Naca bixhozeʼ ancianu stiʼ religión Iglesia Unida de Canadá. Naa ne bizanaʼ rinebe laadu guiráʼ domingu siadóʼ ra yuʼduʼ que para guizíʼdidu ni zeeda lu Biblia casi riziidiʼ ca xcuidi. Despué biaʼ las once rinebe laadu ra cultu que. Ne huadxí la? rinedu jñaaʼ ra Yoo stiʼ Reinu. Ridúʼyadu maʼ gadxé cada tobi de ca religión riʼ.

Bizulú bisiidiʼ jñaaʼ de ca ni caziidiʼ que ca xhamigu Bob Hutcheson ne xheelaʼ, Marion, ne laacaʼ laaca gúcacaʼ Testigu. Lu iza 1958 yené Bob ne Marion naa né guionnaʼ xiiñicaʼ ra guca ti Asamblea Internacional ni láʼ «Voluntad Divina», ne bindaa ni xhono gubidxa, gúcani Nueva York. Yanna riníʼ iqueʼ guiráʼ ni bíʼnicabe para chinécabe naa asamblea que ne guizáʼ rusisacaʼ ni purtiʼ laani nga tobi de ca cosa jma sicarú ni bizaaca lu xquendanabaneʼ.

Dxi nahuiineʼ gulézadu ndaaniʼ ti ranchu ra nuu stale maniʼ ne nabé riuuladxeʼ gapaʼ laacame. Gucalaʼdxeʼ ñacaʼ veterinario. Gudxi jñaaʼ ti ancianu de congregación ni naguixheʼ iqueʼ guneʼ que ne laabe guníʼnebe naa. Né diidxaʼ nadóʼ bisietenaláʼdxibe naa maʼ nabáninu lu ca «últimu dxi» ne gúdxibe naa ximodo zuxheleʼ ca iza guneʼ estudiar carrera que naa de Jehová (2 Tim. 3:1). Guníʼ iqueʼ ni gúdxibe naa que ne gucuaaʼ decisión maʼ cadi guundaʼ carrera que.

 Peru riníʼ iqueʼ, ¿xi guneʼ ora guiluxeʼ secundaria yaʼ? Neca riguneʼ predicar peru né huaxiéʼ gana runeʼ ni ne guníʼ iqueʼ qué zanda gacaʼ precursor. Cumu bixhozeʼ ne stiuaʼ cadi nácacaʼ Testigu la? racaláʼdxicaʼ guneʼ dxiiñaʼ guidubi dxi ndaaniʼ ti empresa ni rutoo seguru ni nuu ndaaniʼ guidxi Toronto. Cumu napa stiuaʼ ti cargu nabé risaca ndaaniʼ empresa que la? gucuaaʼ dxiiñaʼ que.

Maʼ huadxí rireeʼ de dxiiñaʼ ne guidubi dxi ridxaaga’ binni ni cadi naca Testigu, pur ngue maʼ huaxiéʼ bineʼ xhiiñaʼ Jehová. Tiempu que gulezaniáʼ bixhozebiidaʼ ni cadi Testigu, cumu beeda gátibe gupaʼ xidé biyubeʼ sti lugar ra chindezaʼ.

Hermanu ni yené naa asamblea ni guca lu iza 1958 que, Bob ne Marion, beeda gácacabe casi bixhozeʼ ne jñaaʼ, gucuaacabe naa casi xiiñicabe ne yendezaniáʼ laacabe. Ne laacabe nga gucanécabe naa guidxiñaʼ jma gaxha de Jehová. Lu iza 1960 guyuaanísaniáʼ John, tobi de ca xiiñicabe. Beeda gaca John precursor, ne gucanebe naa guneʼ predicar jma. Biiyaʼ ca hermanu de congregación stipa ni cayuneʼ pur guneʼ jma lu xhiiñaʼ Jehová ngue runi biʼniʼ nombrárcabe naa siervu stiʼ Escuela stiʼ ca ni rucheeche diidxaʼ. a

Bichaganayaʼ lu iza 1966 né Randi Berge, ti precursora nayecheʼ ni napa gana chiguni xhiiñaʼ Jehová ra jma caquiiñeʼ gaca predicar. Superintendente de circuito stidu guluu gana laadu chiguni servirdu congregación ni nuu Orillia (Ontario). Bizulú bitópadu ca stidu para chuudu Orillia.

