1. ¿Xii nga ni runi stale binni tiempu riʼ?

 ZÁNDACA huayuuyaluʼ ca dxi riʼ, stale binni jma nga rizaaláʼdxicaʼ laca laacaʼ que gúʼyacaʼ xi caquiiñeʼ xcaadxi. Nuu tu laa riquiiñeʼ ca red social ca para si gucaacaʼ binni guʼyaʼ xi cayúnicaʼ. Peru huaxiéʼ si binni nga ruyubi gusisaca Jehová. Lu artículo riʼ, zadúʼyanu xi riníʼ gusisácanu Jehová ne xi razón nápanu para gúninu ni. Laaca zazíʼdinu ximodo zanda gusisácanu Dios ne ximodo laapebe zusisácabe labe huidxe si.

¿XI RINÍʼ GUSISÁCANU JEHOVÁ?

 2. ¿Ximodo bisihuinni Jehová pabiáʼ risaca lu dani Sinaí que? (Laaca zanda gúʼyaluʼ imagen ca).

² Ora riete lu Biblia diidxaʼ gusisácacaʼ nuu biaje riniʼni de xiixa cosa ni runi tuuxa ni zándaca ridxagayaa stale binni. Despué de biree guidxi Israel de esclavu ndaaniʼ guidxi Egipto, guizáʼ bidxagayaacabe modo bisihuinni Jehová pabiáʼ risaca. Guiníʼ íquenu ni bizaaca raqué: zuhuaa stale israelita ñee dani Sinaí para gucaadiágacaʼ ni chitidxi Dios laacaʼ. Nuchii ti za nacahuidóʼ dani que. Guca ti xu roʼ ne bizulú biree guʼxhuʼ lu dani que, laaca caree biaaniʼ ne caxidxi rayu ne guizáʼ reciu caxidxi cachu (Éx. 19:​16-18; 24:17; Sal. 68:8). Guizáʼ bidxagayaa ca israelita que ora bíʼyacaʼ pabiáʼ risaca Jehová.

 3. ¿Xi riníʼ gusisácanu Jehová?

³ Yanna laanu yaʼ. ¿Ñee zanda gusisácanu Jehová la? Zanda pue. Ti modo zanda gusisácanu Jehová nga ra gábinu binni pabiáʼ poder nápabe ne ra guininu de ca cualidad  sicarú stibe. Sti modo zanda gúninu ni nga ra gudiʼnu xquixe peʼ laabe purtiʼ rudiibe laanu poder para gúninu guiráʼ ca cosa ca (Is. 26:12). Guizáʼ galán ejemplu bisaana rey David para laanu. Lu ti oración ni bíʼnibe nezalú guidubi guidxi que guniʼbe: «Jehová, stiluʼ nga guendanandxóʼ, poder, guendasicarú, guendarisaca, purtiʼ stiluʼ guiráʼ ni nuu guibáʼ ne lu guidxilayú». Ne ora biluxe biʼniʼ orarbe, guidubi guidxi que bisisaca Jehová (1 Crón. 29:​11, 20).

 4. ¿Ximodo bisisaca Jesús Jehová?

⁴ Dxi guyuu Jesús lu Guidxilayú riʼ, bisisácabe Bixhózebe de gadxé gadxé modo. Guzéʼtenu ti ejemplu, cada biaje gúnibe milagru rusiénebe rúnibe cani pur poder stiʼ Jehová (Mar. 5:​18-20). Laaca bisisácabe Dios pur modo guniʼbe ne pur modo biʼniʼ tratarbe xcaadxi binni. Ti dxi laga cusiidiʼ Jesús ndaaniʼ ti sinagoga, lade ca binni que nuu ti gunaa ni maʼ ziné 18 iza de huará pur ti demonio. Nabé maʼ bininá demonio que laabe, ne pur ngue natigu déchebe ne qué randa ruzuhuaabe derechu. ¡Guizáʼ feu, ¿njaʼ?! Ora biʼyaʼ Jesús pabiáʼ cayacaná gunaa que, guizáʼ biabe laa né stale cariñu gúdxibe laa: «Gunaa, maʼ bianda guendahuará stiluʼ». Ne gudixhenabe luguiáʼ ne oraqueca bizuhuaa derechu ne bisisaca Dios (Luc. 13:​10-13). Napa gunaa ni bianda que stale razón para gusisaca Jehová; ne laanu laaca nápanu ni.

