1. Casi ná 3 Juan 3, 4, ¿xi rusiecheʼ laanu?

¿ÑEE ruxuíʼlunu pabiáʼ biecheʼ apóstol Juan ora gunna cayúniruʼ ca xpinni Cristu ni gucanebe ni ná Jehová la? Para Juan, beeda gaca ca hermanu riʼ casi xiiñibe. Cumu gúpacabe stale guendanagana la? biʼniʼ apóstol riʼ stipa para gacané laacabe iguidxi fe stícabe. Laanu, laaca riéchenu ora riguixhe ique ca xiiñinu ne ca binni ni rudiʼnu estudiu gúnicaʼ ni ná Jehová ne cadi gusaanacaʼ laabe (biindaʼ 3 Juan 3, 4).

2. ¿Xiñee bicaa apóstol Juan chonna carta?

² Lu iza 98, zándaca nabeza apóstol Juan ndaaniʼ guidxi Éfeso o gaxha de raqué. Zándaca yendézabe raqué despué de bireebe cárcel lu isla stiʼ Patmos. Lu ca iza que, gucané espíritu santu stiʼ Jehová laabe para gucaabe chonna carta. Ne bicaabe cani para cuʼbe gana ca xpinni Cristu ti cadi guirá fe sticaʼ ne cadi gusaanacaʼ de sacaʼ lu ni dxandíʼ.

3. ¿Xi chonna pregunta zacábinu lu artículo riʼ?

³ Tiempu que, maʼ Juan si nga apóstol ni nabani, ne guyuube xizaa purtiʼ cusiidiʼ ca maestru falsu que ni cadi dxandíʼ ne cucaacabe ni ca hermanu de congregación (1 Juan 2:18, 19, 26). * Guníʼ ca apóstata riʼ runibiaʼcaʼ Dios, peru qué runi respetarcaʼ ni nabe. Lu artículo riʼ zadúʼyanu ca conseju ni bizeeteʼ Juan ne zacábinu chonna pregunta: ¿Xi raca significar sáʼ tuuxa lu ni dxandíʼ? ¿Xi guendanagana ridxaagalunu? Ne ¿ximodo gacanésaanu para cadi gusaana de sanu lu ni dxandíʼ?

4. Casi ná 1 Juan 2:3-6 ne 2 Juan 4, 6, ¿xi caquiiñeʼ gúninu para sanu lu ni dxandíʼ?

⁴ Para sanu lu ni dxandíʼ la? primeru caquiiñeʼ gánnanu  ni dxandíʼ, ni zeeda lu Biblia, Stiidxaʼ Dios. Laaca caquiiñeʼ guzúʼbanu stiidxaʼ Jehová (biindaʼ 1 Juan 2:3-6; 2 Juan 4, 6). Bisaana Jesús ti ejemplu galán para laanu. Nga runi, pa racaláʼdxinu guzúʼbanu stiidxaʼ Jehová la? caquiiñeʼ chinándanu ejemplu stiʼ Jesús dede ra gándatiʼ (Juan 8:29; 1 Ped. 2:21).

5. ¿Xidé caquiiñeʼ chuʼnu seguru?

⁵ Para cadi gusaana de sanu lu ni dxandíʼ la? caquiiñeʼ chuʼnu seguru Jehová nga Dios ni dxandíʼ ne dxandíʼ guiráʼ ni rábibe laanu lu Stiidxabe. Laaca caquiiñeʼ chuʼnu seguru Jesús nga Mesías ni maca nexheʼ gueeda. Tiempu riʼ, stale binni qué runi cré pa Jesús nga ni gulí Dios para gaca Rey lu Reinu stiʼ. Juan guníʼ nuu «stale tu canagusiguii», ne zanda gucaacaʼ ca xpinni Cristu cadi guni cré ni dxandíʼ de Jehová ne Jesús (2 Juan 7-11). Laaca bicaabe ca diidxaʼ riʼ: «¿Tuu nga ni rusiguii pue? ¿Ñee cadi laabe nga ni runi negar pa Jesús nga Cristu la?» (1 Juan 2:22). Para cadi quítecabe laanu la? caquiiñeʼ guidúʼndanu Stiidxaʼ Dios. Zacatiʼ nga zanda gunibiaʼnu Jehová ne Jesús (Juan 17:3). Ne óraca nga ziuʼnu seguru nápanu ni dxandíʼ.

6. ¿Xi guendanagana ridxaagalú ca joven xpinni Cristu?

