1. Bizeeteʼ ti ejemplu para gusiéneluʼ xiñee risaca chinándanu ni gabi Jehová laanu.

 GUNÍʼ ique binítiluʼ ndaaniʼ ti guiʼxhiʼ ne raqué nuu stale maniʼ duxhuʼ, yaga ni napa venenu ne stale tipu manihuiiniʼ. Ne laaca zanda guirenda ti guié ñeeluʼ ne guiábaluʼ. ¿Cadi dxandíʼ ñuuláʼdxiluʼ ñacané tuuxa ni runibiáʼ lugar ca lii para cadi guiábaluʼ lu ca peligru ca la? Zeeda gaca guidxilayú riʼ casi guiʼxhiʼ ca. Laaca nuu stale peligru ni zanda guxheleʼ laanu de Jehová. Peru nuu tuuxa ni zanda gacané laanu: laabe nga Jehová. Laabe cayábibe laanu pa neza chuunu para cadi guiábanu lu ca peligru ca ne ganda chindanu lu guidxilayú cubi ra zabáninu para siempre.

2. ¿Ximodo rabi Jehová laanu xi naquiiñeʼ gúninu?

² ¿Ximodo rabi Jehová laanu ni caquiiñeʼ gúninu? Rúnibe ni ra riquiiñebe Stiidxabe. Peru laaca riquiiñebe binni para gúnibe ni. Riquiiñebe «mozo ni nuu xpiaaniʼ ne ni runi jneza» para gudii laanu guendaró espiritual ni racané laanu guicaanu decisión jneza (Mat. 24:45). Ne laaca riquiiñeʼ Jehová ca superintendente de circuito ne ca ancianu para cuʼcaʼ gana ne gudiicaʼ laanu conseju para gudxíʼlunu ca guendanagana stinu. Rudiʼnu xquixe peʼ Jehová pur caquiiñeʼ laacabe para gabi laanu xi naquiiñeʼ gúninu lu ca últimu dxi nagana nabáninu riʼ. Nga zacané laanu cadi gusaana de gaca xhamígunu laabe ne sanu lu neza ni ziné lu guendanabani.

3. ¿Xi zazíʼdinu lu artículo riʼ?

³ Neca zacá, zándaca ziuu biaje gaca nagana para laanu chinándanu ni gabi Jehová laanu, jmaruʼ si ora zeeda ni de binni ruchee. ¿Xiñee yaʼ? Purtiʼ zándaca qué ziuuláʼdxinu ni gábicabe laanu. O zándaca guiníʼ íquenu cadi para laanu ca conseju ca o qué zacané ca ni laanu, ne pur nga guni sentirnu cadi zeeda ca ni de Jehová. Óraca peʼ nga jma naquiiñeʼ gápanu confianza  Jehová nga cayabi xquidxi xi naquiiñeʼ guni, ne ni jma galán zanda gúninu nga chinándanu ni gábibe laanu o guía stibe. Lu artículo riʼ zadúʼyanu chonna cosa ni zacané laanu guiroobaʼ confianza ca: primé, ximodo gudxi Jehová xquidxi xi naquiiñeʼ guni dxiqué, guiropa, ximodo rabi Jehová laanu xi naquiiñeʼ gúninu yanna ne guionna, gunáʼ nga ca ndaayaʼ ni ricaanu ora qué rusaana de chinándanu ni gabi Jehová laanu.

XIMODO GUDXI JEHOVÁ GUIDXI ISRAEL XI NAQUIIÑEʼ GUNI

4, 5. ¿Ximodo bisihuinni Jehová caquiiñeʼ Moisés para gabi ca israelita xi naquiiñeʼ gúnicaʼ? (Biiyaʼ dibuju ca).

