1. ¿Ximodo riníʼ íqueluʼ naca Jehová?

 ORA runi orarluʼ Jehová, ¿ñee huaníʼ íqueluʼ ximodo laabe la? Neca qué zanda guidúʼyanu Jehová, Biblia racané laanu gánnanu ximodo laabe. Riete nácabe casi «gubidxa ne escudu», ne casi «ti bele ni runitilú» (Sal. 84:11; Heb. 12:29). Lu ti visión biiyaʼ profeta Ezequiel naca Jehová casi ti guié zafiro, casi ti guiibaʼ ni guizáʼ ruzaaniʼ ne casi xtuxhu ti arcoíris (Ezeq. 1:​26-28). Ridxagayaanu ora guiníʼ íquenu naca Jehová zacá ne zándaca dede biaʼritiʼ runi sentirnu.

2. ¿Xiñee nuu tu laa raca nagana para laa chuʼ gaxha de Dios?

² Cumu qué ridúʼyanu Jehová la? zándaca gaca nagana para laanu guni crenu nadxiibe laanu. Zándaca gaca nagana para tuuxa guni cré nadxii Jehová laa pur modo bibani o purtiʼ qué ñannaxhii bixhoze laa. Peru galán nga riene Jehová laanu, nánnabe xi runi sentirnu ne nánnabe xiñee raca nagana para laanu chuʼnu gaxha de laabe. Para gánnanu pabiáʼ nadxiibe laanu la? rábibe laanu lu Stiidxabe de ca cualidad nabé sicarú nápabe.

3. ¿Xiñee zazíʼdinu jma de Jehová ne de guendarannaxhii stibe?

³ Ti diidxaʼ ni jma racané laanu gánnanu ximodo naca Jehová nga guendarannaxhii (1 Juan 4:8). Rusihuinni cualidad riʼ ximodo peʼ naca Jehová; guiráʼ ni rúnibe, rúnibe ca ni purtiʼ nadxiibe laanu. Nabé nadxiibe binni dede né ca ni cadi nadxii laabe (Mat. 5:​44, 45). Lu artículo riʼ zazíʼdinu jma de Jehová ne de guendarannaxhii stibe. Ra jma gunibiaʼnu laabe, jma zannaxhiinu laabe.

 GUIZÁʼ NADXII JEHOVÁ LAANU

4. ¿Ximodo runi sentirluʼ ra gánnaluʼ guizáʼ nadxii Jehová laanu? (Biiyaʼ imagen ca).

⁴ «Nánnatu pabiáʼ nadxii Jehová binni» (Sant. 5:11). Biblia ná zeeda gácabe casi ti gunaa ni rusihuinni nadxii xiiñiʼ (Is. 66:​12, 13). Guníʼ ique ti gunaa ni ruaʼ xiiñiʼ né stale cariñu ne riniʼné laabe né diidxaʼ naxhi ne nadóʼ. Ne ora gúʼyabe cayuunaʼ xiiñihuiinibe o gucaná paxaraa laa la? nagueendaca ruuyabe xi cayaca. Zaqueca nga Jehová, qué zusaana laanu ora nuunu triste. Ngue runi hombre bicaa Salmo que guníʼ: «Ora jma peʼ nuaaʼ xizaa, lii gudixhedxiluʼ ladxiduáʼ ne gucaneluʼ naa guneʼ sentir galán» (Sal. 94:19).

5. Para lii, ¿ximodo nga rannaxhii Jehová binni?

⁵ Naca Jehová ti Dios leal (Sal. 103:8). Qué rusaana de gannaxhiibe laanu neca gucheʼnu. Stale biaje bininá ca israelita que ladxidóʼ Jehová, peru ora gaca arrepentircaʼ rusihuínnibe nadxiirube laacaʼ. Ti biaje gúdxibe xquídxibe: «Beeda gácaluʼ sicarú para naa, risácaluʼ para naa ne nadxieeʼ lii» (Is. 43:​4, 5). Ne qué huachaa diʼ Jehová. Zanda chuʼnu seguru laaca nadxiibe laanu zacá. Ne neca guni cometernu ti pecadu grave, qué zusaanabe laanu. Pa gaca arrepentirnu ne guyúbinu laabe, qué zusaana de gannaxhiibe laanu. Purtiʼ Jehová cayabi laanu «zutiidilaʼdxiʼ guiráʼ donda» stinu (Is. 55:7). Biblia ruzeeteʼ ora runi perdonar Jehová laanu, redané «tiempu para gatadxí» ladxidoʼno (Hech. 3:19).

