Caadxi de ca profecía ni riete lu gráfica riʼ ruzeeteʼ cani caadxi cosa ni zazaaca juntu. Guiráʼ cani rusihuínnicani nabáninu «lu tiempu ra mayaca gueeda fin» (Dan. 12:4).

• Textu zeeda lu Biblia: Apoc. 11:7; 12:13, 17; 13:1-8, 12.

  Profecía: Huayuni mandar «bestia salvaje» binni guidxilayú stale iza. Zacaná ra bizaa gadxe íqueme lu ca dxi ra mayaca gueeda fin. Peru despué biándame «ne guiráʼ binni guidxilayú zinanda» laame. Riquiiñeʼ Binidxabaʼ bestia riʼ para gucaalú «ca ni biaana de lade» descendencia stiʼ gunaa que.

  Cumplimientu: Despué de Diluvio que, bizulú guyuu gobiernu ni bicaalú Jehová. Stale iza despué, gucaná Imperio británico lu Primera Guerra Mundial. Peru despué biasa ni sti biaje dxi guca ni tobi si né Estados Unidos. Lu ca dxi ra mayaca gueeda fin, riquiiñeʼ Binidxabaʼ guiráʼ gobiernu ni nuu lu Guidxilayú para sananda xquidxi Dios.

• Textu zeeda lu Biblia: Dan. 11:25-45.

  Profecía: Ridinde rey del norte ne rey del sur para gápacaʼ jma poder.

  Cumplimientu: Bicaalú Alemania Gran Bretaña ne Estados Unidos ne gudíndecaʼ. Lu iza 1945 beeda gaca Unión Soviética ne ca xpinni rey del norte. Peru lu iza 1991 biaba Unión Soviética, ne ra gudiʼdiʼ iza, beeda gaca Rusia ne ca xpinni rey del norte.

• Textu zeeda lu Biblia: Is. 61:1; Mal. 3:1; Luc. 4:18.

  Profecía: Biseendaʼ Jehová «mensajeru» stiʼ para guxheleʼ neza ante chuʼ Reinu mesiánicu. Grupu ni zeeda gaca mensajeru riʼ, bizulú guníʼnecaʼ binni nadóʼ «ca diidxaʼ nacubi ne galán».

  Cumplimientu: Dede 1870, bizulú biʼniʼ estudiar Charles Russell ne ca xcompañeru Biblia para guiénecaʼ xi peʼ rusiidiʼ ni. Dede 1880, bizulú bisiénecabe xiñee risaca guni predicar ca xpinni Dios. Guleecabe tema ni láʼ «Caquiiñeʼ ti mil binni para guni predicar» ne «Ca ni maʼ bibí para guni predicar».

• Textu zeeda lu Biblia: Mat. 13:24-30, 36-43.

  Profecía: Bisaba ti hombre trigu lu layú stiʼ. Despué beeda enemigu stibe ne bidxiibaʼ guixi malu lade trigu que. Gundani guixi malu lade ni ne bichiini trigu que. De ora guiasa cosecha nga guiaaxha guixi malu lade trigu.

  Cumplimientu: Dede 1870, bihuinni tuu nga ca ni dxandíʼ xpinni Cristu ne tuu nga ca ni cadi dxandíʼ. Lu ca dxi ra mayaca gueeda fin, riuu ca ni dxandíʼ xpinni Cristu tobi si ne rixélecaʼ de ca ni cadi dxandíʼ xpinni Cristu.

• Textu zeeda lu Biblia: Dan. 2:31-33, 41-43.

  Profecía: Estatua de gadxé gadxé material ni riete lu profecía stiʼ Daniel de guiibaʼ ne de beñe ñee ni.

  Cumplimientu: Binni ni nuu lu náʼ Gran Bretaña ne Estados Unidos nga ni runi representar beñe ca, ne cumu rucaalucaʼ ne qué rinacaʼ gúnicaʼ ni ná ca gobiernu riʼ la? qué randa riuu ca gobiernu riʼ naguidxi casi ti guiibaʼ.

• Textu zeeda lu Biblia: Mat. 13:30; 24:14, 45; 28:19, 20.

  Profecía: Ridopa «trigu» ne ridxá ni «ndaaniʼ troja», ne rapa «mozo ni nuu xpiaaniʼ ne ni runi jneza [...] ca ni runi dxiiñaʼ ndaaniʼ lidxi» xpixuaanaʼ. Ne cayaca predicar «ca noticia galán stiʼ Reinu lu guidubi guidxilayú».

