1, 2. ¿Xi guendanagana zándaca guidxaagalunu casi xpinni Jehová?

 TI DXI sti dxi si zanda guizaacanu xiixa ni guchaa xquendanabáninu. Guidúʼyanu chupa chonna ejemplu. Ti dxi gudxi ti doctor ti hermanu láʼ Luis a napa ti tipu cáncer ni huaxiéʼ rihuinni ne maʼ xhupa xhonna beeu si nabani. Né gana cayuni Monika xhiiñaʼ Jehová né xheelaʼ, ni naca ancianu. Peru ti dxi gunna Monika maʼ ziné chupa chonna iza de cucheené xheelaʼ Jehová. Ti hermana soltera láʼ Olivia, gupa xidé bisaana lidxi purtiʼ zedadxiña ti huracán. Ora bibiguétabe biiyabe binidé huracán que lídxibe. Ti ratuhuiiniʼ si bichaa xquendanabani Luis, Monika ne Oliva. ¿Ñee huadxagaluluʼ tobi de ca guendanagana ca la?

² Laanu, ca xpinni Jehová, laaca ridxaagalunu guendanagana ne raca huaranu cásica guiráʼ binni. Ne cadi ngasi, laaca naquiiñeʼ guni huantarnu ora gucaalú o sanándacaʼ ca ni nanalaʼdxiʼ xquidxi Dios laanu. Dxandíʼ, qué rucueeza diʼ Jehová guizaacanu cosa malu, peru maʼ guniʼbe zacanebe laanu (Is. 41:10). Pa nuu Jehová gaxha de laanu zanda chuʼnu nayecheʼ, zanda guicaanu decisión jneza ne qué zaxélenu de laabe ora cadídinu lu guendanagana. Lu artículo riʼ zadúʼyanu tapa cosa ni runi Jehová para gacané laanu ora cayuniná xiixa laanu. Laaca zadúʼyanu xi zanda gúninu para cueendunu ni galán pur cayacané Jehová laanu.

ZAPA JEHOVÁ LAANU

3. ¿Xi zándaca gaca nagana para laanu ora nuu xiixa ni cayuniná laanu?

³ Pa cayuniná xiixa laanu, zándaca gaca nagana para laanu  guiníʼ ique chaahuinu ne guicaanu decisión jneza. ¿Xiñee yaʼ? Purtiʼ zándaca cayuubaʼ ladxidoʼno, nuunu triste, nuunu xizaa ne pur nga qué riníʼ íquenu jneza ne maʼ qué ridxélanu xi gúninu. Zacá nga biʼniʼ sentir guiropaʼ hermana ni bizéʼtenu lu primé párrafo que. Sicaríʼ guníʼ Olivia: «Ora binidé huracán que lidxeʼ, guizáʼ guyuaaʼ xizaa ne qué nidxelaʼ xi ñuneʼ». Ne Monika guníʼ xi biʼniʼ sentir dxi bicheené xheelaʼ laa: «Cadi lica cabezaʼ ñúnibe ngue naa, bineʼ sentir casi ora bidxígacabe ti gudxíu ndaaniʼ ladxiduáʼ. Qué lica ñanda ñuneʼ ca cosahuiiniʼ ni maʼ biaa guneʼ guiráʼ dxi. Qué lica niníʼ iqueʼ nizaacaʼ xiixa zacá». ¿Xi maʼ guníʼ Jehová zuni para gacané laanu ora tídinu ti guendanagana ni ruluíʼ qué zanda gudxíʼlunu yaʼ?

4. ¿Xi cayabi Jehová laanu zuni casi ná lu Filipenses 4:​6, 7?

⁴ Ni runi Jehová. Biblia cayabi laanu «zudii Dios laatu paz stiʼ» (biindaʼ Filipenses 4:​6, 7). Paz riʼ nga ora nexhedxí ladxidoʼno ne xquendabiaaninu purtiʼ naca Jehová xhamígunu. Nabé sicarú paz riʼ «dede guirutiʼ zanda guiene [o guiníʼ ique] ximodo ni». ¿Ñee huayúniluʼ ti oración de guidubi ladxidoʼloʼ ne despué dede bidxagayaaluʼ ora bidiiluʼ cuenta ximodo gutadxí ladxidoʼloʼ la? Pue nga nga «paz stiʼ» Dios.