6. ¿Xi rizíʼdinu lu Zacarías 2:8 de Jehová?

⁶ (Biindaʼ Zacarías 2:8). Ruchaaga Jehová laanu casi guié bizalú. Nabé nadá lú binni ne nácani ti órganu nabé risaca lu cuerpu stinu. Nga runi, casi ñaca niníʼ Jehová: «Ora cayuniná tuuxa laatu, cayuniná xiixa nabé risaca para naa». Cumu nadxii Jehová laanu la? laaca runi sentirbe ni runi sentirnu ne racaláʼdxibe gápabe laanu. Ne ora racananu, laaca racanabe. Nga runi zanda gábinu laabe: «Gupa naa cásica rápaluʼ guié luluʼ» (Sal. 17:8).

7. ¿Xiñee naquiiñeʼ chuʼnu seguru nadxii Jehová laanu?

⁷ Racalaʼdxiʼ Jehová chuʼluʼ seguru nadxiibe lii. Dxandíʼ, nánnabe zándaca raca nagana para lii guni creluʼ nadxiibe lii pur xiixa ni bizaacaluʼ o pur xiixa guendanagana ni cadíʼdiluʼ. Nga runi risaca chuʼluʼ seguru nadxiibe lii.  ¿Xi zanda gacané lii chuʼluʼ seguru yaʼ? Ni zanda gacané lii nga gúʼyaluʼ ximodo nadxii Jehová Jesús, ca ungidu ne laanu. Ne nga nga ni chiguizíʼdinu yanna.

RUSIHUINNI JEHOVÁ GUENDARANNAXHII

8. ¿Xiñee guyuu Jesús seguru nadxii Bixhoze laa?

⁸ Stale peʼ iza nga maʼ ziné Jehová ne Xiiñiʼ, ni nadxii, de nuucaʼ juntu. Nga runi nuucabe tobi si ne guizáʼ nadxiicabe. Cariñu ni nápacabe nga ni jma xadxí nuu lu guidubi naca universu. Lu Mateo 17:​5, Jehová peʼ guníʼ nadxii Jesús. Qué niníʼ si Jehová «Ndiʼ nga ni rusiecheʼ naa», sínuque, cumu racaláʼdxibe gánnanu pabiáʼ nadxiibe Jesús ne riechenebe laa pur ni cayuni ne ni chiguni, guniʼbe: «Ndiʼ nga Xiiñeʼ ni nadxieeʼ» (Efes. 1:7). Gunna dxiichiʼ Jesús xi runi sentir Jehová pur laa. Guyuube seguru nadxii Bixhózebe laabe, ngue runi bizeetebe ni stale biaje (Juan 3:35; 10:17; 17:24).

9. ¿Xi diidxaʼ rusihuinni pabiáʼ nadxii Jehová ca ungidu? (Romanos 5:5).

⁹ Laaca rusihuinni Jehová nadxii ca ungidu (biindaʼ Romanos 5:5). Ti diccionariu ni ruzeeteʼ de Biblia ná, diidxaʼ «ruchátipa» zeeda gácani casi ti guiiguʼ ni zeeda luguianu. ¡Guizáʼ galán ejemplu riʼ para guininu pabiáʼ nadxii Jehová ca ungidu! Ne laacaʼ nánnacaʼ nadxii Dios laacaʼ (Jud. 1). Guirácabe runi sentírcabe para laacabe ca diidxaʼ ni bicaa apóstol Juan ra guníʼ: «¡Laguuyaʼ pabiáʼ nadxii Bixhózenu laanu, dede rábicabe laanu xiiñiʼ Dios!» (1 Juan 3:1). ¿Ñee ca ungidu si nga nadxii Jehová la? Coʼ, casi chiguidúʼyanu, maʼ bisihuínnibe nadxiibe guiráʼ ca xpínnibe.

