1. ¿Xi caquiiñeʼ guiníʼ ique ti hermana pa maʼ caníʼ ique guichaganáʼ?

XAÍQUE stiʼ guiranu nga Jesucristu ne gástiruʼ stobi casi laa. Peru ora richaganáʼ ti gunaa xpinni Cristu nuu biaje raca nagana para laa guzuubaʼ stiidxaʼ xheelaʼ purtiʼ binni ruchee hombre ca. Nga runi pa cá ique ti gunaa guichaganáʼ ti xpinni Cristu naquiiñeʼ guiníʼ ique: «¿Ximodo nannaʼ zaca hermanu ca ti buen xaíque ndaaniʼ familia? ¿Ñee risaca para laabe gúnibe xhiiñaʼ Jehová la? Peru pa cadi zacá ni, ¿ximodo ga gannaʼ zacanebe naa chuaaʼ jma gaxha de Jehová yaʼ?». Laaca caquiiñeʼ guiníʼ ique hermana riʼ: «¿Xi zanda guneʼ para chuʼ xquendaxheelaʼ galán yaʼ? ¿Ñee nacaʼ ti binni nachaʼhui ne napaʼ paciencia la? ¿Ñee nuaaʼ gaxha de Jehová la?» (Ecl. 4:9, 12). Pa racalaʼdxiʼ ti gunaa chuʼ nayecheʼ ora maʼ bichaganáʼ, naquiiñeʼ guicaa decisión jneza ante guichaganáʼ.

2. ¿Xi zazíʼdinu lu artículo riʼ?

² Guizáʼ galán ejemplu stiʼ stale hermana purtiʼ ruzuubacaʼ stiidxaʼ xheelacaʼ. Riuuláʼdxinu guninenu laacabe xhiiñaʼ Jehová ne runi felicitarnu laacabe purtiʼ qué rusaanacabe de gúnicabe xhiiñaʼ Dios. Lu artículo riʼ, zacábinu chonna pregunta: ¿Gunáʼ nga ca guendanagana ni zándaca guidxaagalú ca gunaa ni maʼ bichaganáʼ?, ¿xiñee riguixhe ique ca gunaa ni maʼ bichaganáʼ guzuubacaʼ stiidxaʼ xheelacaʼ? Ne ¿xi zanda guiziidiʼ ca hombre ne ca  gunaa ni maʼ bichaganáʼ de ejemplu stiʼ Jesús, Abigaíl ne María, jñaa Jesús?

3. ¿Xiñee rapa ca guendaxheelaʼ problema?

³ Dios gudixhe guichaganáʼ binni, peru Stiidxaʼ Dios ná zapa ca ni maʼ bichaganáʼ «problema lu xquendanabánicaʼ» purtiʼ binni ruchee laacaʼ (1 Cor. 7:28; 1 Juan 1:8). Ndiʼ nga caadxi guendanagana ni zándaca guidxaagalú ti gunaa ni maʼ bichaganáʼ.

4. ¿Xiñee zándaca guiníʼ ique ti gunaa huaxiéʼ risaca pa guzuubaʼ stiidxaʼ xheelaʼ?

⁴ Zándaca modo biniisi ti gunaa guiníʼ ique huaxiéʼ risaca pa guzuubaʼ stiidxaʼ xheelaʼ. Marisol, ti gunaa nabeza Estados Unidos, guníʼ: «Lugar ra biniiseʼ, nabé bicaacabe ca gunaa guiníʼ íquecaʼ biaʼca risácacaʼ que ca hombre. Peru nannaʼ maʼ gudixhe Jehová tuu nga gaca xaíque ndaaniʼ ti familia, ne maʼ gudíxhebe naquiiñeʼ guzuubaʼ gunaa stiidxaʼ xheelaʼ. Peru laaca naquiiñeʼ guni respetar hombre ca laabe. Neca zacá, ziuu hora zaca nagana para ti gunaa guni ni maʼ gudixhe Jehová».

5. ¿Xi riníʼ ique caadxi hombre de ca gunaa?

