1. ¿Pabiáʼ risaca xquendanabáninu para Jehová?

 GUNÍʼ ique bisigaʼdeʼ ti xhamíguluʼ lii ti cuadru ni maʼ nayooxhoʼ, peru nabé risaca. Neca napa ni stale mancha ne maʼ biete color stini, peru risaca ni stale millón de dólar. ¿Cadi dxandíʼ ñápaluʼ ni ne nusisácaluʼ ni stale la? Jehová laaca maʼ bisigaʼdeʼ laanu xiixa nabé risaca, laani nga guendanabani stinu. Ne nabé risaca ni para laabe dede bidiibe Xiiñibe pur laanu (Juan 3:16).

2. Casi ná 2 Corintios 7:1, ¿xi ribeza Jehová gúninu?

² Ra nuu Jehová «cadá guendanabani» (Sal. 36:9). Nanna apóstol Pablo zacá ni ora guníʼ: «Purtiʼ laabe bizaʼbe laanu, pur laabe nabáninu ne riniibinu» (Hech. 17:25, 28). Nga runi zanda guininu ti regalu stiʼ Dios nga guendanabani. Né stale cariñu rudiibe laanu ni caquiiñenu para guibáninu (Hech. 14:15-17). Peru qué zuni Jehová ti milagru para cadi gátinu, sínuque ribézabe gápanu laanu para chuʼnu nazaaca ne gúninu xhiiñabe (biindaʼ 2 Corintios 7:1). Yanna, ¿xiñee naquiiñeʼ gápanu laanu para chuʼnu nazaaca, ne ximodo zanda gúninu ni yaʼ?

3. ¿Xiñee racaláʼdxinu chuʼnu nazaaca?

³ Racaláʼdxinu chuʼnu nazaaca purtiʼ riuuláʼdxinu gúninu xhiiñaʼ Jehová biaʼ gándatiʼ (Mar. 12:30). Cumu racaláʼdxinu gudiʼnu cuerpu stinu «casi ti sacrificiu nabani, santo ne ni chuulaʼdxiʼ Dios», nga runi qué rúninu xiixa cosa ni guniná cuerpu stinu (Rom. 12:1). Dxandíʼ, neca peʼ gápanu laanu stale, ziuu ora zaca huaranu. Peru rúninu stipa para chuʼnu nazaaca purtiʼ racaláʼdxinu guluinu  Bixhózenu ni nuu guibáʼ rusisácanu guendanabani ni bisigaʼdeʼ laanu.

4. ¿Xi gucalaʼdxiʼ rey David?

⁴ Guizáʼ bisisaca rey David guendanabani ni bidii Dios laa. Ngue runi bicaa: «¿Xi raca ganar né guendaguti stinneʼ, pa guieeteʼ ndaaniʼ baʼ? ¿Ñee zusisaca yu dé ca lii la? ¿Zaníʼ ni nácaluʼ fiel la?» (Sal. 30:9). Zándaca bicaabe ca diidxaʼ riʼ tiempu mayaca gátibe. Neca zaqué gucaláʼdxirube guibánibe para gúnibe ni ná Jehová. Laanu laaca ngaca racaláʼdxinu.

5. ¿Xi zanda gúninu pa maʼ huaniisinu o huaranu?

⁵ Pa maʼ huaniisinu o nápanu xiixa guendahuará, zándaca maʼ qué ganda gúninu ca cosa ni bíninu dxiqué, ne pur nga guireʼnu gana ne chuʼnu triste. Peru neca zacá, naquiiñeʼ gúninu stipa gápanu laanu para chuʼnu nazaaca. ¿Xiñee yaʼ? Purtiʼ neca maʼ huaniisinu o huaranu, zándaruʼ gusisácanu Jehová cásica biʼniʼ rey David. ¡Ratadxí ladxidoʼno gánnanu nadxii Dios laanu ne rusisaca laanu neca nácanu binni ruchee! (Mat. 10:29-31). Ne tantu nadxiibe laanu, dede maʼ biʼniʼ prometerbe zusibánibe laanu pa gueeda gátinu (Job 14:14, 15). Laga nabáninu, nabé risaca gápanu laanu ne chuʼnu nazaaca.

