Guleʼ lu iza 1954 ndaaniʼ guidxi Saint Paul (Minnesota), Estados Unidos, católica familia stinneʼ ne cadi ricu laadu peru laaca cadi pobre laadu. Gaayuʼ xiiñiʼ jñaa ne bixhozeʼ, ne naa nga ra guiropa. Dxi nahuiineʼ bineʼ estudiar ra scuela católica ne gucaʼ tobi de ca xcuidihuiiniʼ ni racané cura ra yuʼduʼ peru huaxiéʼ gunnaʼ de Biblia. Neca nannaʼ nuu ti Dios ni bizáʼ guiráʼ ni nuu maʼ qué ñapaʼ fe ni rusiidiʼ yuʼduʼ.

Lu primé iza de cayuneʼ estudiar ra scuela William Mitchell para gacaʼ abogadu, bixhidxináʼ ca testigu stiʼ Jehová ra lidxeʼ. Cumu caguiibeʼ lari la? guníʼcabe né diidxaʼ nadóʼ mejor ti ibiguétacabe sti biaje. Ora bibiguétacabe gunabadiidxaʼ laacabe chupa cosa: «¿Xiñee jma galán ribani binni malu que binni ni nachaʼhuiʼ?» ne «¿Xi caquiiñeʼ guni tuuxa para guibani nayecheʼ?». Bisaananécabe naa libru La verdad que lleva a vida eterna ne Traducción del Nuevo Mundo de las Santas Escrituras, verde pasta stini. Laaca gudxeʼ laacabe zaa guni estudiarnécabe naa. Ora cayuneʼ estudiar guizáʼ  guyuuladxeʼ guiráʼ ni caziideʼ. Bisiidicabe naa Reinu stiʼ Dios nga gobiernu ni caquiiñeʼ guiráʼ binni, ne laani zaguixhe chaahuiʼ ni guiráʼ cosa ni cadi jneza nuu lu Guidxilayú. Bieneʼ qué zanda guni chaahuiʼ ca gobiernu ca guendanagana stinu, ne ni cusaananécabe laanu nga yuubaʼ, guendananá, cosa ni cadi jneza ne desgracia.

Ra bizulú iza 1982, gucaʼ dedicar Jehová ne guyuaanisaʼ iza queca lu ti Asamblea de Distrito ni biree lá «Verdad del Reino» ndaaniʼ estadiu St. Paul Civic Center. Ti semana despué bibiguetaʼ ra scuela que para guneʼ examen ti ganda guneʼ dxiiñaʼ de abogadu. Ne ra bizulú beeu octubre gunnaʼ gudideʼ examen que.

Ra asamblea que binebiaʼyaʼ Mike Richardson, ti hermanu ni cayuni dxiiñaʼ Betel de Brooklyn (Nueva York) ne gúdxibe naa bizulú ti departamentu de asuntos legales raqué. Óraque bietenaladxeʼ ca diidxaʼ guníʼ eunuco etíope lu Hechos 8:36 ne guníʼ iqueʼ: «¿Xi cucueeza naa para chiguneʼ servir lu Departamento de Asuntos Legales yaʼ?» Ngue runi, bichayaʼ solicitud stinneʼ para chaaʼ Betel.

Qué ñuulaʼdxiʼ bixhozeʼ ne jñaaʼ gucaʼ testigu stiʼ Jehová. Gunabadiidxaʼ bixhozeʼ naa xi zabeenduáʼ né carrera stinneʼ pa guneʼ dxiiñaʼ Betel. Gudxeʼ laabe de voluntariu nga chiguneʼ dxiiñaʼ ne 75 dólar nga chigudiicabe naa ti beeu, biaʼ ca nga rudiicabe ca betelita dxiqué.

Bineʼ siaʼ caadxi dxiiñaʼ ni caquiiñeʼ guneʼ ndaaniʼ ti tribunal, lu iza 1984 bizulú bineʼ servir Betel ni nuu Brooklyn. Biʼniʼ asignárcabe naa Departamento de Asuntos Legales. Ni biziideʼ ra bineʼ dxiiñaʼ ndaaniʼ tribunal que gucané ni naa dxi bineʼ dxiiñaʼ Betel.

