1. ¿Xiñee nabé risaca para laanu dxi rietenaláʼdxinu guendaguti stiʼ Cristu? (Lucas 22:​19, 20).

 PARA laanu, ca xpinni Jehová, dxi rietenaláʼdxinu guendaguti stiʼ Cristu nga dxi ni jma risaca. Laasini nga ceremonia ni biʼniʼ mandar Jesús gaca (biindaʼ Lucas 22:​19, 20). ¡Guizáʼ maʼ nápanu gana guedandá dxi nabé risaca riʼ! ¿Xiiñe yaʼ? Guidúʼyanu chupa chonna razón.

2. ¿Xiñee maʼ racaláʼdxinu guedandá dxi rietenaláʼdxinu guendaguti stiʼ Cristu?

² Ora rietenaláʼdxinu guendaguti stiʼ Cristu racané ni laanu guiníʼ íquenu lu rescate o ni gudixe Jehová ra bidii Xiiñiʼ gati pur laanu. Rusietenalaʼdxiʼ ni laanu caadxi modo zanda gusihuínninu cudiʼnu xquixe peʼ pur bidii Jesús xquendanabani pur laanu (2 Cor. 5:​14, 15). Laaca racané ni laanu chuʼnu juntu né ca hermanu stinu ne «ugúʼsaanu gana laanu» (Rom. 1:12). Guiráʼ iza, stale hermanu inactivu riecaʼ dxi rietenaláʼdxinu guendaguti stiʼ Cristu ne nuu de laacaʼ ruyúbicaʼ guibiguétacaʼ ra nuu Jehová purtiʼ ruuyacaʼ pabiáʼ nadxii ca hermanu laacaʼ. Ne laaca ridxagayaa stale binni ni rié pur ni ruuyacaʼ ne ni runadiágacaʼ. Nga runi riguixhe íquecaʼ guzulucaʼ gúʼndacaʼ Biblia. Pur guiráʼ ni bizéʼtenu riʼ, naca dxi rietenaláʼdxinu guendaguti stiʼ Cristu ti dxi nabé risaca para laanu.

3. ¿Ximodo ridúʼyanu nuu xquidxi Jehová tobi si dxi rietenaláʼdxinu guendaguti stiʼ Cristu? (Biiyaʼ imagen ca).

³ Laaca maʼ racaláʼdxinu guedandá dxi riʼ purtiʼ ridúʼyanu nuu xquidxi Jehová tobi si. Lu guidubi Guidxilayú ridagulisaa ca testigu stiʼ Jehová ora maʼ ziyaaziʼ gubidxa. Rucaʼdiáganu ti discursu ni rusihuinni pabiáʼ risaca ni gudixe Jehová para gulá laanu. Ridúʼndanu chupa canción, rutíʼdinu pan ne vinu ne de guidubi ladxidoʼno rininu «amén» lu guidapaʼ oración ni raca. Lu 24 hora si runi guiráʼ congregación zacá. ¿Ñee riníʼ íquenu  pabiáʼ nayecheʼ riuu Jehová ne Jesús ora ruuyacaʼ rusisácanu laacaʼ lu guidubi Guidxilayú la?

4. ¿Xi zadúʼyanu lu artículo riʼ?

⁴ Lu artículo riʼ zacábinu ca pregunta riʼ: ¿Ximodo zanda cuʼnu ladxidoʼno listu para dxi guietenaláʼdxinu guendaguti stiʼ Cristu?, ¿ximodo zanda gacanenu xcaadxi para cueenducaʼ ni galán? ne ¿ximodo zanda gacanenu ca inactivu? Zacané respuesta stiʼ ca pregunta ca laanu chuʼnu listu para dxi nabé risaca riʼ.

XIMODO ZANDA CUʼNU LADXIDOʼNO LISTU PARA DXI GUIETENALÁʼDXINU GUENDAGUTI STIʼ CRISTU

5. a) ¿Xiñee naquiiñeʼ guiníʼ íquenu pabiáʼ risaca rescate? (Salmo 49:​7, 8). b) Bizeeteʼ xi biziidiluʼ lu videu Xiñee guti Jesús.

