ne guiropaʼ bizáʼnabe, María ne Marta. Guizáʼ cayuubaʼ ladxidóʼ ca gunaa riʼ purtiʼ guti bizáʼnacaʼ. Despué de guti Lázaro, guyé Jesús Betania ra nabeza María ne Marta. Ora gunna Marta zeeda Jesús biree yedxaagalú laabe. Guiníʼ íquenu pabiáʼ triste nuube ora gúdxibe Jesús: «Señor, pa ñuuluʼ raríʼ, qué ñati diʼ bizanaʼ» (Juan 11:21). Ora biʼyaʼ Jesús cayuunaʼ María ne xcaadxi binni, biinaʼ óraque (biindaʼ Juan 11:32-36).
6. ¿Xiñee biinaʼ Jesús ora gutiʼ Lázaro?
6 ¿Xiñee biinaʼ Jesús ora gutiʼ Lázaro yaʼ? Sicaríʼ cusiene libru Perspicacia para comprender las Escrituras: «Ra gutiʼ xhamígube Lázaro, ne biiyabe cayuunaʼ ca bizaʼnaʼ gueʼtuʼ que gucuaaláʼdxibe ne biinabe». * Zándaca guníʼ ique Jesús yuubaʼ gupa Lázaro pur guendahuará stiʼ ne ximodo biʼniʼ sentir dxi mayaca gatiʼ. Ne zándaca laaca biinabe ora bíʼyabe cayuunaʼ María ne Marta pur guti bizáʼnacaʼ. ¿Ñee maʼ biʼniʼ sentirluʼ ni biʼniʼ sentir Jesús ra binítiluʼ ti xhamíguluʼ o ti binni ni nadxiiluʼ la? Pa zacá ni, guidúʼyanu chonna cosa ni rusiidiʼ relatu riʼ laanu.
7. ¿Xi rizíʼdinu de Jehová ra biʼnaʼ Jesús pur ca xhamigu?
7 Riene Jehová ni cayuni sentirluʼ. Zeeda gaca Jesús casi peʼ Dios (Heb. 1:3). Ra biʼnaʼ Jesús bisihuinni ximodo peʼ naca Bixhoze (Juan 14:9). Pa nuuluʼ triste pur guti ti binni ni nadxiiluʼ, gunna dxichi nanna Jehová xi cayuni sentirluʼ ne laaca riuubaʼ ladxidoʼbe. Ne racaláʼdxibe gacanebe lii (Sal. 34:18; 147:3).
8. ¿Xiñee zanda guni crenu dxandíʼ peʼ zusibani Jesús ca binni ni nadxiinu ni maʼ guti?
8 Racalaʼdxiʼ Jesús gusibani ca binni ni nadxiiluʼ ni maʼ guti. Ante guʼnaʼ Jesús gúdxibe Marta: «Ziasa bizáʼnaluʼ». Ne biʼniʼ cré Marta laabe (Juan 11:23-27). Cumu rúnibe ni ná Jehová la? nánnabe gundisaʼ profeta Elías ne Eliseo caadxi binni ni gutiʼ dxiqué (1 Rey. 17:17-24; 2 Rey. 4:32-37). Ne zándaca laaca maʼ nánnabe de ca binni ni bisibani Jesús (Luc. 7:11-15; 8:41, 42, 49-56). Lii laaca zanda chuʼluʼ seguru zabiguetaʼ guibani ca binni ni nadxiiluʼ ni maʼ guti. Ra biʼnaʼ Jesús ne gudixhedxí ladxidóʼ ca xhamigu rusiidini laanu dxandíʼ peʼ racaláʼdxibe gusibánibe ca binni ni maʼ guti.
