1, 2. ¿Ximodo racané promesa ni zeeda lu Isaías 65:16, 17 laanu guni huantarnu?

«¡CADI GUIREELUʼ GANA!». Laani nga tema stiʼ asamblea regional ni gúpanu lu iza 2017. Asamblea que bisiidini laanu xi zanda gúninu para guni huantarnu ca guendanagana ni ridxaagalunu. Neca maʼ gudiʼdiʼ tapa iza, cadi cusaana de gudxíʼlunu ca guendanagana ni nápanu.

² ¿Xi guendanagana cadxaagalunu tiempu riʼ? Zándaca cayacananu purtiʼ guti ti binnilídxinu o ti xhamígunu, nápanu ti guendahuará ni qué rianda, maʼ nagólanu, bizaaca ti desastre neza ra nabézanu, pur nabé ridinde binni, canazanándacabe laanu pur nácanu Testigu. Ne zándaca nápanu guendanagana pur pandemia stiʼ COVID-19. ¿Cadi dxandíʼ guiranu racaláʼdxinu guedandá dxi maʼ cadi gápanu ca guendanagana riʼ la? (biindaʼ Isaías 65:16, 17).

3. ¿Xi caquiiñeʼ gúninu yanna, ne xiñee?

³ Nagana nga guibani binni ndaaniʼ guidxilayú riʼ peru zándaca jma nagana zaca ni despué (Mat. 24:21). Nga runi naquiiñeʼ guizíʼdinu guni huantarnu. Bisiene Jesús xiñee naquiiñeʼ gúninu ni ora guníʼ: «Pa guni huantartu zulatu xpídatu» (Luc. 21:19). Ti cosa ni zacané laanu guni huantarnu nga guiníʼ íquenu xi cayuni ca binni ni cadiʼdiʼ lu ca guendanagana ni cadídinu.

4. ¿Xiñee zanda guininu Jehová nga ni jma nanna guni huantar?

⁴ ¿Tu laa nga jma nanna guni huantar? Jehová. Pa bidxagayaanu ora gúnnanu Jehová nga jma nanna guni huantar la? guiníʼ íquenu ndiʼ. Nuu stale guendanagana  ndaaniʼ guidxilayú riʼ purtiʼ Binidxabaʼ nga cayuni mandar ndaaniʼ ni. Ñanda nunitilú Jehová guidxilayú malu riʼ nagasi ca, peru cabézabe guedandá dxi maʼ gudíxhebe para gúnibe ni (Rom. 9:22). Laga cabeza Jehová guedandá dxí ca, cayuni huantar. Guidúʼyanu gaʼ cosa ni cayuni huantar Jehová.

5. ¿Ximodo huayuni biidicabe lá Dios ne xi runi sentirluʼ ora gánnaluʼ ni?

⁵ Guca biidiʼ labe ra guníʼcabe mal de laabe. Nadxii Jehová lá ne racalaʼdxiʼ guni respetar guiráʼ binni ni (Is. 42:8). Maʼ raca biaʼ 6,000 iza de cayuni biidicabe labe (Sal. 74:10, 18, 23). Bizulú ni ndaaniʼ jardín de Edén, dxi guníʼ Diablu (tobi ni riníʼ mal de tuuxa para guniná) qué náʼ Dios gudii xiixa Adán ne Eva para guibánicaʼ nayecheʼ (Gén. 3:1-5). Dede dxiqué nuu binni riníʼ qué riná Dios gudii laanu xiixa ni caquiiñenu para guibáninu galán. Laaca nabé guyuu Jesús xizaa guiníʼ binni mal de lá Bixhoze. Nga runi, bisiidibe ca discípulo stibe guiniʼcaʼ lu oración: «Bixhózedu ni nuu guibáʼ, gaca santificar laluʼ» (Mat. 6:9).

6. ¿Xiñee cudii Jehová lugar tidiʼ stale tiempu para guihuinni laasi nga napa derechu de guni mandar?

⁶ Bicaalúcabe derechu nápabe para guni mandarbe. Jehová si nga napa derechu de guni mandar guibáʼ ne lu Guidxilayú, ne gástiruʼ sti gobernante casi laabe (Apoc. 4:11). Peru racalaʼdxiʼ Binidxabaʼ guiníʼ ique binni ne ca ángel ca qué gapa Dios derechu de guni mandar. Nga runi, napa xidé tidiʼ tiempu para guihuinni pa dxandíʼ ni. Cumu nabé nuu xpiaaniʼ Jehová la? bidiibe lugar guni mandarsaa binni laaca laa ti tiempu ti guihuinni qué zabeenducaʼ ni galán pa qué guni mandarbe laacaʼ (Jer. 10:23). Ne pur paciencia stiʼ Dios zahuinni tu napa razón. Zahuinni Jehová si nga nanna guni mandar ne Reinu si stibe nga zedané guendariuudxi lu Guidxilayú riʼ.

