1. ¿Xiñee galán nga chuunu guiráʼ iza para guietenaláʼdxinu guendaguti stiʼ Jesús?

 ¿CADI dxandíʼ rudiʼnu xquixe peʼ Jehová ne Jesús pur ni bíʼnicaʼ pur laanu la? (2 Cor. 9:15). Bidii Jesús xquendanabani para gaca xhamígunu Jehová ne guibáninu sin qué chuʼ dxi gátinu. Nápanu stale razón para gudiʼnu xquixe peʼ Jehová purtiʼ guizáʼ nadxii laanu ne bidii laanu regalu riʼ (Rom. 5:8). Para cadi gusaana de gudiʼnu xquixe peʼ Jehová ne cadi gusaana de gusisácanu ni biʼniʼ Jesús pur laanu, biʼniʼ mandarbe guiráʼ iza guietenaláʼdxinu guendaguti stibe (Luc. 22:​19, 20).

 2. ¿Xi zazíʼdinu lu artículo riʼ?

² Iza riʼ zietenaláʼdxinu guendaguti stiʼ Jesús, sábadu 12 de abril de 2025. Guiranu maʼ gudixhe íquenu cadi guiá’dxanu dxi ca. Nga runi galán cueenu tiempu ante ne despué de gaca Conmemoración para guiníʼ íquenu a guiráʼ ni maʼ biʼniʼ Jehová ne Xiiñiʼ pur laanu. Lu artículo riʼ zadúʼyanu bidii Jesús xquendanabani pur laanu ne zaninu xi rusiidini laanu de Jehová ne de Jesús. Ne lu sti artículo ca zadúʼyanu xi ndaayaʼ ricaanu pur ni bíʼnicabe pur laanu ne ximodo zanda gusihuínninu rudiʼnu xquixe peʼ pur laani.

XI RIZÍʼDINU DE JEHOVÁ RA BIDII JESÚS XQUENDANABANI PUR LAANU

 3. ¿Ximodo zanda gulá xquendanabani ti hombre si stale binni? (Laaca zanda gúʼyaluʼ imagen ca).

³ Ra bidii Jesús xquendanabani pur laanu bisihuinni Jehová riuulaʼdxiʼ gaca ni jneza (Deut. 32:4). ¿Xiñee cuzeetenu  ndiʼ yaʼ? Cumu qué nuzuubaʼ Adán stiidxaʼ Dios, guiráʼ ca ni za de laabe gucuá pecadu laacaʼ ne ráticaʼ (Rom. 5:12). Biseendaʼ Jehová Jesús para gulá laanu lu náʼ pecadu ne guendaguti. Peru ¿ximodo nga zanda gulá ni biʼniʼ ti hombre ni qué nuchee stale binni yaʼ? Bisiene apóstol Pablo ni né ca diidxaʼ riʼ: «Cásica pur ti hombre si ni qué nuzuubaʼ diidxaʼ [Adán] guca stale binni pecador, zaqueca pur ti hombre si ni bizuubaʼ diidxaʼ [Jesús] zaca stale binni nachaʼhuiʼ» (Rom. 5:19; 1 Tim. 2:6). Ni caninu nga, beeda gaca guiráʼ xixé binni guidxilayú esclavu stiʼ pecadu ne guendaguti purtiʼ qué nuzuubaʼ ti hombre perfectu stiidxaʼ Dios, ngue runi para ganda guilanu caquiiñeʼ ti hombre perfectu ni guzuubaʼ stiidxaʼ Dios.

 4. ¿Xiñee qué nudii Jehová lugar nibani ca xiiñiʼ Adán ni nuzuubaʼ diidxaʼ sin qué ñuu dxi ñáticaʼ?

⁴ ¿Ñee caquiiñeʼ peʼ gatiʼ Jesús para gulá laanu la? ¿Ñee qué ñanda nudii Jehová lugar nibani ca xiiñiʼ Adán ni nuzuubaʼ diidxaʼ sin qué ñuu dxi ñáticaʼ la? Cumu nácanu binni ruchee la? zándaca para laanu nga nga ni jma galán ñuni Jehová. Peru cadi guiaandaʼ laanu jneza guiráʼ ni runi Jehová. Nga runi ora bichee Adán caquiiñeʼ guni Jehová xiixa, qué zanda gusaanabe ni zaca si.

