ARTÍCULO DE ESTUDIU 5
CANCIÓN 108 Qué rusaana Dios de gannaxhii
Xi ndaayaʼ ricaanu pur nadxii Jehová laanu
«Beeda Cristu Jesús ndaaniʼ guidxilayú para gulá ca pecador» (1 TIM. 1:15).
TEMA
Xi ndaayaʼ ricaanu pur gudixe Jehová para cuee laanu de lu náʼ pecadu ne guendaguti ne ximodo zanda gusihuínninu rudiʼnu xquixe peʼ laabe pur ni bíʼnibe.
1. ¿Ximodo zanda gusiéchenu Jehová?
GUINÍʼ íquenu bisigaʼdenu ti binni ni guizáʼ nadxiinu ti regalu sicarú ne ni zaquiiñeʼ. ¿Cadi ñuuluʼ triste pa niguu chaahuiʼ binni ca regalu ca ne nusiaandabe ni la? Peru guizáʼ riéchenu ora ridúʼyanu rudii binni ca xquixe peʼ laanu ne riquiiñeʼ regalu ni bidiʼnu laa. ¿Xi rusiidiʼ ejemplu riʼ laanu yaʼ? Rusiidini laanu bidii Jehová Xiiñiʼ beeda gatiʼ pur laanu. ¡Guiníʼ íquenu pabiáʼ riecheʼ Jehová ora rudiʼnu xquixe peʼ laa pur ni biʼniʼ pur laanu ne pur guendarannaxhii ni napa laanu! (Juan 3:16; Rom. 5:7, 8).
2. ¿Xi zadúʼyanu lu artículo riʼ?
2 Peru ra zidiʼdiʼ iza zándaca gusaana de gusisácanu ni biʼniʼ Jehová ra bidii Xiiñiʼ gatiʼ pur laanu, casi ñaca ñapa chaahuinu regalu risaca ni bidii Dios laanu ti lugar ra qué nidúʼyanu ni ne nusiáʼndanu ni. Peru para cadi guizaacanu ndiʼ ne gusiaandanu gudiʼnu xquixe peʼ Jehová la? caquiiñeʼ guiníʼ íquenu guiráʼ ni maʼ biʼniʼ Jehová ne Jesús pur laanu, ne ndiʼ nga ni chiguizíʼdinu lu artículo riʼ, zadúʼyanu ca ndaayaʼ ni rápanu yanna pur regalu risaca riʼ ne xi ndaayaʼ zápanu despué. Laaca zadúʼyanu ximodo gudiʼnu xquixe peʼ Jehová pur nadxii laanu ne jmaruʼ si tiempu rietenaláʼdxinu guendaguti stiʼ Jesús.
XI NDAAYAʼ RICAANU YANNA
3. ¿Xi ndaayaʼ nápanu pur guti Jesús pur laanu?
3 Dede yanna maʼ cacaanu ndaayaʼ pur guti Jesús pur laanu. Guzéʼtenu ti ejemplu, pur laani runi perdonar Jehová ca pecadu stinu. Ne qué rúnibe ni purtiʼ caquiiñeʼ gúnibe ni, sínuque purtiʼ dxandíʼ peʼ racaláʼdxibe gúnibe ni. Lu ti canción ra cudii David xquixe peʼ Jehová guníʼ sicaríʼ: «Lii, Jehová, nacháʼhuiluʼ ne nuuluʼ listu para guni perdonarluʼ» (Sal. 86:5; 103:3, 10-13).
4. ¿Tuu nga ca binni ni zacané guendaguti stiʼ Jesús? (Lucas 5:32; 1 Timoteo 1:15).