⁵ Sti guendanagana ni rapa ti gunaa ni maʼ bichaganáʼ nga guiníʼ ique xheelabe qué risácabe. Ti hermana láʼ Ivón, ni nabeza Sudamérica, guníʼ: «Lugar ra nabezaʼ, ca hombre nga ró primé ne despué ca gunaa. Ne ca dxaapahuiiniʼ dede nahuiinicaʼ rucaacabe laacaʼ gúnicaʼ guendaró ne gusiacaʼ, peru ca hombrehuiiniʼ, jñaacaʼ ne bizáʼnacaʼ nga rudii ni gocaʼ ne runi tratarcaʼ laacabe casi rey». Yingling, ti hermana ni nabeza Asia guníʼ: «Lu stiidxaʼ nuu ti dichu ni ná cadi caquiiñeʼ gaca ca gunaa ti binni nuu xpiaaniʼ nin guiziidicaʼ gúnicaʼ xiixa cosa, ni naquiiñeʼ guni ti gunaa ni maʼ bichaganáʼ nga guni dxiiñaʼ ra yoo ne cadi gábibe xheelabe xi riníʼ íquebe». Ti hombre ni runi ca cosa riʼ, cadi zinanda modo rusiidiʼ Biblia, qué riuu xheelaʼ nayecheʼ, cadi zinanda ejemplu stiʼ Jesús ne qué riuulaʼdxiʼ Jehová ni runi (Efes. 5:28, 29; 1 Ped. 3:7).

6. ¿Xi naquiiñeʼ guni ca gunaa ni maʼ bichaganáʼ para chuʼcaʼ gaxha de Jehová?

⁶ Casi bizíʼdinu lu artículo ni gudiʼdiʼ que, racalaʼdxiʼ Jehová gudii ca hermanu ni maʼ bichaganáʼ ni caquiiñeʼ familia stiʼ ne gacané laacabe chúʼcabe gaxha de Jehová (1 Tim. 5:8). Peru de lade guiráʼ ni runi ca hermana ni maʼ bichaganáʼ, laaca naquiiñeʼ cueecaʼ tiempu para gúʼndacaʼ Biblia guiráʼ dxi, guiníʼ íquecaʼ ni cayuundacaʼ ne guni orarcaʼ Jehová. Zándaca gácani nagana para laacabe purtiʼ guizáʼ riuu xhiiñacabe. Ne dede guiníʼ ique ca hermana ni maʼ bichaganáʼ qué gápacaʼ tiempu ne stipa para gúnicaʼ ca cosa ni maʼ guninu riʼ, peru nabé risaca cueecabe tiempu para gúnicabe ni. ¿Xiñee yaʼ? Purtiʼ racalaʼdxiʼ Jehová guni cada tobi de ca xpinni stipa para chuʼ gaxha de laabe (Hech. 17:27).

7. ¿Xi zacané ti gunaa ni maʼ bichaganáʼ guni respetar autoridad stiʼ xheelaʼ?

⁷ Zándaca naquiiñeʼ guni ti gunaa ni maʼ bichaganáʼ stipa para guni respetar ne guzuubaʼ stiidxaʼ xheelaʼ, purtiʼ binni ruchee hombre ca. Peru pa chinándabe ni rusiidiʼ Biblia, ne guiénebe xi dxiiñaʼ maʼ bidii Jehová laabe ndaaniʼ familia qué zaca nagana para laabe guni respetarbe autoridad stiʼ xheelabe.

8. Casi ná Efesios 5:22-24 ¿xiñee runi respetar ti hermana autoridad stiʼ xheelaʼ?

⁸ Runi respetar ti hermana autoridad stiʼ xheelaʼ purtiʼ nga nga ni racalaʼdxiʼ Jehová gúnibe (biindaʼ Efesios 5:22-24). Nánnabe nadxii Jehová laabe ne laaca nánnabe zabánibe galán pa gúnibe ni ná (Deut. 6:24; 1 Juan 5:3).

9. ¿Xi rizaaca ora runi respetar ti gunaa autoridad stiʼ xheelaʼ?

⁹ Rucaa binni guidxilayú ca gunaa cadi chinándacaʼ ni ná Jehová ne cadi guni respetarcaʼ xheelacaʼ. Ca binni ni runi ca ni bizéʼtenu riʼ qué runibiaʼcaʼ Dios stinu. ¿Xiñee yaʼ? Purtiʼ qué ziuu dxi guinabaʼ Jehová ca gunaa gúnicaʼ xiixa para si gacanacaʼ. Ti gunaa ni runi ni ná Jehová la? racané para chuʼ familia stiʼ tobi si (Sal. 119:165). Pa gúnibe ni la? zabani familia stibe nayecheʼ.