 5. ¿Xiñee nanna dxíchinu siempre zuni Jehová ni jneza?

⁵ Guiníʼ íquenu qué ñuni Jehová xiixa para nibee laanu de lu náʼ pecadu ne guendaguti, sínuque nudiibe lugar nibani ca xiiñiʼ Adán, ni naca binni ruchee, sin qué ñuu dxi ñáticaʼ. ¿Xi nizaaca yaʼ? Pa ñúnibe zacá nusihuínnibe qué rúnibe ni jneza ne zándaca ñuu binni niníʼ ique laaca qué zúnibe ni jneza ora guizaaca sti cosa. Guzéʼtenu ti ejemplu, zándaca nuu tu laa niníʼ ique ¿ñee zuni cumplirbe xcaadxi promesa stibe la? Peru cadi caquiiñeʼ chuʼnu xizaa pur laani, purtiʼ jneza ni biʼniʼ Jehová neca gupa xidé bidiibe Xiiñibe ni guizáʼ nadxiibe gatiʼ pur laanu. Nga runi, nanna dxíchinu siempre zúnibe ni jneza.

 6. ¿Xiñee nánnanu nadxii Jehová laanu ra bidii Jesús xquendanabani pur laanu? (1 Juan 4:​9, 10).

⁶ Gudixe Jehová para ganda guireʼnu de lu náʼ pecadu ne guendaguti ne zacá rihuinni nácabe ti Dios ni runi ni jneza, peru ni jma rihuinni nga guendarannaxhii ni nápabe laanu (Juan 3:16; biindaʼ 1 Juan 4:​9, 10). Biseendaʼ Jehová Xiiñiʼ beeda gatiʼ pur laanu purtiʼ racaláʼdxibe guibáninu sin qué chuʼ dxi gátinu ne gácanu familia stibe. Guníʼ ique ndiʼ, dxi bichee Adán bisaana de chuʼ ndaaniʼ familia stiʼ Jehová. Ngue runi maʼ qué ñálenu  ndaaniʼ familia stiʼ Dios. Peru pur bidii Jesús xquendanabani pur laanu la? guiráʼ binni ni gapa fe Dios ne guzuubacaʼ stiidxabe zanda chuʼcaʼ ndaaniʼ familia stibe. Ne laaca pur laani, tiempu riʼ randa runi perdonar Jehová ca pecadu stinu, randa raca xhamígunu laabe ne ngueca ca hermanu stinu. ¡Aque nadxii Jehová laanu! (Rom. 5:​10, 11).

 7. Ora guiníʼ íquenu guiráʼ yuubaʼ gudiʼdiʼ Jesús, ¿ximodo racaneni laanu gánnanu pabiáʼ nadxii Jehová laanu?

⁷ Zanda guiene chaahuinu pabiáʼ nadxii Jehová laanu ra guiníʼ íquenu pabiáʼ naroʼbaʼ preciu ni gudíxebe para gulabe laanu. Guníʼ Binidxabaʼ zaxeleʼ ti xpinni Dios de Jehová ora tidiʼ lu guendanagana. Para gusihuinni Jehová cadi zacá ni bidiibe lugar gacaná Jesús ante gatiʼ (Job 2:​1-5; 1 Ped. 2:21). Dede guibáʼ biiyaʼ Jehová guiráʼ ni bíʼnicabe Xiiñiʼ, ora biʼniʼ burla ca binni que Jesús, ora guluu ca soldadu que chicote laabe ne ora bicaacaʼ laabe lu yaga ne laacaʼ biiyaʼ Jehová pabiáʼ naná biiticabe Xiiñiʼ ni nadxii (Mat. 27:​28-31, 39). Ñanda niguu náʼ Jehová para ñacané Xiiñiʼ. Guzéʼtenu ti ejemplu, ñanda ñúnibe xiixa ora guníʼ ca binni que: «Yanna gulá Dios laabe pa naʼ gacané laabe» (Mat. 27:​42, 43). Peru, pa niguu náʼ Jehová maʼ qué niguixe ti preciu naroʼbaʼ para nulá laanu, ne yanna maʼ qué ñapa binni nin ti esperanza de nibani sin qué chuʼ dxi gatiʼ. Ngue runi, bidii Jehová lugar gacaná Xiiñiʼ dede ra gucuaabe bi últimu biaje ne gútibe.