¿XI RAZÓN NÁPANU PARA GUSISÁCANU JEHOVÁ?

 5. ¿Xi razón nápanu para guni respetarnu Jehová?

⁵ Rusisácanu Jehová purtiʼ runi respetarnu laabe de guidubi ladxidoʼno. Nápanu stale razón para guni respetarnu laabe. Jehová nga Dios ni jma napa poder ne qué rirá stipa stibe (Sal. 96:​4-7). Rihuinni dxíchica pabiáʼ nuu xpiaanibe pur guiráʼ ni maʼ bizaʼbe. Maʼ bidiibe laanu guendanabani ne guiráʼ ni caquíʼñenu para guibáninu (Apoc. 4:11). Nácabe leal (Apoc. 15:4). Jneza guiráʼ ni rúnibe ne siempre runi cumplirbe ca promesa stibe (Jos. 23:14). Nga runi, profeta Jeremías guníʼ: «Lade guiráʼ ca binni nuu xpiaaniʼ stiʼ guidxilayú ne lade ca reinu stini, gástiruʼ stobi casi lii» (Jer. 10:​6, 7). Rihuinni dxíchica nápanu stale razón para guni respetarnu Bixhózenu ni nuu guibáʼ. Peru cadi runi respetársinu laabe; sínuque laaca rúnibe xiixa para gannaxhiinu laabe.

 6. ¿Xiñee nadxiinu Jehová?

⁶ Rusisácanu Jehová purtiʼ nadxiinu laa de guidubi ladxidoʼno. Napa Jehová stale cualidad ni rucaa laanu gannaxhiinu laa. Guzéʼtenu ti ejemplu, nápabe misericordia ne riabe binni (Sal. 103:13; Is. 49:15). Ora racananu runi sentirbe ni cayuni sentirnu ne riuubaʼ ladxidoʼbe (Zac. 2:8). Racanebe laanu guidxíñanu laabe ne gaca xhamígunu laabe (Sal. 25:14; Hech. 17:27). Laaca nácabe humilde ne «ratagudaabe para gúʼyabe guibáʼ ne guidxilayú, para guindísabe binni ni naca humilde de ndaaniʼ yu dé» (Sal. 113:​6, 7). ¿Tu laa qué ñuulaʼdxiʼ nusisaca ti Dios ni naca sicaríʼ yaʼ? (Sal. 86:12).

 7. ¿Xi cosa nabé galán zanda gúninu?

⁷ Rusisácanu Jehová purtiʼ racaláʼdxinu gunibiáʼ xcaadxi binni laabe. Stale binni cadi jneza modo riníʼ ique naca Dios. ¿Xiñee yaʼ? Purtiʼ maʼ huaníʼ Binidxabaʼ stale cosa ni cadi dxandíʼ de laabe ne maʼ biseegube xquendabiaanicaʼ  (2 Cor. 4:4). Maʼ bicaabe binni guni cré naca Jehová ti Dios ni ruquixe ni rúnicabe laa, qué rizaalaʼdxiʼ binni ne laa nga napa donda pur guiráʼ ca cosa malu ni cayaca lu guidxilayú riʼ. Peru laanu nánnanu cadi zacá diʼ ni. Ne zanda gúninu ti cosa nabé galán: gacanenu binni ganna ni dxandíʼ de Dios stinu ne zacá gusisácanu laabe (Is. 43:10). Yanna, chiguidúʼyanu caadxi versículo ni zeeda lu Salmo 96, ra riete gusisácanu Jehová. Zacaneni laanu gánnanu ximodo gusisácanu Jehová.