6. Ora guiníʼ íquenu xi guidoʼno ne pabiáʼ guidoʼno ne guideʼnu, ¿xi ribeza Jehová gúninu?

⁶ Cadi naca diʼ Biblia ti libru de medicina, ninca ti libru ni rabi laanu xi guidoʼno ne xi cadi guidoʼno, peru rusiidini laanu ximodo ruuyaʼ Jehová ca cosa riʼ. Rudiini laanu conseju riʼ: «Bixeleʼ de ca cosa ni zándaca guniná cuerpu stiluʼ» (Ecl. 11:10). Lade ca cosa ni zanda cuʼ xquendanabáninu ra naxoo ne ni ruzeeteʼ Biblia cadi jneza nga, guidoʼ xhaatanu ne xhúdxinu (Prov. 23:20). Nga runi, ora guiníʼ íquenu pabiáʼ chiguidoʼno ne chiguideʼnu, ribeza Jehová gucueezanu laca laanu (1 Cor. 6:12; 9:25).

7. ¿Ximodo zanda chinándanu ni ná Proverbios 2:11 ra guicaanu decisión ni zacané laanu chuʼnu nazaaca?

⁷ Naquiiñeʼ guiníʼ íquenu jneza ora guicaanu xiixa decisión purtiʼ zacá zusihuínninu cudiʼnu xquixe peʼ Dios pur guendanabani ni bisigaʼdeʼ laanu (Sal. 119:99, 100; biindaʼ Proverbios 2:11). Guzéʼtenu ti ejemplu, ora guiníʼ íquenu xi guidoʼno naquiiñeʼ gácanu binni nuu xpiaaniʼ, casi pa riuuláʼdxinu ti guendaró peru nánnanu runinani laanu, ni jma jneza nga cadi guidoʼno ni. Laaca nácanu binni nuu xpiaaniʼ ora rúninu stipa pur guiziiláʼdxinu biaʼ caquiiñeʼ, gúninu ejerciciu, gusianu cuerpu stinu ne gusianu ra lídxinu.

8. Casi rusiidiʼ Biblia, ¿pabiáʼ risaca para Jehová gápanu laanu?

⁸ Bidii Jehová ley ca israelita para cadi guizaacacaʼ xiixa accidente ra lídxicaʼ o ra cayúnicaʼ dxiiñaʼ (Éx. 21:28, 29; Deut. 22:8). Pa gueeda guuti tuuxa ti binni pur accidente, zapa guendanagana naroʼbaʼ (Deut. 19:4, 5). Ne Ley que ná naquiiñeʼ gaca castigar tuuxa ni guniná ti baʼduhuiiniʼ ni caʼruʼ gale neca gaca ni pur accidente (Éx. 21:22, 23). Rusiidiʼ Biblia laanu racalaʼdxiʼ Jehová gápanu laanu para cadi guizaacanu xiixa accidente.

9. ¿Xi naquiiñeʼ gúninu para cadi guizaaca xiixa accidente? (Biiyaʼ ca imagen ca).

⁹ Rusihuínninu rudiʼnu xquixe peʼ  Dios pur guendanabani bisigaʼdeʼ laanu ra chuʼnu cuidadu ti cadi guizaaca xiixa accidente ra lídxinu ne ra rúninu dxiiñaʼ. Guzéʼtenu ti ejemplu, naquiiñeʼ guindísanu ca cosa ni naduxhuʼ, ca producto químicu o medicina para cadi guicaa ca baʼduhuiiniʼ ca ni. Ne ora chisáʼbinu ca cosa ni bizéʼtenu riʼ, gápanu stale cuidadu cadi cuʼnuʼ ca ni ti lugar ra gúʼyacabe ca ni. Laaca rápanu stale cuidadu ora riquiiñenu bele, xiixa herramienta eléctricu ne xiixa cosa ni nandáʼ ne qué rusaananu ca ni ra tiica ne modo tiica si. Laaca cadi naquiiñeʼ gusanu carru stinu pa bideʼnu xiixa medicina nadipaʼ, pa bideʼnu nisa dxuʼniʼ o maʼ bidxáganu purtiʼ qué huayásinu galán, ninca qué zanaazenu teléfono stinu laga zigusanu.