 8. ¿Xiñee nánnanu guizáʼ gucaná ladxidóʼ Jehová ora biʼyaʼ cayacaná Xiiñiʼ? (Laaca zanda gúʼyaluʼ imagen ca).

⁸ Dxandíʼ, qué niquiiñeʼ diʼ Jehová poder stiʼ para cadi ñacaná Xiiñiʼ peru nga qué riníʼ diʼ naguidxi ladxidoʼbe. Bizáʼ Jehová laanu para ganda guni sentirnu. Ne cumu bizaʼbe laanu casi laabe la? nga rusihuinni laaca runi sentirbe. Ne Biblia peʼ ruzeeteʼ guyuu binni bininá ne bisiuubacaʼ ladxidoʼbe (Sal. 78:​40, 41). Guiníʼ íquenu ni bisaacaʼ Abrahán ne Isaac. Gudxi Jehová Abrahán gudii xiiñiʼ casi sacrificiu (Gén. 22:​9-12; Heb. 11:​17-19). Guníʼ ique pabiáʼ naná ne triste nuu Abrahán laga cayuu listu para gutiʼ xiiñiʼ. Yanna, ¿Jehová yaʼ? ¿Xi biʼniʼ sentir ora bíʼyabe guizáʼ cayuniná ca binni que Xiiñibe dede biiticabe laa? Qué zanda diʼ guiníʼ íquenu pabiáʼ triste guyuube ne pabiáʼ gucaná ladxidoʼbe. (Biiyaʼ videu ni láʼ Chinándanu ejemplu stiʼ ca ni gupa fe: Abrahán [guiropa ndaa] ni zeeda lu jw.org).

 9. ¿Xi rusiidiʼ ni riete lu Romanos 8:​32, 38, 39 de guendarannaxhii ni napa Jehová lii ne ca xpinni?

⁹ Ra gudixe Jehová para guireʼnu de lu náʼ pecadu ne guendaguti bisihuinni nabé  nadxii laanu ne guirútiruʼ nadxii laanu jma casi laabe, dede nin binni ni rábinu jma xhamígunu o familia stinu (biindaʼ Romanos 8:​32, 38, 39). Ne jma nadxii Jehová laanu que biaʼ nadxiinu laca laanu. Guníʼ ique ndiʼ: ¿Ñee racaláʼdxiluʼ guibániluʼ sin qué chuʼ dxi gátiluʼ la? Pa racaláʼdxiluʼ ni la? gunna dxichi Jehová jma racalaʼdxiʼ ni. ¿Racaláʼdxiluʼ gaca perdonar ca pecadu stiluʼ la? Pa zacá ni, Jehová peʼ jma racalaʼdxiʼ ni. Ni rinábasibe laanu nga gudiʼnu xquixe peʼ pur regalu ni bidiibe laanu ra guzúʼbanu stiidxabe ne gápanu fe laabe. Rihuinni dxíchica nabé nadxii Jehová laanu purtiʼ gudixe para guireʼnu de lu náʼ pecadu ne guendaguti. Ne lu guidxilayú cubi ca zazíʼdirunu jma de guendarannaxhii stiʼ Jehová (Ecl. 3:11).

XI RIZÍʼDINU DE JESÚS PUR BIDII XQUENDANABANI PUR LAANU

10. a) ¿Xii nga ni jma guluu xizaa Jesús ante gatiʼ? b) ¿Ximodo biʼniʼ defender Jesús lá Jehová? (Laaca zanda gúʼyaluʼ cuadru ni láʼ « Biʼniʼ defender Jesús lá Jehová ra qué nuchee»).

¹⁰ Nabé guyuu Jesús xizaa pur ni guiníʼ binni de Bixhoze (Juan 14:31). Nabé guyuube xizaa purtiʼ caníʼcabe cucaalube Dios ne gobiernu ne zándaca pur nga maʼ guiníʼ binni mal de Bixhózebe. Pur nga guniʼbe: «Bixhozeʼ, pa ganda la? bixheleʼ copa riʼ de naa» (Mat. 26:39). Cumu qué nucheené Jesús Jehová dede dxi guti la? gunda biʼniʼ defenderbe lá Bixhózebe, bisihuínnibe cadi dxandíʼ riníʼ Binidxabaʼ de Jehová.