⁴ Gulí Jehová Moisés para cuee ca israelita de guidxi Egipto ne gucanebe laacaʼ gúʼyacaʼ laapebe nga caquiiñebe hombre ca para gabi laacaʼ xi naquiiñeʼ gúnicaʼ. Ne bisihuínnibe zacá ni ra biquiiñebe ti columna de za para gapa laacaʼ de gubidxa ne ti columna de bele para guzaaniʼ neza ra zizacaʼ huaxhinni (Éx. 13:21). Yenanda Moisés columna ca, ne pur ngue gunda yendanebe ca israelita que ruaa nisadóʼ Xiñáʼ. Guizáʼ bidxibi ca israelita que ora bíʼyacaʼ nanda ejércitu egipciu que laacaʼ, ne guníʼ íquecaʼ maʼ gastiʼ ra guilacaʼ purtiʼ nuu nisadóʼ que raqué ne qué gápacaʼ ra guxooñecaʼ. Guníʼ íquecabe cadi jneza biʼniʼ Moisés yené laacabe raqué. Peru qué nuchee diʼ Moisés purtiʼ Jehová peʼ nga bicaa laabe chinebe ca israelita que lugar ca (Éx. 14:2). Ne despué biʼniʼ Jehová ti milagru ni cadi cabézacabe para bilá laacabe (Éx. 14:​26-28).

⁵ Biaʼsi 40 iza yenanda Moisés columna de za que para biʼniʼ guiar xquidxi Dios lu desiertu. a Guyuu biaje bisaana Jehová columna que luguiáʼ tienda de lari stiʼ Moisés, ra zanda guʼyaʼ guirácabe ni (Éx. 33:​7, 9, 10). Ne de ra nuu columna que nga riniʼné Jehová Moisés ne despué rabi Moisés guidxi que xi instrucción cudii Jehová laacaʼ (Sal. 99:7). Napa ca israelita que stale prueba para guni crecaʼ caquiiñeʼ Jehová Moisés para gabi laacaʼ xi naquiiñeʼ gúnicaʼ.

6. ¿Xi biʼniʼ ca israelita que ora gudxi Jehová laacaʼ xi naquiiñeʼ gúnicaʼ? (Números 14:​2, 10, 11).

⁶ Triste guininu ni, peru qué nulabi stale de ca israelita que ca prueba ni biquiiñeʼ Jehová para gusihuinni maʼ gulí Moisés para gabi laacaʼ xi naquiiñeʼ gúnicaʼ (biindaʼ Números 14:​2, 10, 11). Stale biaje qué nulábicabe Moisés, ne pur nga qué nudii Jehová lugar ñuucabe ndaaniʼ Tierra Prometida (Núm. 14:30).

7. ¿Tuu nga ca ni bizuubaʼ stiidxaʼ Jehová? (Números 14:24; biiyaʼ imagen ca).

⁷ Peru guyuu caadxi israelita ni bizuubaʼ stiidxaʼ Jehová. Tobi de laacabe nga Caleb ne sicaríʼ guníʼ Jehová de laabe: «Caleb [ . . . ] qué nusaana de nuzuubaʼ stiidxaʼ» (biindaʼ Números 14:24). Guluu Dios ndaayaʼ laabe, dede bidii lugar cuibe paraa cuézabe ndaaniʼ guidxi Canaán (Jos. 14:​12-14). Cásica Caleb, ca israelita ni guyuu lu Tierra Prometida que, laaca bidiicaʼ lugar gabi Jehová laacaʼ xi gúnicaʼ. Gulí Jehová Josué para guiaana lugar stiʼ Moisés casi xaíque stiʼ guidxi Israel ne «nabé biʼniʼ respetárcabe laabe biaʼ dxi bibánibe» (Jos. 4:14). Ngue runi guluu Jehová ndaayaʼ laacabe ne bidii lugar chúʼcabe ndaaniʼ Tierra Prometida (Jos. 21:​43, 44).

8. ¿Ximodo gudxi Jehová xquidxi xi naquiiñeʼ guni tiempu guyuu rey ndaaniʼ guidxi israel? (Biiyaʼ imagen ca).

⁸ Gudiʼdiʼ si caadxi iza, gulí Jehová juez para gabi xquidxi xi naquiiñeʼ guni. Ne despué, para tiempu guyuu rey ndaaniʼ guidxi Israel gulibe profeta para guni dxiiñaʼ ca. Ca rey ni biyubi chuʼ gaxha de Jehová la? bicaadiágacaʼ ca  conseju ni bidii ca profeta que laacaʼ. Casi rey David la? guca humilde ne bicaadiaga ora guluu jneza profeta Natán laa (2 Sam. 12:​7, 13; 1 Crón. 17:​3, 4). Bicaadiaga rey Jehosafat ni gudxi profeta Jahaziel laa ne guluube gana ca binni de Judá gápacaʼ fe ca profeta stiʼ Dios (2 Crón. 20:​14, 15, 20). Ne tiempu gudiʼdiʼ rey Ezequías lu guendanagana, gunábabe profeta Isaías gacané laabe (Is. 37:​1-6). Ora qué rusaana ca rey que de chinándacaʼ ni gabi Jehová laacaʼ la? riguube ndaayaʼ laacaʼ ne rápabe guidubi naca guidxi que (2 Crón. 20:​29, 30; 32:22). Rihuinni dxíchica biquiiñeʼ Jehová ca profeta que para gabi xquidxi xi naquiiñeʼ guni. Neca zaqué, stale de ca rey ne ca israelita qué ninacaʼ nucaadiágacaʼ ca profeta que (Jer. 35:​12-15).

