MIÉRCOLES 18 de enero de 2023, biree ti anunciu especial lu jw.org: biete maʼ naca hermanu Gage Fleegle ne Jeffrey Winder parte de Grupu ni Zániru stiʼ ca testigu stiʼ Jehová. Maʼ xadxí cayúnicabe xhiiñaʼ Jehová sin guixélecabe de laa.

Biniisi hermanu Fleegle ladu riaaziʼ gubidxa ndaaniʼ guidxi Pensilvania (Estados Unidos). Bixhózebe ne jñaabe nga bisiidiʼ laabe ni dxandíʼ. Dxi jovenhuiiniʼ laabe yendézacabe ndaaniʼ ti guidxihuiiniʼ ra caquiiñeʼ tu guni predicar. Ne guyuunísabe 20 de noviembre de 1988.

Siempre guluu bixhózebe ne jñaabe gana laabe para gúnibe xhiiñaʼ Jehová de tiempu completu. Runi invitárcabe ca superintendente de circuito ne ca betelita ra lídxicabe, raqué nga bidiibe cuenta pabiáʼ nayecheʼ nabani ca hermanu riʼ. Gúcabe precursor regular 1 de septiembre de 1989, cadi xadxí de guyuunísabe. Chupa iza despué bigaandabe ti meta ni maca gudixhe íquebe dxi nápabe 12 iza: gúnibe dxiiñaʼ Betel. Ne bizulú bíʼnibe dxiiñaʼ ndaaniʼ Betel de Brooklyn lu beeu octubre de 1991.

Raqué bíʼnibe dxiiñaʼ ndaaniʼ taller de encuadernación xhono iza, despué biʼniʼ asignárcabe laabe gúnibe dxiiñaʼ lu Departamento de Servicio. Tiempu que, guyuube ndaaniʼ ti congregación ra riníʼcabe diidxaʼ ruso. Lu iza 2006 bichaganabe Nadia, ne dede dxi que guirópacabe cayúnicabe dxiiñaʼ Betel. Laaca gucanécabe congregación portugués, ne jma de chii iza gucanécabe ndaaniʼ congregación diidxastiá. Despué de stale iza de bíʼnibe dxiiñaʼ lu Departamento de Servicio, bichaacabe laabe ra Oficina stiʼ Comité de Enseñanza ne despué biseendacabe laabe ra Oficina stiʼ Comité de Servicio. Ne lu beeu marzo de 2022 gúcabe tobi de ca ni racané lu Comité de Servicio stiʼ Grupu ni Zániru.

 Hermanu Winder la? biniisi ndaaniʼ guidxi Murrieta (California). Naca bixhózebe ne jñaabe testigu ne laaca nga bisiidicaʼ laabe ni dxandíʼ, ne guyuunísabe 29 de marzo de 1986. Ti beeu despué gúcabe precursor auxiliar ne cumu nabé guyuuláʼdxibe ni la? maʼ qué ninabe nusaanabe ni. Chupa chonna beeu despué, 1 de octubre de 1986, gúcabe precursor regular.

Dxi maʼ jovenhuiiniʼ hermanu Winder yegánnabe chupa bíʼchibe ni jma huaniisi que laabe, ni cayuni servir Betel. Ngue bicaa laabe quixhe íquebe guseendabe solicitud stibe ora maʼ bisaabe iza para ganda chuʼbe Betel. Ne lu beeu mayo de 1990 biʼniʼ invitárcabe laabe chebe Betel de Wallkill.

Gadxé gadxé asignación gúpabe raqué, guyuube lu Departamento de Limpieza, Departamento de la Hacienda ne ra Oficina de Betel. Bichaganabe Angela lu iza 1997, ne dede dxi que juntu cayúnicabe dxiiñaʼ Betel. Lu iza 2014 biseendacabe laacaʼ Warwick, ne raqué gucané hermanu Winder para gurí central mundial. Lu iza 2016 guyécabe Patterson, ra Centro Educativo de la Watchtower, laani nga lugar ra raca ca escuela ni runi xquidxi Dios, ne raqué gucanebe lu Departamento de Servicios de Audio y Video. Tapa iza despué bibiguétacabe Warwick, ne guca asignar hermanu Winder guni dxiiñaʼ ra Oficina stiʼ Comité de Personal. Lu beeu marzo de 2022, gúcabe tobi ni racané lu Comité de Personal stiʼ Grupu ni Zániru.

Naca ca hombre riʼ ti regalu nabé galán ni maʼ bidii Jehová laanu (Efes. 4:8). Guni orarnu para cuʼ Jehová ndaayaʼ ca hombre riʼ pur dxiiñaʼ nadipaʼ ni rúnicabe pur Reinu stiʼ Dios.