Cumu guizáʼ riuulaʼdxiʼ Randi guni predicar la? ngue gucané naa gacaʼ precursor. Yendásidu Orillia, gudixheʼ iqueʼ gacaʼ ti binni ni nanna gusiidiʼ ne gacaʼ precursor. Guizáʼ bisiecheʼ naa iquiiñeʼ Stiidxaʼ Dios para gacaniáʼ binni gunibiáʼ ni dxandíʼ rusiidiʼ Biblia. Ti ndaayaʼ naroʼbaʼ ni gupaʼ nga gucaniáʼ ti guendaxheelaʼ guiziidicaʼ ni ná Jehová, guchaacaʼ ne gudiicaʼ xquendanabánicaʼ Jehová.

Ti dxi guuyaʼ Toronto, raqué binebiaʼyaʼ Arnold MacNamara, tobi de ca hermanu ni ruuyaʼ ximodo raca dxiiñaʼ Betel. Laabe gunabadiidxabe pa ñuuláʼdxidu ñácadu precursor especial. Nin qué niníʼ iqueʼ ni gudxeʼ laabe: «Ñuuladxeʼ pue, xi si la? cadi gácani Quebec». Bidieeʼ lugar guicá modo riníʼ ique ca canadiense ni riníʼ diidxaʼ inglés de modo ruuyacaʼ ca canadiense ni riníʼ diidxaʼ francés de Quebec naa. Ca iza que racalaʼdxiʼ ca xaíque né ca binni stiʼ Quebec guixeleʼ provincia stiʼ Quebec de Canada.

Arnold gudxi naa: «Quebec si cuseendaʼ sucursal ca precursor especial». Naa maca nannaʼ racalaʼdxiʼ Randi chiguni servir raqué. Ra gudiʼdiʼ tiempu bidieeʼ cuenta ngue nga tobi de ca decisión jma galán ni gucuaadu lu xquendanabánidu.

Gucuaadu ti cursu lu diidxaʼ francés ni bindaa gaayuʼ semana, biluxe si ni biseendacabe naa ne Randi ne sti guendaxheelaʼ, Rimouski, ti lugar ni riaana biaʼ 540 kilómetru al noreste de Montreal. Huaxieʼruʼ rinieeʼ diidxaʼ francés, ne zaqué bihuinni ni ora biindaʼ caadxi anunciu ra reunión. Gunieeʼ lu asamblea ni chigápanu riʼ, ziuu stale «delegadu avestruz», lugar de niniéʼ «delegadu ni zeeda de Austria».

Cadi guendaxheelaʼ que si nabezanedu Rimouski, laaca nabézanedu tapa hermana soltera ni guizáʼ runi predicar ne laaca nabézanedu guendaxheelaʼ Huberdeau ne guiropaʼ xiiñicaʼ. Familia riʼ biyubi ti yoo ni napa gadxe cuartu para guni rentar, ne guiradu riguíxedu renta stini. Guleeʼ ladu yoo que «la Casa Blanca» purtiʼ blancu dieʼ yoo que ne pur ca columna stini. Raqué nabézadu biaʼ 12 o 14 binni. Cumu naa ne Randi nácadu precursor especial la? rireʼdu riguni predicardu siadóʼ guieʼruʼ ne ribiguétadu huaxhinni. Riéchedu purtiʼ qué ñaadxaʼ tu ñuni predicarné laadu dede né ca dxi jma nananda stiʼ iza.

Guizáʼ guca xhamígudu ca precursor que ne beeda gácadu ti familia. Para tídidu ti ratu nayecheʼ la? nabé bínidu fogata ne guleedu ti dxi para gúnidu pierogis, zeeda gácani casi ti empanadahuiiniʼ ni zanda guchaluʼ cosa ni riuuláʼdxiluʼ goloʼ ndaaniʼ ni. Stale de ca sábadu huaxhinni ca ridúʼndadu ne ruyaadu ca saa ni ruxhidxi ca hermanu.

Bizulú guyuulaʼdxiʼ stale binni ni rusiidiʼ Biblia ndaaniʼ guidxi Rimouski. Lu gaayuʼ si iza guyuunisa stale de laacabe, guizáʼ bisiecheʼ ngue laadu ne beeda gapa congregación que biaʼ 35 publicador.

Ra guyuʼdu Quebec que gucané ni laadu gánnadu gusíʼdidu jma jneza. Bidúʼyadu modo gucané Jehová laadu ora biʼniʼ predicardu, biiyabe cadi guiaadxaʼ laadu ni caquíʼñedu ne laaca gucané ni laadu gunibiáʼ chaahuidu ca binni ni riníʼ diidxaʼ francés, guizáʼ gunnaxhiidu stiidxacabe ne ca costumbre stícabe. Ngue gucané laadu guchaʼdu modo riníʼ íquedu ne gannaxhiidu binni de gadxé gadxé guidxi (2 Cor. 6:13).