4 Nuu tu laa runi sentir qué runi merecer guni perdonar Jehová laa. Peru ni dxandíʼ nga guirutiʼ runi merecer ni. Apóstol Pablo guníʼ: «Qué runeʼ merecer gábicabe naa apóstol». Ne despué guniʼbe: «Nacaʼ ni nacaʼ purtiʼ guca Dios nachaʼhuiʼ né naa» (1 Cor. 15:9, 10). Ora raca arrepentirnu pur ca pecadu stinu runi perdonar Jehová laanu. ¿Xiñee rúnibe ni yaʼ? Rúnibe purtiʼ nadxiibe laanu ne cadi purtiʼ runi merecernu ni. Nga runi, pa riuʼnu triste purtiʼ riníʼ íquenu qué runi merecernu guni perdonar Jehová laanu la? guietenaláʼdxinu qué nudiibe Xiiñibe gatiʼ para binni ni qué ruchee, sínuque para ca binni ruchee ni gaca arrepentir de ca pecadu stiʼ (biindaʼ Lucas 5:32; 1 Timoteo 1:15).
5. ¿Xiñee cadi naquiiñeʼ guininu runi merecernu misericordia stiʼ Jehová?
5 Neca maʼ zinenu stale iza ndaaniʼ xquidxi Jehová, cadi naquiiñeʼ guiníʼ íquenu maʼ biʼniʼ ganarnu misericordia stibe. Dxandíʼ, guizáʼ rusisaca Jehová ni rúninu pur laa (Heb. 6:10). Peru qué nudiibe Xiiñibe laanu pur ca cosa ni rúninu pur laabe casi ñaca caguíxebe laanu, sínuque zeeda gácani ti regalu ni bidiibe laanu. Pa guininu pur ca cosa ni rúninu nga maʼ biʼniʼ ganarnu misericordia stiʼ Dios, o runi merecernu perdón stibe la? ni cayúninu nga caninu cadi caquiiñeʼ gueeda gatiʼ Cristu pur laanu (bichaaga ni né Gálatas 2:21).
6. ¿Xiñee biʼniʼ Pablo stipa pur guni ni ná Jehová?
6 Nanna Pablo qué zanda guni ganar perdón stiʼ Dios. Yanna, ¿xiñee bíʼnibe stipa pur gúnibe ni ná Jehová yaʼ? Purtiʼ racaláʼdxibe gusihuínnibe rudiibe xquixe peʼ Dios pur guca nachaʼhuiʼ né laabe (Efes. 3:7). Laanu laaca rúninu xhiiñaʼ Dios né stale gana cadi purtiʼ racaláʼdxinu guni ganarnu misericordia stibe, sínuque racaláʼdxinu gudiʼnu xquixe peʼ laabe pur riabe laanu.
7. ¿Gunáʼ nga sti modo ricaanu ndaayaʼ pur guti Jesús pur laanu? (Romanos 5:1; Santiago 2:23).
7 Sti ndaayaʼ ni nápanu pur guti Jesús pur laanu nga zanda chuʼnu jma gaxha de Jehová ne gaca xhamígunu laa. a Casi bizíʼdinu lu artículo gudiʼdiʼ ca, ora rálenu cadi maca naca xhamígunu Dios. Peru pur ni biʼniʼ Jehová ne Jesús pur laanu zanda «chuʼnu tobi si né Dios» ne guidxíñanu laa (biindaʼ Romanos 5:1; Santiago 2:23).
8. ¿Xiñee naquiiñeʼ gusihuínninu rudiʼnu xquixe peʼ Jehová pur nápanu privilegiu de guni orarnu laa?
8 Guiníʼ íquenu ti cosa nabé galán ni nápanu pur naca Jehová xhamígunu, laani nga: privilegiu de guni orarnu laabe. Qué rucaadiágasibe ca oración ni raca lu ca reunión ca, sínuque laaca rucaadiágabe cada tobi de ca xpínnibe ora runi orarcaʼ. Dxandíʼ, riguixhedxí oración ca ladxidoʼno ne xquendabiaaninu, peru ni jma risaca nga racaneni laanu chuʼnu jma gaxha de Dios (Sal. 65:2; Sant. 4:8; 1 Juan 5:14). Ora guyuu Jesús lu Guidxilayú riʼ, nabé biʼniʼ orarbe Jehová purtiʼ nánnabe rucaadiaga laabe ne zacaneni laabe cadi guixélebe de Jehová (Luc. 5:16). Rudiʼnu xquixe peʼ Dios pur sacrificiu ni biʼniʼ Jesús, purtiʼ pur laani zanda gaca xhamígunu Jehová ne guni orarnu laa.