5. ¿Ximodo rapa «paz stiʼ» Dios xquendabiaaninu ne ladxidoʼno?

⁵ Filipenses 4:7 ná: «Zudii Dios laatu paz stiʼ [ . . . ] ne zápani ladxidoʼto ne xquendabiaanitu». Diidxaʼ ni biquiiñecabe para «zápani» zeeda ni de ti diidxaʼ ni biquiiñecabe para guníʼcabe de ca soldadu ni rapa ti guidxi para cadi gucaalúcabe ni. Qué ridxibi ca binni que gásicaʼ purtiʼ nánnacaʼ cayapa ca soldadu que ca puertaʼ stiʼ guidxi que. Ngaca nga ni runi paz stiʼ Dios, rápani ladxidoʼno ne xquendabiaaninu, runi sentirnu seguru ne rápanu paz (Sal. 4:8). Ne neca qué gaca chaahuiʼ guendanagana ca nagueendaca la? zanda gatadxí ladxidoʼno cásica bizaaca Ana (1 Sam. 1:​16-18). Nga zacané laanu guiníʼ ique chaahuinu ne guicanu decisión jneza.

6. ¿Xi zanda gúninu para guni sentirnu nápanu paz stiʼ Dios?

⁶ Ni naquiiñeʼ gúninu. Cásica zanda guinabaʼ ti binni ni nabeza ndaaniʼ ti guidxi gapa ti soldadu laacaʼ la? zaqueca zanda guinábanu Jehová gapa laanu. Guni orarnu laabe dede ora maʼ guni sentirnu maʼ nápanu paz stibe (Luc. 11:9; 1 Tes. 5:17). Nga nga ni biʼniʼ Luis ne Ana, xheelaʼ, ora gúdxicabe laacaʼ maʼ xhupa xhonna beeu si nabani Luis. Laabe guniʼbe: «Guizáʼ nagana nga guicaaluʼ ti decisión de xi tratamientu guicaaluʼ ne xi gúniluʼ ora nápaluʼ ti guendahuará casi ni napaʼ riʼ. Peru  oración ca nga ni huayacané laadu gápadu paz ti ganda gudxíʼludu guendanagana riʼ». Guirópacabe guníʼcabe nabé biʼniʼ orárcabe Jehová de guidubi ladxidóʼcabe ne gunábacabe laa quixhedxí ladxidóʼcabe, gapa xquendabiaanicabe ne gudii laacabe guendabiaaniʼ para guicaacabe decisión jneza. Pa cadíʼdiluʼ lu ti guendanagana ni cayuniná lii, cadi gusaana de guni orarluʼ. Zuuyaluʼ ximodo zudii Jehová lii paz stiʼ, zapa ladxidoʼloʼ ne xquendabiaaniluʼ (Rom. 12:12).

ZACANÉ JEHOVÁ LII GUZUHUAALUʼ DXIICHIʼ

7. ¿Ximodo zándaca guni sentirnu pa cadídinu lu ti guendanagana ni guizáʼ cayuniná laanu?

⁷ Pa cadídinu lu ti guendanagana ni guizáʼ cayuniná laanu, zándaca gaca nagana para laanu guzuhuaʼnu dxiichiʼ ne zándaca zuchaʼnu modo riníʼ íquenu ne ni rúninu. Zándaca guni sentirluʼ nácaluʼ casi ti barcu ni nuu ndaaniʼ ti nisadóʼ ra nabé naroʼbaʼ cayasa ca ola ne cadxelasaa ca ni barcu ca deche ca deche. Ne nga peʼ nga ni bizaaca Ana dxi guti xheelaʼ, laa guníʼ:«Nuu biaje guizáʼ riuaaʼ triste ne riaʼyaʼ laca naa. Peru laaca riuu biaje ridxiicheʼ purtiʼ maʼ qué guinni Luis». Ne laaca bizeeteʼ Ana riuu dxi runi sentir stubi ne qué ridxela xi guni ora chiguicaa decisión ni gucuaa Luis dxiqué. Runi sentirbe casi ñaca nuube lu ti tormenta ni cayaca galaa nisadóʼ. Yanna, ¿ximodo racané Jehová laanu ora maʼ qué ganda laanu pur guiráʼ ni cayuni sentirnu yaʼ?

