ARTÍCULO DE ESTUDIU 29
Gacanenu Jesucristu, superintendente stinu
«Maʼ gucuaaʼ guiráʼ xixé autoridad guibáʼ ne lu guidxilayú» (MAT. 28:18).
CANCIÓN 13 Chinándanu ejemplu stiʼ Cristu
NI ZAZÍʼDINU *
1. ¿Xi racalaʼdxiʼ Dios?
NI RACALAʼDXIʼ Dios nga gaca predicar ca noticia galán stiʼ Reinu lu guidubi Guidxilayú (Mar. 13:10; 1 Tim. 2:3, 4). Stiʼ Jehová dxiiñaʼ riʼ ne nabé risaca ni, nga runi maʼ gulibe Xiiñibe ni nadxiibe para guni dirigir ni. Cumu jneza cayuni dirigir Jesús dxiiñaʼ de predicación, zanda chuʼnu seguru ora gueeda fin ziecheʼ Jehová pur dxiiñaʼ ni maʼ guca (Mat. 24:14).
2. ¿Xi zadúʼyanu lu artículo riʼ?
2 Lu artículo riʼ, zadúʼyanu caquiiñeʼ Jesús «mozo ni nuu xpiaaniʼ ne ni runi jneza» para gudii laanu guendaró espiritual ne gacané gatachaahuiʼ predicación para chindani ra nuu jma binni (Mat. 24:45). Laaca zadúʼyanu xi zanda guni cada tobi de laanu para gacanenu Jesús ne mozo ni nuu xpiaaniʼ.
CAYUNI DIRIGIR JESÚS PREDICACIÓN
3. ¿Xi autoridad gucuaa Jesús?
3 Cayuni dirigir Jesús predicación. ¿Ximodo nánnanu ni yaʼ? Ante cheʼ Jesús guibáʼ gudxibanebe caadxi de ca discípulo stibe lu ti dani de Galilea ne gúdxibe laacaʼ: «Maʼ gucuaaʼ guiráʼ xixé autoridad guibáʼ ne lu guidxilayú». Ne laaca gúdxibe laacaʼ: «Nga runi, laché ne lagacané binni de guiráʼ guidxi gaca discípulo stinneʼ» (Mat. 28:18, 19). Rusiidiʼ ca diidxaʼ riʼ laanu laaca gucuaa Jesús autoridad para guni dirigir predicación.
4. ¿Xiñee zanda chuʼnu seguru cayuni dirigir Jesús predicación tiempu riʼ?
4 Jesús guníʼ zaca predicar ndaaniʼ guiráʼ guidxi ne zacanenu binni gaca discípulo ne qué zaxélebe de ca xpínnibe «dede ora guiluxe guidxilayú riʼ» (Mat. 28:20). Rusihuinni ca diidxaʼ riʼ zuni dirigir Jesús predicación tiempu nabáninu riʼ.
5. ¿Ximodo cayacanenu gaca cumplir ni ná Salmo 110:3?
5 Guyuu Jesús seguru ziuu stale tu zuni predicar tiempu ra mayaca gueeda fin. Gúnnabe zaca cumplir profecía riʼ: «Ziale de ndaaniʼ ladxidóʼ xquídxiluʼ gacané dxi guni dirigirluʼ ejércitu stiluʼ para cheʼ lu ti guerra» (Sal. 110:3). Pa cayuni predicarluʼ ca noticia galán stiʼ Reinu, cayacaneluʼ Jesús ne mozo ni nuu xpiaaniʼ ne laaca cayacaneluʼ gaca cumplir profecía riʼ. Cayaca predicar lu guidubi Guidxilayú peru laaca riuu caadxi guendanagana.
6. ¿Gunáʼ nga tobi de ca guendanagana ni ridxaagalunu?