10. ¿Xi rizíʼdinu de ni guníʼ Carol?

¹⁰ Ti gunaa ni runi respetar autoridad stiʼ xheelaʼ neca binni ruchee hombre ca, rusihuinni nadxii ne runi respetar Jehová, purtiʼ laa nga bidii autoridad hombre ndaaniʼ familia. Carol, ti gunaa de Sudamérica guníʼ: «Nannaʼ ziuu ora zuchee xheelaʼ. Ne ora guizaaca ndiʼ la? pur ni guneʼ zusihuinneʼ pabiáʼ nadxieeʼ Jehová. Nga runi runeʼ stipa guneʼ respetar xheelaʼ purtiʼ nga nga ni racalaʼdxiʼ Jehová».

11. a) ¿Xi runi Aneese para guni perdonar? b) ¿Xi rizíʼdinu de ejemplu stiʼ Aneese?

¹¹ Pa guni sentir ti gunaa qué rizaalaʼdxiʼ xheelaʼ xi cayaca o xi naguu xizaa laa, zándaca gaca nagana para laabe guni respetarbe autoridad stiʼ xheelabe. Guidúʼyanu xi runi ti hermana láʼ Aneese ora rizaaca ndiʼ. Sicaríʼ guniʼbe: «Runeʼ stipa cadi guidxiicheʼ ne rietenalaʼdxeʼ guiranu rucheʼnu. Runeʼ stipa guneʼ perdonar cásica runi Jehová ni. Ora runeʼ ni ratadxí ladxiduáʼ» (Sal. 86:5). Ti gunaa ni runi perdonar xheelaʼ la? qué raca nagana para laa guni respetar autoridad stibe.

12. ¿Xi ejemplu zeeda lu Biblia ni zanda gacané laanu?

¹² Zándaca nuu tu laa riníʼ ique huaxiéʼ risaca ti binni ni runi respetar autoridad stiʼ stobi. Peru cadi zacá diʼ ni. Lu Biblia zeeda ejemplu stiʼ binni ni biʼniʼ respetar autoridad stiʼ stobi, ne qué ñuni sentircaʼ huaxiéʼ risácacaʼ. Guidúʼyanu xi zanda guizíʼdinu de Jesús, Abigaíl ne María.

13. ¿Bisiene xiñee runi respetar Jesús autoridad stiʼ Jehová?

¹³ Neca guizáʼ nuu xpiaaniʼ Jesús ne nanna guni stale cosa, runi respetar autoridad stiʼ Jehová. Cumu guizáʼ nuu xpiaanibe la? nga runi, guizáʼ galán modo bisiidibe (Juan 7:45, 46). Guizáʼ runi respetar Jehová Jesús, nga runi bidii lugar guniné laabe dxiiñaʼ dxi bizáʼ universu (Prov. 8:30; Heb. 1:2-4). Ne dede dxi biasa Jesús de lade gueʼtuʼ bidii Jehová laa «guiráʼ xixé autoridad guibáʼ ne lu guidxilayú» (Mat. 28:18). Neca nanna Jesús guni stale cosa ruyubi gacané Jehová laa, ne rúnibe ni purtiʼ nadxiibe Bixhózebe (Juan 14:31).

14. a) ¿Xi zanda guiziidiʼ ca hombre ni maʼ bichaganáʼ de ejemplu stiʼ Jehová? b) ¿Xi zanda guiziidiʼ ca hombre de ni riete lu Proverbios 31?

¹⁴ ¿Xi zanda guiziidiʼ ca hombre ni maʼ bichaganáʼ? Gudixhe Jehová gaca hombre xaíque ndaaniʼ familia, cadi purtiʼ jma risaca hombre que gunaa. Ne bisihuínnibe ni purtiʼ cabibe gunaa ne hombre para guni mandárnecaʼ Jesús guibáʼ (Gál. 3:26-29). Cásica maʼ bidii Jehová autoridad Xiiñiʼ, laaca naquiiñeʼ gudii ti hombre ni maʼ bichaganáʼ caadxi autoridad xheelaʼ. Stiidxaʼ Dios ruzeeteʼ ruuyaʼ ti gunaa nuu xpiaaniʼ cadi guiaadxaʼ gastiʼ ra lidxi, rizíʼ ne rutoo layú ne runi negocio (biindaʼ Proverbios 31:15, 16, 18). Cadi ti criada ni qué gapa derechu guiníʼ nga laabe, sínuque napa xheelabe confianza laabe, rinabadiidxaʼ ne rucaadiaga laabe (biindaʼ Proverbios 31:11, 26, 27). Ora runi respetar ti hombre xheelaʼ, dede riuulaʼdxiʼ xheelaʼ guzuubaʼ stiidxabe.