7. ¿Tu guiráʼ nga huadxii deche Jehová ne xi zúnibe laacaʼ?

⁷ Bidxiideche caadxi de ca xiiñibe laabe. Dxi bizáʼ Jehová ca ángel ne binni bíʼnibe laacaʼ perfectu. Peru ti ángel perfectu ni qué nuzuubaʼ stiidxaʼ Dios ni biree lá Binidxabaʼ (ni riníʼ tobi ni rucaalú) bicaa Adán ne Eva gudxiidéchecaʼ Jehová. Laaca bidxiideche xcaadxi binni ne xcaadxi ángel Dios (Jud. 6). Ra gudiʼdiʼ tiempu, ca israelita ni beeda gaca xquidxi Dios, bidxiidéchecaʼ laabe ne bizulú biʼniʼ adorarcaʼ dios ni cadi dxandíʼ (Is. 63:8, 10). Guizáʼ gucaná Jehová pur ngue. Peru cayuni huantarbe ne cabézabe guedandá dxi gunitilube cani cucaalú laabe. Guizáʼ ziecheʼ ca xpinni Jehová dxi guedandá dxi riʼ, purtiʼ laaca cayuni huantarcaʼ guiráʼ cosa malu ni nuu ndaaniʼ Guidxilayú riʼ.

8, 9. ¿Xi cosa ni cadi dxandíʼ riníʼcabe de Jehová ne xi zanda gúninu?

⁸ Guiráʼ ca cosa ni cadi dxandíʼ ni riníʼ Binidxabaʼ. Ora guníʼ Binidxabaʼ mal de Job laaca guniʼbe runi ca xpinni Dios ni ná purtiʼ racaláʼdxicaʼ gudiibe laacaʼ xiixa ni galán (Job 1:8-11; 2:3-5). Ngaca nga ni riníʼ Binidxabaʼ dede yanna (Apoc. 12:10). Laaca zanda gusihuínninu rusiguii Binidxabaʼ ra guni huantarnu ca guendanagana ni nápanu ne ra cadi guchéʼnenu Jehová purtiʼ nadxiinu laa. Ne cásica gucané Jehová Job, laaca zacanebe laanu guni huantarnu (Sant. 5:11).

⁹ Riquiiñeʼ Binidxabaʼ ca líder stiʼ ca religión ni cadi dxandíʼ para guiníʼ malu  Jehová ne laa nga napa donda pur ca yuubaʼ napa binni lu Guidxilayú. Ne ora rati ti baʼduhuiiniʼ riniʼcaʼ Dios nga ziné laabe purtiʼ caquiiñeʼ ti ángel huiiniʼ guibáʼ. ¡Nabé runinácabe Jehová ora riníʼcabe zacá! Peru laanu nánnanu cadi dxandíʼ ni. Nga runi, pa gápanu ti guendahuará malu o gatiʼ ti binni ni nadxiinu qué zugáʼninu donda ique Dios, sínuque zuni crenu zedandá dxi zabee Dios ca yuubaʼ nápanu. Zanda gábinu guiráʼ binni naca Jehová ti Dios ni rannaxhii. Ne zacá ricábibe ca ni rucaalú laabe (Prov. 27:11).

10. ¿Xi rusiidiʼ Salmo 22:23, 24 laanu de Jehová?

¹⁰ Ora racaná ca xpínnibe. Naca Jehová ti Dios ni riaʼ. Nga runi racanabe ora gúʼyabe cayacananu pur canazánanda binni laanu purtiʼ nácanu Testigu, pa huaranu o purtiʼ binni ruchee laanu (biindaʼ Salmo 22:23, 24). Runi sentirbe yuubaʼ ni nápanu, nga runi zabeebe ca ni (bichaaga ni né ni ná Éxodo 3:7, 8; Isaías 63:9). Zedandá dxi zaca cumplir promesa riʼ: «Ne zuchaabe nisa riete lucaʼ, maʼ qué ziuuruʼ guendaguti, maʼ guirutiʼ qué ziuu triste, maʼ guirutiʼ qué zuunaʼ ne maʼ qué ziuuruʼ yuubaʼ» (Apoc. 21:4).

