1. ¿Ximodo zeeda gaca ca xpinni Cristu casi ti yaga? (Biiyaʼ imagen ca).

 «QUÉ randa riguza bi ti yaga ni nalaʼsaʼ ne naguudxi». Rusihuinni ca diidxaʼ riʼ nuu yaga zacá ne nga racané para cadi guiluuza ca ni neca nadipaʼ nuu bi. Para guzuhuaʼnu dxiichiʼ lu ni runi crenu, laaca caquiiñeʼ gácanu naguudxi ne gácanu binni ni riuu razón. ¿Ximodo yaʼ? Ra guiaʼnu ora guchaa xquendanabáninu ne ra guni respetarnu modo riníʼ ique xcaadxi ne ca decisión ni guicacaʼ.

2. ¿Xi cualidad zacané laanu ora guchaa xquendanabáninu, ne xi zadúʼyanu lu artículo riʼ?

² Guiráʼ ca ni runi ni ná Jehová, racaláʼdxinu gácanu binni riuu razón ne laaca racaláʼdxinu gácanu humilde ne guianu binni. Lu artículo riʼ zadúʼyanu ximodo gucané ca cualidad riʼ caadxi xpinni Cristu ora bidxaa modo nabánicaʼ ne ximodo zanda gacané ca ni laanu. Peru primé, guidúʼyanu xi zanda guizíʼdinu de ejemplu stiʼ Jehová ne Jesús purtiʼ laacaʼ nga ca binni ni jma riuu razón.

3. ¿Ximodo nánnanu naca Jehová ti Dios ni riuu razón?

³ Biblia ruzeeteʼ naca Jehová ti «Guié» purtiʼ naguidxi ne gastiʼ qué runiibi laa (Deut. 32:4). Peru laaca ruzeeteʼ ni nácabe ti Dios ni riuu razón. ¿Ximodo nánnanu ni yaʼ? Ora guchaa ca cosa ni nuu lu guidxilayú riʼ, ruyubi Jehová modo cadi guidxaa ni maʼ gudixhe ique. Cumu bizaʼbe laanu casi laabe la? laanu laaca zanda guiaʼnu ora guchaa ca cosa ca. Ma’ bidii Jehová laanu ca principiu ni zeeda lu Biblia, ni racané laanu guicaanu decisión jneza ora guidxaagalunu intiica  guendanagana. Rusihuinni ca cosa ni runi Jehová ne ca principiu stiʼ nácabe ti Dios ni qué ruchaa peru ni riuu razón.

4. Bizeeteʼ ti ejemplu ni rusihuinni naca Jehová ti binni ni riuu razón (Levítico 5:7, 11).

⁴ Jneza ca norma stiʼ Jehová ne biaʼsi ca ni. Cadi naduxhuʼ Jehová né binni sínuque nacháʼhuibe. Guidúʼyanu ti ejemplu ni rusihuinni biene Jehová ca israelita. Qué ninabaʼ diʼ Jehová nudii ca ricu ne ca pobre ngueca sacrificiu. Guyuu biaje lu ley que riete zanda gudii binni biaʼ rugaanda laa (biindaʼ Levítico 5:7, 11).

5. Bizeeteʼ ti ejemplu ni rusihuinni naca Jehová humilde ne riá binni.

⁵ Naca Jehová ti Dios ni riuu razón purtiʼ naca humilde ne riá binni. Guzéʼtenu ti ejemplu, bisihuinni Jehová naca humilde dxi chigunitilú ca binni malu de guidxi Sodoma. Biquiiñebe caadxi ángel para gábicaʼ Lot guiree de ndaaniʼ guidxi que ne checaʼ lu ca dani que. Peru cadxibi Lot cheʼ raqué. Pur ngue gunábabe chinebe familia stibe Zóar, ti guidxihuiiniʼ ni laaca gudixhe ique Dios gunitilú. Ñándaca ninabaʼ Jehová Lot ñuni guiráʼ ni gúdxibe laa, peru Jehová bi’ni’ ni gunabaʼ Lot laa que neca nánnabe pur ngue zalá guidxi Zóar (Gén. 19:18-22). Gayuaa iza despué, bisihuinni Jehová riá ca binni de guidxi Nínive ra biseendaʼ profeta Jonás para gabi laacabe zunitilú guidxi que pur guiráʼ cosa malu ni rúnicabe. Peru ora guca arrepentir ca binni de Nínive que biá Jehová laacabe ne bitiidilaʼdxiʼ stóndacabe, ne maʼ qué nunitilú guidxi que. (Jon. 3:1, 10; 4:10, 11).