⁵ Tobi de ca modo jma risaca zanda cuʼnu ladxidoʼno listu para dxi guietenaláʼdxinu guendaguti stiʼ Cristu nga ora riníʼ íquenu pabiáʼ risaca ni biʼniʼ Jesucristu ra bidii xquendanabani pur laanu. Stúbisinu que ñanda diʼ nilanu lu náʼ pecadu ne guendaguti (biindaʼ Salmo 49:​7, 8; biiyaʼ videu ni láʼ «Xiñee guti Jesús»). a Ngue runi bidii Jehová Xiiñiʼ ni nadxii para gati pur laanu, nabé naroʼbaʼ ni gudixe guirópacabe pur laanu (Rom. 6:23). Ra jma guiníʼ íquenu sacrificiu ni biʼniʼ Jehová ne Jesús pur laanu la? jma zusisácanu rescate ni bidiicabe riʼ. Yanna, guidúʼyanu caadxi de ca cosa ni guyuu Jehová ne Jesús dispuestu gúnicaʼ pur laanu. Peru primé, guidúʼyanu xiñee caquíʼñenu ti rescate riʼ.

6. ¿Xiñee caquíʼñenu ti rescate?

⁶ Rescate nga ni riaxa para guixuíʼ xiixa sti biaje o para guibiguetaʼ xiixa lu náʼ tuuxa. Perfectu bizáʼ Jehová Adán, primé hombre ni bibani lu Guidxilayú riʼ. Peru dxi bicheenebe Dios maʼ qué ñanda diʼ nibánibe para siempre ne ninca guiráʼ ca xiiñibe. Para ganda guibiguetaʼ ni biniti Adán que la? gupa xidé bidii Jesús guendanabani perfectu stiʼ casi sacrificiu. Biaʼ tiempu guyuu Jesús lu Guidxilayú riʼ «qué nucheebe ne qué nusiguiibe» (1 Ped. 2:22). Cumu perfectu laabe dxi gútibe la? nga runi biaʼca risaca guendanabani stibe ne guendanabani stiʼ Adán (1 Cor. 15:45; 1 Tim. 2:6).

7. Bizeeteʼ chupa chonna prueba ni bidxaagalú Jesús.

⁷ Dxi guyuu Jesús lu Guidxilayú riʼ qué nusaana de nuzuubaʼ stiidxaʼ Bixhoze ni nuu guibáʼ. Dxi nahuiinibe, gupa xidé bizuubabe stiidxa bixhózebe ne jñaabe neca nácacaʼ biʼniʼ ruchee ne laabe nácabe perfectu (Lucas 2:51). Dxi jma maʼ jovenhuiiniʼ laabe, zándaca bicaanabe ca ni gucalaʼdxiʼ nucaa laabe cadi nuzuubabe stiidxa bixhózebe ne jñaabe o nusaana de ñacabe fiel Jehová. Ne dxi maʼ huaniisibe, bidxiilube Binidxabaʼ, laa gudixhe prueba nezalube para gucaa laabe gucheenebe Jehová (Mat. 4:​1-11). Gudixhe ique Binidxabaʼ guni intiica si para gucaa Jesús gucheené Dios ti cadi quixe rescate que.

8. ¿Xi xcaadxi prueba bidxaagalú Jesús?

⁸ Laaca bidxaagalú Jesús xcaadxi prueba biaʼ tiempu biʼniʼ xhiiñaʼ Jehová lu Guidxilayú riʼ. ¿Casi xi laa yaʼ? Casi dxi guzananda ca enemigu stibe laabe ne guniʼcaʼ zuuticaʼ laabe (Luc. 4:​28, 29; 13:31). Gúpabe paciencia ca discípulo stibe purtiʼ nácacaʼ binni ruchee (Mar. 9:​33, 34). Lu juiciu ni bíʼnicabe para guuticabe laabe, guizáʼ bininácabe laabe ne biʼniʼ burlácabe laabe. Despué biiticabe laabe casi ti binni qué iquiiñeʼ ne guizáʼ gucanabe (Heb. 12:​1-3). Ne ora mayaca gátibe, maʼ qué ñapa diʼ Jehová laabe, ngue runi gupa xidé biʼniʼ huantarbe stúbibe dede ra gútibe (Mat. 27:46). b

9. ¿Xi runi sentirnu ora riníʼ íquenu sacrificiu ni biʼniʼ Jesús pur laanu? (1 Pedro 1:8).