⁶ Guiranu casi xpinni Cristu caquiiñeʼ gápanu laanu para cadi guicá modo riníʼ ique binni laanu (1 Juan 2:26). Ca joven xpinni Cristu nga ca ni jma naquiiñeʼ gápacaʼ laacaʼ para cadi guiábacaʼ lu trampa riʼ. Sicaríʼ guníʼ Alexia, * ti hermana de Francia de 25 iza: «Dxi guyaaʼ scuela, bineʼ estudiar evolución ne xcaadxi modo riníʼ ique binni. Ne ca ni biziideʼ riʼ, bicaa cani naa guiníʼ iqueʼ pa dxandíʼ nga ni caziideʼ de lu Biblia. Guyuu ora guyuuladxeʼ ca ni caziideʼ ra scuela. Peru guníʼ iqueʼ cadi caquiiñeʼ gucaadiaʼgaʼ siaʼ ni cusiidiʼ ca maestru que naa, sínuque laaca naquiiñeʼ gunadiagaʼ xi ná Jehová». Biʼniʼ estudiar Alexia libru La vida... ¿cómo se presentó aquí? ¿Por evolución, o por creación? Chupa chonna semana si maʼ qué ñápabe duda. Laabe guniʼbe: «Guyuaaʼ seguru rusiidiʼ Biblia ni dxandíʼ. Ne bidieeʼ cuenta ziuaaʼ nayecheʼ pa guneʼ respetar ca ley stibe ne zatadxí xquendabiaaneʼ».

7. ¿Xidé caquiiñeʼ chuʼ ca xpinni Cristu cuidadu, ne xiñee?

 ⁷ Guiranu ca xpinni Cristu, ca joven ne ca ni huaniisi, caquiiñeʼ chuʼnu cuidadu para cadi guiníʼ íquenu zanda gúninu cosa malu ne gúninu ni ná Jehová. Guníʼ Juan ca diidxaʼ riʼ ora bisiene qué zanda sáʼ tuuxa lu ni dxandíʼ ne guni cometer pecadu sexual (1 Juan 1:6). Pa racaláʼdxinu chuulaʼdxiʼ Jehová ni rúninu yanna ne lu ca dxi ni zeeda ca, cadi naquiiñeʼ guiaandaʼ laanu ruuyabe guiráʼ ni rúninu. Ne guirutiʼ zanda guni cometer ti pecadu nagaʼchiʼ, purtiʼ ruuyaʼ Jehová guiráʼ ni cazaaca (Heb. 4:13).

8. ¿Xi caquiiñeʼ gucáʼnanu?

⁸ Laaca caquiiñeʼ gucáʼnanu modo ruuyaʼ binni pecadu. Sicaríʼ bicaa apóstol Juan: «Pa guininu “Qué rucheʼnu”, caguítenu laca laanu» (1 Juan 1:8). Tiempu bibani Juan, bisiidiʼ ca apóstata zanda guni cometer tuuxa ti pecadu ne zándaruʼ gaca xhamigu Dios. Tiempu riʼ, laaca zacaca riníʼ ique stale binni. Riniʼcaʼ runi crecaʼ Dios, peru qué riuuláʼdxicaʼ ni rusiidibe de pecadu, jmaruʼ si de tema ni caníʼ de sexo. Para Jehová la? ti pecadu nga ca práctica sexual, peru nuu tu ná zanda guni prácticar binni cani pa nga nga ni racalaʼdxiʼ.

9. ¿Xi zabeendú ca joven pa gúnicaʼ ni ná Biblia?

⁹ Zándaca gaca nagana para caadxi joven xpinni Cristu gúʼyacaʼ sexo modo ruuyaʼ Jehová ni, purtiʼ ra scuela ne ra dxiiñaʼ ridxaagacabe binni ni racalaʼdxiʼ gucaa laacabe guchaacabe modo riníʼ íquecabe. Ndiʼ nga ni bizaaca ti xpinni Cristu láʼ Aleksandar. Sicaríʼ guniʼbe: «Caadxi dxaapahuiiniʼ ni riniáʼ scuela, gucaláʼdxicaʼ nucaacaʼ naa gapaʼ relación sexual né laacaʼ. Ne gúdxicaʼ naa, cumu qué gapaʼ novia, zándaca muxeʼ naa». Zándaca lii, joven, laaca ridxaagaluluʼ  guendanagana riʼ. Peru pa gúniluʼ ni ná Biblia, qué zuchiiñaʼ xquendabiaaniluʼ lii, ziuuluʼ nazaaca, qué zacanaluʼ ne qué zusaana de gaca xhamíguluʼ Jehová. Ne ra jma gucaanaluʼ ca tentación riʼ, jma cadi nagana zaca para lii gúniluʼ ni jneza. Cadi guiaandaʼ lii, cumu caguiteʼ Binidxabaʼ xpiaaniʼ binni la? cadi jneza modo ruuyacabe sexo. Nga runi, ora qué riníʼ íqueluʼ modo riníʼ ique binni, cayuni ganarluʼ Binidxabaʼ (1 Juan 2:14).