11. ¿Xi runi sentir Jehová ora rietenalaʼdxiʼ de ca xpinni ni maʼ guti?

¹¹ Ca xhamígube ni maʼ guti. ¿Xi runi sentir Jehová ora rietenalaʼdxiʼ de ca xpinni ni maʼ guti? Racaláʼdxibe gúʼyabe laacaʼ sti biaje (Job 14:15). ¿Ñee ruxuíʼlunu pabiáʼ ribanaʼ Jehová Abrahán, xhamigu la? (Sant. 2:23). O xpínnibe Moisés, ni guníʼnebe casi riniʼné ti hombre ti binni (Éx. 33:11). Ne pabiáʼ racalaʼdxiʼ Jehová gucaadiaga David ne xcaadxi salmista, gúʼndacaʼ para laabe sti biaje (Sal. 104:33). Qué rusiaandaʼ Jehová ca xhamigu neca maʼ nisiaasicabe  lu guendaguti (Is. 49:15). Qué rusiaandaʼ Jehová ximodo guca ca xpinni «purtiʼ para laabe guiracaʼ nabánicaʼ» (Luc. 20:38). Ziuu ti dxi zusibani Jehová laacabe sti biaje, zucaadiagabe oración sticaʼ ne ziéchebe ora guni adorarcaʼ laabe stiʼ biaje. ¿Cadi dxandíʼ riguixhedxí ndiʼ ladxidóʼ ca binni ni maʼ guti ti familia stiʼ la?

12. ¿Xii nga ni jma riguu triste Jehová lu ca últimu dxi riʼ?

¹² Ora runiná ca binni malu xcaadxi binni. Dxi bidxiidéchecabe Jehová ndaaniʼ jardín de Edén, gúnnabe jma nagana zabani binni ra tidiʼ tiempu. Nanaláʼdxibe ora raca cosa malu, cosa ni cadi jneza ne guendaridinde ni nuu tiempu riʼ. Nabé rizaaláʼdxibe ca ni qué gapa tu gacané laa. Casi ca ni qué gapa bixhoze o jñaa ne ca viuda (Zac. 7:9, 10). Riuu Jehová triste ora ruuyaʼ cayacaná ne cuseguyoocabe ca xpinni. Ca ni cayuni huantar cásica cayuni huantar Jehová, cadi guiaandaʼ laatu nadxii Jehová laatu.

13. ¿Xi cosa cadi jneza ruuyaʼ Jehová runi binni, ne xi zúnibe?

¹³ Ca cosa feu ni runi binni. Bizáʼ Dios laanu casi laa, peru racalaʼdxiʼ Binidxabaʼ gúninu cosa ni cadi jneza. Tiempu bibani Noé, «biiyaʼ Jehová bidale guendaquéiquiiñeʼ ni cayuni binni ndaaniʼ guidxilayú. [...] Ne guyuu Jehová triste pur bizáʼ binni guidxilayú, ne gucaná ladxidoʼbe» (Gén. 6:5, 6, 11). Qué huachaa diʼ modo nabani binni dede dxiqué. Riuulaʼdxiʼ Binidxabaʼ guni practicar binni pecadu sexual, chuʼné binni ni cadi xheelaʼ, chuʼné ti hombre sti hombre o ti gunaa ne sti gunaa (Efes. 4:18, 19). Guizáʼ riecheʼ Binidxabaʼ ora guchee ti xpinni Jehová. Ora maʼ guirá paciencia stiʼ Jehová, zusihuinni pabiáʼ nanalaʼdxiʼ ca pecadu sexual ni runi binni.

14. ¿Xi cayuni binni Guidxilayú riʼ ne ca maniʼ ca?

¹⁴ Cunitilú binni Guidxilayú ni bizaʼbe. Biblia ná binni huayuni mandar binni para si gacanacaʼ, peru laaca cadi cayápacaʼ de Guidxilayú riʼ ne de ca maniʼ nuu luni casi modo gudixhe Jehová ñuni cani (Ecl. 8:9; Gén. 1:28). Caadxi científicu ná lu ca iza ni zeeda ca, zándaca zunitilú binni biaʼ ti millón de maniʼ ne yaga. ¡Ngahuaʼ runi guizáʼ nuucabe xizaa! Peru guizáʼ riéchenu ora gánnanu zunitilú Jehová «ca ni cunitilú guidxilayú» ne zúnibe Guidxilayú riʼ ti paraísu (Apoc. 11:18; Is. 35:1).

