1. ¿Ximodo naquiiñeʼ guidúʼyanu oración?

 MAʼ BIDII Jehová, Dios ni bizáʼ guibáʼ ne Guidxilayú, laanu privilegiu de guinínenu laa lu oración. Guizáʼ galán ndiʼ purtiʼ zanda guxhélenu ladxidoʼno nezalú Jehová ora tiica si, lu intiica diidxaʼ rininu ne cadi naquiiñeʼ cueenu cita. Zanda guni orarnu Bixhózenu ni nadxii laanu pa nuunu ra hospital o ndaaniʼ cárcel, purtiʼ nánnanu zucaadiágabe laanu. ¿Cadi dxandíʼ guizáʼ rusisácanu privilegiu ca la?

2. ¿Ximodo bisihuinni rey David nabé risaca para laa guni orar?

² Nabé bisisaca rey David guni orar. Lu ti canción gúdxibe Jehová: «Gaca oración stinneʼ nezaluluʼ casi inciensu ni guca preparar» (Sal. 141:1, 2). Tiempu bibani David biquiiñecabe ti inciensu especial ni biʼniʼ preparar ca sacerdote que né stale cuidadu para iquiiñeʼ ra gaca adorar Jehová (Éx. 30:34, 35). Zándaca ora guníʼ David de inciensu ni nuube guiniʼbe nga, zaníʼ ique chaahuibe xi chitídxibe Bixhózebe ni nuu guibáʼ lu oración stibe. Laanu laaca ngaca racaláʼdxinu gúninu, purtiʼ racaláʼdxinu chúʼlaʼdxiʼ Jehová ca oración stinu.

3. ¿Ximodo naquiiñeʼ guni orarnu Jehová, ne xiñee?

³ Ora guni orarnu Jehová, naquiiñeʼ gúninu ni né stale respetu. Guiníʼ íquenu ca visión ni gucuaa Isaías, Ezequiel, Daniel ne Juan. Neca gadxé gadxé visión bíʼyacabe, peru guirácabe bicaacabe naca Jehová ti Rey guizáʼ nandxóʼ. Biiyaʼ Isaías zuba Jehová lu trono nasoo risaca stiʼ  (Is. 6:1-3). Biiyaʼ Ezequiel zuba Jehová lu carru stiʼ ni nuu guibáʼ ne guidubi vuelta de laa cuzaaniʼ casi ti arcoíris (Ezeq. 1:26-28). Ne Daniel biiyaʼ Binnigola ni maʼ xadxí nabani nacu lari blancu ne zuba lu ti trono ra caree bele (Dan. 7:9, 10). Ne apóstol Juan biiyaʼ zuba Jehová lu ti trono «ne guidubi vuelta de trono que nuu ti arcoíris ni ruzaaniʼ casi ti esmeralda» (Apoc. 4:2-4). Ora riníʼ íquenu pabiáʼ nandxóʼ Jehová rusietenaláʼdxini laanu pabiáʼ risaca privilegiu nápanu de guni orarnu laabe ne pabiáʼ risaca gúninu ni né stale respetu. Yanna, ¿xidé zanda guininu lu ca oración stinu yaʼ?

4. ¿Xi rizíʼdinu de ca primé cosa ni bizeete Jesús lu oración ni bisiidiʼ ca discípulo stiʼ? (Mateo 6:9, 10).

⁴ (Biindaʼ Mateo 6:9, 10). Lu Sermón del Monte, bisiidiʼ Jesús ca discípulo stiʼ ximodo naquiiñeʼ guni orarcaʼ para gucaadiaga Dios laacaʼ. Despué de guniʼbe «naquiiñeʼ guni orartu sicaríʼ», primé ni guniʼbe nga ca cosa ni jma risaca, laacani nga: gaca santificar lá Jehová, gueeda Reinu stiʼ, purtiʼ laani zunitiluni ca enemigu stiʼ Dios, ne guni cumplirbe ca promesa ni maʼ guniʼbe ra gueedanebe ndaayaʼ para binni ne lu Guidxilayú riʼ. Pa guzéʼtenu ca cosa riʼ lu oración stinu, zusihuínninu ni jma risaca para laanu nga gaca ni ná Jehová.

5. ¿Xiñee gastiʼ naca guinábanu ca cosa ni caquiiñenu?