10. ¿Gunáʼ nga prueba jma risaca ni rusihuinni nadxii Jehová laanu?

¹⁰ ¿Gunáʼ nga prueba jma risaca ni rusihuinni nadxii Jehová laanu yaʼ? Laani nga rescate. Ndiʼ rusihuinni guirútiruʼ nadxii laanu jma que laabe (Juan 3:16; Rom. 5:8). Bidii Jehová laanu Xiiñiʼ, ni nadxii, ne bidiibe lugar gatiʼ pur guiranu para ganda gaca perdonar ca pecadu stinu ne gaca xhamígunu laabe (1 Juan 4:10). Ra jma guiníʼ íquenu pabiáʼ gudixe Jehová ne Jesús pur laanu, jma ziénenu pabiáʼ nadxiicabe cada tobi de laanu (Gál. 2:20). Qué niguixe diʼ Jehová ni purtiʼ nga nga ni ná ley, sínuque bíʼnibe ni purtiʼ nadxiibe laanu. Bisihuínnibe guendarannaxhii ni nápabe laanu ra bidiibe Xiiñibe, ni jma nadxiibe, casi sacrificiu ne bidiibe lugar gacaná ne gati pur laanu.

11. ¿Xi rusiidiʼ ni ná Jeremías 31:3 laanu?

¹¹ Casi maʼ bidúʼyanu, cadi nadxii si Jehová laanu, sínuque rusihuínnibe ni (biindaʼ Jeremías 31:3). Bichíñabe laanu ra nuube purtiʼ nadxiibe laanu (bichaaga ni né Deuteronomio 7:​7, 8). Gastiʼ ne guirutiʼ zanda guxheleʼ laanu de guendarannaxhii ni napa Dios laanu (Rom. 8:​38, 39). ¿Xi runi sentirluʼ ra guiníʼ íqueluʼ pabiáʼ nadxii Dios lii? Ora guidúʼndanu Salmo 23, guidúʼyanu ximodo gucané guendarannaxhii ni napa Jehová David ne ximodo zanda gacané ni laanu.

¿XI RUNI SENTIRLUʼ ORA GUINÍʼ ÍQUELUʼ PABIÁʼ NADXII JEHOVÁ LII?

12. ¿Xidé caníʼ Salmo 23?

¹² (Biindaʼ Salmo 23:​1-6). Lu Salmo 23, guníʼ David nadxii Jehová laa ne rapa laa né stale cariñu. Ne guni David naca Jehová Pastor stiʼ, ne bisiene pabiáʼ xhamigu laabe. Qué nidxibi David purtiʼ nanna cayuni dirigir Jehová laa. Ne siempre biyúbibe gacané Jehová laabe. Nanna David qué zusaana Jehová laa, ne qué zusaana de gannaxhii laabe biaʼ dxi guibánibe. Guidúʼyanu xi bicaa laabe gápabe stale confianza Dios.

13. ¿Xiñee gunna dxichi David cayapa Jehová laa?

 ¹³ «Gastiʼ qué ziaadxaʼ naa». Biʼniʼ sentir David qué nusaana de ñapa Jehová laa ne siempre bidii laabe ni caquiiñebe. Nánnabe naca Jehová xhamígube ne riuulaʼdxiʼ ni rúnibe. Ngue runi guyuu David seguru zacané Jehová laabe cadi guiaadxaʼ laabe gastiʼ, gápabe ni caquiiñebe intiica si guizaaca. Cumu gupa David confianza nadxii Jehová laa la? gucané ni laabe cadi chuʼbe xizaa, sínuque chuʼbe nayecheʼ (Sal. 16:11).

14. ¿Ximodo rusihuinni Jehová napa cariñu laanu?

