1. ¿Xi maʼ nánnanu, ne xiñee?

 ¿ÑEE raca nagana para lii guibániluʼ nayecheʼ pur guiráʼ ni cazaaca lu Guidxilayú riʼ la? Ndaaniʼ stale familia maʼ gastiʼ guendarannaxhii, zeʼ dxi jma malu binni, puru si para laacaʼ ruyúbicaʼ ne stale binni maʼ qué gapa confianza ca autoridad. Peru ca cosa ni bizéʼtenu riʼ racané ca ni laanu gánnanu zazaaca cosa galán despué. ¿Xiñee yaʼ? Purtiʼ maʼ naca binni modo peʼ riete ni lu 2 Timoteo 3:1-5, ra zeeda ti profecía ni caníʼ de «ca últimu dxi». Nin ti binni ni nachaʼhuiʼ qué zanda guiníʼ cadi dxandíʼ cayaca cumplir ni ná profecía ca. Ra cayaca cumplir ni cusihuinni ni maʼ naca Jesucristu Rey lu Reinu stiʼ Dios. Peru nuu xcaadxi profecía ni caníʼ de Reinu riʼ. Yanna guidúʼyanu caadxi profecía ni maʼ guca cumplir lu ca iza gudiʼdiʼ ca, ne ximodo racané ca ni iguidxi fe stinu.

2. ¿Xi zadúʼyanu lu artículo riʼ, ne xi zudiʼnu cuenta? (Bizeeteʼ xi cayuuyaluʼ lu dibuju ni zeeda lu portada).

² ¿Xi zadúʼyanu lu artículo riʼ? Primé, zadúʼyanu ti profecía ni zacané laanu guiénenu padxí bizulú cayuni mandar Reinu stiʼ Dios. Guiropa, zadúʼyanu caadxi profecía ni zacané laanu guiénenu maʼ naca Jesús Rey lu Reinu stiʼ Dios ni nuu guibáʼ. Ne últimu la? zadúʼyanu caadxi profecía ni rusihuinni ximodo zanitilú ca enemigu stiʼ Reinu riʼ. Laaca zudiʼnu cuenta naca ca profecía riʼ casi ca pieza stiʼ ti rompecabeza ne racané ca ni laanu guiénenu  xi tiempu nabáninu lu ca cosa ni naguixhe ique Jehová guni.

3. ¿Xi cayabi profecía ni zeeda lu Daniel 7:13, 14 laanu de Rey stiʼ Reinu stiʼ Dios?

³ Lu Daniel 7:13, 14 ridxélanu ti profecía ni culuíʼ biaʼsi peʼ Jesucristu nga binni para gaca Rey lu Reinu stiʼ Dios. Ruzeeteʼ ni zuni binni de guiráʼ guidxi ni nabe né guendanayecheʼ ne guirutiʼ zaxha laabe lugar stibe. Yanna, ¿padxí nga bizulú Jesús cayuni mandar yaʼ? Sti profecía ni zeeda lu libru stiʼ Daniel ruzeeteʼ zazaaca ni ra maʼ ziluxe gadxe tiempu. Guidúʼyanu ximodo zanda gánnanu padxí bizaaca ni.

4. ¿Ximodo racané Daniel 4:10-17 laanu gánnanu xi iza bizulú Jesús cayuni mandar? (Laaca zanda gúʼyaluʼ ni zeeda lu nota).

⁴ (Biindaʼ Daniel 4:10-17). Runi representar «gadxe tiempu» que 2,520 iza. Bizulú cagabaʼ ca dxi riʼ lu iza 607 ante ca dxi stiʼ Jesús, dxi gulee ca babilonio últimu rey ni gurí lu trono stiʼ Jehová ni guyuu Jerusalén. Biluxe tiempu riʼ lu iza 1914 ora biʼniʼ Jehová Jesús Rey lu Reinu stiʼ, purtiʼ Jesús si nga napa derechu gaca Rey (Ezeq. 21:25-27). *

5. ¿Xi zabeendunu pa guiénenu profecía ni caníʼ de «gadxe tiempu»?

⁵ ¿Ximodo racané profecía riʼ laanu? Guiénenu profecía ni caníʼ de «gadxe tiempu» zacaneni laanu chuʼnu seguru runi cumplir Jehová ca ni maʼ guníʼ ora peʼ naguíxhebe gúnibe ni. Maca gudíxhebe padxí zuzulú Reinu stibe zuni mandar. Ne ora bedandá dxi ca la? bíʼnibe ni. Zaqueca nga zuni cumplir Jehová guiráʼ ca profecía ni maʼ guníʼ, zaca ca ni ora maʼ gudíxhebe gaca ca ni. Nga runi zedandá dxi stiʼ Jehová, «qué zandaa ni» (Hab. 2:3).