⁵ Lu sti parte de oración bisiidiʼ Jesús, guníʼ zanda guinábanu Jehová gudii laanu guendaró para cada dxi, guni perdonar ra maʼ bicheʼnu, gapa laanu para cadi guiábanu lu tentación ne gulá laanu de lu naʼ Binidxabaʼ (Mat. 6:11-13). Ora rinábanu ca cosa riʼ Jehová, rusihuínninu caquiiñenu gacanebe laanu ne racaláʼdxinu gusiéchenu laabe.

6. ¿Ñee caquiiñeʼ guni orarnu pur ca cosa si ni bizeeteʼ Jesús lu oración que la?

⁶ Cadi bisiidiʼ Jesús oración riʼ ca discípulo stiʼ para guni copiarcaʼ ni o para guni repetircaʼ ni diidxaʼ pur diidxaʼ. Lu xcaadxi oración ni biʼniʼ Jesús laaca bizeetebe xcaadxi cosa ni risaca para laabe óraque o ni naguu xizaa  laabe (Mat. 26:39, 42; Juan 17:1-26). Laanu laaca zanda guni orarnu pur xiixa cosa ni naguu xizaa laanu. Casi ora naquiiñeʼ guicaanu ti decisión nabé risaca, zanda guinábanu Jehová gudii laanu guendabiaaniʼ ne guendariene (Sal. 119:33, 34). Ne ora guicaanu ti dxiiñaʼ ndaaniʼ xquidxi Jehová ne qué gánnanu ximodo gúninu ni, zanda guinábanu Jehová lu oración gacané laanu gánnanu ximodo gúninu ni (Prov. 2:6). Zanda guni orar binni pur xiiñiʼ, ne zanda guni orar xiiñiʼ binni pur bixhoze ne jñaa. Ne guiranu naquiiñeʼ guni orarnu pur ca estudiante stinu ne pur ca binni ni runi predicarnu. Peru cadi guni orarnu para si guinábanu cosa.

7. ¿Xiñee naquiiñeʼ gusisácanu Jehová lu ca oración ni gúninu?

⁷ Ora guni orarnu, laaca cadi naquiiñeʼ guiaandaʼ laanu gusisácanu Jehová. Laasibe nga naquiiñeʼ gusisácanu. Sicaríʼ gudxi ti salmista laabe: «Peru lii, Jehová, nacháʼhuiluʼ ne nuuluʼ listu para guni perdonarluʼ». Laaca guniʼbe: «Nácaluʼ ti Dios ni napa misericordia ne riá, rindaa para guidxiichi ne qué rusaana de gannaxhiiluʼ ne nácaluʼ fiel» (Sal. 86:5, 15). Nga runi nápanu stale razón para gusisácanu Jehová pur modo naca ne pur guiráʼ ni runi.

8. Bizeeteʼ caadxi cosa xi pur naquiiñeʼ gudiʼnu xquixe peʼ ora guni orarnu (Salmo 104:12-15, 24).

⁸ Aparte de gusisácanu Jehová lu ca oración stinu, laaca naquiiñeʼ gudiʼnu xquixe peʼ laabe pur ca cosa sicarú ni rudiibe laanu, casi ca color sicarú stiʼ ca guiéʼ ni ridúʼyanu, ca guendaró nanixhe ni nápanu ne pur ca xhamígunu. Guiráʼ ndiʼ rudii Jehová laanu purtiʼ racalaʼdxiʼ guibáninu nayecheʼ (biindaʼ Salmo 104:12-15, 24). Ne jmaruʼ si rudiʼnu xquixe peʼ laabe pur guiráʼ guendaró espiritual ni ricaanu ne pur ni maʼ biʼniʼ prometerbe gudiibe laanu.

9. ¿Xi zanda gúninu para cadi guiaandaʼ laanu gudiʼnu xquixe peʼ Jehová? (1 Tesalonicenses 5:17, 18).

⁹ Guizáʼ nagueenda rusiáʼndanu gudiʼnu xquixe Jehová pur guiráʼ ni runi pur  laanu. ¿Xi zanda gúninu para cadi guizaacanu nga yaʼ? Zanda gúninu ti lista de guiráʼ cosa ni maʼ gunábanu laabe ne gatigá guidúʼyanu ximodo maʼ bicabi Jehová laanu. Despué, zanda guni orarnu para gudiʼnu xquixe laabe pur gucanebe laanu (biindaʼ 1 Tesalonicenses 5:17, 18). ¿Cadi dxandíʼ riéchenu ora rudii tuuxa xquixe peʼ laanu la? Jehová laaca riecheʼ ora rudiʼnu xquixe peʼ laa pur ricabi ca oración stinu (Col. 3:15). Peru nuu sti cosa jma risaca xi pur naquiiñeʼ gudiʼnu xquixe peʼ Jehová. Guidúʼyanu xii ni.