¹⁴ Rapa Jehová laanu né stale cariñu, jmaruʼ si ora cadídinu lu guendanagana. Guidúʼyanu ni bizaaca Claire, a maʼ ziné jma de 20 iza de nuu Betel. Laabe guniʼbe qué nidxélabe xi ñúnibe ora deche ca deche bidxaagalú familia stibe guendanagana: gupa bixhózebe ti derrame cerebral, guca expulsar ti béndabe, biaana familia stibe sin bueltu, ngue runi bieeguʼ negocio ni nápacabe ne biaanané bancu lídxicabe. ¿Ximodo bisihuinni Jehová cayapa laacabe yaʼ? Claire guníʼ: «Guiráʼ dxi bidii Jehová ni caquiiñeʼ familia stinneʼ. Biiyaʼ bidii Jehová laacabe jma de biaʼ ni caquiiñecabe. Qué ziuu dxi gusiaandaʼ guiráʼ modo maʼ bisihuinni Jehová nadxii naa, ne siempre rietenalaʼdxeʼ de laani. Ndiʼ racané naa guneʼ ni ná Jehová né guendanayecheʼ neca cadideʼ lu guendanagana».

15. ¿Ximodo bibiguetaʼ stipa stiʼ David? (Biiyaʼ imagen ca).

¹⁵ «Rudxiguétabe stipa stinneʼ». Pur guiráʼ guendanagana ni cadiʼdiʼ David guyuu biaje biʼniʼ sentir maʼ qué guidxela xi guni (Sal. 18:​4-6). Peru bibiguetaʼ stipa stibe ora bíʼyabe  nadxii ne cayapa Jehová laabe. Biʼniʼ sentirbe yené xhamígube Jehová laabe «lu layú ra nuu guixi nagáʼ» ne lugar ra zanda guiziiláʼdxibe ra daʼ ziáʼ nisa. Nga gucané laabe guibiguetaʼ stipa stibe ne gúnibe ni ná Jehová né guendanayecheʼ (Sal. 18:​28-32).

16. Bisiene ximodo huayuni sentirluʼ maʼ bidxiguetaʼ Jehová stipa stiluʼ.

¹⁶ Ora cadídinu lu guendanagana, laanu laaca zanda guininu: «Pur qué rusaana Jehová de gannaxhii qué huanitilunu» (Lam. 3:22; Col. 1:11). Guidúʼyanu ni bizaaca Rachel. Guizáʼ biuubaʼ ladxidoʼbe dxi bisaana xheelabe laabe ne bixeleʼ de Jehová lu pandemia stiʼ COVID-19. ¿Xi biʼniʼ Jehová para gucané laabe yaʼ? Laabe guniʼbe: «Gucané Jehová naa gudieeʼ cuenta nuu tu nadxii naa, bidiibe naa stale xhamiguaʼ ni guyuu gaxha de naa, redasaanacaʼ ni gahuaʼ, ruseendacaʼ caadxi mensaje sicarú ra nuaaʼ ne rucaacaʼ caadxi textu ni riguu gana naa, ruxidxinecaʼ naa ne rusietenaláʼdxicaʼ naa cayapa Jehová naa. Guiráʼ dxi rudieeʼ xquixe peʼ Jehová purtiʼ bidii naa ti familia naroʼbaʼne ni nadxii naa».

17. ¿Xiñee gunda guníʼ David: «Qué zadxibeʼ gastiʼ»?

¹⁷ «Qué zadxibeʼ gastiʼ, purtiʼ lii nuuneluʼ naa». Gupa David stale enemigu ni qué iquiiñeʼ ne stale biaje guyuu xquendanabánibe lu peligru. Peru biʼniʼ sentirbe qué zazaacabe gastiʼ purtiʼ nánnabe nadxii ne cayapa Jehová laabe, biʼniʼ sentirbe nuu Jehová gaxha de laabe. Nga runi ora bíʼndabe guniʼbe ca diidxaʼ riʼ: «Bilabe naa de guiráʼ ni ruchibi naa» (Sal. 34:4). Neca guyuu biaje nabé bidxibi David, peru gunda bidxiilube ca guendanagana stibe purtiʼ nánnabe nadxii Jehová laabe.