CA NDAAYAʼ NI ZÁPANU DESPUÉ
9. Huidxe si, ¿xi ndaayaʼ zacaa ca xpinni Dios pur bidii Jehová Xiiñiʼ gatiʼ pur laanu?
9 Huidxe si, ¿xi ndaayaʼ zacaa ca xpinni Dios pur bidii Jehová Xiiñiʼ gueeda gatiʼ pur laanu yaʼ? Zudiibe laacaʼ guendanabani ni qué zaluxe. Stale binni nga riníʼ ique nagana nga guibani tuuxa sin qué chuʼ dxi gatiʼ purtiʼ maʼ xadxí nga de cayati binni. Peru dxi bizáʼ Jehová binni bizaʼbe laacaʼ para guibánicaʼ sin qué chuʼ dxi gáticaʼ. Ne neca raca nagana para binni guiníʼ ique guibani sin qué chuʼ dxi gatiʼ la? zanda guni crenu zazaacani, purtiʼ maʼ gudixe Jehová ti preciu guizáʼ naroʼbaʼ, laani nga: guendanabani stiʼ Xiiñibe (Rom. 8:32).
10. ¿Xii nga ni maʼ cabeza ca ungidu ne binni ni naca de xcaadxi dendxuʼ gaca?
10 Neca naca guendanabani ni qué zaluxe ca ti ndaayaʼ ni chiguicaanu despué, peru racalaʼdxiʼ Jehová chuʼnu nayecheʼ ne guiníʼ íquenu casi ñaca maʼ gucuaanu ndaayaʼ ca. Maʼ racalaʼdxiʼ ca ungidu guibánicaʼ guibáʼ ne guni mandárnecaʼ Jesús lu Guidxilayú riʼ (Apoc. 20:6). Ne ca binni ni naca de xcaadxi dendxuʼ maʼ racaláʼdxicaʼ guibánicaʼ ndaaniʼ Paraísu lu Guidxilayú riʼ ra maʼ qué ziuu yuubaʼ nin guendananá (Apoc. 21:3, 4). ¿Ñee nápaluʼ esperanza de guibániluʼ sin qué chuʼ dxi gátiluʼ ndaaniʼ Guidxilayú riʼ la? Cadi guiníʼ íqueluʼ huaxiéʼ risaca esperanza riʼ. Purtiʼ guietenaláʼdxinu bizáʼ Jehová binni para guibani sin qué chuʼ dxi gatiʼ lu Guidxilayú riʼ. Ne ndaayaʼ riʼ dxandíʼ peʼ zusiecheʼ ni laanu.
11, 12. ¿Gunáʼ nga caadxi de ca ndaayaʼ ni cabézanu guizaaca? (Laaca zanda gúʼyaluʼ ca imagen ca).
11 Guníʼ ique ximodo zabániluʼ ndaaniʼ paraísu ca. Racá maʼ qué ziuuluʼ xizaa pur gaca huaraluʼ o gátiluʼ (Is. 25: 8; 33:24). Zudii Jehová lii guiráʼ cosa sicarú ni racaláʼdxiluʼ. ¿Xi ñuuláʼdxiluʼ niziidiluʼ yaʼ? ¿Ñuuláʼdxiluʼ niziidiluʼ ñuni estudiarluʼ de ca maniʼ ne de ca pájaru la? ¿Ñuuláʼdxiluʼ niziidiluʼ nuxhídxiluʼ xiixa instrumentu la? ¿Ñuuláʼdxiluʼ niziidiluʼ ñuni dibujarluʼ o nutieeluʼ la? Ndaaniʼ paraísu ca zaquiiñeʼ binni ni guni planu stiʼ ti yoo, ni gucuí yoo, ni guni dxiiñaʼ lu layú, ni guni guendaró, ni guni ca herramienta riquiiñeʼ binni, ni ganna guzuhuaaʼ yagahuiiniʼ ne gapaʼ de laacani (Is. 35:1; 65:21). ¡Zápaluʼ stale tiempu para guiziidiluʼ ni chuuláʼdxiluʼ!