6. a) ¿Xi cazaaca lu Guidxilayú riʼ ni cusihuinni maʼ cayuni mandar Cristu guibáʼ? b) ¿Ximodo rusihuinni profecía ni zeeda lu Apocalipsis 6:2-8 dxandíʼ zazaaca ca cosa riʼ?

⁶ Dxi mayaca guiluxe Jesús dxiiñaʼ stiʼ guníʼ caadxi cosa ni zazaaca lu Guidxilayú riʼ ni zacané ca discípulo stiʼ gánnacaʼ maʼ bizulú cayuni mandarbe guibáʼ. Guniʼbe ziuu guerra, hambre ne zaca xu roʼ, ne laaca guniʼbe ziuu epidemia «ti lugar ne sti lugar» casi pandemia stiʼ COVID-19. Guirá ca cosa ni cazaaca riʼ naca ca ni «señal» ni rusihuinni presencia stiʼ Cristu (Mat. 24:3, 7; Luc. 21:7, 10, 11). Ne gudiʼdiʼ si jma de 60 iza de guti Jesús ne biguetaʼ guibáʼ gúdxibe apóstol Juan zazaaca ca cosa riʼ (biindaʼ Apocalipsis 6:2-8). Ne cazaaca ca cosa riʼ dede dxi guca Jesús Rey lu Reinu stiʼ Dios lu iza 1914.

7. ¿Xiñee jma guyuu guendanagana lu Guidxilayú riʼ dede dxi guca Jesús Rey yaʼ?

⁷ ¿Xiñee jma guyuu guendanagana lu Guidxilayú riʼ dxi guca Jesús Rey yaʼ? Apocalipsis 6:2 ruzeeteʼ ti cosa ni zacané laanu guiénenu ni. Primé dxiiñaʼ ni biʼniʼ Jesús dxi guca Rey nga gudindenebe Binidxabaʼ ne ca demonio stiʼ lu ti guerra. Capítulo 12 stiʼ Apocalipsis ruzeeteʼ biniti Binidxabaʼ ne ca demonio stiʼ lu guerra riʼ ne bilaa Jesús laacaʼ lu Guidxilayú. Ne cumu guizáʼ cadxiichicabe la? cundaacabe xiana stícabe luguiáʼ binni.  Nga runi Biblia ná: «¡Gapagá si guidxilayú ne nisadóʼ laa!» (Apoc. 12:7-12).

8. Ora ridúʼyanu cayaca cumplir ca profecía ni caníʼ de Reinu stiʼ Dios, ¿ximodo racané ni laanu?

⁸ ¿Ximodo racané ca profecía riʼ laanu? Pur ca cosa ni cazaaca lu guidxilayú ne modo naca binni tiempu riʼ rusihuínnini maʼ naca Jesús Rey. Nga runi qué ridxagayaanu ora guidúʼyanu nabé nanaláʼdxisaa binni ne ruyúbicaʼ puru si para laacaʼ. Purtiʼ rietenaláʼdxinu cayuni cumplírcabe ni maca zeeda lu Biblia. ¡Rihuinni dxíchica maʼ cayuni mandar Reinu stiʼ Dios! (Sal. 37:1). Ne laca ribézanu gaca xpiaʼ binni jma feu ra mayaca gueeda Armagedón (Mar. 13:8; 2 Tim. 3:13). Guizáʼ nadxii Bixhózenu ni nuu guibáʼ laanu ne cayacanebe laanu guiénenu xiñee nabáninu ti tiempu nagana. ¿Cadi dxandíʼ nápanu razón para gudiʼnu xquixe peʼ laabe la?

9. ¿Ximodo riete lu Daniel 2:28, 31-35 naca últimu potencia mundial, ne padxí bihuinni ni?

⁹ (Biindaʼ Daniel 2:28, 31-35). Tiempu riʼ cadúʼyanu cayaca cumplir ni ná profecía riʼ. Lu ti bacaandaʼ biiyaʼ rey Nabucodonosor ni zazaaca «ra maʼ ziluxe ca últimu dxi», despué de guzulú Jesús guni mandar. Tobi de ca enemigu ni napa Jesús lu Guidxilayú riʼ nga últimu potencia mundial ni maca riete lu Biblia. Maʼ nuu potencia riʼ, ne runi representar ni ca ñee de guiibaʼ nuchaʼ beñe stiʼ estatua ni biʼyaʼ Nabucodonosor. Bihuinni ni lu Primera Guerra Mundial dxi bieeguʼ Reinu Unidu ne Estados Unidos. Estatua que ruluiʼni laanu chupa cosa de potencia mundial riʼ ni rusihuinni maʼ gadxé ni que xcaadxi potencia ni guyuu ante de laani.