 ⁹ Rihuinni dxíchica nabé naroʼbaʼ nga ni gudixe Jesús para bilá laanu. Ora riníʼ íquenu guiráʼ sacrificiu ni biʼniʼ Jesús pur laanu, rannaxhiinu laabe jma dede ridxá tipa ladxidoʼno (biindaʼ 1 Pedro 1:8).

10. ¿Xi sacrificiu biʼniʼ Jehová para gulá laanu?

¹⁰ ¿Xi sacrificiu biʼniʼ Jehová para gunda gudixe Jesús rescate que? Casi nánnanu, nabé naroʼbaʼ guendarannaxhii ni nuu entre Jehová ne Xiiñiʼ (Prov. 8:30). Nga runi, guiníʼ íquenu ximodo biʼniʼ sentir Jehová ora biʼyaʼ guiráʼ prueba ni gudiʼdiʼ Jesús lu Guidxilayú riʼ. Nabé biuubaʼ ladxidoʼbe ora bíʼyabe modo gudíñecabe Xiiñibe, modo bíʼnicabe despreciu laa ne modo bininácabe laa.

11. ¿Xi ejemplu racané laanu guiénenu ximodo biʼniʼ sentir Jehová dxi biiticabe Jesús?

¹¹ Ca ni maʼ guti ti xiiñiʼ nánnacaʼ pabiáʼ naroʼbaʼ yuubaʼ redané ni. Neca nanna dxíchinu ziasa ca binni ni maʼ guti, peru qué ribee diʼ nga yuubaʼ ni runi sentirnu ora gatiʼ tuuxa ni nadxiinu. Racané ejemplu riʼ laanu gánnanu ximodo biʼniʼ sentir Jehová lu iza 33 dxi bíʼyabe modo cayacaná Xiiñibe ni nadxiibe dede ra guti (Mat. 3:17). c

12. ¿Xi zanda gúninu ante guedandá dxi guietenaláʼdxinu guendaguti stiʼ Cristu?

¹² Ante ganda dxi guietenaláʼdxinu guendaguti stiʼ Cristu, galán gúniluʼ stipa gúʼndaluʼ jma de rescate lu estudiu personal stiluʼ o lu adoración en familia. Biquiiñeʼ Ca tema ni huabee ca testigu stiʼ Jiobá ne xcaadxi publicación para gánnaluʼ jma de tema riʼ. d Yenanda biaʼ ra nexheʼ guiuundaʼ Biblia para Conmemoración ni zeeda lu Ni chigaca lu reunión Xhiiñaʼ Dios ne modo nabáninu. Ne cadi guiaandaʼ lii gúʼyaluʼ adoración matutina para dxi chigaca Conmemoración. Pa cuʼnu listu ladxidoʼno para dxi ca zanda gacanenu xcaadxi para cueenducaʼ ni galán (Esd. 7:10).

GACANENU XCAADXI CUEENDUCAʼ NI GALÁN DXI RIETENALÁʼDXINU GUENDAGUTI STIʼ CRISTU

13. ¿Xii nga ni naquiiñeʼ gúninu primé para gacanenu xcaadxi cueenducaʼ ni galán dxi rietenaláʼdxinu guendaguti stiʼ Cristu?