15, 16. ¿Xi naquiiñeʼ gucaa laanu guni huantarnu cásica runi Jehová? Bisiéneni né ti ejemplu.

¹⁵ Guiníʼ íquenu guiráʼ guendanagana ni cayuni huantar Bixhózenu ni nuu guibáʼ maʼ raca stale iza (biiyaʼ cuadru ni láʼ « Ca ni cayuni huantar Jehová»). Ñanda nunitilú Jehová guidxilayú riʼ ora tiica si. Peru guizáʼ huabeendunu ni galán pur paciencia stibe. Guzéʼtenu ti ejemplu, guxuíʼlunu gúdxicabe ti guendaxheelaʼ cadi nazaaca zale xiiñicaʼ ne cadi xadxí zabánibe. Neca nanna guendaxheelaʼ riʼ zadxaagalucaʼ stale guendanagana, peru riéchecaʼ ora rale xiiñicaʼ. Cumu nadxiicabe xiiñicabe la? runi huantárcabe ca guendanagana ridxaagalúcabe, para guni sentir xiiñicabe nayecheʼ neca huará.

¹⁶ Zacaca nga laanu, cumu guiranu nga zanu de Adán ne Eva la? ralenenu donda. Peru neca zacá nadxii ne rapa Jehová laanu (1 Juan 4:19). Peru maʼ gadxé Jehová de guendaxheelaʼ ni bizéʼtenu lu ejemplu que, purtiʼ laa zanda guni xiixa pur laanu. Ne maʼ gudíxhebe ti dxi para gunduuxebe ca cosa ni cayuniná ca xiiñibe (Mat.  24:36). Pur nadxii Jehová laanu, naquiiñeʼ guni huantarnu casi cayuni huantarbe biaʼ caquiiñeʼ gúninu ni.

17. Ni riete lu Hebreos 12:2, 3 de Jesús, ¿ximodo racané ni laanu guni huantarnu?

¹⁷ Jehová nga ni jma nanna guni huantar. Ne laaca bisihuinni Jesús ni dxi guyuu lu Guidxilayú, purtiʼ biʼniʼ huantar ca diidxaʼ naná ni gúdxicabe laa, bisituícabe lú ne guti lu ti yaga pur laanu (biindaʼ Hebreos 12:2, 3). Ejemplu stiʼ Bixhoze Jesús gucaneni laa guni huantar. Laanu laaca zanda gacané ejemplu stiʼ Jehová laanu guni huantarnu.

18. ¿Ximodo racané 2 Pedro 3:9 laanu guiénenu xi guiráʼ cayaca pur napa Jehová paciencia?

¹⁸ (Biindaʼ 2 Pedro 3:9). Jehová nga nanna pora gunduuxeʼ guidxilayú malu riʼ. Peru pur paciencia stibe millón de binni cayúnicaʼ ni nabe ne cusisácacaʼ laabe tiempu riʼ. Riecheʼ ca binni riʼ cayuni huantar Jehová purtiʼ zacá gunda gúlecaʼ, biziidicaʼ gannaxhiicaʼ laabe ne bidiicaʼ xpídacaʼ laabe. Ora guicaa millón de laanu ndaayaʼ pur biʼniʼ huantarnu, zahuinni dxichi jneza biʼniʼ Jehová biʼniʼ huantar.

19. ¿Xi maʼ gudixhe íquenu gúninu ne xi ndaayaʼ zacaanu?

¹⁹ Rusiidiʼ Jehová laanu guni huantarnu né guendanayecheʼ, purtiʼ Jehová nga «ti Dios ni nayecheʼ» neca racanabe ora gúʼyabe guiráʼ ni huayuni Binidxabaʼ (1 Tim. 1:11). Laanu laaca zanda chuʼnu nayecheʼ, laga cabézanu né paciencia guni santificar Jehová lá, gusihuinni laa si napa derechu guni mandar, gunduuxeʼ guiráʼ cosa malu ne cuee guiráʼ guendanagana nápanu. Quixhe íquenu guni huantarnu ne zatadxí ladxidoʼno purtiʼ nánnanu laaca cayuni huantar Bixhózenu ni nuu guibáʼ. Pa gúninu ni la? zaca cumplir ca diidxaʼ riʼ luguianu: «Dichoso binni ni cayuni huantar laga cadiʼdiʼ lu prueba, purtiʼ ora maʼ gudiʼdiʼ luni la? zudii Jehová laa guendanabani, laani nga premiu ni biʼniʼ prometer gudii ca ni qué gusaana de gannaxhii laa» (Sant. 1:12).