8. ¿Xi maʼ guníʼ Jehová zuni casi ná lu Isaías 33:6?

⁸ Ni runi Jehová. Ma guniʼbe zacanebe laanu guzuhuaʼnu dxiixhiʼ (biindaʼ Isaías 33:6). Ora ridxaagalú ti barcu ti tormenta runiibi dxacha ni laa cheríʼ chericaʼ. Para cadi guiniibi ni la? stale barcu napa estabilizador cada laadu ni ribiaa xagueteʼ nisa. Zacá maʼ qué raca sentir peʼ pa caniibi ni reciu ne ca ni zeʼ luni riuucaʼ jma seguru. Stale de ca estabilizador ca jma galán rúnicani dxiiñaʼ ora caniibi barcu ca. Zaqueca nga laanu, pa racaláʼdxinu gacané Jehová laanu guzuhuaʼnu dxiichiʼ neca nápanu guendanagana ni nabé cayuniná laanu la? cadi naquiiñeʼ guixélenu de laabe.

9. ¿Ximodo racané ca herramienta ni rudii xquidxi Jehová laanu para guzuhuaʼnu dxiichiʼ? (Biiyaʼ ca imagen ca).

⁹ Ni naquiiñeʼ gúninu. Pa cayuniná ca ni runi sentirnu laanu, casi xa ñaca ñuʼnuʼ ndaaniʼ ti tormenta la? galán gúninu stipa cadi gusaana de guni orarnu, cadi guiáʼdxanu reunión ne guni predicarnu. Dxandíʼ, zándaca maʼ qué zúninu biaʼ rúninu dxiqué, peru cadi guiaandaʼ laanu riene Jehová laanu (bichaaga ni né Lucas 21:​1-4). Cadi guiaandaʼ lii cueeluʼ tiempu para gápaluʼ estudiu personal stiluʼ ne para guiníʼ íqueluʼ ni bíʼndaluʼ. Riquiiñeʼ  Jehová organización stiʼ para gudii laanu artículo ne videu ni zanda gacané laanu guzuhuaʼnu dxiichiʼ ne gatadxí xquendabiaaninu. Para ganda guidxélanu ca ni la? zanda iquíʼñenu ca herramienta ni nápanu, casi JW Library^®, Índice de las publicaciones Watch Tower ne Ca tema ni huabee ca testigu stiʼ Jiobá. Monika, ni maca bizéʼtenu que guníʼ riquiiñeʼ ca herramienta riʼ ora runi sentir casi ñaca maʼ zeeda ti tormenta luguiáʼ pur ca cosa feu ni runi sentir. Ruyúbibe ca diidxaʼ ira, traición o lealtad lúcani, ne ruundabe información ca dede ora guni sentirbe galán. Laabe guniʼbe: «Dede capapa ladxiduáʼ ora ruzuluáʼ gucaaʼ ca diidxaʼ ca para guneʼ investigar, peru ora riluxeʼ la? ratadxí ladxiduáʼ, casi ñaca niguiidxi Jehová naa. Laga cayuundaʼ información ca rudieeʼ cuenta riene Jehová xi cayuneʼ sentir ne racané naa». Laaca zanda gacané Jehová lii guzuhuaaluʼ dxiichiʼ dede ora maʼ gatadxí xquendabiaaniluʼ ne ladxidoʼloʼ (Sal. 119:​143, 144).

ZANAAZE DXIICHIʼ JEHOVÁ LAANU

10. ¿Ximodo zándaca zuni sentirnu ora ridxaagalunu xiixa desgracia?

¹⁰ Ora ridxaagalunu ti desgracia, zándaca zuni sentirnu cayaadxaʼ stipa laanu ne cayuubaʼ ladxidoʼno. Zándaca guiníʼ íquenu gúcanu casi ti binni ni guizáʼ reciu ruxooñeʼ lu ti carrera, peru yanna maʼ chaahuiʼ ruxooñeʼ purtiʼ gucaná ñee. Zándaca gaca nagana para laanu gúninu xiixa ni dxiqué qué raca nagana para laanu gúninu o zándaca maʼ qué gápanu gana gúninu xiixa ni guizáʼ guyuuláʼdxinu gúninu. Ne cásica Elías, ni zándaca racaláʼdxinu nga gásinu ne cadi guiásanu (1 Rey. 19:​5-7). ¿Xi maʼ guníʼ Jehová zuni ora guiaadxaʼ stipa laanu yaʼ?