11. ¿Ximodo bisihuinni Jesús guizáʼ nadxii binni? (Juan 13:1).

¹¹ Ra bidii Jesús xquendanabani pur laanu rusiidini laanu guizáʼ rizaaláʼdxibe binni, ne jmaruʼ si ca discípulo stibe  (Prov. 8:31; biindaʼ Juan 13:1). Nanna Jesús ora chuʼ ndaaniʼ Guidxilayú riʼ, zadiʼdiʼ lu stale guendanagana ne nabé naná modo zuuticabe laa. Peru qué ñúnibe xhiiñaʼ Dios purtiʼ si naquiiñeʼ gúnibe ni, sínuque de guidubi ladxidoʼbe biʼniʼ predicarbe, bisiidibe ne gucanebe binni. Ne dxi maʼ chigátibe que guleebe tiempu para gudiibibe ñee ca apóstol stibe, guluube gana laacaʼ ne bisiidibe laacaʼ stale cosa nabé risaca (Juan 13:​12-15). Ne despué, ora cabe lu yaga que bidiibe gubaanaʼ ni cá cueʼbe que ti esperanza ne gúdxibe Juan gapaʼ María, jñaabe (Luc. 23:​42, 43; Juan 19:​26, 27). Dxi biʼniʼ Jesús xhiiñaʼ Dios lu guidxilayú riʼ bisihuinni guizáʼ nadxii binni dede bidii xquendanabani pur laacabe.

12. ¿Ximodo nga dede yanna cayuni Jesús stale cosa pur laanu?

¹² Guti Cristu ti biaje si «ne maʼ qué ziuuruʼ dxi gátibe», peru dede yanna cayúnirube stale cosa pur laanu (Rom. 6:10). Ne pur bidiibe xquendanabánibe pur laanu qué huasaana de gúnibe dxiiñaʼ para gudiibe laanu stale cosa sicarú. Guiníʼ íquenu guiráʼ ni maʼ bíʼnibe ra maʼ nácabe Rey, Sumo Sacerdote ne xaíque stiʼ congregación (1 Cor. 15:25; Efes. 5:23; Heb. 2:17). Ne laaca nápabe dxiiñaʼ de guni reunirbe ca ungidu ne zaqueca stale binni o gran muchedumbre, ti dxiiñaʼ ni zunduuxebe ante guiluxe gran tribulación (Mat. 25:32; Mar. 13:27). b Laaca cayuuyabe cadi guiaadxaʼ guendaró espiritual ca xpínnibe ni qué rixeleʼ de laabe lu ca últimu dxi riʼ (Mat. 24:45). Ne lu ti mil iza guni mandarbe zúnirube dxiiñaʼ para gacanebe laanu. Ridúʼyanu dxi bidii Jehová Xiiñiʼ la? cadi bíʼnibe ni para si gudii Xiiñibe xquendanabani pur laanu, sínuque para guni stáleruʼ cosa pur laanu.

CADI GUSAANA DE GUIZIIDILUʼ

13. Ora guiníʼ ique chaahuiluʼ ni cayuundaluʼ, ¿ximodo zanda gacaneni lii?

¹³ Ora guiníʼ ique chaahuiluʼ ni cayuundaluʼ zacaneni lii cadi gusaana de guiziidiluʼ stale cosa de guendarannaxhii ni napa Jehová ne Jesús laanu. Iza riʼ, tiempu guiaba Conmemoración, zanda quixhe íqueluʼ gúʼndaluʼ ca Evangeliu. Ne galán cadi gúʼndaluʼ stale de ti jalón si, sínuque biʼniʼ stipa gúʼndaluʼ chaahuiʼ chaahuiʼ ti ganda guidxélaluʼ ca razón para jma gannaxhiiluʼ Jehová ne Jesús. Ne cadi guiaandaʼ  lii: biʼniʼ stipa guiníʼneluʼ xcaadxi de ca cosa nacubi bidxélaluʼ ra biindaluʼ.