¿XIMODO ZANDA GUSISÁCANU JEHOVÁ?

 8. ¿Gunáʼ nga ti modo zanda gusisácanu Jehová? (Salmo 96:​1-3).

⁸ (Biindaʼ Salmo 96:​1-3). Zanda gusisácanu Jehová pur ni guininu de laabe. Cayabi ca versículo riʼ ca xpinni Dios gúʼndacaʼ para Jehová, gusisácacaʼ labe, guiniʼcaʼ de ca noticia galán ni rulá ne gusisácacaʼ laabe lade ca guidxi ca. Naca guiráʼ ndiʼ modo zanda gusisácanu Bixhózenu ni nuu guibáʼ. Ca judíu ni bizuubaʼ stiidxaʼ Dios ne ca xpinni Cristu de primé siglu que, biyúbicaʼ modo guni defendercaʼ lá Jehová ne guiniʼcaʼ de ca cosa galán ni biʼniʼ Dios pur laacaʼ (Dan. 3:​16-18; Hech. 4:29). ¿Ximodo zanda chinándanu ejemplu stícabe yaʼ?

9, 10. ¿Xi rusiidiʼ ni bizaaca Angelina laanu? (Laaca zanda gúʼyaluʼ imagen ca).

⁹ Guidúʼyanu ni bizaaca ti hermana de Estados Unidos ni láʼ Angelina. a Gúcabe nadxibalú ne biʼniʼ defenderbe lá Jehová ra rúnibe dxiiñaʼ. Cumu deruʼ bizulube cayúnibe dxiiñaʼ raqué la? biʼniʼ invitárcabe ca ni nacubi checaʼ ti reunión para guiniʼcaʼ xiixa cosa de laacaʼ ti zacá gunibiáʼ ca compañeru stícabe laacabe. Laabe bíʼnibe ti videu para guluiʼbe pabiáʼ nayecheʼ runi sentirbe pur nácabe testigu stiʼ Jehová. Peru ante gaca caber laabe, gudiʼdiʼ ti compañeru stibe, ni biziidiʼ de Jehová dxi nahuiiniʼ peru qué ñaca testigu stiʼ Jehová, ne bizulú biʼniʼ búrlabe ca testigu pur ni runi crecaʼ. Angelina guníʼ: «Guizáʼ bipapa ladxiduáʼ. Ne guníʼ iqueʼ: “¿Ñee zudieeʼ lugar guiníʼcabe cosa ni cadi dxandíʼ de Jehová la? o zuneʼ defender laabe?”».

¹⁰ Ora biluxe guníʼ compañeru stibe  que, biʼniʼ Angelina ti oración nachucu ndaaniʼ ladxidóʼ. Ne despué, né diidxaʼ nadóʼ guníʼ: «Naa laaca bisiniisicabe naa casi testigu stiʼ Jehová, ne dede yanna nacaʼ Testigu». Neca nagana ni cazaaca riʼ, peru biyúbibe modo chuʼbe tranquila. Primé, biluiʼbe ca xcompañérube ca foto ra canebe ca xhamígube ne nayecheʼ cayúnicabe xhiiñaʼ Jehová, ne despué né respetu biʼniʼ defenderbe ni runi crebe (1 Ped. 3:15). Ora biluxe guníʼ Angelina, maʼ gadxé si modo guníʼ compañeru stibe que ne bizeeteʼ rietenalaʼdxiʼ caadxi cosa galán ni bizaaca dxi bisiniisicabe laa casi testigu stiʼ Jehová. Angelina guníʼ: «Naquiiñeʼ guni defendernu lá Jehová. ¡Nácani ti privilegiu!». Para laanu laaca ti privilegiu naroʼbaʼ nga gusisácanu Jehová dede ne ora chuʼ tu guiníʼ cosa ni cadi dxandíʼ de laabe.

11. ¿Ximodo rinanda ca xpinni Jehová ni ná Salmo 96:8?