9. Cásica Jesús, ¿ximodo zanda gacanenu ca ni naná nuu ladxidóʼ? Bizeeteʼ ti ejemplu.
9 Zanda gacaneluʼ tuuxa ni cayacaná pur guti tuuxa ni nadxii. Cadi biinané si Jesús Marta ne María, sínuque laaca bicaadiágabe laacaʼ ne gudixhedxibe ladxidoʼcaʼ. Laanu laaca zanda gúninu zacá pur ca binni ni maʼ guti ti binni ni nadxiicaʼ. Sicaríʼ guníʼ Dan, ti ancianu ni nabeza Australia: «Despué de guti xheelaʼ biquiiñeʼ tu gacané naa. Ne guyuu guendaxheelaʼ ni guyuu dispuestu gacané naa ora caquiiñeʼ ni. Zanda gabeʼ laacabe ni cayuneʼ sentir ne zanda guunaʼ nezalúcabe sin guituí luaʼ. Ne ora qué gapaʼ stipa para guneʼ xiixa nuucabe para gacanécabe naa casi quíʼbicabe carru, chisícabe o gúnicabe guendaró. Ne gatigá runi orarnécabe naa. Ora gudideʼ ra naná bisihuínnicabe dxandíʼ peʼ nácacabe xhamiguaʼ» (Prov. 17:17).
BIINABE PUR CA PRÓJIMO STIBE
10. ¿Xi relatu riete lu Lucas 19:36-40?
10 Guyé Jesús Jerusalén 9 de nisán iza 33. Ra maʼ zidxíñabe guidxi que biree ti grupu de binni zidxaagalucaʼ laabe, bichiaacaʼ xhábacaʼ lu neza que para gusihuínnicaʼ laabe nga Rey sticaʼ. Ne nánnanu cayéchecabe dxi que (biindaʼ Lucas 19:36-40). Zándaca bidxagayaa ca discípulo que ora bíʼyacaʼ xi biʼniʼ Jesús. Biblia ná: «Ora bidxiña Jesús gaxha de guidxi que ne bíʼyabe ni, biinabe pur laani». Ne dede cadá nisa lú Jesús ora guníʼ xi chiguizaaca ca binni ni nabeza Jerusalén (Luc. 19:41-44).
11. ¿Xiñee biinaʼ Jesús pur ca binni de Jerusalén?
11 Guyuu Jesús triste purtiʼ neca xa galán modo bidxaagalú ca judíu que laabe, gúnnabe stale de laacaʼ qué zanacaʼ gucaadiágacaʼ mensaje stiʼ Reinu. Ngue runi zanitilú Jerusalén ne ca judíu ni guilá la? zinécabe laacaʼ de esclavu (Luc. 21:20-24). Triste guininu ni, peru casi guníʼ Jesús, jma stale binni qué niná nucaadiaga laabe. ¿Ñee rucaadiaga binni mensaje stiʼ Reinu lugar ra nabézaluʼ la? Pa rúniluʼ stipa guni predicarluʼ peru huaxiéʼ binni riuulaʼdxiʼ gucaadiaga mensaje stiʼ Reinu yaʼ. ¿Xi zanda guiziidiluʼ de ora biʼnaʼ Jesús? Guidúʼyanu xhonna cosa.
12. ¿Xi rizíʼdinu de Jehová ra biʼnaʼ Jesús pur ca prójimo stiʼ?
12 Nadxii Jehová binni. Ora biʼnaʼ Jesús, bisihuínnini pabiáʼ rizaalaʼdxiʼ Jehová binni, purtiʼ «qué racaláʼdxibe guinitilú nin tobi, ni racaláʼdxibe nga gaca arrepentir guiráʼ binni» (2 Ped. 3:9). Zusihuínninu nadxiinu prójimo stinu ra gúninu stipa pur guni predicarnu ne chindá ca noticia galán ca ndaaniʼ ladxidóʼcabe (Mat. 22:39). *
Guchaʼnu ora runi predicarnu cásica biʼniʼ Jesús. (Biiyaʼ párrafo 13 ne 14). *
13, 14. a) ¿Ximodo bisihuinni Jesús riá binni? b) ¿Ximodo zanda gusihuínninu cualidad riʼ?
13 Guizáʼ biʼniʼ predicar Jesús. Cumu nadxiibe binni la? Ora tiica guleebe tiempu para gusiidibe laacaʼ (Luc. 19:47, 48). Ne cumu biabe binni, bicaani laabe gusiidibe laacaʼ. Guyuu biaje bidxiña stale binni Jesús ne ca discípulo stiʼ para gucaadiágacaʼ ni cusiidibe dede qué ñápacabe tiempu para gócabe (Mar. 3:20). Ne ora yeyubi ti hombre laabe huaxhinni, guyuube dispuestu guiníʼnebe laa (Juan 3:1, 2). Dxandíʼ nga stale binni bicaadiaga Jesús neca zaqué qué ñácacaʼ discípulo stibe peru guiracaʼ gúnnacaʼ xi bisiidibe. Tiempu riʼ racaláʼdxinu gunadiaga binni mensaje stiʼ Reinu (Hech. 10:42). Para ganda gúninu ni la? laaca naquiiñeʼ guchaʼnu modo runi predicarnu.