10. ¿Xiñee naquiiñeʼ gudiʼnu xquixe peʼ Jehová pur biseendaʼ Jesús lu Guidxilayú? (1 Pedro 2:21).

¹⁰ (Biindaʼ 1 Pedro 2:21). Naquiiñeʼ gudiʼnuʼ xquixe peʼ Jehová purtiʼ biseendaʼ Xiiñiʼ ni nadxii para gusiidiʼ laanu. Ora guni estudiarnu modo bibani Jesús, rizíʼdinu stale de Jehová ne xi naquiiñeʼ gúninu para gusiéchenu laa. Pa gápanu fe lu sacrificiu stiʼ Cristu, zanda gaca xhamígunu Jehová (Rom. 5:1).

11. ¿Xiñee runi orarnu lu lá Jesús?

¹¹ Rudiʼnu xquixe peʼ Jehová purtiʼ zanda guni orarnu laa lu lá Xiiñiʼ. Riquiiñeʼ Jehová Jesús para gudii laanu ni guinábanu laa lu oración. Pa guni orarnu laabe lu lá Xiiñibe, zucaadiágabe laanu ne zacábibe laanu. Sicaríʼ guníʼ Jesús: «Ne intiica cosa ni guinábatu lu laʼyaʼ, zuneʼ ni, ti ganda gusisaca Xiiñiʼ Dios Bixhoze. Pa guinábatu xiixa lu laʼyaʼ la? zuneʼ ni» (Juan 14:13, 14).

12. ¿Xi sti razón nápanu para gudiʼnu xquixe peʼ Jehová pur Xiiñiʼ?

¹² Runi perdonar Jehová ca pecadu stinu pur sacrificiu stiʼ Jesús. Biblia ná Jesús nga «sumo sacerdote» stinu, ne «maʼ zuba ladu derechu de trono stiʼ Dios ni nuu guibáʼ» (Heb. 8:1). Laaca ruzeeteʼ Biblia «nápanu ti ayudante ra nuu Bixhózenu, laa nga Jesucristu» (1 Juan 2:1). Rudiʼnu xquixe peʼ Jehová purtiʼ bidii laanu ti Sumo Sacerdote ni riá, ni nanna xi raca nagana para laanu ne ni «riníʼ pur laanu» (Rom. 8:34; Heb. 4:15). Pa ñaca qué ñati Jesús pur laanu, qué ñanda ñuni orarnu Jehová purtiʼ nácanu binni ruchee. De guidubi ladxidoʼno rudiʼnu xquixe peʼ Jehová pur bidii Xiiñiʼ ni nadxii para gatiʼ pur laanu.

13. ¿Ximodo bisihuinni Jesús guizáʼ nadxii ca discípulo stiʼ gueelaʼ ante gatiʼ?

¹³ Gueelaʼ ante gatiʼ Jesús, xadxí biʼniʼ orarbe Jehová pur ca discípulo stibe ne gunábabe Bixhózebe gapaʼ laacaʼ de Binidxabaʼ (Juan 17:15). ¡Guizáʼ gunnaxhii Jesús ca apóstol stiʼ! Purtiʼ neca mayaca gátibe, guizáʼ bizaaláʼdxibe laacaʼ.

14. ¿Ximodo rusihuínninu nadxiinu ca hermanu stinu?

¹⁴ Cásica Jesús qué rinábanu puru si ni caquiiñenu, sínuque laaca runi orarnu pur ca hermanu stinu. Ra gúninu ni, rusihuínninu zinándanu mandatu ni bidii Jesús de gannaxhiisaanu ne ruluinu Jehová pabiáʼ nadxiinu ca hermanu stinu (Juan 13:34). Ne nánnanu ora runi orarnu pur xcaadxi xpinni Jehová, cadi pur gana si rúninu ni. Biblia ná: «Napa oración stiʼ ti binni nachaʼhuiʼ stipa» (Sant. 5:16).

15. ¿Xiñee caquiiñeʼ guni orarnu pur ca hermanu stinu?