¹¹ (Biindaʼ Salmo 96:8). Zanda gusisácanu Jehová né ca cosa risaca ni nápanu. Ca ni dxandíʼ naca xpinni Dios, rusisácacaʼ Jehová ra gudiicaʼ de ni nápacaʼ (Prov. 3:9). Guzéʼtenu ti ejemplu, ca israelita que bidiicaʼ de ni nápacaʼ para cuiʼ ne guiaapaʼ templu que (2 Rey. 12:​4, 5; 1 Crón. 29:​3-9). Caadxi de ca discípulo stiʼ Jesús bidiicaʼ de ni nápacaʼ para gápabe ni iquiiñebe ne ni iquiiñeʼ ca apóstol stibe (Luc. 8:​1-3). Ne lu primé siglu que, laaca biseendaʼ ca xpinni Cristu ni caquiiñeʼ ca hermanu sticaʼ (Hech. 11:​27-29). Ca dxi stinu riʼ, laaca rusisácanu Jehová ra gudiʼnu ca donación stinu de guidubi ladxidoʼno.

12. ¿Ximodo rusisácanu Jehová né ca donación stinu? (Laaca zanda gúʼyaluʼ imagen ca).

¹² Guidúʼyanu ximodo rusisácanu Jehová ra gudiʼnu ca donación stinu. Lu iza 2020, cumu qué ñaba nisaguié ti tiempu ndaaniʼ guidxi Zimbabue, stale binni gupa guendanagana ne dede zanda gueeda gáticaʼ de hambre. Ládecabe nuu ti hermana ni láʼ Prisca. Neca qué ñaba nisaguié que, peru laabe qué nusaana de nireebe predicación guiráʼ ca miércoles ne ca viernes, dede ne tiempu raca dxiiñaʼ layú. Runi burla ca vecinu stibe laabe purtiʼ runi predicarbe lugar de gúnibe dxiiñaʼ layú, ne rábicaʼ laabe: «¡Zátiluʼ de hambre!». Peru né stale  confianza ricábibe laacaʼ: «Qué huayuu dxi gusaana Jehová ca xpinni». Despué pur ca donación ni rudiʼnu gunda biseendaʼ organización ni caquiiñeʼ hermana riʼ. Chupa chonna de ca vecinu stibe guizáʼ bidxagayaacaʼ ne gúdxicaʼ laabe: «Qué huayuu dxi gusaana Dios lii. Racaláʼdxidu gánnadu jma de laabe». Ne gadxe de laacabe bizulú guyé reunión.

13. Casi riete lu Salmo 96:​9, ¿ximodo zanda gusisácanu Jehová pur modo nabáninu?

¹³ (Biindaʼ Salmo 96:9). Zanda gusisácanu Jehová pur modo nabáninu. Ca sacerdote stiʼ Jehová, caquiiñeʼ quíʼbicaʼ ládicaʼ ne chuʼcaʼ nayá ora gúnicaʼ xhiiñabe ndaaniʼ tabernáculo ne ndaaniʼ templu que (Éx. 40:​30-32). Laanu laaca rúninu stipa pur chuʼ ládinu nayá, peru ni jma risaca nga chuʼnu nayá nezalú Dios (Sal. 24:​3, 4; 1 Ped. 1:​15, 16). Caquiiñeʼ gúninu stipa pur gusaananu modo gúcanu dxiqué ne guibáninu modo cusiidiʼ Dios. Ni caninu nga, gusaananu guiráʼ ca cosa ni cadi jneza bíninu ne modo gúcanu dxiqué ne guizíʼdinu guiníʼ íquenu modo riníʼ ique Jehová ne gúninu ca cosa ni gusihuinni ca cualidad sicarú ni nápabe (Col. 3:​9, 10). Dede né ca binni ni cadi nayá nuucaʼ nezalú Dios ne nabé feu xpiaʼcaʼ, zanda gacanebe laacaʼ guchaacaʼ ne guibánicaʼ modo riuuláʼdxibe.

14. ¿Xi rusiidiʼ ni bizaaca Jack laanu? (Laaca zanda gúʼyaluʼ imagen ca).

