Guleʼ lu iza 1935 Darlaston (Inglaterra), ndaaniʼ ti guidxihuiiniʼ láʼ Black Country, ni raca significar «guidxi nayaaseʼ». Zaqué biree lá ni purtiʼ nuu stale fábrica ni ribee guʼxhuʼ nayaaseʼ raqué. Dxi napaʼ biaʼ tapa iza, bizulú bixhozeʼ ne jñaaʼ biʼniʼ estudiarcaʼ Biblia né ca testigu stiʼ Jehová. Ne dxi napaʼ 14 o 15 iza bineʼ cré ngue nga ni dxandíʼ, ne guyuaanisaʼ dxi napa 16, lu iza 1952.

Tiempu que bizuluáʼ biziideʼ guneʼ dxiiñaʼ ndaaniʼ ti fábrica naroʼbaʼ ni runi herramienta ne pieza para carru. Bisiidicabe naa guneʼ ti dxiiñaʼ nabé risaca ndaaniʼ empresa que ne guizáʼ guyuuladxeʼ ni.

Ti dxi gunabadiidxaʼ ti viajante naa pa zanda gutiideʼ estudiu de libru ndaaniʼ congregación ra riaaʼ, ndaaniʼ guidxi Willenhall. Qué nidxelaʼ xi ñuneʼ. Purtiʼ tiempu que riaa reunión ndaaniʼ chupa congregación, ndaaniʼ semana riaaʼ ndaaniʼ congregación ni riaana gaxha de ra runeʼ dxiiñaʼ guidxi Bromsgrove, ni riaana 32 kilómetro de ra lidxeʼ. Ne ca fin de semana ora riaaʼ ra nuu bixhozeʼ ne jñaaʼ riaaʼ ndaaniʼ congregación ni nuu guidxi Willenhall.

Cumu racalaʼdxeʼ gacaniáʼ xquidxi Jehová, bineʼ ni gunabaʼ viajante que naa neca gupa xidé bisaanaʼ dxiiñaʼ ni nabé riuuladxeʼ. Qué raca arrepentir diaʼ ra bidieeʼ lugar guni dirigir Jehová neza stinneʼ purtiʼ ra bineʼ ni maʼ gucuaaʼ stale ndaayaʼ.

Dxi riaaʼ ndaaniʼ congregación ni nuu Bromsgrove, binebiaʼyaʼ Anne, ti hermana sicarú ni riuulaʼdxiʼ guni xhiiñaʼ Dios. Bichaganadu lu iza 1957. Dede dxiqué huayápadu privilegiu de gúnidu xhiiñaʼ Jehová casi precursor regular, precursor especial, dxiiñaʼ de circuito ne guni servirdu Betel. Nabé huasiecheʼ Anne naa ca iza riʼ.

Lu iza 1966 guyuudu clase 42 stiʼ scuela de Galaad. ¡Guizáʼ nayecheʼ guyuʼdu! Biʼniʼ asignárcabe laadu chuudu Malaui, ti guidxi stiʼ África ra nabé nachaʼhuiʼ binni ne hospitalariu laacaʼ. Peru huaxiéʼ tiempu guyuʼdu raqué.

Yendadu Malaui 1 de febrero iza 1967. Ti beeu bisiidicabe laadu guinidu idioma ni riníʼcabe raqué, ne despué biseendacabe laadu lu dxiiñaʼ de distrito. Biʼniʼ viajardu ndaaniʼ ti Kaiser Jeep. Guníʼ íquedu ñanda nidiʼdiʼ ni ra tiica si dede né ndaaniʼ guiiguʼ. Peru puru si ra huaxiéʼ daʼ nisa gunda gudiʼdiʼ ni. Nuu biaje biaanadu ndaaniʼ yoohuiiniʼ de beñe ni dxiʼbaʼ ziña ique. Tiempu riaba nisaguié gupa xidé guluʼdu ti lona xagueteʼ para cadi tidiʼ nisa ndaaniʼ ni. Nagana bizuludu dxiiñaʼ de misioneru que. ¡Peru guizáʼ guyuuláʼdxidu ni!

Lu beeu abril biiyaʼ cayuu guendanagana ndaaniʼ guidxi que. Binadiagaʼ lu radiu ti discursu ni bidii presidente stiʼ Malaui, ti doctor ni láʼ Hastings Banda, ra caníʼ qué riguixhe ca testigu stiʼ Jehová impuestu ne riuucaʼ lu política. Peru cadi dxandíʼ ngue ni caniʼbe que. Guiradu nánnadu qué riuuláʼdxibe xiñee qué runi apoyardu laabe, ne jmaruʼ si purtiʼ qué rinadu sidu tarjeta para chuʼdu lu partidu stibe.