14. Casi riete lu Salmo 119:97 ne nota stini, ¿xi caquiiñeʼ gúninu para cadi gusaana de guizíʼdinu de ni biʼniʼ Jehová ne Jesús pur laanu ne de xcaadxi tema? (Laaca zanda gúʼyaluʼ imagen ca).

¹⁴ Pa maʼ zineluʼ stale iza de nuuluʼ ndaaniʼ xquidxi Dios, zándaca guiníʼ íqueluʼ pa zándaruʼ guiziidiluʼ xiixa cosa nacubi ora maʼ cayuundaluʼ ca tema ni caníʼ de guendaruni jneza stiʼ Dios, guendarannaxhii stibe ne ni biʼniʼ Jehová ne Jesús para gulá laanu de lu náʼ pecadu ne guendaguti. Qué zusaana de gusiidiʼ ca tema riʼ laanu de Jehová. Peru ¿xi zanda gacané lii cadi gusaana de guiziidiluʼ yaʼ? Zanda iquiiñeluʼ información ni zeeda lu ca publicación stinu. Pa qué guiéneluʼ ti textu stiʼ Biblia, biyubi información ni caníʼ de laani. Ne despué, guníʼ ique ni biindaluʼ ne ni cusiidini lii de Jehová, de Xiiñiʼ ne de guendarannaxhii ni nápacabe lii (biindaʼ Salmo 119:97 ne nota stini).

15. ¿Xiñee cadi naquiiñeʼ gusaana de guyúbinu ca tesoro ni zeeda lu Biblia?

¹⁵ Cadi guireeluʼ gana pa cadi caziidiluʼ xiixa nacubi o ni chuuláʼdxiluʼ ora gúʼndaluʼ o guni estudiarluʼ Biblia. ¿Xiñee yaʼ? Purtiʼ guni estudiarluʼ Biblia zeeda gácani casi ñaca nuyúbiluʼ oro. Nuu binni ridiʼdiʼ stale ora o dxi maʼ cuyúbicaʼ oro, nápacaʼ paciencia ne qué rireecaʼ gana purtiʼ neca ti ndaahuiiniʼ guidxélacaʼ risaca ni para laacaʼ. Ca tesoro ni zeeda lu Biblia jma risácacani que oro (Sal. 119:127; Prov. 8:10). Nga runi gupa paciencia ne cadi gusaana de guni estudiarluʼ Biblia (Sal. 1:2).

16. ¿Ximodo zanda chinándanu ejemplu stiʼ Jehová ne stiʼ Jesús?

¹⁶ Ora guni estudiarluʼ, biyubi modo gúniluʼ ni caziidiluʼ. Guzéʼtenu ti ejemplu, zanda chinándaluʼ ejemplu stiʼ Jehová ra cadi gúniluʼ jma pur tobi que pur stobi. Ne laaca zanda chinándanu ejemplu stiʼ Jesús, laa gunnaxhii Bixhoze ne binni, ne laaca guyuu dispuestu gacaná pur Dios, lii laaca zanda gacaneluʼ ca hermanu neca gácani nagana para lii, biʼniʼ predicar ti ganda guicaa xcaadxi binni ca ndaayaʼ ni chiguicaanu pur bidii Jesús xquendanabani pur laanu.

17. ¿Xi zadúʼyanu lu stiʼ artículo ca?

¹⁷ Ora jma guiénenu ne jma gusisácanu ni biʼniʼ Jehová ne Jesús pur laanu jma zannaxhiinu laacabe. Ne laaca jma zannaxhii Jehová ne Jesús laanu (Juan 14:21; Sant. 4:8). Nga runi, iquiiñenu guiráʼ ni cudii Jehová laanu para guizíʼdinu jma de ni gudíxebe para ganda guireʼnu de lu náʼ pecadu ne guendaguti. Lu sti artículo ca zazíʼdinu xi ndaayaʼ ricaanu pur laani ne ximodo zanda gusihuínninu rudiʼnu xquixe peʼ Jehová pur bisihuinni nadxii laanu ra bidii lugar gatiʼ Xiiñiʼ pur laanu.