15. ¿Xi zanda guiziidiʼ ca gunaa ni maʼ bichaganáʼ de ejemplu stiʼ Jesús?

¹⁵ ¿Xi zanda guiziidiʼ ca gunaa ni maʼ bichaganáʼ? Neca maʼ biʼniʼ Jesús stale cosa, runi respetar autoridad stiʼ Jehová ne cadi pur nga riníʼ ique qué risaca (1 Cor. 15:28; Filip. 2:5, 6). Nga ca nga runi ti gunaa nuu xpiaaniʼ, runi respetar xheelaʼ ne cadi pur nga riníʼ ique qué risaca. Racanebe xheelabe purtiʼ nadxiibe laa, peru ni jma risaca nga rúnibe ni purtiʼ nadxiibe ne runi respetarbe Jehová.

16. Casi ná 1 Samuel 25:3, 23-28, ¿xi guendanagana bidxaagalú Abigaíl? (Biiyaʼ imagen zeeda lu portada).

¹⁶ Xheelaʼ Abigaíl nga Nabal, ti hombre ni riníʼ ique puru para laa si ne orgulloso laa. Neca zacá, qué niníʼ ique Abigaíl nusaana xheelaʼ. Ñanda nudiibe lugar ñuuti David ne ca soldadu stiʼ xheelabe peru bíʼnibe xiixa para cadi guizaaca Nabal ne ca xpinni gastiʼ. ¡Guizáʼ nadxibalú guca Abigaíl purtiʼ guyé nezalú 400 hombre ni naaze guiibaʼ ne guniʼné David né stale respetu! Dede gúdxibe David guiaba donda luguiabe pur ni biʼniʼ Nabal (biindaʼ 1 Samuel 25:3, 23-28). Bidii David cuenta Jehová ngue biquiiñeʼ gunaa nabé nadxibalú riʼ para guiniʼné laa ne cadi guni ti cosa nabé malu.

17. ¿Xi zanda guiziidiʼ ca hombre ni maʼ bichaganáʼ de ejemplu stiʼ David ne Abigaíl?

 ¹⁷ ¿Xi zanda guiziidiʼ ca hombre ni maʼ bichaganáʼ? Guca Abigaíl ti gunaa nuu xpiaaniʼ. Ngue runi, jneza ngue biʼniʼ David bicaadiaga laabe. Ne zaqué maʼ qué ñati binni ni qué gapa donda. Zacaca nga ti hombre ni nuu xpiaaniʼ, zucaadiaga ni gabi xheelaʼ laa ora chicaa xiixa decisión nabé risaca. Zándaca pur ni gabi xheelabe laabe zacané ni para cadi guicaabe xiixa decisión ni cadi jneza.

18. ¿Xi zanda guiziidiʼ ca gunaa ni maʼ bichaganáʼ de ejemplu stiʼ Abigaíl?

¹⁸ ¿Xi zanda guiziidiʼ ca gunaa ni maʼ bichaganáʼ? Ti gunaa ni nadxii ne runi respetar Jehová, guizáʼ racané familia stiʼ neca qué runi xheelabe ni ná Jehová. Zinanda hermana riʼ ca principiu zeeda lu Biblia ne qué zusaana xheelaʼ. Zuni respetarbe ne zuzuubabe stiidxaʼ xheelabe ne zacá zacanebe laa chuulaʼdxiʼ guiziidiʼ de Jehová (1 Ped. 3:1, 2). Ne neca qué gusisaca hombre ca stipa ni gúnibe, naquiiñeʼ gánnabe guizáʼ rusisaca Jehová stipa cayúnibe.

19. ¿Pora nga qué zuzuubaʼ ti gunaa ni maʼ bichaganáʼ stiidxaʼ xheelaʼ?