Lu beeu noviembre de iza 1983, guzíʼ ca testigu stiʼ Jehová Teatro Stanley, ni nuu Jersey City (Nueva Jersey). Gunabaʼ ca hermanu que permisu ca autoridad para guni chaahuicaʼ biaaniʼ ne nisa stini. Ora guyécabe ra nuu ca autoridad que bisiénecabe laacaʼ zaquiiñeʼ ca testigu stiʼ Jehová lugar que para gápacaʼ asamblea sticaʼ. Peru gúpacabe ti guendanagana. Napa guidxi que ti ley ra ná, qué zanda guidagulisaa xiixa religión ndaaniʼ guidxi que, sínuque naquiiñeʼ gúnicabe ni fuera de lugar que. Ne cumu nuu teatro que ndaaniʼ peʼ guidxi ra nuu jma negocio la? qué nudiicabe permisu laacaʼ. Guyé ca hermanu que nezalú juez sti biaje peru laaca qué nulábicabe laacaʼ.

 Primé semana yendayaʼ Betel, yenécabe asuntu que ra nuu tribunal federal stiʼ distrito que. Cumu chupa iza bineʼ dxiiñaʼ ra tribunal federal stiʼ distrito Saint Paul (Minnesota) la? runebiaʼyaʼ ca tipu guendanagana riʼ. Tobi de ca hermanu abogadu que guníʼ huaquiiñecabe Teatro Stanley para gúnicabe sti cosa casi gúʼyacabe película dede gúnicabe ti conciertu de rock. Yanna, ¿xiñee nácabe cadi jneza iquiiñeʼ ti religión ni para guidagulisaa raqué yaʼ? Biiyaʼ tribunal que casu stícabe, ne guníʼ cadi cayuni respetar Jersey City libertad ni napa religión ca para guidagulisaa, ne biʼniʼ mandárcabe ca autoridad que gudii permisu ca hermanu que. Zaqué nga biiyaʼ modo riguu Jehová ndaayaʼ departamentu legal ni napa organización stiʼ para cadi guiaanadxí de gaca xhiiñaʼ. Guizáʼ nayecheʼ guyuaaʼ purtiʼ gunda gucaniáʼ neca caadxi.

Bizulú biʼniʼ chaahuiʼ ca hermanu que edificiu riʼ ne bilúxecabe ni menu de ti iza. Guca graduación stiʼ clase 79 de Scuela de Galaad 8 de septiembre iza 1985, ne binibiáʼcabe lugar que casi Salón de Asambleas de Jersey City. Guizáʼ nayecheʼ guyuaaʼ purtiʼ para Jehová ngue bineʼ dxiiñaʼ ne jma nayecheʼ guyuaaʼ que dxi bineʼ dxiiñaʼ de abogadu ante chaaʼ Betel. Qué niníʼ iqueʼ pa chigudiiruʼ Jehová naa jma privilegiu casi ni bineʼ riʼ.

Lu ca iza 1980, qué ñuni respetar ca doctor ne ca hospital ora gunabaʼ ca testigu stiʼ Jehová ni maʼ huaniisi cadi guicacaʼ rini. Ne ca gunaa ni naca xiiñiʼ jma gúpacaʼ guendanagana, purtiʼ ca juez que nacaʼ qué gápacabe derechu guiníʼcabe qué zacácabe rini, purtiʼ pa gueeda gáticabe ziaana ca baʼduhuiiniʼ que sin jñaacaʼ.

Ti dxi, 29 de diciembre de iza 1988, despué de gupa hermana Denise Nicoleau xiiñiʼ, guizáʼ bixii rini. Biete lu hemoglobina stibe menu de 5.0, ne gudxi doctor stibe laabe gudiibe lugar guicabe rini. Peru qué ninabe. Sti siadóʼ que, gunabaʼ hospital que ti juez gudii permisu guicá hermana que rini. Qué nibidxi juez que hermana Nicoleau ne xheelaʼ para gusiénecaʼ laabe xiñee qué zacá hermana que rini, ne qué lica ñabi juez que laacabe maʼ bidii permisu hospital que para gucaa laabe rini.