XIMODO GUDXI JEHOVÁ CA PRIMÉ XPINNI CRISTU XI NAQUIIÑEʼ GÚNICAʼ

9. ¿Ximodo gudxi Jehová ca xpinni Cristu de primé siglu que xi naquiiñeʼ gúnicaʼ? (Biiyaʼ imagen ca).

⁹ Lu primé siglu que, gudixhe Jehová chuʼ congregación. ¿Ximodo gudxi Jehová xquidxi xi naquiiñeʼ guni tiempu que yaʼ? Gulibe Jesús para gaca xaíque stiʼ congregación (Efes. 5:23). Peru nánnanu qué niniʼné diʼ Jesús cada tobi de ca xpinni Cristu que para gábibe laacaʼ xi naquiiñeʼ gúnicaʼ. Sínuque biquiiñebe ca apóstol ne ca ancianu de Jerusalén para guni dirigircaʼ dxiiñaʼ que (Hech. 15:​1, 2). Ne ndaaniʼ cada congregación guca nombrar ancianu para gacané ca hermanu que gánnacaʼ xi naquiiñeʼ gúnicaʼ (1 Tes. 5:12; Tito 1:5).

10. a) ¿Ñee yenanda ca xpinni Cristu de primé siglu ca instrucción ni gucuaacaʼ la? (Hechos 15:​30, 31). b) ¿Xiñee nuu tu laa qué ñuni cré biquiiñeʼ Jehová binni para gabi xquidxi xi guni dxiqué? (Biiyaʼ cuadru ni láʼ « Xiñee nuu tu laa qué runi cré riquiiñeʼ Jehová binni para gabi xquidxi xi naquiiñeʼ guni»).

¹⁰ ¿Ñee gucuaa ca xpinni Cristu de primé siglu ca instrucción ni bidiicabe laacaʼ la? Stale de laacaʼ né gana yenándacaʼ ni gúdxicabe laacaʼ. Ne biéchecabe «purtiʼ guluuni gana laacabe» (biindaʼ Hechos 15:​30, 31). Yanna, ¿ximodo cayabi Jehová xquidxi xi naquiiñeʼ guni ca dxi riʼ yaʼ?

XIMODO RABI JEHOVÁ LAANU XI GÚNINU YANNA

11. Biquiiñeʼ ti ejemplu para gusiéneluʼ ximodo cayuni guiar Jehová ca hombre ni caquiiñeʼ para gabi laanu xi gúninu.

¹¹ Ca dxi stinu riʼ, riquiiñeʼ Jehová Stiidxaʼ ne Xiiñiʼ, xaíque stiʼ congregación, para gabi  xquidxi xi guni. ¿Ñee nápanu prueba caquiiñeruʼ Jehová binni para gabi laanu xi caquiiñeʼ gúninu la? Nápanu pue. Guiníʼ íquenu ni bizaaca ra ziluxe siglu diecinueve. Biene Charles Russell ne ca xhamigu zaca iza 1914 ti iza nabé risaca para Reinu stiʼ Dios (Dan. 4:​25, 26). ¿Xiñee guníʼ íquecabe zacá yaʼ? Purtiʼ biʼniʼ estudiárcabe ca profecía ni zeeda lu Biblia. Ne nánnanu guluu Jehová ndaayaʼ dxiiñaʼ ni bíʼnicabe. Bihuinni maʼ bizulú cayuni mandar Reinu stiʼ Dios pur ni bizaaca lu iza 1914: bizulú Primera Guerra Mundial, guyuu epidemia, guca xu roʼ ne guyuu hambre (Luc. 21:​10, 11). Bihuinni dxíchica biquiiñeʼ Jehová ca hombre chaʼhuiʼ riʼ para gacané xquidxi.