6 Ti guendanagana ni ridxaagalunu nga nuu tu rucaalú dxiiñaʼ riʼ. Riníʼ ca apóstata, ca políticu ne ca líder stiʼ ca religión ca cosa ni cadi dxandíʼ de dxiiñaʼ ni rúninu. Ne pa guni cré familia stinu, ca binni ni runibiaʼnu ne ca compañeru de dxiiñaʼ ca cosa riʼ la? zándaca gucaacaʼ laanu gusaana de gúninu ni ná Jehová ne gusaana de guni predicarnu. Ndaaniʼ caadxi guidxi, runi amenazar ca enemigu stinu laanu, rucaalucaʼ, rucueezacaʼ ne dede ruseguyoocaʼ caadxi de laanu ndaaniʼ cárcel. Ne qué ridxagayaanu ndiʼ purtiʼ Jesús guníʼ: «Zaca nanalaʼdxiʼ guiráʼ guidxi laatu pur nácatu xpinneʼ» (Mat. 24:9). Ne pa nanalaʼdxiʼ binni laanu la? rusihuínnini zinándanu ejemplu stiʼ Jesús ne nuu Jehová nayecheʼ né laanu (Mat. 5:11, 12). Binidxabaʼ nga cucaa binni gucueeza dxiiñaʼ stinu peru jma nadipaʼ Jesús que laabe. Ne cumu cayacané Cristu laanu la? cayanda cayaca predicar mensaje stiʼ Reinu ndaaniʼ guiráʼ guidxi.
7. ¿Xi prueba cusihuinni maʼ cayaca cumplir ni ná Apocalipsis 14:6, 7?
7 Sti guendanagana nga nuu stale idioma. Lu visión ni biluíʼ Jesús apóstol Juan gúdxibe laa qué zucueeza nga para gaca predicar ca noticia galán (biindaʼ Apocalipsis 14:6, 7). Cudxíʼlunu guendanagana riʼ purtiʼ maʼ nápanu stale publicación ni biree lu Biblia lu sitiu jw.org, lu jma de 1,000 idioma para guʼndaʼ binni. Laaca maʼ bidii Grupu ni Zániru permisu para gaca traducir libru ni riquiiñenu para gudiʼnu estudiu ni láʼ ¡Zanda guibániluʼ nayecheʼ! lu jma de 700 idioma. Laaca nuu videu para ca binni ni qué runadiaga ne publicación braille para ca binni ni qué ruuyaʼ. Zacá la? nin ti binni qué riaana sin ganna xi caníʼ Biblia de Reinu stiʼ Dios. Caduʼya dxíchinu cayaca cumplir ca profecía riʼ, binni de guiráʼ idioma stiʼ ca guidxi caziidicaʼ guiniʼcaʼ idioma nayá ni rusiidiʼ Biblia (Zac. 8:23; Sof. 3:9). Cayanda cayaca guiráʼ ndiʼ purtiʼ jneza cayuni dirigir Jesucristu dxiiñaʼ riʼ.
8. ¿Xi guiráʼ cosa galán cazaaca pur cayaca predicar tiempu riʼ?
8 Tiempu riʼ, maʼ naca xquidxi Jehová jma de xhono millón de binni ne nuunu ndaaniʼ jma de 240 país. Ne guiráʼ iza riuunisa stale mil binni peru cadi biaʼ diʼ cadale binni nga ni jma risaca, sínuque ca binni ni cayaca discípulo, cuchaacaʼ ne maʼ nabánicaʼ modo cusiidiʼ Dios laanu (Col. 3:8-10). Stale de laacabe maʼ qué runi practicárcabe pecadu sexual, maʼ qué ridíndecabe, qué rúnicabe menu binni ne qué riníʼ íquecabe jma risaca nación stícabe. Maʼ cayaca cumplir profecía ni zeeda lu Isaías 2:4 ni ná: «Maʼ qué zaziidicaʼ tíndecaʼ para checaʼ lu guerra». Cumu guiranu cayúninu stipa guibáninu modo rusiidiʼ Dios la? stale binni cadxiña ndaaniʼ xquidxi Dios ne rusihuínninu zinándanu Jesucristu, superintendente stinu (Juan 13:35; 1 Ped. 2:12). Ne cayanda cayúninu guiráʼ ndiʼ purtiʼ cayacané Jesús laanu.
BIʼNIʼ NOMBRAR JESÚS TI MOZO
9. Casi ná Mateo 24:45-47, ¿xi guníʼ Jesús zazaaca tiempu ra mayaca gueeda fin?
9 (Biindaʼ Mateo 24:45-47). Guníʼ Jesús zuni nombrar ti «mozo ni nuu xpiaaniʼ ne ni runi jneza» tiempu ra mayaca gueeda fin para gudii laanu guendaró espiritual. Ne nga peʼ nga ni cayuni mozo riʼ, cayúnicaʼ dxiiñaʼ nadipaʼ tiempu riʼ. Caquiiñeʼ Jesús ti grupuhuiiniʼ de ungidu para gudii guendaró espiritual ora peʼ caquiiñeʼ ca xpinni Dios ni ne ca binni ni caziidiʼ de lu Biblia. Nanna ca hermanu riʼ cadi sticaʼ fe ni napa ca xpinni Cristu (2 Cor. 1:24). Nánnacabe Jesucristu nga líder ne comandante stiʼ xquidxi (Is. 55:4).