6. ¿Ximodo bisihuinni Jesús riuu razón cásica Jehová?

⁶ Dxi biʼniʼ predicar Jesús bisihuinni riuu razón cásica Jehová. Neca beedabe para guni predicarbe «ca dendxuʼ ni cananiti stiʼ guidxi Israel», ti biaje gucanebe ti gunaa ni cadi israelita laa. Gunabaʼ gunaa riʼ laabe gusiándabe xiiñidxaapaʼ «Guizáʼ feu modo cayuniná ti demonio» laa. Biá Jesús gunaa riʼ ne bisiándabe xiiñiʼ (Mat. 15:21-28). Yanna guiníʼ íquenu ejemplu riʼ. Gudiʼdiʼ si ti tiempu de bizulú cayuni predicar Jesús, guni ca diidxaʼ riʼ: «Ni guiníʼ qué runibiáʼ naa […], laaca zanieeʼ qué runebiaʼyaʼ laa» (Mat. 10:33). Peru ¿ñee bicaanáʼ Jesús Pedro purtiʼ si chonna biaje guníʼ qué runibiáʼ laabe la? Coʼ. Nánnabe maʼ guca arrepentir Pedro ne naca ti hombre fiel. Despué de biasa Jesús de lade gueʼtuʼ biiyaʼ Pedro laabe, ne zándaca raca nga bisihuinni Jesús maʼ biʼniʼ perdonar ne nadxii laabe (Luc. 24:33, 34).

7. Casi ná Filipenses 4:5, ¿ximodo racaláʼdxinu gúʼyacabe laanu?

⁷ Maʼ bidúʼyanu Jehová ne Jesús riuucaʼ razón. Ne racalaʼdxiʼ Jehová laaca gácanu binni ni riuu razón (biindaʼ Filipenses 4:5). Zanda guiníʼ íquenu: «¿Ñee riníʼ ique xcaadxi naca ti binni riuu razón, ni runi respetar ne qué riree né xtema la? ¿O runibiáʼcabe naa casi tuuxa naguidxi, estrictu ne tercu? ¿Ñee ruyubeʼ gaca ca cosa casi naa rabeʼ la? ¿O  rucaadiaʼgaʼ ni guiníʼ xcaadxi ne rudieeʼ lugar gaca ni nacaʼ?». Ora gácanu binni riuu razón, jma zusihuínninu nácanu casi Jehová ne Jesús. Yanna guidúʼyanu ximodo zanda gácanu binni riuu razón ora guchaa xquendanabáninu, ora guicaanu xiixa decisión ne ora maʼ gadxé modo riníʼ ique xcaadxi que modo riníʼ íquenu.

8. ¿Xi zanda gacané laanu gácanu binni riuu razón ora guchaa modo nabáninu? (Biiyaʼ nota ca).

⁸ Ora guchaa modo nabáninu, caquiiñeʼ gusihuínninu nácanu binni riuu razón ne gánnanu xi zanda guni xcaadxi ne guiénenu laacaʼ. Zándaca málasi gaca huaranu, guiaadxaʼ bueltu laanu o chuʼ xiixa guendanagana ra nabézanu. Zanda guchaa ca guendanagana ni cadi cabézanu riʼ xquendanabáninu (Ecl. 9:11; 1 Cor. 7:31). Dede né ora guinabaʼ xquidxi Jehová laanu guchaʼnu modo rúninu xhiiñaʼ o gúninu xhiiñaʼ Jehová sti lugar zándaca gácani nagana para laanu. Neca zacá zanda gudxíʼlunu ora guchaa xquendanabáninu, ¿ximodo yaʼ? Pa chinándanu guidapaʼ cosa riʼ: Primé, gánnanu maʼ bichaa modo nabáninu. Guiropa, guiníʼ íquenu ni cabeza laanu ne cadi guiníʼ íquenu ni bizaaca. Guionna, guidúʼyanu ca cosa galán ni nápanu. Ne guidapa, gúninu xiixa pur xcaadxi. b Guidúʼyanu caadxi ejemplu ni rusihuinni dxandíʼ racané ca ni bizéʼtenu riʼ laanu.

9. ¿Xi biʼniʼ ti guendaxheelaʼ ni naca misioneru ora bidxiilucaʼ guendanagana ni cadi cabézacaʼ?