12, 13. ¿Xi biʼniʼ ca hermanu lu Segunda Guerra Mundial para ganda gaca predicar ne gusíʼdinu binni jma jneza?

¹² Guiníʼ íquenu ti cosa ni bizaaca lu Segunda Guerra Mundial. Biʼniʼ estudiar ca hermanu ni nuu ra central mundial ni ná Apocalipsis 17:8 ne biénecabe qué zedandá diʼ Armagedón despué de guiluxe Segunda Guerra Mundial, sínuque ziuu ti tiempu ra qué zuchiiñaʼ gastiʼ laanu ne zuni predicarnu jma binni. Ngue runi gucuaa organización stiʼ Jehová ti decisión ni ruluíʼ cadi jneza. Bixhélecabe ti scuela para ca misioneru ti ganda guni predicarcaʼ ne chigusiidicaʼ stale lugar lu guidubi Guidxilayú, ne scuela ca nga Colegio Superior Bíblico de la Watchtower de Galaad. b Ne neca nuu guerra que biseendacabe caadxi hermanu gadxé gadxé guidxi. Gudixhe mozo ni nuu xpiaaniʼ gaca ti cursu para gacané ca publicador gusiidicaʼ jma jneza, biree lani Curso en el Ministerio Teocrático. c Gucané guiráʼ ndiʼ ca xpinni Jehová para dxiiñaʼ ni chigúnicaʼ despué.

¹³ Rihuinni dxíchica gudxi Jehová xquidxi xi naquiiñeʼ guni tiempu nagana ca. Despué de biluxe Segunda Guerra Mundial, randa runi predicar ca xpinni Jehová stale lugar sin gucueezacabe laacaʼ. Yanna riʼ, maʼ stale binni runibiáʼ Jehová ne cayaca predicar lu guidubi naca Guidxilayú.

14. ¿Xiñee zanda chinándanu ca instrucción ni rudii ca ancianu ne organización stiʼ Jehová laanu? (Apocalipsis 2:1; biiyaʼ imagen ca).

 ¹⁴ Ca dxi riʼ, ruyubi ca hermanu ni nuu lu Grupu ni Zániru gabi Cristu laacaʼ xi gúnicaʼ. Rúnicabe stipa gusihuinni ca instrucción ni rudiicabe laanu modo riníʼ ique Jehová ne Jesús. Ne riquiiñecabe ca superintendente de circuito ne ca ancianu para chindá ca instrucción riʼ ndaaniʼ ca congregación. d Nuu ca ancianu ungidu ne zaqueca guiráʼ xixé ca ancianu «ndaaniʼ náʼ [Cristu] ladu derechu» (biindaʼ Apocalipsis 2:1). Cumu imperfectu laacabe la? nuu biaje rucheecabe, cásica bizaaca Moisés, Josué ne ca apóstol (Núm. 20:12; Jos. 9:​14, 15; Rom. 3:23). Peru nánnanu cayabi Jesús mozo ni nuu xpiaaniʼ ne ca ancianu xi naquiiñeʼ gúnicaʼ ne qué zusaana de gúnibe ni «dede ora guiluxe guidxilayú riʼ» (Mat. 28:20). Nga runi nápanu stale razón para gápanu confianza caquiiñeʼ Jehová ca hermanu riʼ para gabi laanu xi naquiiñeʼ gúninu.

GUNÁʼ NGA CA NDAAYAʼ NI RICAANU ORA RINÁNDANU NI GABI JEHOVÁ LAANU

15, 16. ¿Xi riziidiluʼ de ejemplu stiʼ ca ni rinanda ni ná Jehová?