10. ¿Gunáʼ de ca libru ni zeeda lu ca imagen ca gucané lii guiziidiluʼ de Jehová?
10 Dede lu iza 1919, huabee mozo ni nuu xpiaaniʼ stale publicación ni zeeda lu Biblia ni dxandíʼ zacané binni. Lu iza 1921 gulee mozo ni nuu xpiaaniʼ ti libru lu diidxaʼ inglés ni láʼ El Arpa de Dios para gacané binni ganna ca cosa ni rusiidiʼ Biblia. Ne ra zidiʼdiʼ tiempu guleecabe xcaadxi libru. ¿Xi gucané lii gunibiaʼluʼ ne gannaxhiiluʼ Bixhózenu ni nuu guibáʼ? Zándaca tobi de ca libru riʼ: “Sea Dios veraz”, La verdad que lleva a vida eterna, Usted puede vivir para siempre en el paraíso en la Tierra, El conocimiento que lleva a vida eterna, Xipeʼ ndiʼ cusiidiʼ Biblia o ¿Xi rusiidiʼ Biblia laanu? O zándaca yanna caquiiñeluʼ libru ni láʼ ¡Zanda guibániluʼ nayecheʼ! Biree ca libru riʼ para gacané ca ni laanu gacanenu binni gaca discípulo. Ne siempre riree ca ni ora peʼ caquiiñenu ni.
11. ¿Xiñee nabé risaca nga guicaa guiranu guendaró espiritual?
11 Cadi ca binni si ni cacaa estudiu nga ni caquiiñeʼ guendaró espiritual ni guquidxi fe sticaʼ. Guiranu nga caquiiñenu ni. Apóstol Pablo bicaa: «Ca ni maʼ zanda gó gueta casi ti binni huaniisi la? maʼ naguidxi fe sticaʼ». Laaca guniʼbe pa gúninu guiráʼ ni cazíʼdinu zacaneni laanu gánnanu «xii nga ni jneza ne ni cadi jneza» (Heb. 5:14). Cumu zeʼ dxi jma feu ziyaca xpiaʼ binni la? nga runi zándaca gaca nagana para laanu chinándanu guiráʼ ni rusiidiʼ Jehová laanu. Peru rudii Jesús laanu guendaró espiritual ni zeeda de lu Biblia ni racané laanu chuʼ fe stinu naguidxi. Cayuni dirigir Jesús mozo ni nuu xpiaaniʼ para guni preparar ne gudiicaʼ guendaró espiritual.
12. ¿Xi huayúninu para gusisácanu lá Dios cásica biʼniʼ Jesús ni?
12 Cásica biʼniʼ Jesús, laaca rusisácanu láʼ Dios (Juan 17:6, 26). Guzéʼtenu ti ejemplu, lu iza 1931 biree lanu testigu stiʼ Jehová casi cá ni lu Biblia. Zacá rusihuínninu racaláʼdxinu iquiiñenu lá Bixhózenu ni nuu guibáʼ, purtiʼ nabé risaca ni para laanu (Is. 43:10-12). Ne lu beeu octubre iza ca maʼ bizulú biquiiñenu lá Dios lu portada stiʼ revista riʼ lu diidxaʼ ingles. Ne lu Biblia Traducción del Nuevo Mundo maʼ cá la Dios ra naquiiñeʼ cheni. Maʼ gadxé peʼ ni runi ca religión falsu purtiʼ laacaʼ ribeecaʼ lá Jehová lu ca Biblia ni riquiiñecaʼ.
CAYUNI DIRIGIR JESÚS CA XPINNI
13. ¿Xi rucaa lii guni creluʼ dxandíʼ caquiiñeʼ Jesús «mozo ni nuu xpiaaniʼ ne ni runi jneza» tiempu riʼ? (Juan 6:68).
13 Caquiiñeʼ Jesús «mozo ni nuu xpiaaniʼ ne ni runi jneza» para quixhe chaahuiʼ modo gaca adorar Jehová. ¿Xi riníʼ íqueluʼ de dxiiñaʼ ni cayuni mozo riʼ yaʼ? Zándaca guni sentirluʼ casi biʼniʼ sentir Pedro ora gúdxibe Jesús: «¿Tu ra nuu nga chuudu yaʼ? Ca diidxaʼ ni riniʼluʼ rudiicani guendanabani ni qué zaluxe» (Juan 6:68). ¿Xi nizaaca de laanu pa qué ñunibiaʼnu xquidxi Jehová yaʼ? Riquiiñeʼ Cristu ni para gudii laanu guendaró espiritual ne racané laanu gusíʼdinu jma jneza. Laaca racané ni laanu guibáninu modo racalaʼdxiʼ Dios. Para ganda gusiéchenu ladxidóʼ Jehová (Efes. 4:24).