Lu beeu septiembre, biree lu ca periódicu que guníʼ presidente que cucaalú ca hermanu stinu gobiernu. Lu ti campaña ni bíʼnibe guniʼbe zucueezabe dxiiñaʼ ni runi ca testigu stiʼ Jehová. ne bíʼnibe ni 20 de octubre iza 1967. Qué nindaa, guyé ca policiá ne de migración ra sucursal que para guseegucaʼ ni ne cueecaʼ de ndaaniʼ guidxi que guiráʼ misioneru.

Biaanadu chonna dxi ndaaniʼ cárcel, despué biseendacabe laadu Mauricio, ti guidxi ra runi mandar ca británicu. Peru qué niná ca autoridad que ñaanadu raqué casi misioneru, ngue runi biseendaʼ organización laadu Rodesia (ni yanna láʼ Zimbabue). Ora yendadu raqué,  bidxaagalú ti hombre de migración nabé naduxhuʼ laadu ni qué niná ñuʼdu ndaaniʼ guidxi que, ne gudxi laadu: «Guládxicabe laatu de Malaui, qué ninácabe ñaanatu Mauricio ne yanna nuutu raríʼ purtiʼ runi convenir ni laatu». Bizuluca Anne cayuunaʼ. ¡Ruluíʼ peʼ guirutiʼ tu racalaʼdxiʼ laadu! Óraque ni jma racalaʼdxeʼ nga guibiguetaʼ Inglaterra. Peru bidii ca autoridad que lugar guiaanadu gueelaʼ que ndaaniʼ sucursal ne sti dxi que chuudu ra oficina sticaʼ. Guizáʼ maʼ bidxágadu peru bisaanadu guiráʼ ca cosa que lu náʼ Jehová. Sti huadxí que bizaaca ti cosa ni cadi cabézadu, bidiicabe lugar guiaanadu Zimbabue casi visitante. Qué ziuu dxi guiaandaʼ naa ximodo bineʼ sentir dxi que. Guyuaaʼ seguru dxandíʼ cayuni dirigir Jehová neza stidu.

Ndaaniʼ sucursal stiʼ Zimbabue, biʼniʼ asignárcabe naa Departamento de Servicio para guuyaʼ dxiiñaʼ ni raca guidxi Malaui ne Mozambique. Nabé cayuni huantar ca hermanu de Malaui purtiʼ canazanándacabe laacaʼ. Parte de dxiiñaʼ stinneʼ nga guneʼ traducir ca informe ni ruseendaʼ ca viajante ni nuu ndaaniʼ guidxi que. Ti dxi biaanaʼ dede huaxhinni cunduuxeʼ ti informe. Ora biindaʼ pabiáʼ feu modo cayuninácabe ne cucaalúcabe ca hermanu ne ca hermana bizulú biinaʼ. * Peru laaca guizáʼ bidxagayaaʼ purtiʼ cadi cusaanacabe Jehová, naguidxi nuu fe stícabe ne cayuni huantárcabe (2 Cor. 6:4, 5).

Bínidu guiráʼ ni nuu lu nadu para cadi guiaadxaʼ guendaró espiritual ca hermanu ni nuuruʼ ndaaniʼ guidxi Malaui ne ca ni guyé Mozambique pur ca guendaridinde guyuu ndaaniʼ guidxi Malaui. Ne Equipu de Traducción Chichewa, diidxaʼ ni jma riníʼcabe Malaui guyecaʼ Zimbabue lu ti terrenu ni bidii ti hermanu. Guizáʼ galán ni biʼniʼ hermanu riʼ, bicuibe ti oficina ne caadxi yoo para cueza ca traductor. Ngue gucané para cadi gusaana de guni traducírcabe ca publicación.

Guluʼdu listu guiráʼ ca dxiiñaʼ que para ganda cheʼ ca superintendente de circuito ni nuu ndaaniʼ guidxi Malaui cada iza Zimbabue ne gápacaʼ asamblea de distrito lu diidxaʼ chichewa. Ne raqué rudiicabe laacaʼ ca bosqueju stiʼ asamblea que. Ne ora ribiguétacabe Malaui rigánnacabe ca hermanu ne ruiʼnécabe laacaʼ ni biziidicabe lu programa stiʼ asamblea que. Tobi de ca iza que gunda biʼniʼ organizadu ndaaniʼ guidxi Zimbabue ti Scuela stiʼ Xhiiñaʼ Reinu para iguidxi fe stiʼ ca superintendente de circuito ni nabé nadxibalú que.