⁹ Gánnanu maʼ bichaa modo nabáninu. Naca Emanuele ne Francesca misioneru ne biseendacabe laacaʼ sti guidxi. Ora yendácabe raqué bizulú biziidicabe diidxaʼ ni riníʼ binni guidxi que ne laaca bizulú binibiáʼcabe ca hermanu de congregación que. Peru bizulú pandemia stiʼ COVID-19 ne maʼ qué ñanda ñuucabe juntu né ca hermanu. Ne laaca málasi gutiʼ jñaa Francesca, pa ñanda si oraqueca ñuunebe familia stibe, peru pur pandemia que la? qué ñanda ñuni viajarbe. ¿Xi gucané laabe gudxiilube guendanagana ni cadi cabézabe riʼ yaʼ? Primé, biʼniʼ orar Emanuele ne Francesca juntu ne gunábacabe gudii Jehová laacabe guendabiaaniʼ para ganda gudxiilúcabe guendanagana stiʼ cada dxi ne cadi guiábacabe lu ansiedad. Bicabi Jehová oración stícabe, biquiiñeʼ xquidxi para gudii laacabe ni peʼ caquiiñecabe ne ora peʼ caquiiñecabe ni. Ne nabé guluu gana ni guníʼ ti hermanu lu ti videu laacabe, hermanu que guníʼ: «Pa guni aceptarnu maʼ bichaa modo nabáninu ziuunu nayecheʼ sti biaje ne qué zaca nagana para laanu gúninu xiixa cosa lu xquendanabáninu». c Guiropa, gudixhe íquecabe guni predicárcabe jma galán pur teléfono dede bizulúcabe ti estudiu. Ne guionna, bidiicabe lugar gacané ca hermanu que laacabe ne bidiicabe xquixe peʼ laacaʼ pur guendarannaxhii sticaʼ. Guiráʼ dxi ruseendaʼ ti hermana ti mensaje ra cá ti textu ni zeeda lu Biblia ra nuucabe ne bíʼnibe ni lu guidubi ti iza. Yanna, ¿xi rizíʼdinu de ndiʼ yaʼ? Pa guiénenu maʼ bichaa modo nabáninu la? ziuunu nayecheʼ né ca cosa ni zanda si gúninu.

10. ¿Xi biʼniʼ ti hermana ora bichaa xquendanabani?

¹⁰ Guníʼ ique ni cabeza lii cadi guiníʼ íqueluʼ ni bizaaca. Ti hermana de Rumania ni nabeza ndaaniʼ guidxi Japón láʼ Christina, guyuu triste dxi bixhiá congregación ra rié ni nuu lu  diidxaʼ inglés. Qué niníʼ íquebe ni bizaaca que, sínuque bíʼnibe stipa gacanebe ti congregación de diidxaʼ japonés ne guni predicarbe né stale gana lu diidxaʼ que. Gunábabe ti gunaa ni bíʼninebe dxiiñaʼ gacané laabe guiziidibe diidxaʼ japonés ne iquiiñeʼ Biblia ne folletu ¡Zanda guibániluʼ nayecheʼ! Para gusiidiʼ laabe. Zaqué bisiidiʼ Christina guiníʼ jma galán japonés. Ne gunaa ni bíʼninebe dxiiñaʼ guyuulaʼdxiʼ guiziidiʼ jma de lu Biblia. ¿Xi rizíʼdinu de ndiʼ yaʼ? Guiníʼ íquenu ni cabeza laanu ne cadi ni bizaaca zanda guedané ni ndaayaʼ ni cadi cabézanu.

11. ¿Xi biʼniʼ ti guendaxheelaʼ ora biaadxaʼ bueltu laacaʼ?

¹¹ Biyubi gúniluʼ xiixa pur xcaadxi. Ti guendaxheelaʼ ni nabeza ti lugar ra rucueeza gobiernu dxiiñaʼ stinu, biaanacaʼ sin dxiiñaʼ ora gupa guidxi que guendanagana de bueltu. ¿Xi bíʼnicabe para bidxiilúcabe guendanagana riʼ yaʼ? Primé, bíʼnicabe stipa pur guibaninécabe huaxiéʼ si cosa. Guiropa, qué nicá íquecabe guendanagana stícabe, sínuque biyúbicabe gacanécabe xcaadxi ne biquiiñecabe tiempu stícabe para guni predicárcabe (Hech. 20:35). Hermanu que guníʼ: «Cumu gudixhe íquedu guni predicardu la? gúpadu tiempu para gúnidu ni ná Dios ne huaxiéʼ tiempu para guiníʼ íquedu ca guendanagana stidu». Yanna, ¿laanu yaʼ? Pa guchaa xquendanabáninu la? galán guietenaláʼdxinu pabiáʼ risaca gacanenu xcaadxi ne jmaruʼ si ora guni predicarnu.