Gudiʼdiʼ tiempu gunabadiidxaʼ sucursal laadu pa zanda chuudu Tracadie, ti guidxihuiiniʼ ni nuu gaxha de costa, ladu riree gubidxa stiʼ Nueva Brunswick. Cadi cabézadu ni. Cadi xadxí ndaʼ biʼniʼ firmardu para quíxedu renta stiʼ ti yoo ne maʼ cayuneʼ dxiiñaʼ galaa dxi de maestru ndaaniʼ ti scuela. Ne stale de ca ni rusíʼdidu ni ná Biblia maʼ nácacaʼ publicador ne laaca cayacanedu cuiʼ ti Yoo stiʼ Reinu. Nagana guca para laadu guicaadu decisión riʼ.

 Biʼniʼ orardu fin de semana que para ganda guicadu decisión jneza. Guyuudu Tracadie ne bidúʼyadu maʼ gadxé ni de Rimouski. Peru gunidu, pa Jehová racalaʼdxiʼ guni servirdu raríʼ la? zúnidu ni. Gudíxhedu prueba Jehová ne laa gudixhe chaahuiʼ ca cosa que (Mal. 3:10). Cumu Randi guizáʼ nadxii Jehová, naca ti gunaa nayecheʼ ne riuulaʼdxiʼ guni sacrificiu pur Jehová la? gucané ni laadu cadi gaca nagana para laadu guidxaʼdu.

Ndaaniʼ congregación stiʼ Tracadie ti ancianu si nuu, labe Robert Ross. Laabe ne xheelabe Linda, yeguni servírcabe raqué casi precursor peru gudixhe íquecabe guiaanacabe raqué despué de gule primé xiiñicabe. Neca guyuu xhiiñacabe ra cusiniisicabe xiiñicabe la? nabé guluucabe gana laadu purtiʼ ridxaagalúcabe binni ra lídxicabe, qué rireecabe gana ne guizáʼ nayecheʼ runi predicárcabe.

Maʼ zinedu chupa iza de nácadu precursor Tracadie, málasi beeda ti invitación ni cadi cabézadu: guni servirdu casi viajante. Gadxe iza yegánnadu ca congregación ra riníʼcabe inglés, despué biseendacabe laadu Quebec para guni servirdu ti circuito de diidxaʼ francés. Raqué, superintendente de distrito, Léonce Crépeault, nabé runi felicitarbe naa despué de gudieeʼ ti discursu. b Peru despué rábibe naa: «¿Xi zanda gúniluʼ para gacané ca discursu stiluʼ xcaadxi yaʼ?». Pur bizaalaʼdxiʼ hermanu riʼ naa gucané ni naa gudieeʼ ca discursu stinneʼ jma galán, iquiiñeʼ diidxaʼ ni cadi nagana ne ni gacané ca hermanu.

Tobi de ca asamblea rietenalaʼdxeʼ ne qué zusiaandaʼ nga ni guca Montreal lu iza 1978, Asamblea Internacional «Fe Victoriosa». Bineʼ dxiiñaʼ ndaaniʼ Departamento de Alimentos, ne cabézadu cheʼ biaʼ ochenta mil binni. Peru lu asamblea riʼ maʼ gadxé modo guca dxiiñaʼ lu departamentu que, guirani bidxaa: ca máquina ni riquiiñeʼ ra guzina, menú ne modo gaca guendaró. Nápadu gande refrigerador tipu remolque para cadi gaca feu ca guendaró que, peru nuu biaje rixiiñeʼ ca ni. Bizaacadu xiixa, qué ñanda ñaca instalardu ndaaniʼ estadiu ra chigaca asamblea que purtiʼ ti dxi ante guca ti eventu deportivu raqué, ngue runi maʼ galaa guela gunda guyuʼdu. ¡Caquiiñeʼ ndaʼ chuʼ ca horno que listu para gaca guendaréʼ ante guirá gueelaʼ! Aque bidxágadu, peru guizáʼ biziideʼ de ca hermanu ni guyuu raqué, pabiáʼ fe stícabe, bíʼnicabe dxiiñaʼ nadipaʼ ne  nayecheʼ bíʼnicabe xhiiñaʼ Jehová. Gucané ni bizaaca riʼ chuʼdu tobi si ne dede yanna napaʼ xhamiguaʼ ni binebiaʼyaʼ ca iza que. Asamblea riʼ nga guca tobi de ca asamblea jma risaca ni huayaca ndaaniʼ guidxi Quebec, purtiʼ ndaaniʼ guidxi riʼ nga guzanándacabe ca hermanu stinu lu ca iza 1940 hasta 1960.

Guizáʼ biziideʼ de xcaadxi superintendente lu ca asamblea ni guca ndaaniʼ guidxi Montreal. Ti biaje, David Splane, nagasi nácabe tobi de ca ni nuu lu Grupu ni Zaniruʼ, gúcabe superintendente de asamblea. Lu sti asamblea ni guca que guizáʼ gucané David naa ora gucuaaʼ dxiiñaʼ riʼ.