¹⁴ Guidúʼyanu ni bizaaca Jack, ti hombre ni bieguyoo purtiʼ nabé malu laa ne bininá binni, ne gúdxicabe laa Demonio. Pur guiráʼ ni biʼniʼ gudíxhecabe gatiʼ. Peru laga cabézabe guedandá fecha guuticabe laabe, gunabe gudii ti hermanu ni riguni predicar ndaaniʼ cárcel estudiu laabe. Neca biʼniʼ Jack stale cosa malu, peru bichaa ne ra gudiʼdiʼ tiempu guyuunísabe casi ti testigu stiʼ Jehová. Cumu guizáʼ bichaa Jack xquendanabani la? dxi maʼ nexheʼ gátibe que dede bidá nisa lú chupa chonna de ca guardia ni yegaca despedir de laabe. Ti sargentu ni runi dxiiñaʼ raqué guníʼ: «Dxiqué la? Jack nga ni jma malu. Peru yanna la? laabe nga tobi de ca ni jma nachaʼhuiʼ». Ti semana despué de biiticabe laabe, ca hermanu ni runi reunión ndaaniʼ carcel que biiyacaʼ guyé ti presu ni qué huayuu dxi cheʼ. ¿Xi bicaa  laabe chebe yaʼ? Guyebe purtiʼ guizáʼ bidxagayaabe ora bíʼyabe modo bichaa Jack ne racaláʼdxibe gánnabe xi zanda gúnibe para guni adorarbe Jehová. Ni bizaaca riʼ rusihuinni zanda gusisácanu Bixhózenu ni nuu guibáʼ pur modo nácanu (1 Ped. 2:12).

¿XIMODO ZUSISACA JEHOVÁ LÁ HUIDXE SI?

15. ¿Xi zuni Jehová huidxe si para gusisaca lá? (Salmo 96:​10-13).

¹⁵ (Biindaʼ Salmo 96:​10-13). Ra maʼ ziluxe Salmo 96 riete naca Jehová ti Rey ni runi juzgar jneza. ¿Ximodo zusisaca Jehová lá huidxe si yaʼ? Zúnibe ni ra guni juzgarbe jneza. Maʼ cadi candaa zunitilube Babilonia guidxi roʼ, purtiʼ maʼ biʼniʼ bidii lá nayá stibe (Apoc. 17:​5, 16; 19:​1, 2). Caadxi de ca binni ni guʼyaʼ ora guzulú guinitilú ca religión ni qué rusiidiʼ ni dxandíʼ zándaca zaguixhe íquecaʼ guni adorarnecaʼ laanu Jehová. Despué de Armagedón, zunitilú Jehová Binidxabaʼ ne guiráʼ ca xpinni. Zunitilube guiráʼ ca ni nanalaʼdxiʼ laabe ne ca ni runi bidii labe, peru zulabe ca ni nadxii laabe, ruzuubaʼ stiidxabe ne racaláʼdxicaʼ gusisácacaʼ laabe (Mar. 8:38; 2 Tes. 1:​6-10). Ora guiluxe guni mandar Jesús ti mil iza, maʼ bisiá Jehová lá (Apoc. 20:​7-10). Tiempu ca «zadxá tipa guidxilayú de binni ni nanna pabiáʼ nandxóʼ Jehová casi dxaʼ tipa nisadóʼ» (Hab. 2:14).

16. ¿Xi maʼ gudixhe íqueluʼ gúniluʼ? (Laaca zanda gúʼyaluʼ imagen ca).

¹⁶ ¡Guizáʼ galán zaca ora guiráʼ xixé binni gusisaca lá Jehová! Laga cabézanu guedandá dxi ca, zanda gúninu biaʼ gándatiʼ para gusisácanu Dios stinu. Para cadi guiaandaʼ laanu pabiáʼ risácani, Grupu ni Zániru maʼ gulí Salmo 96:8 para gaca textu stiʼ iza 2025: «Lagusisaca Jehová purtiʼ naquiiñeʼ gusisácatu labe».