DIIDXAʼ griegu ni biquiiñecabe para guni traducírcabe «carru» lu Traducción del Nuevo Mundo zanda guiniʼni gadxé gadxé tipo carru (Hech. 8:​28, 29, 38). Zándaca cadi naca carru ni ziné etíope que ti carru ni rinécabe lu guerra o de carrera, sínuque naca ni ti carru jma naroʼbaʼ. ¿Ximodo nánnanu ni yaʼ? Guidúʼyanu chupa chonna razón.

Naca etíope riʼ ti hombre nabé risaca ne guizáʼ zitu biʼniʼ viajar. Nácabe «ti hombre ni napa autoridad lu gobiernu stiʼ Candace, reina de Etiopía, ne laabe nga rápabe ca tesoro stiʼ reina que» (Hech. 8:27). Tiempu que la? guidxi Etiopía rugaanda ni dede ra nuu ni runibiaʼnu yanna casi guidxi Sudán hasta ladu gueteʼ de guidxi Egipto. Zándaca cadi lu ngueca carru nga biʼniʼ viajar etíope que purtiʼ nabé zitu viaje que ne caquiiñeʼ chinebe stale cosa. Lu primé siglu que gadxé gadxé tipu carru biquiiñecabe para guni viajar binni. Ne tobi de laacani nga ca carru ni napa tapa rueda ne ni dxiʼ ique. Ti libru ni rusiene ni zeeda lu Biblia ná: «Lu ca tipu carru riʼ zanda guni viajarcabe jma galán, chinécabe stale cosa ne zándaca jma zitu dede ra rindá ca ni» (Acts—An Exegetical Commentary).

Cayuundaʼ etíope que ora bidxiña Felipe ra nuu. Biblia ná: «Bixooñeʼ Felipe ne ora bidxiña binadiaga cayuundabe en voz alta ni bicaa profeta Isaías» (Hech. 8:30). Cumu guca ca tipu carru ra zeʼ etíope que para sácani chaahuiʼ la? ngue runi qué ñaca nagana para laa guʼndaʼ ne Felipe gunda bigaanda laabe ra ziguxooñeʼ.

Gunabaʼ etíope que Felipe «quibaʼ ne cuiné laabe» (Hech. 8:31). Ca ni rusá carru de carrera que la? ruzuhuaacaʼ. Peru ca carru ni riné binni de viaje la? napa stale lugar ngue runi gunda guriné Felipe eunuco que.

Pur ni riete lu Hechos capítulo 8 ne pur ca prueba ni ruzeeteʼ historia la? maʼ que rucaʼnu dibuju lu ca publicación stinu ra rihuinni dxiʼbaʼ etíope que ndaaniʼ ti carru ni rié lu guerra o ndaaniʼ ti carru de carrera, sínuque ndaaniʼ ti carru jma naroʼbaʼ.