¹⁵ Ricaanu stale ndaayaʼ ora rinándanu ni gabi Jehová laanu. Casi Andy ne Robyn, xheelabe, gudixhe íquecabe guibaninécabe huaxiéʼ cosa (biindaʼ guiropa nota de estudiu stiʼ Mateo 6:​22, lu Biblia de estudiu diidxastiá). Ne ra bíʼnicabe ni gunda gucanécabe lu caadxi proyectu de construcción ni runi organización. Sicaríʼ guníʼ Robyn: «Huabézadu ndaaniʼ caadxi lugar nabé nahuiiniʼ ne stale biaje qué ñápadu ra gúnidu guendaró. Cumu nabé riuuladxeʼ cueeʼ foto la? gupaʼ stale cámara, peru gupa xidé bituaaʼ caadxi de laacani neca cayuubaʼ ladxiduáʼ. Gudixheʼ iqueʼ gacaʼ casi Sara, xheelaʼ Abrahán, cadi guuyadxieeʼ ca cosa ni bisaanaʼ, sínuque guiníʼ iqueʼ ni cabeza naa» (Heb. 11:15). ¿Nuucabe nayecheʼ pur decisión ni gucuaacabe ca la? Laca laabe guniʼbe: «Nabé nayecheʼ nuudu purtiʼ nánnadu cudiʼdu Jehová guiráʼ xixé ni nápadu. Cada biaje gúnidu xiixa dxiiñaʼ para Jehová, riníʼ íquedu ximodo zabánidu ndaaniʼ guidxilayú cubi ca». ¿Xi riníʼ ique Andy yaʼ? Laabe guniʼbe: «Nabé nayecheʼ nuudu purtiʼ caquíʼñedu tiempu ne stipa stidu para gúnidu xhiiñaʼ Jehová».

¹⁶ ¿Xi sti ndaayaʼ ricaanu ora qué rusaana de gúninu ni gabi Jehová laanu yaʼ? Guidúʼyanu ni bizaaca ti hermana láʼ Marcia. Dxi binduuxebe scuela, gudixhe íquebe gácabe precursora (Mat. 6:33; Rom. 12:11). Laabe guniʼbe: «Biʼniʼ ofrecércabe naa ti beca de tapa iza ra ti universidad. Peru cumu ni racalaʼdxeʼ ngue guneʼ  jma lu xhiiñaʼ Jehová la? guyaaʼ ti scuela ra zanda guiziideʼ ti dxiiñahuiiniʼ para gapaʼ ni guibaneniaʼ ne gacaʼ precursora. Laani nga tobi de ca decisión jma risaca ni maʼ gucuaaʼ lu xquendanabaneʼ. Yanna maʼ precursora regular naa, ne pur dxiiñaʼ stinneʼ napaʼ tiempu para gacaʼ voluntaria externa Betel ne laaca napaʼ xcaadxi privilegiu nabé sicarú».

17. ¿Xi xcaadxi ndaayaʼ ricaanu ora rúninu ni gabi Jehová laanu? (Isaías 48:​17, 18).

¹⁷ Rudii organización stiʼ Jehová laanu conseju ni rapa laanu para cadi guicá íquenu gápanu puru si cosa risaca ne para cadi guiábanu lu xcaadxi cosa ni zándaca gucaa laanu guchéʼnenu ca ley stiʼ Dios. Rié ni laanu galán ora rinándanu ni gabi Jehová laanu purtiʼ rápanu ti conciencia nayá ne qué riábanu lu guendanagana (1 Tim. 6:​9, 10). Nga racané laanu gúninu xhiiñaʼ Jehová sin chuʼ ni guchiiñaʼ laanu. Gástiruʼ sti cosa ni zanda gusiecheʼ laanu ne quixhedxí ladxidoʼno (biindaʼ Isaías 48:​17, 18).

18. ¿Xiñee racaláʼdxiluʼ gúniluʼ ni ná Jehová?

¹⁸ Zaquiiñeruʼ Jehová binni guidxilayú para gabi xquidxi xi naquiiñeʼ guni lu gran tribulación ne ora maʼ cayuni mandar Cristu lu guidxilayú riʼ pur ti mil iza (Sal. 45:16). Ca dxi ca, ¿ñee zinándanu ni gabi Jehová laanu neca ñuuláʼdxinu ñúninu sti cosa la? Pa dede ca yanna guzúʼbanu diidxaʼ la? qué zaca nagana para laanu gúninu ni despué. Nga runi, cadi gusaana de gúninu ni gabi Jehová laanu ne gucaʼdiáganu ca hombre ni maʼ gulibe para gapa laanu (Is. 32:​1, 2; Heb. 13:17). Nuu stale razón para gápanu confianza Jehová, Dios ni rabi laanu gunáʼ nga neza ra naquiiñeʼ sanu, ni racané laanu para cadi guiábanu lu ca peligru ni zanda guxheleʼ laanu de laa, ni cayacané laanu para chindanu lu guidxilayú cubi, ra zabáninu para siempre.