10. a) ¿Xi cosa ruzeeteʼ profecía stiʼ Daniel ni rusihuinni ximodo naca Reino Unido ne Estados Unidos? b) ¿Xi naquiiñeʼ chuʼnu cuidadu? (Biiyaʼ cuadru ni láʼ « ¡Guyuu cuidadu lii né beñe ca!»).

 ¹⁰ Guidúʼyanu primé cosa ni rusihuinni maʼ gadxé Reino Unido ne Estados Unidos de xcaadxi potencia. Xcaadxi potencia ni biʼyaʼ Nabucodonosor que, naca ca ni de ti guiibaʼ si, casi oro o plata, peru últimu potencia riʼ nácani de guiibaʼ nuchaʼ beñe, runi representar beñe ca binni ni qué gapa autoridad (Dan. 2:43). Rihuinni dxíchica qué randa runi potencia riʼ ni cá ique, purtiʼ rucaalú binni laacaʼ ra rúnicaʼ marcha pur ca derechu sticaʼ ne ruzaʼcaʼ sindicatu para gucaalucaʼ gobiernu.

11. ¿Xi ti cosa racané laanu gánnanu maʼ nabáninu tiempu ra mayaca gueeda fin?

¹¹ Guiropa cosa ni ruzeeteʼ profecía riʼ nga runi representar potencia riʼ ñee estatua que. Reino Unido ne Estados Unidos nga últimu potencia ni riete lu Biblia. Ndiʼ riníʼ despué de laani maʼ qué ziuuruʼ sti potencia. Purtiʼ lu Armagedón zunitilú Reinu stiʼ Dios potencia riʼ ne xcaadxi gobiernu ni nuu lu Guidxilayú (Apoc. 16:13, 14, 16; 19:19, 20). *

12. ¿Xi xcaadxi prueba riete lu profecía stiʼ Daniel, ne ximodo riguixhedxí ni ladxidoʼno, ne rudiini laanu esperanza?

¹² ¿Ximodo racané profecía riʼ laanu? Cudiiruʼ profecía stiʼ Daniel laanu xcaadxi prueba ni rusihuinni maʼ nabáninu tiempu ra mayaca gueeda fin. Raca jma de 2,500 iza laabe guniʼbe lu ti profecía despué de guiaba Babilonia, ziasa xtapa potencia mundial ne zucaalucaʼ xquidxi Dios. Ne laaca guniʼbe Reino Unido ne Estados Unidos nga últimu potencia. Riguixhedxí ndiʼ ladxidoʼno ne rudiini esperanza laanu purtiʼ nánnanu maʼ cadi candaa zunitilú Reinu stiʼ Dios guiráʼ gobiernu ne zuni mandar ni lu Guidxilayú riʼ (Dan. 2:44).

13. ¿Tuu nga runi representar «ra guizaa xhono rey» ne «chii rey» ni riete lu Apocalipsis 17:9-12, ne ximodo maʼ guca cumplir profecía riʼ?

¹³ (Biindaʼ Apocalipsis 17:9-12). Primé guerra mundial que nabé bininani binni, ne raqué guca cumplir sti profecía ni caníʼ de ca últimu dxi. Cumu racalaʼdxiʼ ca líder chuʼ paz lu guidxilayú la? lu beeu enero iza 1920 bizáʼcabe ti grupu ne gulee lácabe ni Sociedad de Naciones, peru lu octubre iza 1945 bidxaa lani ne yanna maʼ lani Naciones Unidas. Biblia ná organización riʼ nga «ra guizaa xhono rey». Peru cadi ti potencia mundial ni, ricaani poder ne autoridad de ca gobiernu ni cayuni apoyar ni. Ribee lá Biblia ca gobiernu riʼ «chii rey».

14, 15. a) ¿Xi cuzeeteʼ Apocalipsis 17:3-5 de «Babilonia guidxi roʼ»? b) ¿Xi cazaaca ca religión falsu?