10. ¿Xi zanda gúninu ante ne ora maʼ cayaca ti emergencia ni cuʼ xquendanabáninu ra naxoo?

¹⁰ Nuu biaje qué zanda gúninu gastiʼ para cadi guizaaca cosa ni cuʼ xquendanabáninu ra naxoo, casi ca desastre  natural, xiixa epidemia ne ora ridinde binni. Peru ora guizaaca ca cosa riʼ, naquiiñeʼ chinándanu ni gabi ca autoridad laanu para gulanu xquendanabáninu, casi ora gábicabe laanu guiaananu ra lídxinu, guireʼnu de lugar ra nabézanu ne xcaadxi instrucción gudiicabe laanu (Rom. 13:1, 5-7). Laaca zanda chuʼnu listu ante guizaaca xiixa emergencia ra chinándanu ni gabi ca autoridad laanu. Ti cosa ni zanda gúninu nga, gápanu nisa ne guendaró ni qué raca feu ne ti botiquín de primeros auxilios.

11. ¿Xi zanda gúninu pa nuu ti epidemia lugar ra nabézanu?

¹¹ Yanna, ¿xi zanda gúninu pa nuu ti epidemia lugar ra nabézanu yaʼ? Ni zanda gúninu nga chinándanu ni gabi ca autoridad laanu, casi quiʼbiʼ nanu, cadi chuʼnu gaxha de binni, iquiiñenu cubreboca ne chuʼnu cuarentena. Pa gúninu ca cosa riʼ, zusihuínninu rusisácanu guendanabani ni bisigaʼdeʼ Dios laanu.

12. ¿Ximodo racané Proverbios 14:15 laanu gápanu cuidadu né información ni gunadiáganu ora chuʼ xiixa emergencia?

¹² Ora rizaaca xiixa emergencia, zándaca gunadiáganu información ni cadi jneza ni gabi ca xhamígunu laanu, ca binni ni runibiaʼnu o ca mediu de comunicación. Lugar de guni crenu guiráʼ ni gunadiáganu, ni jma jneza nga gucaʼdiáganu ni guiníʼ Gobiernu o ca doctor (biindaʼ Proverbios 14:15). Laaca naquiiñeʼ chinándanu ca instrucción ni rudii Grupu ni Zániru ne ca sucursal ora gábicaʼ laanu ximodo gúninu ca reunión ne guni predicarnu, purtiʼ rúnicaʼ stipa iquiiñecaʼ información biaʼsi ora ricaacaʼ ca decisión ca (Heb. 13:17). Ra gúninu ni nácabe, rápanu laanu ne rápanu xcaadxi, ne zándaca guiníʼ binni cosa galán de ca testigu stiʼ Jehová (1 Ped. 2:12).

13. ¿Ximodo rusihuínninu rusisácanu guendanabani ora gabi ca doctor laanu guicanu rini?

¹³ Stale binni nanna qué ricá ca testigu stiʼ Jehová rini. Cumu rinándanu ley stiʼ Jehová ni caníʼ de tema riʼ, qué rinanu guicanu rini neca cadídinu lu ti emergencia (Hech. 15:28, 29). Peru qué riníʼ diʼ nga riuuláʼdxinu gátinu. Ni dxandíʼ nga rusisácanu guendanabani purtiʼ naca ni ti regalu stiʼ Dios. Nga runi ruyúbinu doctor ni naʼ guni tender laanu sin iquiiñeʼ rini.

14. ¿Xi zanda gúninu para cadi guni operárcabe laanu o gudiicabe laanu ti tratamientu?

¹⁴ Pa gápanu laanu ra gúninu ca ni bizéʼtenu lu artículo riʼ, zándaca qué zaquiiñeʼ gaca operarnu o guicaanu xiixa tratamientu para ti guendahuará malu. Ne pa caquiiñeʼ guni operárcabe laanu, jma nagueenda ziándanu pa gúpanu laanu dede ante. Ne pa gúninu stipa gápanu laanu ra lídxinu, ra rúninu dxiiñaʼ ne chinándanu ca ley stiʼ tránsitu, zándaca qué zápanu ti accidente ne qué zinécabe laanu de urgencia ra nuu doctor.

