Bisiidiʼ Jesús cadi naquiiñeʼ tíndenu. Peru ti biaje gúdxibe ca apóstol stibe: «Cadi guiníʼ íquetu zedanduaaʼ paz ndaaniʼ guidxilayú; cadi zedanduaaʼ paz, sínuque zedanduaaʼ ti espada. Purtiʼ zedanduaaʼ división. Zucaalú hombre bixhoze, ne zucaalú ti baʼdudxaapaʼ jñaa ne zucaalú ti gunaa suegra» (Mat. 10:34, 35). ¿Xi riníʼ ca diidxaʼ riʼ yaʼ?

Qué racalaʼdxiʼ Jesús guibiá ca familia, peru gúnnabe zuxheleʼ ca ni bisiidibe binni de familia stiʼ. Ca ni racalaʼdxiʼ gaca discípulo stibe ne chúʼnisa, naquiiñeʼ gánnacaʼ zándaca qué ziuulaʼdxiʼ familia sticaʼ decisión ni guicaacaʼ. Nga runi, pa chuʼ tu gucaalú xheelaʼ o familia stiʼ laa zaca nagana para laa chinanda ca ni bisiidiʼ Cristu.

Biblia cayabi ca xpinni Cristu: «Laguni biaʼ gándatiʼ para chuʼtu en paz né guiráʼ binni» (Rom. 12:18). Peru ca ni bisiidiʼ Jesús zándaca gueeda gaca ca ni casi «ti espada» para caadxi familia. Ne rizaaca ndiʼ ora guiziidiʼ tuuxa ca ni bisiidiʼ Jesús purtiʼ qué riuuláʼdxicaʼ ni riziidiʼ familia sticaʼ dede rucaalucaʼ laacabe. Zacá nga reeda gaca familia stícabe casi enemigu purtiʼ caziidicabe ni dxandíʼ (Mat. 10:36).

Ca discípulo stiʼ Cristu ni nabeza ndaaniʼ ti familia ni rié ndaaniʼ sti religión nuu biaje ridíʼdicaʼ lu prueba ra rusihuínnicaʼ pa nadxiicaʼ Jehová ne Jesús. Zándaca gucaa ca familia stícabe laacabe gúnicabe xiixa saa ni rúnicaʼ lu religión sticaʼ. Óraca nga naquiiñeʼ guluíʼcabe tu laa racaláʼdxicabe gusiéchecabe. Jesús guníʼ: «Tu gannaxhii bixhoze ne jñaa jma que naa la? qué runi merecer gaca discípulo stinneʼ» (Mat. 10:37). Cadi guníʼ diʼ Jesús cadi naquiiñeʼ gannaxhii tuuxa bixhoze ne jñaa para gaca discípulo stibe. Ni bisiidibe nga naquiiñeʼ gánnanu xii nga ni jma risaca lu guendanabani stinu. Pa gucaalú tobi de ca familia stinu laanu para cadi guni adorarnu Jehová, qué zusaana de gannaxhiinu laabe, peru nánnanu jma risaca gannaxhiinu Jehová primeru.

Nabé triste nga gucaalú familia stinu laanu. Peru laanu, ca discípulo stiʼ Jesús, qué rusiáʼndanu ca diidxaʼ riʼ: «Tu qué naʼ guáʼ yaga ni nuayaʼ riʼ ne gueeda nanda naa, qué runi merecer gaca discípulo stinneʼ» (Mat. 10:38). Nga runi, ca xpinni Cristu, nánnanu zuni sufrirnu stale cosa ra chinándanu Jesús, dede gucaalú familia stinu laanu. Laga cayuni huantarnu, né conducta stinu zanda gacanenu guchaa familia stinu modo riníʼ ique ne chuuláʼdxicaʼ guiziidicaʼ ni rusiidiʼ Biblia (1 Ped. 3:1, 2).