¹³ ¿Ximodo zanda gacanenu xcaadxi cueenducaʼ ni galán dxi rietenaláʼdxinu guendaguti stiʼ Cristu yaʼ? Primé, naquiiñeʼ guni invitarnu laacabe, galán guni invitarnu binni lu predicación, peru laaca galán gúninu ti lista  ra gucaʼnu lá ca binni ni ñuuláʼdxinu ñé. Casi ca familia stinu, ca compañeru de dxiiñaʼ, ca compañeru ni rinenu scuela ne xcaadxi binni ni runibiaʼnu. Pa guirá invitación stinu, zanda guséʼndanu ti enlace stini ra nuu tuuxa. Zándaca dede zadxagayaanu ora guidúʼyanu guyé stale de ca binni ni biʼniʼ invitarnu (Ecl. 11:6).

14. Bizeeteʼ ti experiencia ni rusihuinni pabiáʼ risaca guni invitarnu tuuxa.

¹⁴ Qué chuʼ dxi guiníʼ íquenu qué risaca ti invitación. Guzéʼtenu ti ejemplu, ti dxi guizáʼ bidxagayaa ti hermana ora gudxi xheelabe ni cadi naca Testigu laabe ziné laabe dxi rietenaláʼdxinu guendaguti stiʼ Cristu. ¿Xiñee nabé bidxagayaabe yaʼ? Purtiʼ stale biaje gunábabe xheelabe chiné laabe, peru nin ti biaje qué ñé. Yanna, ¿xiñee maʼ nuu xheelabe cheʼ yaʼ? Gudxi xheelabe laabe ti ancianu ni maca runibiáʼ nga bidii laa ti invitación. Ne dede iza que qué huayaadxaʼ xheelabe dxi rietenaláʼdxinu guendaguti stiʼ Cristu ni raca guiráʼ iza.

15. ¿Xi cadi naquiiñeʼ guiaandaʼ laanu ora guni invitarnu tuuxa dxi rietenaláʼdxinu guendaguti stiʼ Cristu?

¹⁵ Cadi guiaandaʼ laanu, ora guni invitarnu tuuxa dxi rietenaláʼdxinu guendaguti stiʼ Cristu, zándaca nápabe xiixa duda, jmaruʼ si pa qué huayebe ca reunión stinu. Nga runi galán guiníʼ íquenu xi duda zándaca nápabe ne ximodo ñanda nicábinu laabe (Col. 4:6). Zándaca racaláʼdxibe gánnabe: «¿Xi rúnitu racá yaʼ? ¿Pabiáʼ rindaa ni? ¿Xi lari naquiiñeʼ chiniaʼ? ¿Naquiiñeʼ quixeʼ para chuaaʼ la? ¿Ñee rinábacabe bueltu la?». Nga runi, galán guinabadiidxanu invitadu stinu pa napa xiixa duda ne gusiénenu laa ni racalaʼdxiʼ ganna. Zanda iquiiñeluʼ ca videu Guietenaláʼdxinu guendaguti stiʼ Jesús ne Ximodo raca ca guendaridagulisaa stidu. Ne lu lección 28 stiʼ libru ¡Zanda guibániluʼ nayecheʼ! zeeda xcaadxi cosa ni zanda gusiéneluʼ laabe.

16. ¿Xi xcaadxi cosa zándaca guinabadiidxaʼ tuuxa ni cheʼ dxi rietenaláʼdxinu guendaguti stiʼ Cristu?

¹⁶ Despué de cheʼ binni ni biʼniʼ invitarnu dxi rietenaláʼdxinu guendaguti stiʼ Cristu, zándaca gápabe jma duda. Zándaca guinabadiidxabe xiñee guirutiʼ o casi guirutiʼ ñó pan ne ñeʼ vinu. Zándaca guinabadiidxabe panda biaje  raca reunirnu para guietenaláʼdxinu guendaguti stiʼ Cristu. Ne zándaca guinabadiidxabe pa zacá rúninu lu guiráʼ reunión stinu. Neca riete stale de ca cosa riʼ lu discursu ni rápanu dxi rietenaláʼdxinu guendaguti stiʼ Cristu, peru zándaca caquiiñeʼ gusiénenu binni ca xcaadxi cosa. Para guicábinu caadxi de ca pregunta ni gúnibe laanu, zanda iquíʼñenu artículo ni nuu lu jw.org ni láʼ «¿Xiñee maʼ gadxé runi ca testigu stiʼ Jehová Guendaroxhí stiʼ Señor que xcaadxi religión?». Racaláʼdxinu gúninu guiráʼ ni nuu lu nanu ante guedandá dxi guietenaláʼdxinu guendaguti stiʼ Cristu, ora maʼ cayaca ni ne despué de gaca ni ti ganda gacanenu «guiráʼ ca ni nachaʼhuiʼ ladxidóʼ» cueenducaʼ ni galán dxi nabé risaca riʼ (Hech. 13:48).