¹⁴ (Biindaʼ Apocalipsis 17:3-5). Lu ti visión biluíʼ Jehová apóstol Juan ti prostituta ni lá «Babilonia guidxi roʼ». Runi representar gunaa riʼ guiráʼ religión falsu ni nuu lu guidubi Guidxilayú. ¿Xi riete lu visión riʼ yaʼ? Maʼ xadxí nga de naca ca religión falsu ca tobi si né ca gobiernu ne cayúnicaʼ dxiiñaʼ juntu. Peru maʼ cadi candaa zaguu Jehová ndaaniʼ ladxidóʼ ca gobernante ca gúnicaʼ ni cá íquebe. ¿Xi guizaaca despué yaʼ? Zucaalú «chii rey» o ca gobiernu ca religión falsu ne zunduuxecaʼ ni (Apoc. 17:1, 2, 16, 17).

¹⁵ ¿Ximodo nánnanu mayaca guinitilú  Babilonia guidxi roʼ? Ti cosa ni zacané laanu guicábinu pregunta riʼ nga guietenaláʼdxinu guluu guiiguʼ Éufrates leʼ guidxi Babilonia ni guyuu dxiqué para cadi chuʼ ca enemigu. Apocalipsis ná millón de binni ni racané ne rapa Babilonia guidxi roʼ zeeda gácacaʼ casi nisa (Apoc. 17:15). Peru laaca caniʼni zabidxi ca nisa ca, ndiʼ riníʼ, zusaana binni de gacané ca religión falsu ni nuu lu guidubi Guidxilayú (Apoc. 16:12). Maʼ cayaca cumplir profecía riʼ: stale binni caree de ndaaniʼ ca religión falsu ca ne cuyúbicaʼ sti lugar para gudxiilucaʼ ca guendanagana sticaʼ.

16. ¿Xi ribeendunu ora guiénenu profecía ni caníʼ ra guyáʼ Naciones Unidas ne ra guinitilú Babilonia guidxi roʼ?

¹⁶ ¿Ximodo racané ca profecía riʼ laanu? Ra guyáʼ Naciones Unidas ne cumu stale binni maʼ cadi cayuni apoyar ca religión falsu, rusihuinni ca ni maʼ nabáninu lu ca últimu dxi. Dxandíʼ maʼ cabidxi «nisa» ni cayapa Babilonia guidxi roʼ, peru cadi nga diʼ nga ni chigunduuxeʼ ni. Casi maʼ bidúʼyanu ca zaguu Jehová  ndaaniʼ ladxidóʼ «chii rey» —ca gobiernu racané Naciones Unidas— «gúnicaʼ ni cá íquebe». Málasi zunitilú ca gobiernu guiráʼ religión falsu ne guizáʼ zadxagayaa binni ora guizaaca ni (Apoc. 18:8-10). * Ora guinitilú Babilonia guidxi roʼ zuchibi ni binni lu guidubi Guidxilayú ne zándaca ziuu guendanagana. Peru laanu, ca ni cayúninu ni ná Jehová, ziéchenu pur chupa razón. Primé la? zanitilú enemiga stiʼ Jehová para siempre, prostituta que. Ne guiropa la? mayaca gácanu libre de guiráʼ cosa malu ni nuu lu guidxilayú (Luc. 21:28).

17, 18. a) ¿Xi naquiiñeʼ gúninu para guquídxinu fe stinu? b) ¿Xi zadúʼyanu lu sti artículo ca?

¹⁷ Daniel guníʼ: «Ziene stale binni ni dxandíʼ». Ne zacá ni, purtiʼ tiempu riʼ maʼ riene chaahuinu ca profecía ni caníʼ de ca dxi stinu (Dan. 12:4, 9, 10). Biaʼsi ca profecía riʼ ne rucaa ca ni laanu guni respetarnu Jehová ne Stiidxaʼ (Is. 46:10; 55:11). Nga runi naquiiñeʼ guquídxinu fe stinu. ¿Ximodo yaʼ? Ra guni estudiarnu Biblia ne ra gacanenu xcaadxi binni gaca xhamigu Jehová. Zapa Dios stinu ca ni gapa confianza laa, ne qué zusaana de gudiibe paz laacaʼ (Is. 26:3).

¹⁸ Lu sti artículo ca zuzéʼtenu de caadxi profecía ni caníʼ xi zazaaca ca xpinni Cristu ni nabani tiempu ra mayaca gueeda fin. Zadúʼyanu cayaca cumplir nécani xcaadxi profecía ni caníʼ de ca últimu dxi. Laaca zadúʼyanu xcaadxi prueba ni rusihuinni cayuni dirigir Jesús, Rey stinu, ca xpinni ni qué rusaana laa.