Lu febrero iza 1975, guyaaʼ Mozambique yegannaʼ ca hermanu ni bixooñeʼ pur guendaridinde ni guyuu Malaui. Ne zinanda ca hermanu riʼ ca instrucción jma nacubi huadii xquidxi Jehová, dede maʼ biʼniʼ nombrarcaʼ cuerpu de ancianu. Ne ca ancianu nacubi riʼ, gudixe chaahuicaʼ caadxi dxiiñaʼ casi gudiicaʼ discursu públicu, guni considerarcaʼ textu stiʼ dxi, gutiidicaʼ Torre stiʼ ni rapa ne dede gúnicaʼ asamblea. Lugar ra biaana ca hermanu ni bixooñeʼ de guendaridinde que bíʼnicabe ni casi ora ra raca ti asamblea, gúpani departamentu de limpieza, tu quiʼziʼ guendaró ne tu gapaʼ lugar que. Guizáʼ stale cosa gunda biʼniʼ ca hermanu que né ndaayaʼ stiʼ Jehová. ¡Nabé guluu ngue gana naa!

Ra mayaca chuʼnu lu iza 1980, maʼ sucursal stiʼ Zambia biʼyaʼ dxiiñaʼ ni raca Malaui. Peru qué nusiaandaʼ ca hermanu de Malaui ne ruzeeteʼ laacaʼ lu oración stinneʼ ne nannaʼ laaca zaqueca biʼniʼ sentírcabe. Cumu guyuaaʼ lu Comité de Sucursal stiʼ Zimbabue, stale biaje guca reunirdu né ca hermanu representante stiʼ central mundial. Lu ca reunión que, laaca nuu hermanu ni biʼniʼ dirigir dxiiñaʼ ni raca Malaui, Sudáfrica ne Zambia. Ne siempre guníʼ íquedu, ¿ximodo ruʼ zanda gacanedu ca hermanu de Malaui?

Ra gudiʼdiʼ dxi, maʼ huaxiéʼ guzanándacabe ca hermanu que, ngue runi chaahuidugá biguetaʼ ca hermanu ni bixooñeʼ de Malaui. Ca ni biaana  ndaaniʼ guidxi que maʼ qué ñacaná peʼ caʼ. Ne chaahuidugá maʼ guná xcaadxi guidxi ni nuu gaxha guni predicar ca Testigu, ne zaqueca bizaaca ndaaniʼ guidxi Mozambique lu iza 1991. Peru qué nusaana de niníʼ íquedu: «¿Padxí maʼ qué zucueezacabe dxiiñaʼ stiʼ ca Testigu ndaaniʼ guidxi Malaui pue?».

Maʼ lu iza 1993, bidxaa gobiernu stiʼ Malaui ne maʼ bidiicabe lugar gaca dxiiñaʼ stinu ndaaniʼ guidxi ca. Gudiʼdiʼ si ti tiempu, gunabadiidxaʼ ti misioneru naa: «¿Zabiguétaluʼ Malaui la?». Cumu maʼ napaʼ 59 iza, gudxeʼ laa: «¡Coʼ, maʼ huaniiseʼ para guibiguetaʼ!». Peru dxí que ca bedandá ti carta ni biseendaʼ Grupu ni Zániru ra nuaaʼ ra cayuni invitarcaʼ naa ne xheelaʼ guibiguétadu Malaui.

Guizáʼ riuuláʼdxidu guni servirdu ndaaniʼ guidxi Zimbabue, ngue runi guca nagana para laadu guicaadu ti decisión. Maʼ biaʼdu raríʼ ne maʼ nápadu xhamígudu. Guca Grupu ni Zániru nachaʼhuiʼ ne gúdxicaʼ laadu zanda guiaanadu Zimbabue pa ngue nga ni racaláʼdxidu. Ni jma fácil nga laapedu nibidu xi neza nicaadu ne ñaanadu ra nuudu que. Peru bietenaladxeʼ maca guníʼ iqueʼ de ejemplu stiʼ Abrahán ne Sara, neca maʼ huaniisicaʼ, bisaanacaʼ lídxicaʼ neca galán nabézacaʼ raqué para gúnicaʼ ni canabaʼ Jehová laacaʼ (Gén. 12:1-5).

Gudixhe íquedu chinándadu ni cayabi xquidxi Jehová laadu ne biguétadu Malaui 1 de febrero iza 1995. Biaʼsi gudiʼdiʼ 28 iza de dxi yendadu ndaaniʼ guidxi que primé biaje. Guyáʼ ti Comité de Sucursal raqué ra guyuaaʼ naa né xhupa hermanu. Ne qué nindaa biʼniʼ organizadu dxiiñaʼ stiʼ ca testigu stiʼ Jehová.