Viernes 30 de diciembre, bicaa hospital que rini hermana Nicoleau neca guníʼ xheelabe ne ca familia stibe qué zacabe rini. Maʼ para huadxí que gunaazecabe caadxi de ca familia stiʼ hermana riʼ ne chupa chonna de ca ancianu. Nácabe gucalaʼdxiʼ ca binni riʼ nucueezacaʼ ca ni zigucaa rini hermana riʼ para cadi nucaacaʼ ni laabe. Sábadu siadóʼ 31 de diciembre biree ni bizaaca riʼ lu noticia ndaaniʼ guidxi Nueva York ne ca guidxihuiiniʼ nuu gaxha de raqué.

 Gunábadu chuudu nezalú tribunal superior, ne lunes que gunieniaʼ juez ni cayuni tender guendanagana que, Milton Mollen. Gudxeʼ laabe ni bizaaca ne bizeeteʼ lube biʼniʼ autorizar sti juez que gucaacabe rini hermana que sin ninabadiidxacabe laa ne xheelaʼ. Gunabaʼ juez Mollen naa chaaʼ ra despachu stiʼ para gusieneʼ laa ni bizaaca que ne guinidu de ca ley ni raca aplicar lu ca casu riʼ. Yené superintendente stinneʼ naa, Philip Brumley. Laca biʼniʼ invitar juez que abogadu stiʼ hospital que. Nadipaʼ guzani raqué. Ngue runi, bicaa hermanu Brumley lu cuadernu stiʼ ne rabi naa: «Gundeteʼ lu ridxi stiluʼ». Galán conseju que, purtiʼ cadxiicheʼ ora cusieneʼ cadi jneza nuu abogadu stiʼ hospital que.

Despué de ti hora de gunidu que, guníʼ juez Mollen primé ca laadu guni tender sti dxi que. Ora zireʼdu ra despachu stibe, gúdxibe laadu nagana para gucuudxicabe abogadu stiʼ hospital que. Peru zaca nagana para laa gusihuinni qué gapa hospital que donda pur ni bíʼnicabe hermana Nicoleau. Bidieeʼ cuenta casi ora cayabi Jehová naa zuni ganardu casu que. Guendaridxagayaa ngue guidúʼyadu biquiiñeʼ Jehová laadu para gaca ni ná.

Bínidu dxiiñaʼ dede huaxhinni para guni preparardu ni chiguinidu sti dxi que. Chupa chonna cuadra de Betel de Brooklyn nuu tribunal que, ngue runi ca compañeru stidu ni nuu ra Oficina de Asuntos Legales guzacaʼ dede raqué. Despué de bicaadiaga guidapaʼ juez que laadu guniʼcaʼ cadi jneza ni biʼniʼ hospital que. Guníʼ tribunal que biʼniʼ ganar hermana Nicoleau casu que, ne laaca guniʼcaʼ biʼniʼ violar hospital que ca derechu stiʼ hermana que, purtiʼ qué zanda guni mandarcaʼ gaca xiixa sin gudiicaʼ lugar guiníʼ paciente ca xi racalaʼdxiʼ.

Caadxi dxi despué guníʼ tribunal ni jma risaca ni nuu ndaaniʼ guidxi Nueva York napa hermana Nicoleau derechu guiníʼ cadi guicá rini. Ndiʼ nga primé de tapa casu ni biʼniʼ ganardu nezalú ca tribunal estatal ni nuu ndaaniʼ guidxi Estados Unidos ne gupaʼ privilegiu de gacaniáʼ (biiyaʼ cuadru ni láʼ « Ca casu ni guca ganar nezalú ca tribunal ni jma risaca»). Laaca huayuneniaʼ xcaadxi abogadu de Betel dxiiñaʼ ne huayuni  tenderdu casu de divorcio, guihuinni tu guiaanané ca baʼduhuiiniʼ ora gaca divorciar bixhózecaʼ ne jñaacaʼ ne laaca huayuni tenderdu casu ni caníʼ ximodo iquiiñeʼ ca layú ne ca edificiu ca.