14 Guyuu dispuestu guchaaluʼ modo runi predicarluʼ. Pa ngueca ora runi predicarnu, zándaca qué zadxélanu binni gucaadiaga ca noticia galán stiʼ Reinu. Sicaríʼ guníʼ ti precursora láʼ Matilda: «Naa ne xheelaʼ rúnidu stipa guni predicardu gadxé gadxé hora. Siadóʼ ca runi predicardu ra nuu ca negocio. Galaa dxi ca cumu nuu stale binni ndaaniʼ calle la? runi predicarnedu exhibidor. Ne huadxí, ridxéladu binni ra lidxi para guni predicardu». Lugar de guni predicarnu hora rábinu la? naquiiñeʼ chuʼnu dispuestu guchaʼnu hora runi predicarnu para guidxélanu jma binni. Pa gúninu ni, ziuʼnu seguru zusiéchenu Jehová.
BIINAʼ JESÚS PURTIʼ GUYUU XIZAA GUINÍʼCABE MAL DE LÁ BIXHOZE
Guinábanu Jehová gacané laanu ora nuunu xizaa cásica biʼniʼ Jesús. (Biiyaʼ párrafo 15 hasta 17). *
15. Casi ná Lucas 22:39-44, ¿xi biʼniʼ Jesús gueelaʼ ante gatiʼ?
15 Huaxhinni 14 de nisán iza 33, guyé Jesús ndaaniʼ jardín de Getsemaní ne gúdxibe Jehová guiráʼ ni nuu ndaaniʼ ladxidoʼbe (biindaʼ Lucas 22:39-44). Ne ora nuu Jesús raqué «gunábabe ne biʼniʼ rogarbe Dios de guidubi ladxidoʼbe [...] dede biinabe ne bicaabe ridxi» (Heb. 5:7). ¿Xi gunabaʼ Jesús gueelaʼ ante gatiʼ yaʼ? Gunábabe Jehová gudii stipa laabe para cadi gucheenebe laa ne gúnibe ni ná. Bicaadiaga Jehová oración stiʼ Xiiñiʼ ne biseendaʼ ti ángel para gudii stipa laabe.
16. ¿Xiñee guyuu Jesús xizaa ora cayuni orar ndaaniʼ jardín de Getsemaní?
16 Biinaʼ Jesús laga cayuni orar ndaaniʼ jardín de Getsemaní purtiʼ guyuube xizaa guiníʼ binni qué runi respetarbe lá Dios. Laaca gúnnabe nápabe ti dxiiñaʼ nabé risaca. Laani nga guni defenderbe lá Bixhózebe. Pa cadíʼdiluʼ lu guendanagana ra caquiiñeʼ gusihuínniluʼ qué zucheeneluʼ Jehová, ¿xi zanda guiziidiluʼ de ora biʼnaʼ Jesús yaʼ? Guidúʼyanu chonna cosa ni rusiidiʼ ni laanu.
17. ¿Xi rizíʼdinu de Jehová ra bicábibe oración stiʼ Jesús?
17 Rucaadiaga Jehová ni rinábanu laa lu oración. Bicaadiaga Jehová ni gunabaʼ Xiiñiʼ laa lu oración. ¿Xiñee yaʼ? Purtiʼ ni jma bisaca para Jesús nga cadi gucheené Bixhoze ne guni defender labe. Laaca zacané Jehová laanu pa ni jma risaca para laanu nga cadi guchéʼnenu laa ne guni defendernu nombre stiʼ (Sal. 145:18, 19).
18. ¿Xiñee zanda guininu naca Jesús xhamígunu ne riene laanu?