12. ¿Ximodo zacané ejemplu stiʼ Pablo laanu guiénenu binni ora guni predicarnu?

¹² Ora guni predicarnu caquiiñeʼ gúninu stipa guiénenu binni. Rinínenu binni ni napa gadxé gadxé creencia, de gadxé gadxé guidxi ne ni maʼ gadxé modo biniisicaʼ. Gunna apóstol Pablo modo chuʼ binni ne zanda guizíʼdinu de laabe. Guníʼ Jesús naca Pablo «apóstol ni rié ra nuu binni de xcaadxi guidxi» (Rom. 11:13). Ne para guni Pablo dxiiñaʼ que biʼniʼ predicarbe ca judíu, ca griegu, ca binni nuu xpiaaniʼ, ca campesinu, ca ni napa xiixa puestu risaca ne ca rey. Para chindabe ndaaniʼ ladxidóʼ ca binni riʼ, Pablo guníʼ: «Runeʼ intiica si ti ganda gulaʼyaʼ stale binni» (1 Cor. 9:19-23). Biiyabe de padé binni ne xi runi cré ti zacá ganda gusiidibe laacaʼ. ¿Xi rizíʼdinu de ndiʼ yaʼ? Zanda cueendunu ni galán lu predicación pa gácanu naguudxi ne guiénenu binni ne guiníʼ íquenu xi peʼ nga caquiiñeʼ cada tobi de ca binni de territorio stinu.

13. ¿Xi zazaaca pa guni respetarnu ni riníʼ ique xcaadxi? (1 Corintios 8:9).

¹³ Pa nácanu binni riuu razón qué zaca nagana para laanu guni respetarnu ni riníʼ ique xcaadxi. Guidúʼyanu caadxi ejemplu, nuu hermana la? riuuláʼdxicaʼ guidieecaʼ, peru xcaadxi la? coʼ. Ne nuu hermanu gastiʼ naca para laacaʼ guecaʼ caadxi nisadxuʼniʼ, peru xcaadxi la? qué rinacaʼ guecaʼ. Guiranu casi xpinni Cristu, ruyúbinu modo chuʼnu nazaaca, peru gadxé gadxé modo ruyúbinu gápanu laanu. Pa guiníʼ íquenu jma jneza modo riníʼ íquenu zucaʼnu xcaadxi guiníʼ íquecaʼ casi riníʼ íquenu ne nga zándaca gucaani guchee xcaadxi ne cadi chuʼ congregación tobi si. ¡Qué zadiʼdiʼ ndaaniʼ íquenu gúninu ti cosa zacá! (Biindaʼ 1 Corintios 8:9; 10:23, 24). Ra chinándanu ca principiu ni zeeda lu Biblia zacané ni laanu gácanu equilibradu ne chuʼnu tobi si. Guidúʼyanu ximodo zanda gúninu ni.

14. ¿Xi principiu stiʼ Biblia zanda gacané laanu ora guzuchaahuinu ne modo gácunu lari?

 ¹⁴ Modo ruzuchaahuinu ne rácunu lari. Lugar de gudii Jehová laanu ley de modo guzuchaahuinu, rudiibe laanu principiu ni racané laanu. Naquiiñeʼ gusisaca modo guzuchaahuinu Jehová ne gusihuínnini nácanu binni riuu razón ne binni nuu xpiaaniʼ (1 Tim. 2:9, 10; 1 Ped. 3:3). Nga runi, qué ruyúbinu guʼyadxícabe modo nácunu lari. Laaca zanda gacané ca principiu ni zeeda lu Biblia ca ancianu para cadi laapecaʼ quíxhecaʼ xiixa regla de modo gacu ca hermanu ne ca hermana lari ne modo gata guicha íquecaʼ. Guzéʼtenu ti ejemplu, ndaaniʼ ti congregación racalaʼdxiʼ ca ancianu gacanecaʼ caadxi joven ni bigacaʼ guicha íquecaʼ nachucu purtiʼ zinándacaʼ moda stiʼ guidxilayú riʼ. Yanna, ¿ximodo zanda gacané ca ancianu laacabe sin quíxhecaʼ ti regla yaʼ? Bidii superintendente de circuito que conseju riʼ ca ancianu para gábicaʼ ca joven riʼ: «Pa ora tídiluʼ lu plataforma ne ca ni cucaadiaga lii jma guuyadxicaʼ modo zuchaahuiluʼ que ni caniʼluʼ, ¿ñee cadi rábiluʼ nuu xiixa ni cadi jneza de modo zuchaahuiluʼ la?». Zaqué qué niguixhe ca ancianu ti regla para gacanecaʼ ca joven que. d