11. ¿Xiruʼ runi Jehová para gacané laanu? (Salmo 94:18).

¹¹ Ni runi Jehová. Cayuni prometerbe zanaazeʼ dxiichibe laanu (biindaʼ Salmo 94:18). Cásica caquiiñeʼ chuʼ tu gacané ti deportista ora racaná, zacaca nga laanu, zándaca caquíʼñenu tu gacané laanu para cadi gusaananu de gúninu ni ná Jehová. Ora guizaacanu ndiʼ, rábibe laanu: «Naa, Jehová Dios stiluʼ, naazeʼ dxiicheʼ naluʼ ladu derechu; naa nga cayabeʼ lii: “Cadi guidxíbiluʼ. Naa zacaniaʼ lii”» (Is. 41:13). Ora bidxaagalú rey David gadxé gadxé guendanagana ne ora bicaalú ca enemigu stiʼ laa, gunna dxiichiʼ nuuné Jehová laa, ngue runi gúdxibe Jehová: «Naze dxiichiluʼ naa né naluʼ ladu derechu» (Sal. 18:35). Peru, ¿ximodo rinaaze dxiichiʼ Jehová nanu yaʼ?

12. Pa cadi galán cayuni sentirnu, ¿tu zándaca iquiiñeʼ Jehová para gacané laanu?

 ¹² Stale biaje rinaaze dxiichiʼ Jehová laanu ra runiibibe ladxidóʼ xcaadxi binni para gacané laanu. Guzéʼtenu chupa ejemplu, casi dxi biaadxaʼ stipa David, guyé xhamígube Jonatán yeganna laabe para gudii laabe stipa ne cuʼ gana laabe (1 Sam. 23:​16, 17). Ne Elías la? biquiiñeʼ Jehová Eliseo para gacané laabe (1 Rey. 19:​16, 21; 2 Rey. 2:2). Ora cayaadxaʼ stipa laanu, zanda iquiiñeʼ Jehová familia stinu, ca xhamígunu o ca ancianu para gacanecaʼ laanu. Peru ni rizaaca nga ora cadi cayuni sentirnu galán, zándaca ni racaláʼdxisinu nga chuʼnu stúbinu. Ne gastiʼ naca guni sentirnu zacá. Yanna, ¿xi naquiiñeʼ gúninu para gacané Jehová laanu yaʼ?

13. ¿Xi naquiiñeʼ gúninu para gudiʼnu lugar gacané Jehová laanu? (Biiyaʼ ca imagen ca).

¹³ Ni naquiiñeʼ gúninu. Gúninu stipa cadi guixélenu de xcaadxi. Ora rixélenu de xcaadxi jma nga ricá íquenu modo nuunu ne ca guendanagana stinu. Ne pur nga zanda guicaanu decisión ni cadi jneza (Prov. 18:1). Dxandíʼ, guiranu nga caquiiñeʼ chuʼnu stúbinu gatigá, jmaruʼ si ora cadídinu lu xiixa guendanagana ni nabéʼ cayuniná laanu. Peru, pa guyúbinu chuʼnu stúbinu xadxí la? zándaca cucáʼnanu ni caquiiñeʼ Jehová para gacané laanu. Nga runi, neca nagana ra cadídinu, gudiʼnu lugar gacané familia stinu laanu, ca xhamígunu ne ca ancianu. Laacabe nga caquiiñeʼ Jehová para gacané laanu (Prov. 17:17; Is. 32:​1, 2).

ZAGUIXHEDXÍ JEHOVÁ LADXIDOʼNO

14. ¿Xi zanda guchibi laanu?

