Racalaʼdxiʼ Jehová guibani ca binni ni guichaganáʼ nayecheʼ, gaca guendaxheelaʼ sticaʼ naguidxi ne cadi guixélecaʼ (Mat. 19:4-6). Pa racaláʼdxiluʼ guichaganaluʼ, ¿xi zanda gúniluʼ para guidxélaluʼ ti binni ni gannaxhii lii yaʼ? Cumu Jehová nga bizáʼ laanu la? nánnabe xi naquiiñeʼ gúninu para cheʼ ni laanu galán ora maʼ nápanu novio o novia ne lu guendaxheelaʼ stinu. Pa chinándanu ca conseju ni zeeda lu Biblia, zabeendunu ni galán. Guzéʼtenu caadxi de ca conseju riʼ.

Primeru naquiiñeʼ guiénenu ti cosa ruzeeteʼ Biblia de modo naca binni. «Ladxidoʼ binni nga ni jma riguite laa que intiica si cosa ne que ridxélani xi gúnini» (Jer. 17:9). Ora ruzulú runibiáʼ chupa binni ni racalaʼdxiʼ guichaganáʼ zándaca nagueenda ca guzulú gaca sentimientu stícabe nadipaʼ ne pur nga maʼ qué guicaacabe decisión jneza. Pa guichaganáʼ chupa binni pur ca cosa si ni cayuni sentircaʼ la? zándaca gacanacaʼ (Prov. 28:26). Nga runi chupa binni ni maʼ naca novio cadi galán diʼ guiniʼcaʼ de ca cosa ni runi sentircaʼ pa deruʼ bizulú cayunibiaʼcaʼ o gúnicaʼ promesa ante gunibiáʼ chaahuicaʼ.

Proverbios 22:3 ná: «Binni nuu xpiaaniʼ la? rucaachilú ora guʼyaʼ zeeda xiixa guendanagana ni zuniná laa, peru ni cadi nuu xpiaaniʼ la? runi guiráʼ ni racalaʼdxiʼ ne racaná». ¿Gunáʼ nga caadxi de ca cosa ni runiná ca ni riuu lu sitiu de Internet ne aplicación para guyubi tu guichaganáʼ yaʼ? Triste guininu ni, peru nuu tu laa huayuniná tuuxa binni ni binibiáʼ lu Internet laa, purtiʼ gunna caguitesícabe laa ne nuu binni malu ruzáʼ cuenta ni cadi dxandíʼ para quite xcaadxi binni ne gaxha xpuéltucabe, ne nuu biaje ca binni ni runi ca cosa riʼ, riniʼcaʼ nácacaʼ testigu stiʼ Jehová.

Guidúʼyanu sti cosa ni zanda guniná tuuxa. Nuu sitiu ni nuu lu Internet riquiiñecaʼ programa ni nuu lu computadora para guidxélacaʼ tu guichaganáʼ binni, peru huaxiéʼ seguru ni. ¿Ñee jneza nga gudiʼnu lugar ti programa ni nuu lu computadora cuí tu guichagananu la? Coʼ, qué zanda guchaaganu ti programa ni nuu lu computadora ne ca conseju ni zeeda lu Biblia (Prov. 1:7; 3:5-7).

Lu Proverbios 14:15 zeeda sti conseju, racá ná: «Ni nahuati runi cré intiica ni gábicabe  laa, peru ti binni ni nuu xpiaaniʼ la? riníʼ ique ante guni xiixa». Nga runi ante cuinu tu guichagananu nabé risaca nga gunibiáʼ chaahuinu binni ca, peru zándaca gaca ni nagana pa iquiiñenu ti sitiu ni nuu lu Internet para gunibiaʼnu tuuxa. Dede pa randa ruuyaʼ ti binni información stiʼ sti binni ni cayuni biaʼ ne nabé ruiʼcaʼ diidxaʼ lu Internet. ¿Ñee zanda guininu dxandíʼ runibiáʼcabe la? Nuu tu laa riníʼ ique maʼ bidxela tu gannaxhii laa peru ora ru ruuyacaʼ ne runibiáʼ chaahuicaʼ binni ca, rudiicaʼ cuenta cadi dxandíʼ ni.