10. ¿Ximodo racané 1 Juan 1:9 laanu gúninu ni ná Jehová né ti conciencia nayá?

¹⁰ Nánnanu napa Jehová derechu para guiníʼ xii nga ti pecadu. Ne rúninu stale stipa para cadi gúninu cani. Peru ora rucheʼnu la? rábinu ni laabe lu oración (Biindaʼ 1 Juan 1:9). Ne pa ti pecadu nabé grave ni la? ruyúbinu gacané ca ancianu laanu, purtiʼ maʼ gulí Jehová laacabe para gápacabe laanu (Sant. 5:14-16). Ne cadi naquiiñeʼ gudiʼnu lugar cuee ca cosa malu ni bíninu dxiqué gana laanu. ¿Xiñee coʼ yaʼ? Purtiʼ bidii Jehová, Bixhózenu ni nadxii laanu Xiiñiʼ para gati pur ca pecadu stinu. Ora riníʼ Jehová zuni perdonar ca pecador la? runi cumplir ni riníʼ. Nga runi zanda gúninu ni nabe né ti conciencia nayá (1 Juan 2:1, 2, 12; 3:19, 20).

11. ¿Xi zanda gúninu para cadi gusirá ca apóstata fe stinu?

¹¹ Nuuruʼ sti cosa ni caquiiñeʼ gucáʼnanu: ni riníʼ ca apóstata. Dede dxi bizulú guyuu congregación stiʼ ca xpinni Cristu la? huaquiiñeʼ Binidxabaʼ stale binni para gusiracaʼ fe stiʼ ca xpinni Cristu ni naca fiel. Nga runi caquiiñeʼ gánnanu pora nga caníʼ tuuxa ni dxandíʼ ne pora nga cusiguii. * Zanda iquiiñeʼ ca xhenemígunu Internet ne ca red social para  gucaacaʼ laanu maʼ cadi gápanu confianza Jehová ne maʼ cadi gannaxhiinu ca hermanu stinu. Gucáʼnanu ca guendarusiguii riʼ, purtiʼ zeedacani de Binidxabaʼ (1 Juan 4:1, 6; Apoc. 12:9).

12. ¿Xiñee caquiiñeʼ gaca fe stinu naguidxi?

¹² Para guni huantarnu ora gucaalú Binidxabaʼ laanu la? caquiiñeʼ gápanu confianza Jesús ne gápanu confianza laabe nga caquiiñeʼ Jehová para guni cumplir ni maʼ guníʼ. Laaca caquiiñeʼ gápanu confianza mozo ni nuu xpiaaniʼ ne ni runi jneza ni maʼ gulí Jehová para guni dirigir organización stiʼ (Mat. 24:45-47). Pa guidúʼndanu Biblia guiráʼ dxi la? zaca confianza ca jma naguidxi ne zaca fe stinu naguidxi casi ti yaga ni napa xcu gueteʼ. Peru guníʼ Pablo de ni cuzéʼtenu riʼ ora bicaa ra nuu ca hermanu de Colosas, sicaríʼ bicaabe: «Cumu maʼ xpinni Cristu Jesús, Señor stinu, laatu la? cadi guixéletu de laa. Ne casi maʼ biziiditu, fe ni nápatu Cristu naquiiñeʼ gacaneni laatu gápatu stipa ne guzuhuaatu dxiichiʼ casi ti yaga ni napa xcu gueteʼ» (Col. 2:6, 7). Nga runi, pa gaca fe stinu naguidxi la? nin ti cosa guni Binidxabaʼ ne ca xpinni qué zucaa laanu guixélenu de lu neza stiʼ Dios (2 Juan 8, 9).

13. Laanu, ca xpinni Cristu, ¿xi nánnanu, ne xiñee?

¹³ Nánnanu zaca nanalaʼdxiʼ binni guidxilayú laanu (1 Juan 3:13). Ne Juan guníʼ «guidubi guidxilayú riʼ nuuni lu náʼ Binidxabaʼ» (1 Juan 5:19). Maʼ cadi candaa zanitilú guidxilayú riʼ, nga runi jmaruʼ si cadxiichi Binidxabaʼ (Apoc. 12:12). Cadi ruyubi si Binidxabaʼ modo gusaba laanu sin gudiʼnu cuenta, ora riquiiñeʼ ca pecadu sexual ne ca guendarusiguii stiʼ ca apóstata, sínuque laaca riquiiñebe stipa stibe. Nánnabe maʼ huaxiéʼ tiempu nápabe, nga runi cuyúbibe modo gucueezabe predicación o gusirabe fe stinu. Nga runi, qué ridxagayaanu guni prohibir o gucueeza gobiernu dxiiñaʼ stinu. Peru neca zacá, cayuni huantar ca hermanu stinu. Rusihuínnicabe, intiica cosa guni Binidxabaʼ laanu, zándaruʼ gácanu fiel.