¹⁴ Zándaca ziuu ora zadxíbinu. Lu Biblia zeeda historia stiʼ caadxi xpinni Dios ni guníʼ guizáʼ bidxíbicaʼ pur ca xhenemígucaʼ ne pur ca guendanagana ni nabé bininá laacaʼ (Sal. 18:4; 55:​1, 5). Yanna, ¿laanu yaʼ? ¿Ñee cucaalú ca compañeru ni rinenu scuela o dxiiñaʼ laanu la? ¿Cucaalú ca familia stinu o ca ni runi xhiiñaʼ Gobiernu laanu la? ¿Ñee nápanu xiixa guendahuará malu ni zándaca guuti laanu la? Ora cadídinu lu tipu guendanagana ca nga zándaca guni sentirnu qué zanda laanu, cásica runi sentir ti xcuidihuiiniʼ. ¿Ximodo racané Jehová laanu yaʼ?

15. Casi riete lu Salmo 94:​19, ¿xi maʼ guni Jehová zuni?

¹⁵ Ni runi Jehová. Riguixhedxibe ladxidoʼno (biindaʼ Salmo 94:19). Guxuíʼlunu ti baʼdudxaapahuiiniʼ guizáʼ cadxibi ne qué ganda gasi purtiʼ cayaba nisaguié ne caxidxi rayu. Óraque reeda bixhózebe riguiidxi  laabe ne riguixhedxí ladxidoʼbe dede ra gásibe. Neca cayaba dxacha nisaguié que, peru maʼ cadi cadxíbibe purtiʼ nuube ndaaniʼ náʼ bixhózebe. Zacaca nga laanu ora guizáʼ cadxíbinu, zándaca ni caquíʼñenu nga guni sentirnu casi ñaca caguiidxi Jehová laanu dede ra chuʼnu jma galán. ¿Xi caquiiñeʼ gúninu para quixhedxí Jehová ladxidoʼno yaʼ?

16. ¿Xi naquiiñeʼ gúninu pa racaláʼdxinu quixhedxí Jehová ladxidoʼno?

¹⁶ Ni naquiiñeʼ gúninu. Nabé risaca gápanu costumbre guni orarnu Jehová ne guidúʼndanu Stiidxa, zacá casi xa ñaca ñuínenu laabe diidxaʼ (Sal. 77:​1, 12-14). Pa gúninu ni la? ora maʼ cadídinu lu ti guendanagana ni cayuniná laanu, jma nagueenda zuyúbinu Bixhózenu ni nuu guibáʼ para gacané laanu. Gábinu Jehová xii nga naguu xizaa laanu ne xi ruchibi laanu ne gudiʼnu lugar guicábibe laanu ne quixhedxibe ladxidoʼno ra iquiiñebe Stiidxabe (Sal. 119:28). Nuu caadxi libru stiʼ Biblia ni jma zanda cu gana laanu ora cadídinu lu xiixa guendanagana, casi: Job, Salmos ne Proverbios, ne ca diidxaʼ ni guníʼ Jesús lu Mateo capítulo 6. Pa guni orarluʼ Jehová ne gúʼndaluʼ Stiidxabe la? zuuyaluʼ ximodo zaguixhedxibe ladxidoʼloʼ.

17. ¿Xi cadi naquiiñeʼ guiaandaʼ laanu?

¹⁷ Cadi gusaana de gápanu confianza Jehová neca tídinu lu ca guendanagana ni jma guniná laanu, siempre zacané Jehová laanu. Qué ziuu dxi gusaanabe laanu stúbinu (Sal. 23:4; 94:14). Cadi guiaandaʼ laanu, maʼ guníʼ Jehová zapa laanu, zacanebe laanu guzuhuaʼnu dxiichiʼ, zanaazebe nanu ne zaguixhedxibe ladxidoʼno. Gudxi Isaías Jehová ca diidxaʼ riʼ: «Zápaluʼ ca ni napa confianza lii de guidubi ladxidóʼ. Qué ziuu dxi gusaana de gudiiluʼ paz laacaʼ, purtiʼ nápacaʼ confianza lii» (Is. 26:3). Nga runi, gupa confianza Jehová ne biʼniʼ aprovechar guiráʼ ni rúnibe para gacanebe lii. Ne pa gúniluʼ zacá, zápaluʼ stipa para guni huantarluʼ dede ca guendanagana ni jma guniná lii.