Guizáʼ galán ora bidúʼyadu nagueenda gucané Jehová guiroobaʼ dxiiñaʼ que. Lu iza 1993 ne 1998, ¡de 30,000 publicador, gúcadu 42,000! * Cumu bidale dxiiñaʼ stidu la? guníʼ Grupu ni Zániru cuiʼ ti sucursal nacubi. Guzidu ti terrenu de 12 hectárea ndaaniʼ guidxi Lilongüe, ne biʼniʼ asignárcabe naa guneʼ dxiiñaʼ lu Comité de Construcción.

Lu mayo iza 2001, hermanu Guy Pierce, ni nuu lu Grupu ni Zániru bitiidiʼ discursu de dedicación stiʼ sucursal nacubi que. Guyé jma de 2,000 Testigu de guidxi que. Stale de laacabe maʼ zinécabe jma de 40 iza de guyuunísacabe.  Xadxí biʼniʼ huantar ca hermanu ne ca hermana riʼ purtiʼ guzananda gobiernu laacaʼ ne bininácabe laacaʼ. Qué gapa ca hermanu que stale cosa material peru guizáʼ gúpacabe stale cosa espiritual. Ne yanna nayecheʼ nuucabe yegánnacabe Betel nacubi que. Dxi canayunibiáʼcabe Betel que ziyuundacabe ca canción stiʼ Reinu modo ruundaʼ binni de África. ¡Qué ziuu dxi guiaandaʼ naa dxi que! Ejemplu stícabe rusihuinni guizáʼ riguu ndaayaʼ Jehová ca ni runi huantar purtiʼ napa fe.

Despué de gurí sucursal nacubi que bidiicabe naa privilegiu guneʼ dedicar ca Yoo stiʼ Reinu. Ca congregación de Malaui, guyuucaʼ lu ti programa para cuiʼ Yoo stiʼ Reinu nagueenda ndaaniʼ ca guidxi ra huaxiéʼ nuu bueltu. Dxiqué guyuu caadxi congregación guca reunircaʼ xaʼnaʼ ti ramada ni bizáʼnecaʼ yaga eucalipto. Bidxiibacabe ziña ique ca ni, ne de beñe bíʼnicabe ca banguʼ ra gurícabe. Yanna rugaaguiʼ ca hermanu que ladríu ndaaniʼ ca horno ni bizaʼcaʼ para gucuicaʼ ti lugar sicarú ra gúnicaʼ reunión sticaʼ. Neca zaqué, lugar de niquiiñecabe silla jma riuuláʼdxicabe iquiiñecabe banca, purtiʼ nácabe jma stale tu ribí luni.

Laaca guizáʼ riecheʼ ora guuyaʼ ximodo huayacané Jehová binni guni progresar. Ti cosa ni guyuuladxeʼ nga nabé disponible ca hermanu joven de África para gacanecaʼ ne nagueenda riénecaʼ guiráʼ ni rusiidiʼ organización laacaʼ. Racané capacitación ca laacabe para guicaacabe jma dxiiñaʼ ndaaniʼ Betel ne ndaaniʼ ca congregación que. Ne ca superintendente de circuito nacubi de guidxi que, guizáʼ riguucaʼ gana ca congregación. Stale de laacaʼ maʼ bichaganacaʼ. Peru para gunda biʼniʼ ca guendaxheelaʼ riʼ jma lu xhiiñaʼ Jehová, gudixhe íquecaʼ cadi gápacaʼ xiiñicaʼ yanna neca stale tu rabi laacaʼ gápacaʼ xiiñicaʼ dede né familia sticaʼ.

Despué de 52 iza de nuaaʼ África, bizulú guca huaraʼyaʼ. Biseendaʼ Comité de Sucursal ti recomendación para guseendacabe naa sucursal de Gran Bretaña, ne biʼniʼ aprobar Grupu ni Zániru ni. Guizáʼ biuubaʼ ladxidoʼdo bisaanadu asignación ra nuudu que. Peru guizáʼ galán modo cayapa familia Betel stiʼ Gran Bretaña laadu yanna ra maʼ nagóladu.

Nanna dxicheʼ, decisión ni jma jneza gucuaaʼ nga ra cudieeʼ lugar guni dirigir Jehová neza stinneʼ. Pa ñaca ñuneʼ ni racalaʼdxeʼ, ¿nanna paraa niné dxiiñaʼ ni gupaʼ que naa yaʼ? Siempre gunna Jehová xi caquiiñeʼ guneʼ para cadi guireeʼ de lu neza stiʼ (Prov. 3:5, 6). Dxi nahuiineʼ nabé gucalaʼdxeʼ gannaʼ ximodo runi ti empresa naroʼbaʼ dxiiñaʼ. Peru xquidxi Jehová bidii naa ti dxiiñaʼ jma galán. Ra cayuneʼ servir Jehová, maʼ bidiibe naa ne cudiibe naa ti guendanabani nayecheʼ.