14. Cumu nuuluʼ ndaaniʼ xquidxi Jehová, ¿ximodo huayacané ni lii lu pandemia stiʼ COVID-19?
14 Ora chuʼ xiixa guendanagana jneza runi dirigir Jesús laanu. Ne zacá bihuinni ni dxi bizulú pandemia stiʼ COVID-19. Stale binni qué nidxela xi ñuni, peru Jesús bidii laanu instrucción para gapa laanu. Gucuaanu instrucción iquiiñenu cubreboca ora guireʼnu de ra lídxinu ne chuʼnu cuidadu cadi guidxíñanu gaxha peʼ de binni. Laaca gucuaa ca ancianu instrucción guizaaláʼdxicaʼ ca publicador ne gacanécabe laacaʼ pa caquiiñecaʼ xiixa cosa material ne cúʼcabe gana laacaʼ ti chuʼcaʼ gaxha de Jehová (Is. 32:1, 2). Ne lu ca informe stiʼ Grupu ni Zániru ricaanu jma instrucción ne riguucabe gana laanu.
15. ¿Xi xcaadxi instrucción maʼ gucuaanu lu pandemia riʼ, ne xi huabeendunu?
15 Lu pandemia riʼ, laaca bidiicabe laanu instrucción modo gápanu ca reunión stinu ne modo guni predicarnu. Nagueendaca gúdxicabe laanu modo gápanu ca reunión ne ca asamblea stinu lu videollamada, ne guni predicarnu pur carta ne pur teléfono. Caguu Jehová ndaayaʼ stipa stinu. Ne cayuuyaʼ stale sucursal cayuu stale publicador ndaaniʼ xquidxi Dios. Tiempu riʼ, stale hermanu huayápacaʼ stale experiencia galán lu predicación (biiyaʼ cuadru ni láʼ « Caguu Jehová ndaayaʼ predicación ni rúninu»).
16. ¿Ximodo naquiiñeʼ guidúʼyanu ca instrucción ni ricaanu?
16 Zándaca nuu caadxi hermanu guiníʼ ique nabé exageradu ca instrucción ni gucuaanu lu pandemia riʼ. Peru maʼ bihuinni biaʼsi ca instrucción ni bidii xquidxi Dios laanu (Mat. 11:19). Pa guiníʼ íquenu cayapa Jesús laanu né guendarannaxhii, zanda chuʼnu seguru intiica si guidxaagalunu lu ca dxi ni zeeda ca qué zaxeleʼ Jehová ne Xiiñiʼ de laanu (biindaʼ Hebreos 13:5, 6).
17. ¿Xi runi sentirluʼ purtiʼ Jesús nga cayuni dirigir laanu?
17 ¡Guizáʼ nayecheʼ nuunu purtiʼ cayuni dirigir Jesús laanu! Nuunu ndaaniʼ xquidxi Dios ra guirutiʼ runi menu xcaadxi pur cultura stiʼ, guidxi ra gule o idioma ni riníʼ ne nuunu tobi si. Nápanu stale guendaró espiritual ne nápanu guiráʼ ni iquiiñenu para guni predicarnu. Ne cada tobi de laanu cazíʼdinu guibáninu modo racalaʼdxiʼ Dios ne gannaxhiinu xcaadxi. ¡Guizáʼ riéchenu naca Jesús superintendente stinu!
CANCIÓN 16 Gusisácanu Jiobá purtiʼ maʼ bíʼnibe Xiiñibe Rey
^ ¿Ñee lii nga tobi de ca millón de hombre, gunaa ne xcuidi ni runi predicar né stale gana ca noticia galán stiʼ Reinu la? Pa zacá ni, zinándaluʼ modo cayuni dirigir Señor Jesucristu predicación tiempu riʼ. Lu artículo riʼ zadúʼyanu caadxi prueba ni cusihuinni dxandíʼ cayuni dirigir Jesús predicación tiempu riʼ. Ra guiníʼ íquenu ca ni, zaguuni gana laanu cadi gusaana de gúninu ni ná Jehová ra chinándanu ni cayabi Cristu laanu.