¹⁵ Caquiiñeʼ guni orarnu pur ca hermanu stinu purtiʼ ridxaagalucaʼ stale  guendanagana. Zanda guinábanu Jehová gacané laacabe guni huantárcabe guendahuará, desastre natural, guerra ne ora sánanda binni laacabe. Laaca zanda guni orarnu pur ca hermanu ni rigacané ra guca xiixa desastre natural. Zándaca runibiaʼluʼ tuuxa hermanu ni cadiʼdiʼ lu ca cosa ni bizéʼtenu riʼ. ¿Xiñee qué guzéʼtenu lácabe lu ca oración ni gúninu stúbinu? Ra guinábanu Jehová gacané ca hermanu stinu para gudxiilucaʼ ca guendanagana sticaʼ, rusihuínninu dxandíʼ nadxiinu laacaʼ.

16. ¿Xiñee naquiiñeʼ guni orarnu pur ca hermanu ni runi dirigir xquidxi Dios?

¹⁶ Rudii ca hermanu ni zániru ndaaniʼ xquidxi Dios xquixe peʼ ora runi orarnu pur laacaʼ, purtiʼ racané ca oración ca laacabe. Zacaca nga biʼniʼ sentir apóstol Pablo. Laa bicaa: «Laguni orar pur naa ti gudii Dios diidxaʼ naa ora guinieeʼ, ti cadi guidxibeʼ ne ganda gusiideʼ secretu sagradu stiʼ ca noticia galán» (Efes. 6:19). Tiempu riʼ, laaca guizáʼ runi ca hermanu ni runi dirigir xquidxi Dios dxiiñaʼ. Nga runi, ora rinábanu Jehová uguu ndaayaʼ laacabe, rusihuínninu nadxiinu laacabe.

17, 18. ¿Pora nga zándaca guinábacabe laanu guni orarnu nezalú xcaadxi, ne xi cadi naquiiñeʼ guiaandaʼ laanu?

¹⁷ Zándaca nuu biaje guinábacabe laanu guni orarnu nezalú xcaadxi. Guzéʼtenu ti ejemplu, zándaca guinabaʼ ti hermana compañera stiʼ guni oración ora chigudiicaʼ ti estudiu. Cumu qué runibiaʼ peʼ compañera ca estudiante ca la? zándaca jma galán gúnibe últimu oración. Purtiʼ zacá zanda guzeetebe xi caquiiñeʼ estudiante ca.

¹⁸ Yanna, ¿xi guni ti hermanu pa guinábacabe laa guni ti oración lu ti reunión de predicación o lu ti reunión de congregación yaʼ? Cadi naquiiñeʼ guiaandaʼ ca hermanu ca xi para raca ca reunión riʼ para gánnacaʼ xi guiniʼcaʼ lu ca oración ni gúnicaʼ. Cadi naquiiñeʼ gudiicabe conseju congregación ne cadi naquiiñeʼ gúnicabe anunciu. Cumu gaayuʼ si minutu nuu para canción ne oración la? nga runi  jma galán cadi iquiiñecaʼ «stale diidxaʼ» lu oración ni gúnicaʼ, jmaruʼ si ora ruzulú reunión (Mat. 6:7).

19. ¿Xi zacané laanu chuʼnu listu para ora gueeda dxi stiʼ Jehová?

¹⁹ Cumu mayaca nuu dxi stiʼ Jehová la? nga runi jmaruʼ si naquiiñeʼ guni orarnu. Dxi guníʼ Jesús de oración, bizeeteʼ: «Lagataná ne laguni rogar guiráʼ ora para ganda guilatu de guiráʼ ca cosa ni maʼ nexheʼ gaca» (Luc. 21:36). Pa qué gusaana de guni orarnu, zaguidxi fe stinu ne ziuʼnu listu ora gueeda dxi stiʼ Jehová.

20. ¿Xi naquiiñeʼ gúninu para gaca ca oración stinu casi inciensu ni rindáʼ naxhi?

²⁰ Lu artículo riʼ maʼ bizíʼdinu naquiiñeʼ gusisácanu privilegiu ni nápanu de guni orarnu Jehová. Laaca bizíʼdinu naquiiñeʼ guzéʼtenu ca cosa ni jma risaca para Jehová lu ca oración stinu, casi gudiʼnu xquixe peʼ laabe pur biseendabe Xiiñibe, pur Reinu stibe, ne laaca runi orarnu pur ca hermanu stinu. Laaca zanda guinábanu Jehová ca cosa ni caquiiñenu casi cosa material ne espiritual. Ora riníʼ ique chaahuinu xi chiguininu lu ca oración stinu, rusihuínninu rusisácanu privilegiu riʼ. Para Jehová la? oración stiʼ ca xpinni zeeda gácani casi inciensu rindáʼ naxhi ni riuulaʼdxiʼ (Prov. 15:8).