15. a) ¿Xiñee nabé risaca sánenu documentu ni rusiene qué zacanu rini ne guni actualizarnu ni? (Biiyaʼ ca imagen ca). b) Casi riete lu videu ca, ¿xi zacané laanu guicaanu decisión jneza ni caníʼ de rini?

¹⁵ Sti modo zanda gusihuínninu rusisácanu guendanabani nga ra guchanu documentu ni rusiene qué zacanu rini ne siempre chinenu ni ra tiica  chuunu. b Riquiiñeʼ documentu riʼ para guluinu maʼ gudixhe íquenu qué zacanu rini ne xi tratamientu zanda guicaanu ne xi qué zanda guicaanu. ¿Ñee nápaluʼ documentu riʼ la? Pa caquiiñeʼ guchaluʼ ni o guni actualizarluʼ ni, biʼniʼ ni nagueenda. Pa gucaʼnu decisión ni maʼ gucuaanu, qué zunítinu tiempu gusiénenu ca doctor xi decisión gucuaanu ne jma nagueenda zuni tendércabe laanu. Ne zacaneni laanu cadi gudiicabe laanu ti tratamientu ni zándaca guniná laanu. c

16. ¿Xi zanda gúniluʼ pa qué gánnaluʼ guchaluʼ documentu ni rusiene qué zacaluʼ rini?

¹⁶ Neca joven laanu o nazaacanu, guiranu zanda gápanu ti accidente o gaca huaranu (Ecl. 9:11). Nga runi nabé risaca gápanu documentu ni rusiene qué zacanu rini. Peru ¿pa qué gánnaluʼ ximodo guchaluʼ ni yaʼ? Cadi guizaaláʼdxiluʼ, zanda gacané ca ancianu de congregación stiluʼ lii. Peru qué zábicabe lii xi decisión guicaaluʼ, nga maʼ responsabilidad stiluʼ ni (Gál. 6:4, 5). Ni zanda gúnicabe nga, gacanécabe lii guiéneluʼ ca tratamientu ni nuu ne gucaaluʼ decisión stiluʼ lu documentu ca.

17. ¿Ximodo zanda gusihuínninu nácanu binni riuu razón ora maʼ caninu xi zanda gúninu para gápanu laanu?

¹⁷ Ni maʼ bizíʼdinu de lu Biblia racaneni laanu guicaanu decisión xi tratamientu chinándanu o ximodo gápanu laanu para chuʼnu nazaaca (Hech. 24:16; 1 Tim. 3:9). Ora guicaanu xiixa decisión o guinínenu ni xcaadxi binni, galán guietenaláʼdxinu ni ná Filipenses 4:5: «Guiráʼ binni naquiiñeʼ gunibiáʼ laatu casi binni riuu razón». Zusihuínninu nácanu binni riuu razón ra cadi chuʼ xhaatanu xizaa pur gápanu laanu para cadi guizaacanu xiixa, ninca qué zucaʼnu xcaadxi guiníʼ íquecaʼ casi riníʼ íquenu. Nadxiinu ne runi respetarnu ca hermanu stinu, neca maʼ gadxé decisión guicaacaʼ (Rom. 14:10-12).

18. ¿Ximodo zanda gudiʼnu xquixe peʼ Jehová pur bisigaʼdeʼ laanu guendanabani?

¹⁸ Casi guninu ra bizulú artículo riʼ, ra nuu Jehová nga cadá guendanabani. Zanda gusihuínninu cudiʼnu xquixe peʼ laabe pur guendanabani ni bisigáʼdebe laanu ne ra gúninu ni nabe de guidubi ladxidoʼno (Apoc. 4:11). Tiempu riʼ, ridxaagalunu guendahuará ne guendanagana, peru cadi zacá diʼ nga guníʼ ique Jehová nibáninu. Ne xquixe peʼ laabe maʼ cadi candaa zabáninu ndaaniʼ ti Guidxilayú ra maʼ qué ziuu yuubaʼ nin guendaguti (Apoc. 21:4). Laga guedandá dxi ca, gusisácanu guendanabani ni nápanu ne iquiiñenu ni para gúninu ni ná Jehová, Bixhózenu ni nuu guibáʼ.