12 ¡Guizáʼ galán nga guidxaagalunu ca binni ni guiasa de lade gueʼtuʼ! (Hech. 24:15). Ne pabiáʼ galán nga guizíʼdirunu de Jehová ne de ca cosa ni bizáʼ (Sal. 104:24; Is. 11:9). Peru ni jma galán nga guni adorarnu Jehová sin guni sentirnu nápanu donda pur bíninu xiixa cosa ni cadi jneza. ¿Cadi dxandíʼ jma risaca nga guicaanu ndaayaʼ riʼ que guiechenenu guiráʼ ni nucaa pecadu laanu ñúninu, neca ti tiempu si la? (Heb. 11:25). Nga runi, risaca guiráʼ sacrificiu ni gúninu yanna. Zedandá dxi zaca Guidxilayú riʼ ti Paraísu ne maʼ qué zácani ti promesa si, purtiʼ dxandíʼ peʼ zabániluʼ ndaaniʼ ni. Ne zanda gácani purtiʼ guizáʼ nadxii Jehová laanu dede bidii Xiiñiʼ gatiʼ pur laanu.
De guirá’ ca ndaaya’ zacaanu ndaani’ Paraísu, ¿guná’ de laani jma racalá’dxilu’ gú’yalu’? (Biiyaʼ párrafo 11 ne 12).
GUSIHUÍNNINU RUDIʼNU XQUIXE PEʼ JEHOVÁ PURTIʼ NADXII LAANU
13. ¿Ximodo zanda gusihuínninu rudiʼnu xquixe peʼ Jehová pur nadxii laanu? (2 Corintios 6:1).
13 ¿Ximodo gusihuínninu rudiʼnu xquixe peʼ Jehová pur bidii Xiiñiʼ beeda gatiʼ pur laanu? Ra gusihuínninu ni jma risaca para laanu nga gúninu ni nabe primé lu xquendanabáninu (Mat. 6:33). Purtiʼ guti Jesús «pur guiranu, ti zacá, ca ni nabani la? maʼ cadi guibánicaʼ para laacaʼ, sínuque guibánicaʼ para ni gutiʼ ne ni bibani pur laacaʼ» (2 Cor. 5:15). Qué racaláʼdxinu guiaandaʼ laanu naca Jehová nachaʼhuiʼ ne runi perdonar laanu (biindaʼ 2 Corintios 6:1).
14. ¿Ximodo zanda gusihuínninu nápanu fe ra chinándanu ni ná Jehová?
14 Laaca zanda gusihuínninu rudiʼnu xquixe peʼ Jehová pur nadxii laanu ra gápanu fe ne chinándanu ni nabe. ¿Ximodo gusihuínninu cayúninu ni yaʼ? Ora chiguicaanu xiixa decisión casi pa ziuurunu scuela o xi dxiiñaʼ zanda gúninu. Galán guiníʼ íquenu xi racalaʼdxiʼ Jehová gúninu (1 Cor. 10:31; 2 Cor. 5:7). Ora rusihuínninu fe stinu pur ca cosa ni rúninu la? riguidxi fe stinu ne jma raca xhamígunu Jehová. Ne laaca jma riguidxi esperanza stinu (Rom. 5:3-5; Sant. 2:21, 22).
15. ¿Ximodo zanda gusihuínninu rudiʼnu xquixe peʼ tiempu raca Conmemoración?