Dxi binebiaʼyaʼ Dawn, divorciada laa ne napa chonna xiiñiʼ. Rúnibe dxiiñaʼ ne precursora laabe. Neca nagana modo bibánibe, guizáʼ bidxagayaaʼ pabiáʼ nadxiibe Jehová. Lu iza 1992 guyuudu Asamblea de Distrito ni biree lá «Portadores de Luz» ndaaniʼ guidxi Nueva York ne gudxeʼ laabe rapaʼ gana gunebiaʼyaʼ laabe jma. Bichaganadu ti iza despué ne gucaniaruáʼ ca hermanu ni runi dxiiñaʼ Betel. Ne rudieeʼ xquixe peʼ Jehová purtiʼ naca xheelaʼ ti gunaa espiritual ne nayecheʼ, ti regalu stiʼ Jehová nga laabe. Casi ná Proverbios 31:12, guizáʼ galán bibánidu guiráʼ dxi guyuʼdu juntu.

Dxi bichaganadu, napa ca xiiñibe 11, 13 ne 16 iza. Cumu racalaʼdxeʼ gacaʼ ti buen padre para laacabe la? biindaʼ ni caníʼ ca publicación stinu de ca padre adoptivo ne bineʼ ni ná cani. Ca iza gudiʼdiʼ ca gúpadu guendanagana, peru riecheʼ purtiʼ yanna ruuyacabe naa casi bixhózecabe ni nadxii laacabe ne ti xhamígucabe ni zanda gápabe confianza. Nabé riuuláʼdxidu cheʼ ca xhamígucabe ra lídxidu ne riéchedu ora maʼ nuu puru jovenhuiiniʼ ra yoo.

Lu iza 2013, naa ne Dawn yendézadu Wisconsin para gápadu bixhózedu ne jñaadu. Ne guyuaaʼ nayecheʼ purtiʼ bíneruaʼ dxiiñaʼ Betel. Biʼniʼ invitárcabe naa gacaniáʼ lu ca asuntu legal stiʼ organización stinu casi voluntario temporal.

Lu septiembre de iza 2018, bidieeʼ cuenta ruchiiñaʼ xiixa ndaaniʼ yanneʼ ora chiguinieeʼ. Qué nidxela doctor ni ruuyaʼ naa xiñee nuaaʼ zaqué. Despué gudxi sti doctor naa chaaʼ ra nuu ti neurólogo. Lu enero de 2019, gudxi neurólogo que naa zándaca napaʼ ti trastorno neurológico o ti guendahuará ndaaniʼ iqueʼ ne huaxiéʼ rihuinni tipu guendahuará riʼ, ni runibiáʼcabe casi parálisis supranuclear progresiva (PSP).

Chonna gubidxa despué, biabaʼ ora cayuneʼ patinar lu hielu ne biluuza nayaʼ ladu derechu. Maʼ xadxí de runeʼ patinar ne maʼ biaaʼ guneʼ ni. Ngue runi bidieeʼ cuenta maʼ cayaca nagana para naa guniibeʼ ca músculo stinneʼ. Guizáʼ nagueenda guzá guendahuará que ne pur laani raca nagana para naa guinieeʼ, guiniibeʼ ne gabeʼ.

Ti privilegiu para naa nga iquiiñeʼ experiencia napaʼ casi abogadu para gacaniáʼ lu xhiiñaʼ Reinu. Laaca nuaaʼ nayecheʼ purtiʼ gunda bicaaʼ caadxi tema para revista ni ruundaʼ ca abogadu, doctor ne juez. Guiráʼ ndiʼ huayacané naa para ganda guneʼ defender ca xpinni Jehová ora guicaacaʼ xiixa tratamientu médicu o para cadi guicacaʼ rini. Ne casi ná Lucas 17:10, nacaʼ ti esclavu ni qué runi merecer gastiʼ; ni maʼ bineʼ nga ni naquiiñeʼ guneʼ.