18. Ra gánnanu nadxii Jehová laanu, ¿ximodo racané ni laanu ora cadídinu lu guendanagana ni ruchibi laanu?

¹⁸ Ora ridídinu lu guendanagana ni ruchibi laanu, ¿ximodo racané ni laanu gánnanu nadxii Jehová laanu? Ti precursora láʼ Susi bisiene ximodo biʼniʼ sentir, laa ne xheelaʼ, dxi biiti xiiñiʼ laca laa, laabe guniʼbe: «Ora guizaaca xiixa cosa feu, nabé runiná ni lii, runi sentirluʼ qué zanda gúniluʼ gastiʼ ne dede riníʼ íqueluʼ zanda guizaacaluʼ xiixa cosa jma feu. Peru cumu nánnadu nadxii Jehová laadu la? nga racané laadu chuʼdu seguru cayápabe laadu». Raquel, hermana ni bizéʼtenu lu párrafo 16 que, guníʼ: «Ti gueelaʼ bineʼ sentir guizáʼ nuaaʼ triste ne cadxibeʼ, ne guníʼ iqueʼ maʼ qué zanda naa, cayuunaʼ bineʼ orar Jehová ne naná cacaalaʼdxeʼ. Oraqueca bineʼ  sentir casi ñaca niguu Jehová naa ndaaniʼ náʼ para quixhedxí ladxiduáʼ, cásica runi ti gunaa né baʼduhuiiniʼ stiʼ. Ne despué maʼ gunda guseʼ. Qué ziuu dxi gusiaandaʼ ni bizaaca que». Ti ancianu láʼ Tasos guyuu ndaaniʼ cárcel tapa iza purtiʼ qué niná ñuu lu ejércitu. Guniʼbe né stale cariñu gupa Jehová laabe. Sicaríʼ bizeetebe: «Bidiibe naa jma de biaʼ ni caquiiñeʼ ne ngue gucané naa gapaʼ jma confianza laabe. Laaca bidiibe naa espíritu stibe para chuaaʼ nayecheʼ neca nuaaʼ ndaaniʼ ti lugar nabé feu. Ndiʼ gucané naa gudieeʼ cuenta, ra jma gapaʼ confianza laabe, jma zuneʼ sentir nadxiibe naa. Ngue runi neca nuaaʼ ndaaniʼ cárcel gucaʼ precursor regular».

GUIDXÍÑANU GAXHA DE DIOS NI NADXII LAANU

19. a) ¿Ximodo zúninu ca oración stinu ra gánnanu nadxii Jehová laanu? b) ¿Xi textu ni caníʼ de guendarannaxhii stiʼ Jehová jma riuuláʼdxiluʼ? (Biiyaʼ cuadru ni láʼ « Ca versículo ni racané laanu gúʼyanu pabiáʼ napa Jehová cariñu laanu»).

¹⁹ Rusihuinni ca experiencia ni maʼ bizéʼtenu ca Jehová nga «Dios ni rannaxhii» (2 Cor. 13:11). Rizaaláʼdxibe cada tobi de laanu. Ne nánnanu «qué rusaana de gannaxhiibe» laanu (Sal. 32:10). Ora qué rusaana de guiníʼ íquenu ximodo rusihuínnibe nadxiibe laanu, jma ridúʼyanu laabe casi ti binni ne runi sentirnu nuunu jma gaxha de laabe. Nga runi zanda guni orarnu laabe ne guxhélenu ladxidoʼno nezalube para gábinu laabe caquíʼñenu gannaxhiibe laanu. Zanda gábinu laabe guiráʼ ni riguu xizaa laanu ne chuʼnu seguru riénebe laanu ne racaláʼdxibe gacanebe laanu (Sal. 145:​18, 19).

20. ¿Xiñee riuʼnu gaxha de Jehová ora gánnanu nadxii laanu?

²⁰ Zeeda gaca guendarannaxhii stiʼ Jehová casi ti guí ni ruchaa binni ora nananda. Racaláʼdxinu chuʼnu gaxha de Jehová. Nabé napa guendarannaxhii stibe stipa, peru guizáʼ galán modo rusihuínnibe ni. ¡Riéchenu stale purtiʼ guizáʼ nadxii Jehová laanu! Guiranu racaláʼdxinu guininu: «Nadxieeʼ Jehová» (Sal. 116:1).