Sicaríʼ guníʼ ti hombre ni bicaa salmo: «Qué ribieniáʼ ca hombre ni rusiguii ne qué ridxaagaʼ ca ni rucaachiʼ tu laa» (Sal. 26:4). Stale binni rusiguii lu ca datu ni napa lu Internet para chuulaʼdxiʼ xcaadxi modo laa. Zándaca nuu tu laa rucaachiʼ modo naca purtiʼ qué rihuinni ca cosa ni cadi jneza ni runi lu ca mensaje ni rucaa. Ne zándaca nuu tu laa guiníʼ testigu stiʼ Jehová laa. Peru galán guiníʼ íquenu ndiʼ: ¿Ñee maʼ guyuunísabe la? ¿Dxandíʼ nadxiibe Jehová la? ¿Runi respetar ca hermanu de congregación laabe la? ¿Nácabe ti ejemplu galán para xcaadxi la? o nácabe ti «binni ni runi ni cadi jneza»? (1 Cor. 15:33; 2 Tim. 2:20, 21). ¿Ñee dxandíʼ nuu binni ca libre para guichaganáʼ la? Ndiʼ nga ca cosa ni caquiiñeʼ ganna tuuxa ante, peru zándaca gaca nagana para laanu gánnanu ni pa qué guinínenu sti hermanu ni runibiáʼ chaahuiʼ binni ca (Prov. 15:22). Ne ti binni ni ruzuubaʼ stiidxaʼ Dios, qué zaníʼ ique guichaganáʼ o «chuʼ tobi si né ca ni qué runi cré» ne ni caʼruʼ chúʼnisa (2 Cor. 6:14; 1 Cor. 7:39).

Cumu nabé racaná ca binni ni ruyubi tu guichaganáʼ lu xiixa sitiu ni nuu lu Internet o lu ti aplicación. Nga runi, ¿ñee nuu sti modo para ganda gunibiáʼ tuuxa ti binni ni gannaxhii laa la? Ora ganda gaca reunirnu, zanda gunibiaʼnu xcaadxi Testigu ra reunión, ra asamblea ne xcaadxi lugar.

Lu pandemia stiʼ COVID-19, qué ñanda ñuunu ra Yoo stiʼ Reinu para ñápanu reunión, peru biquiiñenu ca aparatu electrónicu para gápanu reunión stinu ne racá zanda gunibiaʼnu xcaadxi Testigu ni caʼruʼ guichaganáʼ. Zanda gucaʼdiáganu discursu ne comentariu stícabe para guidúʼyanu ximodo rusihuínnicabe fe stícabe (1 Tim. 6:11, 12). Laaca zanda güínenu laacabe diidxaʼ ora guiluxe reunión. Ne laaca nuu hermanu rieegucaʼ para güicaʼ diidxaʼ ti ratu lu Internet. Ne lu ca reunión huiiniʼ riʼ zanda gánnanu ximodo ti hermanu o hermana ne ximodo runi tratarbe xcaadxi (1 Ped. 3:4). Ne ra jma ziyunibiáʼ chupa binni, zudiicaʼ cuenta pa ngueca meta nápacaʼ ne pa zanda guibánicaʼ juntu casi guendaxheelaʼ.

Ora rinanda ti binni ca conseju ni zeeda lu Biblia ora cuyubi tu guichaganáʼ la? jma nagueenda guibani nayecheʼ né familia stiʼ. Zeeda gaca casi ná ti proverbio: «Tuuxa ni maʼ bidxela ti gunaa [o ti hombre] nachaʼhuiʼ para gaca xheelaʼ la? maʼ bidxela ti cosa risaca, ne ricaa ndaayaʼ stiʼ Jehová» (Prov. 18:22).