GACANENU CA HERMANU NI NUU INACTIVU

17. ¿Xi zanda guni ca ancianu para gacanecaʼ ca hermanu ni nuu inactivu? (Ezequiel 34:​12, 16).

¹⁷ ¿Ximodo zanda gacané ca ancianu ca hermanu ni nuu inactivu tiempu rietenaláʼdxinu guendaguti stiʼ Cristu yaʼ? Ra gusihuínnicabe rizaaláʼdxicabe ne nadxiicabe laacaʼ (biindaʼ Ezequiel 34:​12, 16). Ancianu caʼ, ante guedandá dxi guietenaláʼdxinu guendaguti stiʼ Cristu, laguyubi ne lagacané guiráʼ ca ni nuu inactivu. Lagabi laacaʼ rizaaláʼdxitu laacaʼ ne racaláʼdxitu gúnitu guiráʼ ni nuu lu natu para gacanetu laacaʼ. Laguni invitar laacabe Conmemoración ne pa chécabe la? laidxaagalú laacabe né stale cariñu. Despué de Conmemoración, cadi gusaana de chigánnatu ca hermanu ni nadxiinu riʼ ne lagacané laacabe para guibiguétacabe ra nuu Jehová (1 Ped. 2:25).

18. ¿Ximodo zanda gacanenu ca hermanu ni nuu inactivu? (Romanos 12:10).

¹⁸ Guiranu zanda gacanenu ca hermanu ni nuu inactivu ni cheʼ dxi rietenaláʼdxinu guendaguti stiʼ Cristu. ¿Ximodo yaʼ? Ra guni tratarnu laacabe né cariñu, gácanu nachaʼhuiʼ ne guni respetarnu laacabe (biindaʼ Romanos 12:10). Cadi guiaandaʼ laanu, zándaca raca nagana para ca dendxuhuiiniʼ stiʼ Jehová riʼ checaʼ reunión stiʼ biaje. Zándaca riuucabe xizaa ximodo guidxaagalú ca hermanu  laacabe. e Nga runi, cadi galán gúninu pregunta ni gucaa laacabe guni sentírcabe mal o guininu xiixa ni gusituí lúcabe (1 Tes. 5:11). Nacarúcabe ca hermanu stinu, nadxiirunu laacabe ne riéchenu guni adorárnenu laacabe Jehová juntu (Sal. 119:176; Hech. 20:35).

19. ¿Xi ribeendunu ora riuunu dxi rietenaláʼdxinu guendaguti stiʼ Cristu?

¹⁹ Pur guiráʼ ni maʼ bizíʼdinu riʼ, qué ridxagayaanu gánnanu xiñee biʼniʼ mandar Jesús guietenaláʼdxinu guendaguti stiʼ guiráʼ iza. Stale nga ni ribeendunu ne zaqueca xcaadxi binni ora rúninu ni (Is. 48:​17, 18). Racané ni laanu gannaxhiinu Jehová ne Jesús jma. Naca ni ti dxi para gusihuínninu pabiáʼ rúdinu xquixe peʼ laacabe pur ni bíʼnicabe pur laanu. Riuʼnu jma gaxha de ca hermanu ne randa racanenu xcaadxi binni gánnacaʼ xi caquiiñeʼ gúnicaʼ para guicaacaʼ ca ndaayaʼ ni redané rescate ca. Nga runi, gúninu stipa pur chuʼnu listu ti ganda chuunu dxi rietenaláʼdxinu guendaguti stiʼ Cristu, dxi maʼ risaca stiʼ cada iza.