15. ¿Xi ley ne principiu zeeda lu Biblia zanda gacané laanu guicanu decisión jneza ora gaca huaranu? (Romanos 14:5).

¹⁵ Modo gápanu laanu para chuʼnu nazaaca. Cada xpinni Cristu naquiiñeʼ guicaa decisión modo gapa laa para chuʼ nazaaca (Gál. 6:5). Ora cuinu xi tratamientu guicaanu naquiiñeʼ chinándanu mandatu ni zeeda lu Biblia ra ná guni rechazarnu rini ne gucaananu espiritismo ne xcaadxi práctica ni napa brujería (Hech. 15:20; Gál. 5:19, 20). Aparte de ca ni maʼ bizéʼtenu riʼ la?  maʼ cada tobi guicaa decisión xi tratamientu guicaa. Nuu caadxi xpinni Cristu riecaʼ ra nuu doctor ne xcaadxi ruyúbicaʼ sti tipu tratamientu guicaacaʼ. Neca laanu maʼ nánnanu tu ra nuu chuʼnu ora gaca huaranu la? galán guni respetarnu decisión sti xcaadxi hermanu ora gúʼyacaʼ ximodo gápacaʼ laacaʼ para chuʼcaʼ nazaaca. Pur nga risaca guietenaláʼdxinu guidapaʼ cosa riʼ: primé, Reinu si stiʼ Dios nga zabee guiráʼ guendahuará (Is. 33:24); guiropa, cada xpinni Cristu naquiiñeʼ ganna dxichi xii nga ni jma galán para laa (biindaʼ Romanos 14:5); guionna, cadi guni juzgarnu xcaadxi ne cadi gúninu xiixa ni gucaa xcaadxi guchee (Rom. 14:13), ne guidapa, ca xpinni Cristu nadxiisaacaʼ ne ni jma risaca para laacabe nga chuʼ congregación tobi si que ni riníʼ íquecabe (Rom. 14:15, 19, 20). Zacané guidapaʼ puntu riʼ laanu chuʼnu tobi si né ca hermanu stinu ne chuʼ paz ndaaniʼ congregación.

16. ¿Ximodo zanda gusihuinni ti ancianu riuu razón né xcaadxi ancianu? (Biiyaʼ ca imagen ca).

¹⁶ Caquiiñeʼ quixhe ca ancianu ti ejemplu galán ra gácacaʼ binni riuu razón (1 Tim. 3:2, 3). Guzéʼtenu ti ejemplu, qué zabeza ti ancianu purtiʼ si jma huaniisi que xcaadxi ancianu, gaca ni riníʼ ique cada biaje guiníʼ. Nánnabe zanda gudii Jehová espíritu stiʼ tutiica de laacabe para guicácabe ti decisión jneza. Ne pa cadi cucheené decisión ni chiguicaacabe riʼ xiixa principiu zeeda lu Biblia ne stale de laacabe ná jneza decisión que la? ti ancianu ni riuu razón zuni apoyar decisión que neca jma gadxé modo riníʼ ique.

17. ¿Xi ndaayaʼ ricaanu ora nácanu binni riuu razón?

¹⁷ Pa nácanu binni riuu razón, zácanu stale ndaayaʼ. Casi, riuunu tobi si né ca hermanu stinu ne riuu paz ndaaniʼ congregación. Laaca riéchenu guidúʼyanu cayuni adorar ca hermanu stinu Jehová tobi si neca maʼ gadxé cada tobi ne de gadxé gadxé lugar laacaʼ. Ne ni jma risaca nga riuunu nayecheʼ purtiʼ zinándanu ejemplu stiʼ Jehová, ti Dios ni riuu razón.