18 Riene Jesús ni cayuni sentirluʼ. Ora nuunu xizaa, riquiiñenu tuuxa xhamígunu ni guiene laanu, jmaruʼ si pa maʼ gudíʼdibe lu ca guendanagana ni cadídinu. Jesús nga zeeda gaca xhamígunu ca. Nánnabe ora qué gápanu stipa ne ora qué gápanu tu gacané laanu. Nánnabe ximodo guyanu ne zacanebe laanu ora peʼ caquiiñenu ni (Heb. 4:15, 16). Cásica bidii Jesús lugar gacané ti ángel laa dxi nuu ndaaniʼ jardín de Getsemaní, laanu laaca naquiiñeʼ gudiʼnu lugar gacané Jehová laanu. Ne zanda gúnibe ni ra iquiiñebe ti publicación, ti videu, ti discursu o ra chiganna ca ancianu o ti hermanu ni naca xhamígunu.
19. ¿Xi zacané lii pa cadíʼdiluʼ ti guendanagana? Bizeeteʼ ti ejemplu.
19 Zudii Jehová paz stiʼ lii. ¿Ximodo rudii Jehová stipa laanu yaʼ? Ora runi orarnu rudii Dios paz stiʼ laanu «dede guirutiʼ zanda guiene ximodo ni» (Filip. 4:6, 7). Paz ni rudii Jehová laanu, riguixhedxini ladxidoʼno ne racaneni laanu guiníʼ íquenu jneza. Nga peʼ nga ni bizaaca ti hermana láʼ Luz. Sicaríʼ guniʼbe: «Nuu biaje runeʼ sentir stubeʼ, ne rucaani naa guiníʼ iqueʼ cadi nadxii Jehová naa. Peru óraca rabeʼ Jehová xi cayuneʼ sentir. Ra guneʼ orar racané ni naa chuaaʼ galán». Ni bizaaca hermana Luz rusihuinni ni racané oración laanu para gatadxí ladxidoʼno.
20. ¿Xi rizíʼdinu ra biʼnaʼ Jesús?
20 Ca cosa ni bizíʼdinu de ora biʼnaʼ Jesús, riguixhedxí ca ni ladxidoʼno ne racané ca ni laanu. Ora biʼnaʼ Jesús, rusietenalaʼdxiʼ ni laanu naquiiñeʼ gacanenu ca xhamígunu ora gatiʼ ti binni ni nadxiicaʼ ne gápanu confianza zacané Jehová ne Jesús laanu ora gatiʼ ti binni ni nadxiinu. Ne cásica riá Jehová ne Jesús binni la? laanu laaca naquiiñeʼ guianu laacaʼ ra guni predicarnu ne gusíʼdinu laacaʼ. Ra biʼnaʼ Jesús riguixhedxini ladxidoʼno purtiʼ rusihuínnini riene Jehová ne Jesús ni cazaacanu ne racaláʼdxicaʼ gacanecaʼ laanu guni huantarnu. Cadi gusaana de gúninu ca ni bizíʼdinu riʼ dede guedandá dxi guni cumplir Jehová promesa riʼ: «Zuchaabe nisa riete lucaʼ» (Apoc. 21:4).
CANCIÓN 120 Gácanu nadóʼ ne humilde casi Jesús
^ Guyuu biaje guyuu Jesús triste ne biinaʼ. Lu artículo riʼ zadúʼyanu chonna biaje bíʼnabe ne xi rizíʼdinu de laani.
^ Maʼ bidxaa lá caadxi binni.
^ Diidxaʼ griegu ni zeeda lu Mateo 22:39 ni raca traducir prójimo riníʼ ni tuuxa ni nuu gaxha. Peru cadi caníʼsini de tuuxa ni nuu gaxha, sínuque laaca caniʼni de ca binni ni ridxaagabe.
^ NI RIHUINNI LU IMAGEN RIʼ: Gudixhedxí Jesús ladxidóʼ María ne Marta. Laanu laaca zanda quixhedxinu ladxidóʼ tuuxa ni nadxiinu.
^ NI RIHUINNI LU IMAGEN RIʼ: Guyuu Jesús dispuestu gusiidiʼ Nicodemo huaxhinni. Laanu laaca naquiiñeʼ gusíʼdinu ca estudiante stinu ora quíxhecaʼ ni.
^ NI RIHUINNI LU IMAGEN RIʼ: Gunabaʼ Jesús Jehová gudii stipa laabe para cadi gucheenebe laa. Laanu laaca ngaca naquiiñeʼ gúninu ora tídinu lu ti guendanagana.