Lu iza 2011 despué de 36 iza de guyuʼdu lu dxiiñaʼ de circuito, biʼniʼ invitárcabe naa para gacaʼ instructor stiʼ Escuela para ca ancianu de congregación. Lu chupa iza si naa ne Randi gúsidu biaʼsi lu 75 cama. Gúcani ti sacrificiu peru guizáʼ nayecheʼ nuudu bínidu ni. Ra guiluxe ti semana ca ancianu que nabé rudiicaʼ xquixe peʼ Grupu ni Zaniruʼ purtiʼ rizaaláʼdxicaʼ chúʼcabe gaxha de Jehová.

Despué beeda gacaʼ instructor stiʼ Escuela para Evangelizadores del Reino. Stale biaje nabé riuu ca estudiante que xizaa, ra gúʼyacaʼ guiráʼ ni caquiiñeʼ gúnicaʼ: chuʼcaʼ gadxe hora lu clase, gúnicaʼ chonna hora tarea ne guni prepararcaʼ tapa o gaayuʼ asignación cada semana. Naa ne sti instructor que rábidu laacabe zanda gúnicabe guirani pa guinábacabe gacané Jehová laacabe. Qué zianda naa pabiáʼ ridxagayaa ca estudiante que ora ruuyacabe modo racané Jehová laacabe, dede rúnicabe jma de ni cadi cabézacabe.

Cumu bizaalaʼdxiʼ jñaaʼ ca binni ni rudiibe estudiu la? ngue gucané laacaʼ guni progresarcaʼ ne laaca gucanebe bixhozeʼ chuulaʼdxiʼ ganna ni dxandíʼ. Chonna gubidxa despué de guti jñaaʼ, guizáʼ bidxagayaadu purtiʼ guyé bixhozeʼ ra yoo stiʼ Reinu para gucaadiaga discursu públicu. Ne dede dxi que maʼ qué ñaadxabe nin ti reunión, zaqué bíʼnibe ni 26 iza. Neca qué ñuunisa bixhozeʼ, peru ca ancianu que gúdxicaʼ naa, laabe nga siempre rindaabe primé ra yoo stiʼ Reinu.

Guca jñaaʼ ti ejemplu para naa ne para ca guionnaʼ bizanaʼ. Laacabe ne xheelacabe cayúnicabe ni ná Jehová. Chupa de ca bizanaʼ nuucaʼ Betel, tobi nuu ra sucursal stiʼ Portugal ne stobi Haití.

Yanna, naa ne Randi nuudu Hamilton (Ontario) casi precursor especial. Tiempu bínidu dxiiñaʼ de viajante, guizáʼ riuuláʼdxidu chinedu ca hermanu gúnicaʼ ca revisita ne ca estudiu sticaʼ. Peru yanna guizáʼ riéchedu guidúʼyadu ximodo ca estudiante stidu rannaxhiicaʼ Dios ne riuucaʼ jma gaxha de laabe. Ne laaca runibiáʼ chaahuidu ca hermanu de congregación ra nuudu, ridúʼyadu ximodo racané Jehová laacabe jmaruʼ si ora cadiidicabe ra nagana.

Guizáʼ rudiʼdu xquixe peʼ ca ni bizaalaʼdxiʼ laadu. Nga runi, huayúnidu stipa pur guizaaláʼdxidu xcaadxi ne cuʼdu gana laacaʼ para ganda gúnicaʼ xhiiñaʼ Jehová biaʼ gándatiʼ ne gúnicaʼ ni de guidubi ladxidoʼcaʼ (2 Cor. 7:6, 7). Ti biaje gunabadiidxaʼ ti hermanu ni naca xheelaʼ ne guiropa xiiñiʼ precursor, pa laaca ca ique gaca precursor. Peru gúdxibe naa, maʼ cayacanebe chonna precursor. Ngue runi gunabadiidxaʼ laabe: «¿Ñee cadi rábiluʼ jma zanda gapa Jehová laacabe la?». Guluaaʼ gana laabe gácabe precursor ne gúʼyabe ca ndaayaʼ ni cayapa familia stibe pur cayúnicaʼ xhiiñaʼ Jehová. Xhoopaʼ beeu despué guca hermanu riʼ precursor.

Naa ne Randi qué zusaana de guinínedu ca joven, gúʼyacaʼ pabiáʼ sicarú ne guizáʼ nandxóʼ guiráʼ ni bizáʼ Jehová. Ne ribézadu laaca chúʼcabe nayecheʼ ra gúnicabe ni ná Jehová cásica cayúnidu ni (Sal. 71:17, 18).