14. ¿Xi zanda gúninu para gacanenu ca hermanu stinu sacaʼ lu ni dxandíʼ?

¹⁴ Zanda gacanenu ca hermanu stinu sacaʼ lu ni dxandíʼ pa guianu laacaʼ (1 Juan 3:10, 11, 16-18). Caquiiñeʼ gannaxhiisaanu ora nuunu galán ne ora cadídinu ra nagana. Guzéʼtenu ti ejemplu, ¿ñee runibiaʼnu tuuxa hermanu ni maʼ guti ti familia stiʼ ne caquiiñeʼ tu quixhedxí ladxidóʼ o gacané laa la? ¿Ñee gúnnanu guca ti desastre natural ne caquiiñeʼ ca hermanu stinu gacanenu laacaʼ cuí Yoo stiʼ Reinu sticaʼ o lídxicaʼ la? Zanda gábinu ca hermanu riʼ diidxaʼ ni uguu gana laacaʼ, peru zusihuínninu nadxiinu ne rianu laacabe pa gacanenu laacabe.

15. Casi ná 1 Juan 4:7, 8, ¿xi caquiiñeʼ gúninu?

¹⁵ Ora nadxiisaanu la? rinándanu ejemplu stiʼ Bixhózenu ni nuu guibáʼ ni nadxii laanu (biindaʼ 1 Juan 4:7, 8). Ti modo zanda gusihuínninu guendarannaxhii nga ora guni perdonarnu xcaadxi. Guzéʼtenu ti ejemplu, pa guniná tuuxa laanu la? guendarannaxhii ca zucaa laanu guni perdonarnu laabe ne gusiáʼndanu ni bíʼnibe laanu (Col. 3:13). Guidúʼyanu ni bizaaca ti hermanu láʼ Aldo. Bidxiichibe ora binadiágabe guníʼ ti hermanu ni runi respetarbe mal de ca binni  xquídxibe. Sicaríʼ guníʼ Aldo: «Stale biaje gunabaʼ Jehová cadi guiníʼ iqueʼ mal de hermanu riʼ». Peru bíʼnibe sti cosa: biʼniʼ invitarbe hermanu riʼ guireené laabe predicación. Óraque bisiénebe laa ximodo cayuni sentirbe. Laaca guníʼ Aldo: «Ora bidii hermanu que cuenta ximodo bineʼ sentir pur ni guníʼ la? gunábabe perdón naa. Pur modo caniʼbe bidieeʼ cuenta nuube arrepentidu de guidubi ladxidoʼbe. Biʼniʼ chaahuidu guendanagana que ne bisiáʼndadu ni guca que».

16, 17. ¿Xi caquiiñeʼ quixhe íquenu gúninu?

¹⁶ Nabé gunnaxhii apóstol Juan ca hermanu stiʼ ne gucalaʼdxiʼ ñaca fe stícabe naguidxi. Ne bisihuínnibe ni pur guionnaʼ carta ni bicaabe pur espíritu santu. Riéchenu stale ora ránnanu ca hombre ne ca gunaa ni cheʼ guibáʼ para guni mandarné Cristu laaca nácacaʼ casi apóstol Juan (1 Juan 2:27).

¹⁷ Gusisácanu ca conseju ni maʼ bizíʼdinu lu artículo riʼ. Quixhe íquenu sanu lu ni dxandíʼ ne guzúʼbanu stiidxaʼ Jehová lu guiráʼ ni gúninu. Guni estudiarnu Stiidxaʼ Dios ne gápanu confianza ni cá luni. Guquídxinu fe ni nápanu Jesús. Gucáʼnanu modo riníʼ ique binni ne ni riníʼ ca apóstata. Cadi guiníʼ íquenu zanda gúninu cosa malu ne gúninu ni ná Jehová ne cadi guiábanu lu pecadu. Gudiʼnu lugar gacané ca ley stiʼ Jehová laanu. Ne gacanenu ca hermanu stinu cadi guixélecaʼ de Jehová ora guni perdonarnu ca ni guni laanu xiixa ne gacanenu ca ni caquiiñeʼ tu gacané laacaʼ. Nga runi, intiica prueba tídinu, qué zusaananu de sanu lu ni dxandíʼ.