¹⁹ Peru qué zuzuubaʼ ti hermana stiidxaʼ xheelaʼ pa canabaʼ laabe guni xiixa ni qué riuulaʼdxiʼ Jehová. Guzéʼtenu ti ejemplu, guxuíʼlunu guinabaʼ xheelaʼ ti hermana laa gusiguii, cuanaʼ o guni xiixa cosa ni qué riuulaʼdxiʼ Jehová. Cásica guiranu, ni jma naquiiñeʼ guni ti hermana ni maʼ bichaganáʼ nga guzuuba stiidxaʼ Jehová. Nga runi, pa guinabaʼ xheelaʼ ti hermana laa guni xiixa ni qué riuulaʼdxiʼ Jehová, naquiiñeʼ gusiénebe laa né stale respetu xiñee qué zúnibe ni (Hech. 5:29).

20. ¿Xiñee nánnanu nabé guyuu María gaxha de Jehová?

²⁰ María nga ti gunaa ni nabé guyuu gaxha de Jehová. Binibiaʼbe Stiidxaʼ Dios, ne nánnanu zacá ni purtiʼ dxi guníʼnebe Elisabet, jñaa Juan Bautista,  jma de gande biaje bizeetebe de memoria ni zeeda lu Escrituras Hebreas (Luc. 1:46-55). Ne neca maʼ chiguichaganáʼ María José, qué ñé diʼ ángel que ra nuu José primeru, sínuque guyé ra nuu María para gábibe laa zapa Xiiñiʼ Dios (Luc. 1:26-33). Cumu runibiáʼ chaahuiʼ Jehová María la? gunna dxichi zannaxhii ne zapa Xiiñibe. Qué nusaana María de chuʼ gaxha de Jehová neca maʼ guti Jesús ne zeʼ guibáʼ (Hech. 1:14).

21. ¿Xi zanda guiziidiʼ ca hombre ni maʼ bichaganáʼ de ejemplu stiʼ María?

²¹ ¿Xi zanda guiziidiʼ ca hombre ni maʼ bichaganáʼ? Rudii gustu ti hombre ni maʼ bichaganáʼ guʼyaʼ nanna xheelaʼ de Biblia. Qué rituí diʼ lube ganna xheelabe jma que laabe. Cumu runibiáʼ xheelabe ni ná Biblia la? nánnabe zacané nga familia stibe. Nánnabe neca jma xadxí ziné hermana ca de cayuni estudiar, hombre ca nga naquiiñeʼ guni adoración en familia ne guni xcaadxi cosa ti chuʼ familia stiʼ gaxha de Jehová (Efes. 6:4).

22. ¿Xi zanda guiziidiʼ ca gunaa ni maʼ bichaganáʼ de ejemplu stiʼ María?

²² ¿Xi zanda guiziidiʼ ca gunaa ni maʼ bichaganáʼ? Ti gunaa ni maʼ bichaganáʼ naquiiñeʼ guni respetar autoridad stiʼ xheelaʼ, peru laaca naquiiñeʼ guni xiixa para gaca fe stibe jma naguidxi (Gál. 6:5). Nga runi, naquiiñeʼ cueebe tiempu para guni estudiarbe laasibe ne guiníʼ íquebe lu ni cayuundabe. Nga zacané laabe para cadi gusaana de gannaxhiibe ne guni respetarbe Jehová ne guibánibe nayecheʼ purtiʼ cuzuubabe stiidxaʼ xheelabe.

23. Ca gunaa ni runi respetar autoridad stiʼ xheelaʼ, ¿ximodo racané ni laacaʼ, familia sticaʼ ne congregación?

²³ Ca gunaa ni nadxii Jehová, runi respetarcaʼ xheelacaʼ ne jma nayecheʼ nabánicaʼ que ca gunaa ni qué rúnini. Laaca rudiicabe ti ejemplu galán ca hombre ne ca gunaa jma nahuiiniʼ ne racanécabe chuʼ familia stícabe nayecheʼ ne chuʼ congregación tobi si (Tito 2:3-5). Tiempu riʼ, jma stale gunaa nuu ndaaniʼ xquidxi Jehová (Sal. 68:11). Gastiʼ naca pa hombre o pa gunaa laanu, guiranu nápanu ti dxiiñaʼ nabé risaca ndaaniʼ congregación. Lu sti artículo ca zadúʼyanu xi dxiiñaʼ ca.