15 Sti modo zanda gusihuínninu rudiʼnu xquixe peʼ Jehová pur bidii Xiiñiʼ beeda gatiʼ pur laanu ne pur nadxii laanu nga ra gúninu biaʼ gándatiʼ tiempu rietenaláʼdxinu guendaguti stiʼ Cristu. Laga cayuʼnu listu para cadi guiá’dxanu dxi ca, zanda guni invitarnu xcaadxi binni cheʼ (1 Tim. 2:4). Ora gúninu ni galán gusiénenu binni ca ximodo raca reunión risaca riʼ. Zanda guluinu laabe ca videu ni láʼ ¿Xiñee guti Jesús? ne Guietenaláʼdxinu guendaguti stiʼ Jesús ni zeeda lu jw.org. Zuuyaʼ chaahuiʼ ca ancianu gaca invitar guiráʼ ca inactivu. Guníʼ ique pabiáʼ nayecheʼ ziuu ca ni nuu guibáʼ ne ca ni nuu lu Guidxilayú ora gúʼyacaʼ racalaʼdxiʼ ti dendxuhuiiniʼ ni biniti stiʼ Jehová guibiguetaʼ ndaaniʼ xquídxibe (Luc. 15:4-7). Dxi guietenaláʼdxinu guendaguti stiʼ Cristu zanda quixhe íquenu ugapadiúxinu, cadi ca ni runibiaʼsinu, sínuque né ca ni nacubi cheʼ o ca ni maʼ xadxí de qué huayé. ¡Guyúbinu guni sentírcabe galán dxi ca! (Rom. 12:13).
16. ¿Xiñee galán quixhe íquenu gúninu jma lu xhiiñaʼ Jehová tiempu guiaba Conmemoración?
16 ¿Ñee zanda gúniluʼ jma lu xhiiñaʼ Jehová tiempu guiaba Conmemoración la? Ndiʼ nga ti modo zanda gusihuínninu rudiʼnu xquixe peʼ Jehová ne Jesús pur ni bíʼnicaʼ pur laanu. Ra jma guni predicarnu zadúʼyanu zacané Jehová laanu ne jma zápanu confianza laabe (1 Cor. 3:9). Ne cadi guiaandaʼ, guidúʼndanu biaʼ ra nexheʼ guiuundaʼ Biblia para Conmemoración ni zeeda lu folletu ni láʼ Guidúʼndanu Stiidxaʼ Dios guiráʼ dxi ne ni zeeda lu Xhiiñaʼ Dios ne modo nabáninu. Ne zanda iquíʼñenu ca textu ca para gúninu ti proyectu de estudiu.
17. ¿Xi rucaa Jehová guiechené laanu? (Laaca zanda gúʼyaluʼ cuadru ni láʼ « Ximodo gusihuínniluʼ rudiiluʼ xquixe peʼ Jehová pur nadxii lii»).
17 Yanna, ¿pa qué zanda chinándaluʼ guiráʼ ca sugerencia ni bieeteʼ lu artículo riʼ neca ñuuláʼdxiluʼ ñúniluʼ jma lu xhiiñaʼ Jehová yaʼ? Cadi chuʼluʼ xizaa, bietenalaʼdxiʼ qué ruchaaga diʼ Jehová ni rúniluʼ né ni runi xcaadxi. Laabe ruuyabe ladxidoʼloʼ ne rusiécheluʼ laabe purtiʼ nánnabe rudiiluʼ xquixe peʼ laabe de guidubi ladxidoʼloʼ purtiʼ biseendabe Jesús para gudii xquendanabani pur lii, laani nga regalu jma risaca ni bidiibe lii (1 Sam. 16:7; Mar. 12:41-44).
18. ¿Xiñee rudiʼnu xquixe peʼ Jehová né Jesús?
18 Pur bidii Jesús xquendanabani pur laanu la? zanda guni perdonar Jehová ca pecadu stinu, gaca xhamígunu laa ne gápanu esperanza de guibáninu sin qué chuʼ dxi gátinu. Cadi gusaana de gudiʼnu xquixe peʼ Jehová pur nadxii laanu ne rudii laanu ca ndaayaʼ riʼ (1 Juan 4:19). Ne zaqueca gusihuínninu rudiʼnu xquixe peʼ Jesús pur nadxii laanu dede bidii xquendanabani pur laanu (Juan 15:13).
CANCIÓN 154 Qué ziuu dxi guirá guendarannaxhii