  Cumplimientu: Lu iza 1919, bizulú biʼniʼ tender mozo ni nuu xpiaaniʼ modo gaca dxiiñaʼ ndaaniʼ xquidxi Dios. Dede dxi que, jmaruʼ si biʼniʼ predicar ca Binni Ruundaʼ Biblia. Tiempu riʼ, cayuni predicar ca testigu stiʼ Jehová lu jma de chupa gayuaa guidxi ne territorio, ne ribeecaʼ publicación ni caníʼ de Biblia lu jma de ti mil idioma.

• Textu zeeda lu Biblia: Dan. 12:11; Apoc. 13:11, 14, 15.

  Profecía: Cucaa ti bestia salvaje ni napa chupa cachu binni «gúnicaʼ ti imagen stiʼ primé bestia salvaje» que ne rudiime «guendanabani» laa.

  Cumplimientu: Gran Bretaña ne Estados Unidos guniʼcaʼ chuʼ Sociedad de Naciones. Gucané xcaadxi guidxi laacabe. Ne despué, dede 1926 hasta 1933 laaca guyuu rey de ladu guiáʼ lade Sociedad riʼ. Bisisácacabe Sociedad de Naciones jma que Reinu stiʼ Dios, ne ngaca cazaaca ne Naciones Unidas yanna (ONU).

• Textu zeeda lu Biblia: Dan. 8:23, 24.

  Profecía: Bininá ti rey guizáʼ malu binni de ti modo cadi cabézacaʼ.

  Cumplimientu: Nabé huayuniná Gran Bretaña ne Estados Unidos binni. Guzéʼtenu ti ejemplu, lu Segunda Guerra Mundial, bisaba Estados Unidos chupa bomba atómica ndaaniʼ tobi de ca guidxi stiʼ ca enemigu sticaʼ.

• Textu zeeda lu Biblia: Dan. 11:31; Apoc. 17:3, 7-11, 16.

  Profecía: Riree ti bestia «color naxiñáʼ rini» ni napa chii cachu de ndaaniʼ abismo, ne laame nga ra bizaa xhono rey. Libru stiʼ Daniel riníʼ rey riʼ nga «cosa yuudxuʼ ne ni runitilú».

  Cumplimientu: Maʼ qué ñuni Sociedad de Naciones dxiiñaʼ lu Segunda Guerra Mundial. Despué de guerra que, guca fundar ONU. Cásica ni bizaaca né Sociedad de Naciones, jma rusisaca binni ONU que Reinu stiʼ Dios. Zucaalú guiráʼ guidxi ni runi apoyar ONU ca religión.

• Textu zeeda lu Biblia: 1 Tes. 5:3; Apoc. 17:16.

  Profecía: Zaníʼ ca guidxi ca «maʼ nuu paz ne seguridad», ne despué zucaalú «chii cachu» ne «bestia salvaje» «prostituta» que ne zunitilucaʼ laabe. Despué zanitilú ca guidxi ca.

  Cumplimientu: Zaníʼ ca guidxi ca maʼ gucanecaʼ para chuʼ paz ne seguridad. Despué, zunduuxe ca guidxi ni runi apoyar ONU ca religión falsu. Óraca nga guzulú gran tribulación. Zaluxe tribulación riʼ ora gunduuxeʼ Jesús ca binni ni cayuni ni ná Binidxabaʼ lu Armagedón.

• Textu zeeda lu Biblia: Ezeq. 38:11, 14-17; Mat. 24:31.

  Profecía: Zuni invadir Gog layú ra nuu xquidxi Dios. Despué, zuni reunir ca ángel ca ungidu stiʼ Dios.

  Cumplimientu: Zacané xcaadxi gobiernu ni nuu lu guidubi Guidxilayú rey del norte para gucaalú xquidxi Dios. Tidiʼ si ti tiempu despué de gucaalúcabe xquidxi Dios, zié xcaadxi ungidu ni nuu lu Guidxilayú riʼ guibáʼ.

• Textu zeeda lu Biblia: Ezeq. 38:18-23; Dan. 2:34, 35, 44, 45; Apoc. 6:2; 16:14, 16; 17:14; 19:20.

  Profecía: Jinete dxiʼbaʼ «caballu blancu» zuni «ganar» ora gunitilú Gog ne ejércitu stiʼ. Zulaacabe «bestia salvaje» que lu «lago de bele» ne zacadé estatua naroʼbaʼ que.

  Cumplimientu: Jesús, rey lu Reinu stiʼ Dios, zaree para guni defender xquidxi Jehová. Laabe, 144,000 ne ca ángel zunitilucaʼ grupu de guidxi roʼ. Racá nga guinitilú guidxilayú malu stiʼ Binidxabaʼ.